སྙན་ཞུའི་རྩོམ་རིག་གི་སྒྱུ་རྩལ་ཁྱད་ཆོས་རགས་ཙམ་གླེང་བ།
རྩོམ་རིག་གི་གར་སྟེགས་ཐོག་རང་ཚུགས་ཐུབ་པའི་རྩོམ་ལུས་ཤིག་ཡིན་ཕྱིན། དེར་སྤྱི་ཚོགས་ཀྱི་འཚོ་བ་མཚོན་པའི་ཐབས་རྩལ་རེ་དང་ཀློག་པ་པོའི་ཡིད་སེམས་འགུག་པའི་ཁྱད་ཆོས་རེ་ལྡན་པ་སྨོས་མེད་ལགས། སྤྱི་ཚོགས་འཕེལ་རྒྱས་ཀྱི་འགྲོས་དང་བསྟུན་ནས་གསར་འགྱུར་གྱི་བུ་མོ་དང་རྩོམ་རིག་གི་གཞོན་ནུ་གཉིས་གཉེན་བསྡེབས་པ་ལས། རྩོམ་རིག་གི་ཞིང་ས་གཤིན་པོར་སྙན་ཞུའི་རྩོམ་རིག་ཅེས་པའི་རྩོམ་ལུས་གསར་པ་ཞིག་རྩ་བ་ཚུགས་ཤིང་མྱུ་གུ་འབུས་འགོ་ཚུགས་པས། འདིར་སྙན་ཞུའི་རྩོམ་རིག་གི་སྒྱུ་རྩལ་ཁྱད་ཆོས་སྐོར་རགས་ཙམ་གླེང་བར་བྱའོ།
གཅིག གསར་འགྱུར་གྱི་རང་བཞིན།
སྙན་ཞུའི་རྩོམ་རིག་ནི་གསར་འགྱུར་གྱི་མངལ་ནས་སྐྱེས་ཤིང་གསར་འགྱུར་གྱི་ཁྲག་རྒྱུན་ལྡན་པ་ཞིག་ཡིན་པས། གསར་འགྱུར་རང་བཞིན་ནི་སྙན་ཞུའི་རྩོམ་རིག་ལ་ལྡན་པའི་དམིགས་བསལ་གྱི་ཁྱད་ཆོས་ཤིག་ཡིན། སྙན་ཞུའི་རྩོམ་རིག་གི་གསར་འགྱུར་རང་བཞིན་ཡང་བརྗོད་པར་བྱ་བའི་དོན་དེ་གསར་པ་དང་དྲང་བདེན་ཡིན་དགོས་པ་དང་། གཞན་ཀློག་མཁན་སོགས་ལ་བློ་བསྐྱེད་འབྱིན་པ་དང་མཚར་སྣང་སྟེར་བ་བཅས་དུས་ཀྱི་ཆ་ནས་དུས་ཐོག་ཏུ་མཚོན་རྒྱུའི་རྩ་དོན་སྟེང་ནས་བཤད་པ་ཡིན། མ་གཞི“བདེན་པར་སྣང་བ་ནི་རྩོམ་རིག་སྒྱུ་རྩལ་གྱི་སྲོག་རྩ་ཡིན་ལ། རྩོམ་རིག་གི་ཆེས་རྩ་བའི་རེ་འདུན་ཡིན”ཞེས་གསུངས་མོད། ཡིན་ནའང་། སྙན་ཞུའི་རྩོམ་རིག་གི་བདེན་པ་ནི་བརྩམས་སྒྲུང་བཞིན་རྟོག་བཟོ་དང་ཕྱོགས་བསྡུས། སྒྱུ་རྩལ་གྱི་ལས་སྣོན་ལ་བརྟེན་པའི་མི་སྣའི་གཟུགས་བརྙན་ཞིག་ནས་མི་སྣ་མང་པོའི་གཟུགས་བརྙན་དུ་བློས་བསླངས་བྱས་པའི་