ཉེ་ཆར། བོད་རང་སྐྱོང་ལྗོངས་ཏང་ཨུད་རྩ་འཛུགས་པུས་ཧུའུ་པེ་ཞིང་ཆེན་བོད་སྐྱོར་ལས་དོན་རུ་ཁག་དང་མཉམ་དུ་ཧུའུ་པེའི་ཝུའུ་ཧན་དུ“ཤེས་ལྡན་པ་འཛོམས་ནས་ས་མཐོར་ཕྱོགས”2024ལོའི་བོད་ཀྱི་ཤེས་ལྡན་པ་འགུག་པ་དང་བློ་རིག་འདྲེན་པའི་འོས་སྦྱོར་བྱེད་སྒོ(ཝུའུ་ཧན་ཆེད་དོན་བྱེད་སྒོ)སྤེལ་བ་རེད།

ཤེས་རྟོགས་བྱུང་བར་གཞིགས་ན། རང་སྐྱོང་ལྗོངས་ཀྱིས་མཐོ་རིམ་ཤེས་ལྡན་པ་ནང་འདྲེན་བྱེད་པ་དེ་རྒྱལ་ཁབ་ཕྱི་ནང་གི་རྩེར་སོན་ཤེས་ལྡན་པ་དང་། རྒྱལ་ཁབ་རིམ་པའི་སྣེ་ཁྲིད་ཤེས་ལྡན་པ། ས་གནས་རིམ་པའི་སྣེ་ཁྲིད་ཤེས་ལྡན་པ། མཐོ་རིམ་ཤེས་ལྡན་པ་གཞན་དག་སོགས་རིགས་བཞི་ལ་དབྱེ་ཡོད། མཐོ་རིམ་ཤེས་ལྡན་པ་ནང་འདྲེན་གྱི་དགོས་མཁོ་456དང་ལག་རྩལ་མཉམ་ལས་ཀྱི་དགོས་མཁོ་66འོས་སྦྱོར་དང་། ཚུར་འགུག་ནང་འདྲེན་ལ་སྒོར་ཁྲི་20ནས་སྒོར་ཁྲི་220བར་གྱི་མི་སྒེར་གྱི་ཁ་གསབ་དང་སྒོར་ཁྲི་10ནས་སྒོར་ཁྲི་200བར་གྱི་ཚན་ཞིབ་ཁ་གསབ་སྤྲོད་རྒྱུ་མ་ཟད། གླ་ཕོགས་དང་། གོ་གནས། གོ་མིང་དཔྱད་བསྡུར་གདན་ཞུ། སྡོད་ཁང་སྲིད་ཇུས། ནང་མི་བཀོད་སྒྲིག སྨན་བཅོས་འགན་ལེན་སོགས་ཀྱི་ཐད་སྲིད་ཇུས་ཀྱི་རྒྱབ་སྐྱོར་བྱ་རྒྱུ་རེད། དེ་དང་ཆབས་ཅིག་ནང་འདྲེན་ཤེས་ལྡན་པས“ཇོ་མོ་གླང་མའི་རྨད་བྱུང་ཤེས་ལྡན་པའི”འཆར་གཞིར་ཡིག་ཐོག་སྙན་ཞུ་འབུལ་བར་ལྕག་སྐུལ་བྱེད་པ་དང་། ནང་འདྲེན་ཤེས་ལྡན་པའི་གསར་གཏོད་ལས་གཏོད་ལ་རྒྱབ་སྐྱོར་བྱེད་པ། ནང་འདྲེན་ཤེས་ལྡན་པའི་གྲུབ་འབྲས་གཞན་སྒྱུར་ལ་ལྕག་སྐུལ་བྱེད་པ། ལེ་ལག་ཚང་བའི་གཟེངས་བསྟོད་བྱ་དགའི་སྲིད་ཇུས་ལག་ལེན་བསྟར་བ་སོགས་བྱ་ཐབས་བརྒྱུད་ནང་འདྲེན་ཤེས་ལྡན་པར་ལྕག་སྐུལ་གང་ལེགས་བྱ་རྒྱུ་རེད། དེའི་ནང་ཇོ་མོ་གླང་མའི་འཐབ་ཇུས་ཤེས་ལྡན་པ་དང་ཚན་རྩལ་གསར་གཏོད་ཚོགས་པར་མང་ཤོས་ལ་སྒོར་ཁྲི་1000གི་རྣམ་གྲངས་ཀྱི་གྲོན་དངུལ་སྤྲོད་རྒྱུ་རེད།