སློབ་བསྡུ་ནི་འགོ་འཛུགས་ས་དང་། གསོ་སྐྱོང་ནི་བརྒྱུད་རིམ། ལས་ཞུགས་ནི་འབྲས་བུ་བཅས་ཡིན་ཞིང་། དེ་གསུམ་འབྲེལ་བ་ཟབ་ལ་ཕན་ཚུན་གཞི་གཅིག་ཏུའང་གྱུར་ཡོད། ལོ་མང་པོའི་རིང་། བོད་ལྗོངས་ལས་རིགས་ལག་རྩལ་སློབ་གླིང་གིས་ཁྲོམ་རའི་དགོས་མཁོ་ཚད་གཞིར་བརྩིས་ནས“སློབ་ཁེ་མཉམ་ལས་དང་ཐོན་སློབ་མཉམ་འདྲེས”མཐའ་འཁྱོངས་བྱས་ཤིང་། ཁེ་ལས་ཀྱི་ལས་སྒོའི་ཁྱབ་ཁོངས་དང་ལས་རིགས་འཕེལ་རྒྱས་འགྲོ་ཚུལ་ཤེས་རྟོགས་གཏིང་ཟབ་བྱས་པའི་རྨང་གཞིའི་ཐོག་སློབ་གྲྭའི་བོད་སྐྱོར་ལེགས་ཆ་དང་ཟུང་འབྲེལ་གྱིས་ནང་སའི་མཐོ་སློབ་དང་ཁེ་ལས་ཆེ་གྲས་དང་ལྷན་དུ་མཉམ་འབྲེལ་གསོ་སྐྱོང་བྱེད་སྟངས་བཏོད་པ་དང་། ཆེད་ལས་བཀོད་སྒྲིག་རྒྱུན་ཆད་མེད་པར་སྙོམས་སྒྲིག་སྒོས་ལེགས་སུ་བཏང་ནས“མངགས་ཐོའི་འཛིན་གྲྭ”བཙུགས་པ་དང་འབྲེལ་གསོ་སྐྱོང་ལས་ཞུགས་ཀྱི་གྲོས་མཐུན་བཞག་ཅིང་། ཤེས་ལྡན་པ་གསོ་སྐྱོང་ཇུས་གཞི་མཉམ་དུ་བཟོས་པ་དང་འཐུས་ཚང་དུ་བཏང་ནས་ཁེ་ལས་ཀྱི་མི་སྤྱོད་དགོས་མཁོ་རྒྱུན་ཆད་མེད་པར་བསྐངས་ཏེ་སློབ་མ་སྤུས་ཚད་མཐོ་པོས་ལས་ཞུགས་ཐུབ་པར་བྱས་ཡོད།

ཤེས་རྟོགས་བྱུང་བ་ལྟར་ན། མཁོ་སྤྲོད་ལས་སྟེགས་བསྐྲུན་པ་དང་། ལས་ཞུགས་ཐབས་ལམ་རྒྱ་སྐྱེད། ལས་ཞུགས་མཛུབ་ཁྲིད་ལེགས་གཏོང་སོགས་ཀྱི་བྱེད་ཐབས་སྤྱད་པ་ལས་བོད་ལྗོངས་ལས་རིགས་ལག་རྩལ་སློབ་གླིང་གི་ལས་ཞུགས་ཐུབ་ཚད་ལོ་དྲུག་བསྟུད་མར་90%ལས་ཐོག་མར་བརྒལ་ནས་བོད་ཀྱི་མཐོ་སློབ་ཀྱི་ཨང་དང་པོར་སླེབས་ཡོད། པད་མ་མཆོག་ནོར་གྱི“མངགས་ཐོའི་འཛིན་གྲྭས”རིམ་རྩིས་བརྒྱབ་ན་བོད་རིགས་སློབ་ཆེན་སློབ་མ་གསོ་སྐྱོང་བྱས་པ་དང་འབྲེལ་ཁེ་ལས་དེ་གར་ལས་ཞུགས་བཀོད་སྒྲིག་མི་98བྱས་པ་དང་། དམག་མིའི“མངགས་ཐོའི་འཛིན་གྲྭ”ནས་རིམ་རྩིས་བརྒྱབ་ན་མི་150དམག་དཔུང་ལ་ཞུགས་པ། སློབ་ཐོན་སློབ་མ་167ཀྲུང་གོ་ལྕགས་ལམ་མཚོ་བོད་ཚོགས་པ་ཚད་ཡོད་ཀུང་སིས་བསྡུས་པ། སློབ་ཐོན་སློབ་མ་402རྒྱལ་ཁབ་གློག་དྲ་བོད་ལྗོངས་གློག་ཤུགས་ཀུང་སིས་བསྡུས་པ། སློབ་ཐོན་སློབ་མ་51རེ་བ་གསར་པའི་ཚོགས་པས་བསྡུས་པ་བཅས་རེད།