སྒྱུ་རྩལ་གྱི་བདེན་པ་དེ་མ་ཡིན་པར། དངོས་ཡོད་འཚོ་བའི་ཁྲོད་བྱུང་ཟིན་པའམ་འབྱུང་བཞིན་པའི་གནས་ཚུལ་དག་གི་དུས་ཚོད་དང་། ས་གནས། རྒྱབ་ལྗོངས། རྒྱུ་རྐྱེན། མཇུག་འབྲས་བཅས་དང་། དེ་བཞིན་གནས་ཚུལ་དེ་དང་འབྲེལ་བའི་མི་སྣ་སོགས་ཇི་མ་ཇི་བཞིན་དུ་མཚོན་པར་ཟེར། དེ་ནི“སྤྱི་ཚོགས་ཀྱི་འཚོ་བ་ཇི་མ་ཇི་བཞིན་མཚོན་དགོས་ཞེས་པ་ལས་སྙན་ཞུའི་རྩོམ་རིག་གི་གསར་འགྱུར་རང་བཞིན་མངོན་པ་དང་། ད་དུང་མགྱོགས་ཤིང་མྱུར་བའི་སྒོ་ནས་སྤྱི་ཚོགས་འཚོ་བ་མཚོན་རྒྱུ་དེའང་སྙན་ཞུའི་རྩོམ་རིག་ལ་ལྡན་པའི་གསར་འགྱུར་རང་བཞིན་གྱི་ཁྱད་ཆོས་ཤིག་ཡིན་པས། སྙན་ཞུའི་རྩོམ་རིག་ལ་དུས་ཐོག་དང་ཤེས་ཚོར་རྣོ་བའི་སྒོ་ནས་དངོས་ཡོད་འཚོ་བ་མཚོན་པ་དང་། དུས་རབས་འཕེལ་རྒྱས་ཀྱི་གོམ་འགྲོས་དང་མཉམ་དུ་དུས་བསྟུན་མདུན་སྐྱོད་ཐུབ་པ་བྱེད་རྒྱུ་གལ་ཆེ་བ་ཡིན། འདི་ནི་རྩོམ་ལུས་གཞན་དང་མི་འདྲ་བར་སྙན་ཞུའི་རྩོམ་རིག་ལ་ལྡན་པའི་གསར་འགྱུར་རང་བཞིན་ནོ”ཞེས་པ་ལྟར་རོ།
གཉིས། རྩོམ་རིག་གི་རང་བཞིན།
རྩོམ་རིག་ཅེས་པ་ནི་སྤྱི་ཚོགས་ཀྱི་འདུ་ཤེས་འཛིན་སྟངས་ཀྱི་གྲས་ཤིག་ཡིན་ཞིང་། དེའང་སྐད་ཡིག་ལ་བརྟེན་ནས་སྣང་བརྙན་གསར་བཞེངས་བྱས་ཏེ་སྤྱི་ཚོགས་ཀྱི་འཚོ་བ་མཚོན་པ་དང་། རྩོམ་པ་པོའི་བསམ་བློའི་ཚོར་འདུ་མཚོན་པ་ཞིག་ཡིན། སྙན་ཞུའི་རྩོམ་རིག་གི་རྩོམ་རིག་རང་བཞིན་ནི་གཙོ་བོ་རྩོམ་རིག་གི་ཐབས་གང་ལེགས་སྤྱད་པ་ལས་མཚོན་ཞིང་། སྒྱུ་རྩལ་གྱི་རྩོམ་རིག་ཡོད་དོ་ཅོག་སྤྱི་ཚོགས་འཚོ་བ་ལས་བྱུང་ནའང་སྤྱི་ཚོགས་འཚོ་བ་ནི་རྩོམ་རིག་སྒྱུ་རྩལ་མ་ཡིན་ཏེ། འཚོ་བར་རྒྱུས་མངའ་ལོན་ཡང་སྒྱུ་རྩལ་གྱི་ལམ་ནས་འཚོ་བ་མཚོན་རྒྱུ་ནི་ལས་སླ་པོ་ཞིག་མིན། སྤྱི་ཚོགས་འཚོ་བའི་ནང་སྒྱུ་རྩལ་གྱི་རྒྱུ་ཆ་ཕུན་སུམ་ཚོགས་པོ་ཡོད་ཀྱང་། གལ་སྲིད་རྒྱུ་ཆ་དེ་དག་ལ་ཞིབ་བརྗོད་དང་བསྲེག་བཅད་བརྡར་བའི་གསེར་བཞིན་བཙོ་སྦྱང་ཡག་པོ་བྱེད་མི་ཐུབ་པའམ། རྩོམ་མཁན་རང་ངོས་ལ་སྒྱུ་རྩལ་གྱི་བློ་སྦྱོང་དང་ཐབས་རྩལ་མེད་ན། འཚོ་བར་ཡུན་རིང་ཟབ་འཇུག་བྱས་ཀྱང་སྔར་བཞིན་མི་སྣའི་སྣང་བརྙན་དང་སྐད་ཆ། ཐ་ན། མཛེས་རྟོག་གི་དམིགས་བསལ་ཁྱད་ཆོས་མཚོན་དཀའ། དེར་བརྟེན། རྩོམ་པ་པོས་མཐོང་ཐོས་མྱོང་གསུམ་གང་བྱུང་བ་རྣམས་བརྗོད་བྱར་བཟུང་སྟེ་དེ་དག་ལ་མངོན་སུམ་དང་། རྟོག་བཟོ། འཆར་སྒོ་སོགས་ལ་བརྟེན་ནས་ལས་སྣོན་དང་བཙོ་སྦྱང་བྱེད་དགོས།
《རྩོམ་རིག་ནི་ཅི་ཞིག་ཡིན》ཞེས་པར། “སྙན་ཞུའི་རྩོམ་རིག་གི་རྩོམ་རིག་རང་བཞིན་ནི་གཙོ་བོ་རྩོམ་རིག་གི་ཐབས་གང་ལེགས་སྤྱད་པ་ལས་མཚོན་ཐུབ” ཅེས་པ་ལྟར། རྗོད་བྱེད་ངག་གི་སྦྱོར་བ་ལ་བརྟེན་ནས་བརྗོད་བྱ་སྤྱི་ཚོགས་ཀྱི་མི་དངོས་དང་དོན་དངོས་བྲིས་པའི་རྨང་གཞིའི་འོག རྩོམ་པ་པོའི་རྣམ་དཔྱོད་ཀྱི་རྩལ་ལ་བརྟེན་ནས་སྒྱུ་རྩལ་གྱི་ཐབས་གང་ལེགས་སྤྱད་ཆོག་པ་ནི་ཤ་ཁྲག་གདོས་བཅས་ཀྱི་གཟུགས་བརྙན་གྱི་སྒོ་ནས་བྱ་དངོས་བསྐྱར་མཚོན་དང་། མཛེས་དཔྱོད་ཀྱི་ལམ་ནས་འཚོ་བའི་སྣང་ཚུལ་རི་མོ་ལྟར་མཚོན་པ། བརྩེ་དུང་གི་མེ་ལྕེ་ཤུགས་ཆེར་མཚོན་དགོས་པ། སྐད་བརྡ་ཕུན་སུམ་ཚོགས་པོ་བཀོལ་དགོས་པ། བརྗོད་བྱའི་དོན་མཚོན་པ་ལ་སྐབས་བབ་ཏུ་བགྲོ་གླེང་དང་བསམ་ཚོད་བྱེད་པ་སོགས་སྒྱུ་རྩལ་རྩོམ་རིག་གི་ཨ་ལོང་ལ་བརྟེན་ནས། ཀློག་པ་པོའི་ཡིད་ཀྱི་ལྕགས་ཀྱུ་འགུག་དགོས་ཏེ། དཔེར་ན། ཚེ་རིང་གནམ་མགོན་གྱི《གངས་རིན་པོ་ཆེའི་འོག་གི་རླབས་