2023ལོའི་ལོ་འཁོར་གྱི་རང་ལྗོངས་ཀྱི་འཕྲོད་བསྟེན་བདེ་ཐང་ལས་དོན་ལ་ཕྱོགས་སྡོམ་བྱས་ཚེ“འཐུས་སྒོ་ཚང་བ”དང་། “སྤུས་ལེགས” “ནུས་ཆེ”སོགས་འགག་རྩའི་ཐ་སྙད་ཀྱིས་མི་རྣམས་ལ་བག་ཆགས་ཟབ་མོ་བཞག་ཡོད། རང་སྐྱོང་ལྗོངས་འཕྲོད་བསྟེན་བདེ་ཐང་ཨུ་ལྷན་གྱིས་ཐོག་མཐའ་བར་གསུམ་དུ་མི་དམངས་གོང་དུ་བཀུར་བ་དང་ཚེ་སྲོག་གོང་དུ་བཀུར་བ་མཐའ་འཁྱོངས་དང་། མི་དམངས་ཀྱི་བདེ་ཐང་ལྟེ་བར་འཛིན་པ་དང་སྤུས་ཚད་མཐོ་བའི་འཕེལ་རྒྱས་ཀྱི་བརྗོད་དོན་གཙོ་བོ་མཐའ་འཁྱོངས། སྤྱོད་ཚུལ་ལེགས་གཏོང་དང་དོན་འཁྱོལ་ལ་དམ་འཛིན་ནན་པོ་བཅས་བྱས་ཏེ། ལྗོངས་ཡོངས་ཀྱི་སྨན་བཅོས་ཞབས་ཞུའི་མ་ལག་འཛུགས་སྐྱོང་སྐས་རིམ་གསར་པ་ཞིག་ཏུ་སླེབས་པར་སྐུལ་འདེད་ཧུར་ཐག་བཏང་ནས“བདེ་ཐང་བོད་ལྗོངས”ཀྱི་མཐོ་ས་བཏོད་ཡོད་པ་རེད།

གཞུང་བཙུགས་སྨན་ཁང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་བཏང་བ།

ཉེ་བའི་ལོ་ཤས་རིང་། རང་ལྗོངས་ཀྱིས་ཐོན་ཁུངས་དང་། སྟོབས་ཤུགས། སེམས་ནུས་བཅས་གཅིག་སྡུད་བྱས་ནས་མང་ཚོགས་ཀྱི་བོད་ལུགས་གསོ་རིག་གི་དགོས་མཁོར་དམིགས་པ་དང་ལྗོངས་ཡོངས་ཀྱི་བོད་ལུགས་གསོ་རིག་གི་ཁྱད་ལྡན་ལེགས་ཆ་དང་འཕེལ་རྒྱས་ཀྱི་ད་ལྟའི་གནས་ཚུལ་ལ་གཞི་ཚུགས་ནས། སྤུས་ལེགས་དང་ནུས་ཆེའི་བོད་ལུགས་གསོ་རིག་གི་སྨན་བཅོས་འཕྲོད་བསྟེན་མ་ལག་གང་མགྱོགས་བཙུགས་པར་གྲུབ་འབྲས་མངོན་གསལ་དོད་པོ་ཐོབ་ཡོད། རང་སྐྱོང་ལྗོངས་མི་དམངས་སྨན་ཁང་གིས་རྒྱལ་ཁབ་ཀྱི་ས་མཐོའི་ནད་ཀྱི་གསོ་རིག་ལྟེ་གནས་འཛུགས་གཏོད་ལ་སྐུལ་འདེད་ཧུར་ཐག་བཏང་ནས་སི་ཁྲོན་སློབ་ཆེན་ཧྭ་ཤིས་སྨན་ཁང་བོད་ལྗོངས་སྨན་ཁང་དང་སི་ཁྲོན་སློབ་ཆེན་ཧྭ་ཤིས་སྨན་ཁང་གཉིས་པའི་བོད་ལྗོངས་སྨན་ཁང་རྒྱལ་ཁབ་ཀྱི་ས་ཁོངས་སྨན་བཅོས་ལྟེ་གནས་གཉིས་འཛུགས་རྒྱུར་སྐུལ་འདེད་ཏན་ཏིག་བཏང་བ། སྟོབས་ཤུགས་བཀོད་སྒྲིག་དང་མཐུན་སྦྱོར་ལམ་སྲོལ་འཐུས་སྒོ་ཚང་དུ་བཏང་ནས་རིམ་པ་ཁག་གི་སྨན་བཅོས་སྒྲིག་གཞིར་ཚ་རྒྱས་སྒོ་བསྟེན་སྨན་ཁང“འཛུགས་དགོས་རིགས་ཚང་མར་འཛུགས་དགོས་པ”དང་ཆུ་ཚོད་24སྒོ་འབྱེད་རྒྱུར་སྐུལ་འདེད་བཏང་ནས་མང་ཚོགས་ཐག་ཉེ་སར་སྨན་བཅོས་བྱེད་པའི་དགོས་མཁོ་བསྐངས་པ། རང་སྐྱོང་ལྗོངས་སྨན་རྩིས་ཁང་ལ་དངོས་སུ་སྒོ་བྱང་བཀལ་ནས“རྒྱལ་ཁབ་ཀྲུང་ལུགས་གསོ་རིག་ལྟེ་གནས(བོད་ཀྱི་གསོ་བ་རིག་པ)”ཀྱི་གྲབས་འཛུགས་ཚན་པར་གྱུར་པ་རེད།