“ལོ་ལྔ་ཚན་བཅུ་བཞི་པའི”འཆར་འགོད་ནང་ལྕགས་ལམ་དཔལ་འབྱོར་ཁུལ་དར་རྒྱས་གོང་འཕེལ་བཏང་ནས་ཁྲོན་བོད་ལྕགས་ལམ་སྐྲུན་པ་གོ་སྐབས་སུ་བྱས་ཏེ་མཚོ་བོད་ལྕགས་ལམ་གྱི་ཁྱབ་འགྱེད་སྐུལ་ཁྲིད་ཀྱི་ནུས་པ་འདོན་དགོས་ཞེས་བཏོན་ཡོད།

“འཐབ་ཇུས་བཀོད་སྒྲིག་དེར་དམིགས་ནས་སློབ་གླིང་གིས་ཁྲོམ་རའི་དགོས་མཁོ་དང་ཟུང་འབྲེལ་གྱིས་ལྕགས་ལམ་གློག་འདོན་གྱི་ལག་རྩལ་ཆེད་ལས་རེ་བ་ཞུས་ནས་གཉེར་བ་མ་ཟད། 2022ལོར་མཚོ་བོད་ལྕགས་ལམ་ཐོན་ལས་སློབ་གླིང་དངོས་སུ་བཙུགས་པ་དང་ཀྲུང་གོ་ལྕགས་ལམ་མཚོ་བོད་ཚོགས་པ་ཚད་ཡོད་ཀུང་སིར་སློབ་ཁེའི་འཐབ་ཇུས་མཉམ་ལས་སྒྲོམ་གཞིའི་གྲོས་མཐུན་བཞག་ཡོད”ཅེས་བོད་ལྗོངས་ལས་རིགས་ལག་རྩལ་སློབ་གླིང་གི་ཏང་ཨུད་ཀྱི་ཧྲུའུ་ཅི་བསོད་དབང་གིས་ངོ་སྤྲོད་བྱས།

བོད་ཀྱིས་བོད་ལྗོངས་ལས་རིགས་ལག་རྩལ་སློབ་གླིང་གཙོ་བོར་བྱས་པའི་ལྕགས་ལམ་གློག་འདོན་ལག་རྩལ་ཆེད་ལས་ཤེས་ལྡན་པ་གསོ་སྐྱོང་བྱེད་སྟངས་གསར་གཏོད་བྱས་ནས་བོད་ཀྱི་ལྕགས་ལམ་རིགས་ཀྱི་ཆེད་ལས་ཀྱི་སྟོང་ཆ་བསྐངས་ཡོད།

ཆོས་རྒྱལ་ནི་བོད་ལྗོངས་ལས་རིགས་ལག་རྩལ་སློབ་གླིང་གི་2018ལོའི་སྒྱུ་རྩལ་ཇུས་འགོད་འཛིན་གྲྭའི་སློབ་མ་ཡིན་ལ་སློབ་མཐར་ཕྱིན་རྗེས་ཁྲེང་ཧྥ་པད་མ་མཆོག་ནོར་རིག་གནས་འཕེལ་རྒྱས་ཚད་ཡོད་ཀུང་སི་དང་གན་རྒྱ་བཞག་པ་མ་ཟད། ལྷ་འབྲི་བ་ཕུལ་བྱུང་ཞིག་ཏུ་འཚར་ལོངས་བྱུང་ཡོད། 2024ལོར་ཆོས་རྒྱལ་གྱིས་བྲིས་པའི་ཐང་ག་སི་ཁྲོན་དུ་འགྲེམས་སྟོན་བྱེད་སྐབས་རིན་གོང་སྒོར་ཁྲི་200རག་པ་དང་ཁོང་གི་བརྩམས་ཆོས་གཞན་དག་ལའང་མི་ཚོས་ཧ་ཅང་དགའ་པོ་བྱེད་ཀྱི་ཡོད།

“སློབ་ཁེ་མཉམ་ལས་དང་ཐོན་སློབ་མཉམ་འདྲེས”ཀྱི་མཉམ་ལས་བྱེད་སྟངས་ལས་ཆོས་རྒྱལ་ལྟ་བུའི་ཕུལ་བྱུང་སློབ་མ་སྐྱེད་སྲིང་ཐུབ་པ་དང་། ཁོང་ཚོར་འཇོན་ཐང་ངོམ་སའི་གར་སྟེགས་ཀྱང་བསྐྲུན་ཡོད། དུས་མཚུངས་སུ་བོད་ལྗོངས་ལས་རིགས་ལག་རྩལ་སློབ་གླིང་ལ་གཟི་བརྗིད་བརྩོན་ལེན་བྱས་ཡོད་པ་སྟེ།