པོ་ཆེའི་བྱ་གཞག》ཅེས་པར། བོད་ཀྱི་རྨང་གཞིའི་སློབ་གསོའི་འཕེལ་རྒྱས་ཆེད་རང་གི་ལང་ཚོ་སྐྱེས་སུ་འབུལ་མཁན་རྦ་རྒྱལ་གྱིས་ཆེས་དཀའ་སྡུག་ཆེ་བའི་ས་ཆར་བསྐྱོད་ནས། ཚད་ཡོད་ཀྱི་མི་ཚེ་འདི་ཚད་མེད་ཀྱི་སློབ་གསོའི་བྱ་གཞག་ལ་སྐྱེས་སུ་ཕུལ་བའི་ནང་དོན་དེ་གསར་འགྱུར་དང་རྒྱས་འཕྲིན་ཇི་བཞིན་ངོ་སྤྲོད་བྱས་པ་ཙམ་མིན་པར། སྒྱུ་རྩལ་གྱི་ཐབས་རྩལ་དང་། ལྷག་པར་དུ། སྐད་ཆའི་སྒྱུ་རྩལ་ཕུན་སུམ་ཚོགས་པོ་སྤྱད་ནས་ཀློག་པ་པོའི་ཡིད་ཀྱི་དང་བ་འདྲེན་པའི་ནུས་པ་ཐོན་པར་བྱས་ཡོད། གང་ལྟར་ཀྱང་། སྙན་ཞུའི་རྩོམ་རིག་རྩོམ་འབྲི་བྱེད་སྐབས་བདེན་པ་བརྗོད་རྒྱུ་ནི་འགྱུར་མེད་ཀྱི་སྲོག་ཤིང་ཡིན་པ་དང་། འཚོ་བའི་ཁྲོད་ནས་འདེམས་སྒྲུག་བྱས་པའི་མི་དང་བྱ་དངོས་དེ་དག་གཟུགས་བརྙན་བཞིན་མཚོན་ཐུབ་ན། དྲི་ལྡན་མེ་ཏོག་རྒྱང་རིང་ཡང་། །བུང་བ་སྤྲིན་གྱི་ཚོགས་བཞིན་འཁོར། །ཞེས་པའི་དཔེ་ལྟར། ཀློག་པ་པོའི་ཡིད་དབང་འགུག་ཐུབ་པ་དང་ཆབས་ཅིག འཚོ་བ་དངོས་ནས་བྱུང་བའི་གནད་དོན་ཁག་གིས་ཀློག་པ་པོའི་བློ་ཁ་འབྱེད་ཐུབ་པ་དང་ཁོང་ཚོ་ཡང་དག་པའི་ལམ་དུ་ཁྲིད་སྟོན་བྱེད་པར་ནུས་པ་ངེས་ཅན་ཐོན་ཐུབ།
གསུམ། དཔྱད་གཏམ་གྱི་རང་བཞིན།
སྙན་ཞུའི་རྩོམ་རིག་ནི་སྤྱི་ཚོགས་ཀྱི་འཚོ་བ་དང་དུས་རབས་ཤིག་གི་མཐའ་ཡས་རྒྱ་མཚོ་ཆེན་པོའི་ཐོག་གི་ངེས་གཏན་མེད་པའི་གནམ་གཤིས་འགྱུར་ལྡོག་ལ་སོ་ལྟ་བྱས་ཏེ་དུས་ཐོག་ལ་ཉེན་བརྡ་གཏོང་མཁན་གྱི་སོ་ལྟ་བ་ལྟ་བུ་ཞིག་ཡིན་ལ། སོ་སོའི་ཁེ་གྱོང་དང་བཅར་འདྲི་བྱེད་ཡུལ་གྱི་ངོ་སོར་མ་ལྟོས་པར་ནམ་ཡང་རང་ལ་ཡིད་ཆེས་བྱེད་མཁན་གྱི་མང་ཚོགས་ལ་ཁ་ཕྱོགས་སྟོན་པའི་སྤྱི་པའི་གྲུ་པ་ལྟ་བུ་ཞིག་དགོས་པ་ནི་རྩོམ་ལུས་འདིའི་དཔྱད་གཏམ་རང་བཞིན་ལས་མངོན་ཐུབ། རྩོམ་པ་པོས་རྩོམ་ལུས་ཀྱི་རྣམ་པ་དེ་དག་རྩོམ་འབྲི་བྱེད་པའི་བརྒྱུད་རིམ་ཁྲོད། སྤྱི་ཚོགས་འཚོ་བའི་གནས་ཚུལ་སྣ་ཚོགས་ལ་རིག་པས་བརྟག་པ་དང་། སྤྱི་ཚོགས་ཀྱི་མི་ཕན་ཚུན་དབར་གྱི་འབྲེལ་བ་སྣ་ཚོགས་ལ་ཕྱོགས་ཡོངས་ནས་དབྱེ་ཞིབ་བྱས་ཏེ། དངོས་ཡོད་སྤྱི་ཚོགས་ཀྱི་སྣང་ཚུལ་ཁག་གི་ལེགས་ཉེས་དང་། བདེན་རྫུན། ཤུགས་རྐྱེན་ཐེབས་ཚུལ། མི་སྣ་བཟང་ངན་སོགས་ཚུར་སྣང་དང་། དེ་དག་ལ་སྤོབས་པ་ཆེན་པོས་ལེགས་པར་བསྟོད་པ་དང་མི་ལེགས་པ་རྣམས་ལ་སུན་འབྱིན་དགག་རྒྱག་དང་རྩོམ་པ་པོ་རང་ངོས་ཀྱི་ལྟ་བའམ་དཔྱད་གཏམ་གནད་འཕིགས་བྱེད་དགོས་ཀྱི་ཡོད། དཔྱད་གཏམ་དེ་ཡང་རྒྱུན་གཏན་གྱི་ཆབ་སྲིད་རང་བཞིན་གྱི་དཔྱད་གཏམ་ལྟར་མ་ཡིན་པར། རྩོམ་རིག་རང་བཞིན་ལྡན་པའི་དཔྱད་གཏམ་ཞིག་ཡིན་དགོས་ལ། སྒྱུ་རྩལ་གྱི་ཉམས་ལྡན་པ་ཞིག་ཀྱང་ཡིན་དགོས།
བཞི། ལོ་རྒྱུས་ཀྱི་དཔྱད་གཞིའི་རང་བཞིན།
རྒྱལ་མོ་འབྲུག་པས། ལོ་རྒྱུས་ཀྱི་དཔྱད་གཞིའི་རང་བཞིན་ནི“མིའི་རིགས་ཀྱི་སྤྱི་ཚོགས་དང་རང་བྱུང་ཁམས་ཀྱི་འདས་ཟིན་པའི་སྔོན་བྱུང་གི་བྱ་བ་དང་། སྔོན་བྱུང་གི་ལོ་རྒྱུས་ཡི་གེར་བཀོད་པའམ། ཡང་ན། མི་རང་ཉིད་ཀྱིས་སྤྱི་ཚོགས་ཀྱི་གོ་རིམ་དངོས་སུ་བརྒྱུད་པའི་བྱུང་བ་སོགས་ལ་ངོས་འཛིན་པའམ། ཡང་ན་གཙོ་བོ་རྒྱལ་ཁབ་དང་མི་རིགས་ཀྱི་འདས་པའི་བྱུང་བ་ལ་བརྗོད་དགོས”ཞེས་གསུངས་པ་ལྟར། ལོ་རྒྱུས་སྨྲ་བ་པོའམ་ལོ་རྒྱུས་ལ་ཞིབ་འཇུག་བྱེད་མཁན་རྣམས་ཀྱིས་སྤྱི་ཚོགས་འཚོ་བ་དངོས་ལ་འཁྱོག་བརྗོད་དང་སྒྲོ་བཏགས་མེད་པར་དྲང་བདེན་གྱི་སྒོ་ནས་དོན་དངོས་བརྗོད་རྒྱུ་ནི་ལོ་རྒྱུས་རྩོམ་འབྲི་