2023ལོར་གྲོང་ཁྱེར་དང་ས་ཁུལ་རིམ་ངོས་ནས་རང་ལྗོངས་ཀྱིས་ལྷ་ས་གྲོང་ཁྱེར་དུ་ཚགས་དམ་པའི་གྲོང་ཁྱེར་སྨན་བཅོས་ཚོགས་པ་འཛུགས་རྒྱུའི་ཚོད་ལྟ་བྱས་ཏེ་དོན་དངོས་དང་མཐུན་པའི་སྨན་བཅོས་ཐོན་ཁུངས་དྲ་མིག་ཅན་གྱི་དོ་དམ་ལམ་སྲོལ་འཚོལ་ཞིབ་བྱས་ནས་བཙུགས་ཡོད། སྨན་པ་ཁྲི་ཡིས་གྲོང་གསེབ་ཀྱི་འཕྲོད་བསྟེན་ལ་རོགས་སྐྱོར་བྱེད་པའི་འདུ་འགོད་སྒྲིག་འཛུགས་དང་ལག་བསྟར་བྱས་ཏེ། རིམ་པ་གསུམ་པའི་སྨན་ཁང་17ནས་ལག་རྩལ་རྐང་འཛིན་པ་100རོགས་སྐྱོར་དང་ལེན་བྱེད་མཁན་སྨན་ཁང་43ལ་ཁ་གཏད་རོགས་སྐྱོར་བྱེད་པར་བཏང་ནས་རོགས་སྐྱོར་དང་ལེན་བྱེད་མཁན་རྫོང་གི་སྨན་བཅོས་མི་སྣའི་སྨན་བཅོས་ཞབས་ཞུའི་ཆུ་ཚད་མཐོ་རུ་བཏང་བ་རེད།

རྫོང་དང་ཆུས་རིམ་པར“རྫོང་སྟོང་གི་འདུ་འགོད”སྒྲིག་འཛུགས་དང་ལག་བསྟར་བྱས་ཏེ་དུས་རིམ་ལྟར་རིམ་པ་གསུམ་པའི་ཕྱོགས་བསྡུས་སྨན་ཁང་འཛུགས་པར་སྐུལ་འདེད་བཏང་ཡོད། རྫོང་ཁོངས་ཀྱི་སྨན་བཅོས་ཞབས་ཞུའི་ནུས་པ་ཆེ་རུ་གཏོང་བ་དང་ས་བབ་མཐོ་བའི་ས་ཁུལ་གྱི་སྨན་བཅོས་ཞབས་ཞུའི་ནུས་པ་ཆེ་རུ་གཏོང་བའི་རྣམ་གྲངས་ལག་བསྟར་གཏིང་ཟབ་བྱས་ཏེ། རྫོང་རིམ་པའི་སྨན་ཁང་གི་ཞན་ཆ་བསལ་བས་རྫོང་ཁོངས་ནང་གི་སྨན་བཅོས་ཐོན་ཁུངས་ཟླ་སྒྲིལ་མཉམ་སྤྱོད་རིམ་བཞིན་མངོན་འགྱུར་བྱུང་བ་རེད།

སྨན་བཅོས་ཞབས་ཞུའི་ནུས་པ་མངོན་གསལ་དོད་པོས་ཆེ་རུ་ཕྱིན་པ།

འཕྲོད་བསྟེན་དང་བདེ་ཐང་ནི་མི་ཚང་མའི་བདེ་སྐྱིད་འཚོ་བ་དང་འབྲེལ་བ་ཡོད་པ་དང་། སྤུས་ཚད་མཐོ་བའི་སྨན་བཅོས་འཕྲོད་བསྟེན་ཞབས་ཞུའི་མ་ལག་འཛུགས་པ་དང་སྤུས་ཚད་མཐོ་བའི་འཕྲོད་བསྟེན་བདེ་ཐང་གི་འགོག་སྲུང་དྲ་བ་ཚགས་དམ་དུ་གཏོང་བ་ནི“བདེ་ཐང་བོད་ལྗོངས”མངོན་འགྱུར་ཡོང་བའི་རྨང་གཞི་ཡིན།

2023ལོར་རང་ལྗོངས་ཀྱི་འཕྲོད་བསྟེན་བདེ་ཐང་ཁོངས་གཏོགས་ཀྱིས་སྨན་བཅོས་ཤེས་ལྡན་པའི་ཚོགས་སྒྲིག་རྣམ་པའི་བོད་སྐྱོར་དང་ཁ་གཏད་རོགས་སྐྱོར་སོགས་ལམ་སྲོལ་གྱི་ལེགས་ཆར་བརྟེན་ནས་ནད་ལྕི་དང་། དབུགས་འབྱིན་རྔུབ། འགོས་ནད། བྱིས་ནད་ཚན་ཁག་སོགས་ཁྱབ་ཁོངས་ཀྱི་ཆེད་ལས་ལག་རྩལ་པ་གསོ་སྦྱོང་ལ་ཤུགས་སྣོན་རྒྱག་པ་དང་། རྒྱང་རིང་ནད་དཔྱད་མཛུབ་ཁྲིད་ལ་ཤུགས་སྣོན་རྒྱག་པ། རྒྱབ་ཕྱོགས་རོགས་སྐྱོར་སྨན་ཁང་གི་ལེགས་ཆ་གང་ལེགས་འདོན་པ། སྨན་ཁང་ལམ་ལུགས་འཛུགས་སྐྱོང་ལ་ཕྱོགས་ཡོངས་ནས་ཤུགས་སྣོན་རྒྱག་པ། སྤུས་ཚད་བདེ་འཇགས་དོ་དམ་མ་ལག་གཏོད་པ། རྒྱུན་གཏན་གྱི་སྨན་བཅོས་ཞབས་ཞུ་བརྟན་པོ་དང་གོ་རིམ་ལྡན་པ་འགན་ལེན་བྱས་ཏེ་ཞབས་ཞུའི་ལས་ཕྱོད་རྒྱུན་ཆད་མེད་པར་ཆེ་རུ་བཏང་བ་རེད།

2023ལོར་རང་ལྗོངས་ཀྱིས《རྒྱལ་ཡོངས་ཀྱི་ནད་གཡོག་བྱ་གཞག་འཕེལ་རྒྱས་འཆར་འགོད(2021ལོ་ནས་2025ལོ་བར)》ལག་བསྟར་དོན་འཁྱོལ་བྱས་ནས་སྡོད་རྩའི་སྨན་བཅོས་དང་། ཁྲག་གཙང་འགྱུར། གཤགས་བཅོས་ཁང་། ནད་ལྕིའི་གསོ་རིག འཕྲལ་བཅོས་མྱུར་སྐྱོབ། གཅིན་སྙི་ཟགས་ཁུའི་ནད། བྱིས་ནད་ཚན་ཁག་སོགས་རང་སྐྱོང་ལྗོངས་རིམ་པའི་ཆེད་ལས་ཚན་ཁག་གི་སྨན་གཡོག་གསོ་སྦྱོང་རྟེན་གཞི་8བསྐྲུན་རྒྱུའི་འཆར་འགོད་བྱས་པ་དང་། རང་སྐྱོང་ལྗོངས་ཀྱི་ནད་གཡོག་གི་སྤུས་ཚད་ཚོད་འཛིན་དང་རྒྱུན་མཐུད་ལེགས་གཏོང་ལྟེ་གནས་བཙུགས་ནས་ནད་གཡོག་གི་སྤུས་ཚད་ཚོད་འཛིན་དང་རྒྱུན་མཐུད་ལེགས་གཏོང་གི་ལམ་སྲོལ་བཙུགས་པ་དང་འཐུས་སྒོ་ཚང་དུ་བཏང་ནས་ནད་གཡོག་དཔུང་ཁག་གི་སྤྱི་ཡོངས་ཀྱི་བྱང་ཚད་རྒྱུན་ཆད་མེད་པར་མཐོ་རུ་བཏང་བ་རེད།

