རང་སྐྱོང་ལྗོངས་ལས་བྱེད་པ་རྒན་གྲས་ཅུས་ཀྱིས།
སྨན་བཅོས་བདེ་སྲུང་ཤེས་བྱའི་འཆད་ཁྲིད་གཉེར་བ།
ཉེ་ཆར། ལྗོངས་ཏང་ཨུད་ལས་བྱེད་པ་རྒན་གྲས་ཅུས་ཀྱིས་སྨན་བཅོས་བདེ་སྲུང་ཤེས་བྱའི་འཆད་ཁྲིད་གཉེར་བ་རེད། འཆད་ཁྲིད་ཐོག་པེ་ཅིང་ཞེ་ཧོ་སྨན་ཁང་གི་བོད་སྐྱོར་རིགས་གཅིག་མཁས་ཅན་དང་བོད་རང་སྐྱོང་ལྗོངས་མི་དམངས་སྨན་ཁང་དབང་རྩའི་ཁོག་ནད་ཚན་ཁག་གི་ཀྲུའུ་རེན་ཡོན་ཅིང་གདན་དྲངས་ནས། “ཀླད་པའི་བདེ་ཐང”དང“ཨར་ཚི་ཧའེ་མོའི་ནད”སོགས་རྒན་རྒོན་གྱི་རྒྱུན་མཐོང་ནད་རིགས་ཀྱི་རྩ་བའི་རིགས་པ་དང་དེ་བཞིན་སྔོན་འགོག་བྱ་ཐབས་འགྲེལ་བཤད་བརྒྱབ་སྟེ། ཚན་རིག་དང་། ཤེས་དཔལ། བདེ་ཐང་བཅས་ཀྱི་འཚོ་བ་སྐྱེལ་སྟངས་དར་སྤེལ་གཏོང་དགོས་པའི་སྐུལ་མ་བྱས་པ་རེད།
འཆད་ཁྲིད་ཐོག་ཡོན་ཅིང་གིས་ཁ་གསལ་ཞིང་གོ་བདེ་བའི་ཐོག་ནས་ཨར་ཚི་ཧའེ་མོའི་ནད་ཀྱི་ནད་ལུགས་དང་། ནད་ཐོག་མངོན་ཚུལ། སྔོན་འགོག་བྱ་ཐབས་སོགས་ལ་འགྲེལ་བཤད་ཞིབ་ཕྲ་བརྒྱབ་པ་རེད། འཆད་ཁྲིད་ཉན་དུ་ཡོང་བའི་རྒན་ཡོལ་ཞུས་པའི་ལས་བྱེད་པ་དང་ལས་བཟོ་ཚོས་གཅིག་རྗེས་གཉིས་མཐུད་ངང་། ད་ཐེངས་ཀྱི་འཆད་ཁྲིད་བརྒྱུད། “ཀླད་པའི་བདེ་ཐང”དང་རྒན་རྒོན་གྱི་གླེན་ནད་སྔོན་འགོག་གི་བདེ་སྲུང་འདུ་ཤེས་སྔར་བས་ཟབ་ཏུ་ཕྱིན་སོང་། སྨན་པས་གསལ་བཤད་བྱས་པའི་དོ་སྣང་བྱེད་དགོས་པའི་དོན་ཚན་ཁག་ལ་གཞིགས་ནས་འཚོ་བའི་གོམས་གཤིས་བཟང་པོ་འཇགས་པ་དང་། སྦྱོང་བརྡར་ཡག་པོ་བྱེད་པ། སེམས་བག་ཡངས་པོ་རྒྱུན་འཁྱོངས་བཅས་བྱས་ནས། ཚེ་མཇུག་གི་འཚོ་བ་སྐྱིད་པོ་ཞིག་སྐྱེལ་གྱི་ཡིན་ཞེས་བརྗོད།
ལྗོངས་ཐད་གཏོགས་ཚན་པ་དང་། གྲོང་ཁྱེར་དང་ས་ཁུལ་བདུན་གྱི་རྒན་ཡོལ་ཞུས་པའི་ལས་བྱེད་པའི་འཐུས་མི་ཁག་གཅིག་དང་། དེ་བཞིན་རང་སྐྱོང་ལྗོངས་ལས་བྱེད་པ་རྒན་གྲས་ཀྱི་སྒྱུ་རྩལ་ཚོགས་པའི་འཁྲབ་སྟོན་པ། ལྗོངས་ཏང་ཨུད་ལས་བྱེད་པ་རྒན་གྲས་ཅུས་ཀྱི་ལས་བྱེད་པ་དང་ལས་བཟོ་ཡོངས་ཀྱིས་འཆད་ཁྲིད་ཉན་པ་རེད། འཆད་ཁྲིད་མཇུག་འགྲིལ་རྗེས་ད་དུང་ས་གནས་ས་ཐོག་ཏུ་འོས་འགན་སྨན་བཅོས་ཀྱང་བྱས་པ་རེད།