བས་སྲུང་དགོས་ངེས་ཀྱི་མ་མཐའི་ཆ་རྐྱེན་ཡིན། འདི་དང་དེ་འདྲ་བར་དྲང་བདེན་བརྗོད་རྒྱུ་ནི་སྙན་ཞུའི་རྩོམ་རིག་གི་བླ་སྲོག་ལྟ་བུ་ཡིན་པས། རྩོམ་པ་པོས་སྙན་ཞུའི་རྩོམ་རིག་གི་ལམ་ནས་འཚོ་བའི་ཁྲོད་ཀྱི་དཔེ་མཚོན་མི་སྣ་དང་དོན་དག་རྣམས་བརྩམས་ཆོས་སུ་མཚོན་པ་དག་ལ་དཔྱད་གཞིའི་རིན་ཐང་དང་ལོ་རྒྱུས་རིན་ཐང་ངེས་ཅན་ལྡན་དགོས་པ་ཡིན། དཔེར་ན། བཀྲ་ཤིས་དཔལ་ལྡན་གྱི《གར་སྟེགས། ཁོང་གི་ཡོད་ཚད》ཅེས་པར། ལྷ་ས་གླུ་གར་ཚོགས་པའི་གཤེགས་ཟིན་པའི་འཁྲབ་སྟོན་པ་གྲགས་ཅན་ཐུབ་བསྟན་ལགས་ཀྱི་ཆུང་བྱིས་པའི་དུས་ཀྱི་འཚོ་བ་དང་། བར་གཞོན་ནུའི་འཚོ་བ། ཁོང་དང་སྒྱུ་རྩལ་དབར་ལས་འཕྲོའི་མདུད་པ་ཇི་ལྟར་ཐེབས་མིན་སོགས་ཇི་བཞིན་དུ་མཚོན་ཡོད།
སྙན་ཞུའི་རྩོམ་རིག་གི་གོང་སྨོས་ཀྱི་ཁྱད་ཆོས་དེ་དག་ལས་རྩོམ་ལུས་དེ་ནི་འགྲོ་བ་མིའི་སྤྱི་ཚོགས་དང་འབྲེལ་བ་ཤིན་ཏུ་ཟབ་པའི་སྒྱུ་རྩལ་མཚོན་ཐབས་ཤིག་ཡིན་པ་ཤེས་ཐུབ་རུང་། བོད་ཀྱི་རྩོམ་རིག་ལོ་རྒྱུས་ལ་ལྟ་ཞིབ་བྱེད་སྐབས། རྩོམ་ལུས་དེ་དར་བའི་དུས་ཡུན་ཅུང་འཕྱི་སྟབས། ན་ཚོད་མ་སྨིན་པའི་རྩོམ་ལུས་ཤིག་ཏུ་གྱུར་ཡོད། དེར་བརྟེན། ང་ཚོས་སྔར་སོང་གི་ཉམས་མྱོང་ལ་ཕྱོགས་སྡོམ་དང་། རིགས་པའི་གཞུང་ལུགས་ཀྱི་མཛུབ་སྟོན། མི་རིགས་གཞན་གྱི་གསར་རྩོམ་ལེགས་ཆར་སློབ་སྦྱོང་གང་མང་བྱས་ཏེ། ཕུལ་བྱུང་བརྩམས་ཆོས་དེ་བས་མང་བ་གསར་རྩོམ་བྱས་ནས་མང་ཚོགས་ལ་བསམ་པའི་རྒྱགས་ཕྱེ་དང་ཡིད་ཀྱི་ལོངས་སྤྱོད་ཕུན་སུམ་ཚོགས་པ་ཞིག་སྟེར་ཐུབ་པ་བྱ་རྒྱུ་ནི་གནད་དམ་པའོ།
(བོད་ལྗོངས་སློབ་ཆེན་རིག་གཞུང་སློབ་གླིང་གི་2022ལོའི་ཤེས་རམས་ཞིབ་འཇུག་སློབ་མ་བསོད་ནམས་ཆོས་ལྡན་གྱིས)