སྤུས་ལེགས་ཀྱི་སྨན་བཅོས་ཐོན་ཁུངས་གཞི་རིམ་དུ་སྣུར་སྲིང་བྱས་པ།

བདེ་ཐང་དབུལ་སྐྱོར་ལས་དོན་སྤེལ་ཚུན། རང་ལྗོངས་ཀྱི་འཕྲོད་བསྟེན་བདེ་ཐང་ཁོངས་གཏོགས་ཀྱིས་མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་བློ་མཐའ་འཁྱོངས་བྱས་ཏེ་གཞི་རིམ་དུ་སྐོར་སྐྱོད་སྨན་བཅོས་བྱེད་པ་དང་། སྨན་བཅོས་ཞབས་ཞུའི་འགན་སྲུང་ནུས་པ་ཆེ་རུ་གཏོང་བ། མང་ཚོགས་ཀྱི་དགོས་མཁོ་དང་གཞི་རིམ་གྱི་རེ་སྒུག་གནད་ལ་འཁེལ་པོས་ཐག་གཅོད་བྱེད་པ། གཞི་རྩའི་སྨན་བཅོས་དང་གཞི་རྩའི་སྤྱི་པའི་འཕྲོད་བསྟེན་ཞབས་ཞུ་ཆ་སྙོམས་ཅན་ལ་སྐུལ་འདེད་གཏོང་བ་བཅས་བྱས་ཏེ། ཞབས་ཞུའི་རྣམ་པ་དེ“གཞན་དབང་ཞབས་ཞུ”ནས“རང་འགུལ་ངང་སྒོ་རྩར་ཡོང་བའི”བར་བསྒྱུར་བ་དང་། ཞབས་ཞུའི་འདུ་ཤེས་དེ“གཞན་སྐུལ”ནས“རང་འགུལ”དུ་བསྒྱུར་ནས་གཞི་རིམ་མང་ཚོགས་ཀྱི་སྨན་བཅོས་ཀྱི་དཀའ་གནད་རྒྱུན་ཆད་མེད་པར་ཐག་གཅོད་བྱས་པ་རེད།

སྨན་བཅོས་འཕྲོད་བསྟེན་དང་འགྲིམ་འགྲུལ་ཆ་རྐྱེན་ལེགས་སུ་ཕྱིན་པ་དང་བསྟུན་ནས་རང་ལྗོངས་ཀྱི་རྫོང་རིམ་པའི་སྨན་ཁང་གིས་ཞབས་ཞུ་སྣུར་སྲིང་བྱས་ཏེ། ནད་གཞི་ལྕི་པོ་རྫོང་རིམ་པ་དང་གྲོང་ཁྱེར་རིམ་པའི་སྨན་ཁང་ནས་སྨན་བཅོས་བྱེད་པ་ཕུད། ཞིང་འབྲོག་མང་ཚོགས་ཐག་ཉེ་ས་ནས་ནད་ལྟ་ཐུབ་པའི་འདུན་པ་སྐོང་གང་ཐུབ་བྱས་ཏེ་མང་ཚོགས་ཐག་རིང་དུ་སྨན་བཅོས་བྱེད་པར་སྐྱོད་མི་དགོས་ལ། དཔལ་འབྱོར་གྱི་ཁུར་པོའང་ཡང་དུ་ཏན་ཏིག་བཏང་ནས“དང་ཐོག་ནས་སྨན་ཁང་ཆེ་གྲས་སུ་འགྲོ་བ་དང་སྨན་པ་གྲགས་ཅན་བསྟེན་པ”ནས“ནད་གཞི་ཡང་པོ་གྲོང་ཚོ་ནས་སྨན་བཅོས་ཐུབ་པ་དང་། ནད་གཞི་ལྕི་པོ་གྲོང་ཁྱེར་ནས་སྨན་བཅོས་ཐུབ་པ”མངོན་འགྱུར་བྱུང་བ་རེད།

2023ལོར་ལྗོངས་ཡོངས་ཀྱི་སྐོར་སྐྱོད་སྨན་བཅོས་ཚོགས་པ་ཁག་གིས་རིམ་རྩིས་བྱས་ན་གཞི་རིམ་དུ་སྐོར་སྐྱོད་སྨན་བཅོས་ཐེངས་6589བྱས་པ་དང་མི་ཐེངས་ཁྲི་77ལྷག་ཙམ་ལ་སྐོར་སྐྱོད་སྨན་བཅོས་བྱས་པ་རེད། གཞི་རིམ་གྱི་སྐོར་སྐྱོད་སྨན་བཅོས་འགན་འཁྲི་ཚོགས་པས་ད་དུང་དུས་བཀག་ལྟར་གཞི་རིམ་དུ་བསྐྱོད་དེ་ནད་གཞི་བརྟག་དཔྱད་དང་བདེ་ཐང་དྲིལ་བསྒྲགས་སློབ་གསོ་སོགས་སྐོར་སྐྱོད་སྨན་བཅོས་ཞབས་ཞུ་བྱས་པས། མང་ཚོགས་དང་སྨན་དོན་པའི་དབར་བསམ་ཤེས་དང་ཁས་ལེན་ཟབ་ཏུ་ཕྱིན་ནས“བདེ་ཐང་བོད་ལྗོངས”ཀྱི་ལེའུ་གསར་པ་ནུས་ཤུགས་ཡོད་རྒུས་བརྩམས་ཡོད་པ་རེད།