—— 2020ལོར་བོད་ལྗོངས་ལས་རིགས་ལག་རྩལ་སློབ་གླིང་གི་སློབ་མའི་ལས་གཏོད་རྣམ་གྲངས《མ་ཕམ་གཡུ་མཚོ·པད་མ་མཆོག་ནོར》ལ“དྲ་སྦྲེལ+”གསར་གཏོད་ལས་གཏོད་འགྲན་བསྡུར་ཆེན་པོ་སྐབས་དྲུག་པའི་རྒྱལ་ཡོངས་ཀྱི་མཐའ་བསྡུར་ལ་གསེར་གྱི་བྱ་དགའ་ཐོབ་ནས་རང་ལྗོངས་ཀྱི་མཐོ་སློབ་ཀྱིས་འགྲན་བསྡུར་དེའི་གསེར་གྱི་བྱ་དགའ་དང་པོ་བླངས་ཡོད།

—— 2021ལོར་ཕྱི་འབྲེལ་པུའུ་བོད་ལྗོངས་གོ་ལ་ཧྲིལ་པོའི་འོས་སྦྱོར་བྱེད་སྒོའི་ཁྲོད་བོད་ལྗོངས་ལས་རིགས་ལག་རྩལ་སློབ་གླིང་གི་སློབ་མས་བཟོས་པའི་ནོར་གནག་གི་རུས་པའི་རྫ་དཀར་ཐོན་རྫས་སྤུས་ལེགས(ཀྲུང་གོའི་བོད་ཀྱི་དཀར་ཆས)དེ་འཛམ་གླིང་གི་གར་སྟེགས་སུ་ཐེངས་དང་པོར་འགྲེམས་སྟོན་བྱས་ཡོད།

—— 2024ལོར་བོད་ལྗོངས་ལས་རིགས་ལག་རྩལ་སློབ་གླིང་གི་འགྲན་ཞུགས་རྣམ་གྲངས“སྲོ་ལོ་དམར་པོའི་བཏུང་བྱ”ལ་ཀྲུང་ཧྭ་ལས་རིགས་སློབ་གསོའི་གསར་གཏོད་ལས་གཏོད་འགྲན་བསྡུར་ཆེན་པོའི་རྒྱལ་ཡོངས་ཀྱི་མཐའ་བསྡུར་ལ་རྒྱལ་ཁབ་རིམ་པའི་མཐོ་རིམ་ལས་རིགས་ལག་རྩལ་ཚོགས་ཆུང་གི་བྱ་དགའ་ཨང་གསུམ་པ་ཐོག་མར་ཐོབ་ཡོད།

“མིག་སྔར་བོད་ལྗོངས་ལས་རིགས་ལག་རྩལ་སློབ་གླིང་གིས་ཁྲེང་ཧྥ་པད་མ་ནོར་མཛོད་རིག་གནས་འཕེལ་རྒྱས་ཚད་ཡོད་ཀུང་སི་དང་། རེ་བ་གསར་པའི་ཚོགས་པ། ཆུ་ཤུར་རྫོང་ཚལ་སྣ་རྒྱལ་ཁབ་དེང་རབས་ཞིང་ལས་དཔེ་སྟོན་གླིང་ཁུལ་སོགས་ཁེ་ལས་དང་མཉམ་ལས་བྱེད་ཤུགས་ཆེ་རུ་བཏང་ནས་ཐོན་ལས་དང་སློབ་ཁྲིད་ཟུང་འབྲེལ་དམ་ཟབ་དང་། ཕན་ཚུན་རྒྱབ་སྐྱོར། ཕན་ཚུན་སྐུལ་འདེད་བཅས་བྱས་ནས་སློབ་གྲྭ་དེ་ཉིད་ཤེས་ལྡན་པ་གསོ་སྐྱོང་དང་། ཚན་རིག་ཞིབ་འཇུག ཚན་རྩལ་ཞབས་འདེགས་བཅས་གཞི་གཅིག་ཏུ་འདུས་པའི་ཐོན་ལས་རང་བཞིན་གྱི་གཉེར་སྐྱོང་དངོས་ཚན་ཞིག་ཏུ་བསྐྲུན་རྒྱུ་མ་ཟད། ཐོན་སློབ་མཉམ་འདྲེས་གཏིང་ཟབ་དང་དེ་བཞིན་སློབ་གྲྭ་དང་ཁེ་ལས་གཞི་གཅིག་ཏུ་འདུས་པའི་སློབ་གཉེར་བྱེད་སྟངས་གྲུབ་པར་བྱ་རྒྱུ་རེད”ཅེས་བསོད་དབང་གིས་བཤད།