2024ལོའི་ཟླ་6ཚེས་6ཉིན་ནི་རྒྱལ་ཡོངས་ཀྱི་མིག་གཅེས་ཉིན་མོ་ཐེངས་29པ་ཡིན་ཞིང་། ད་ཐེངས་ཀྱི་བརྗོད་དོན་གཙོ་བོ་ནི“མིག་གི་དབང་པོའི་བདེ་ཐང་ལ་དོ་ཁུར་རྒྱ་ཁྱབ་བྱེད”ཅེས་པ་དེ་རེད། རྒྱང་སྒྲིབ་སྔོན་འགོག་དང་ཚོད་འཛིན་གྱི་དྲིལ་བསྒྲགས་སློབ་གསོའི་རྣམ་པ་བཏོད་དེ་མིག་དབང་བདེ་ཐང་གི་ཤེས་བྱ་ཕུན་སུམ་ཚོགས་སུ་གཏོང་ཆེད། ཉེ་ཆར། ལྷ་ས་གྲོང་ཁྱེར་གྱི་སློབ་གྲྭ་འབྲིང་ཆུང་ཁག་གིས་མིག་ནད་ཚན་ཁག་གི་རིགས་གཅིག་མཁས་ཅན་གྱི་སྨན་པ་བཀའ་བཅུ་པ་གདན་དྲངས་ནས་སློབ་མ་ཚོར་མིག་དབང་བདེ་ཐང་གི་ཚན་རིག་ཁྱབ་གདལ་དྲིལ་བསྒྲགས་བྱེད་སྒོ་སྣ་ཚོགས་སྤེལ་ཡོད། གཞན་ཡང་། རང་སྐྱོང་ལྗོངས་སྨན་རྩིས་ཁང་གི་སྨན་དོན་མི་སྣ་ཡང་སྡེ་ཁུལ་དུ་བསྐྱོད་དེ་མིག་དབང་བདེ་ཐང་གི་ཤེས་བྱ་དྲིལ་བསྒྲགས་དང་འོས་འགན་སྨན་བཅོས་དང་སྨན་སྐྱེལ་བ་སོགས་ཀྱི་བྱེད་སྒོ་སྤེལ་ཡོད། དེས་ན་ང་ཚོས་མིག་ལ་གཅེས་སྐྱོང་ཇི་ལྟར་བྱེད་དགོས་སམ། གཞོན་ནུ་ལོ་ཆུང་དང་ལྷག་པར་དུ་བྱིས་པའི་མིག་ལ་སྲུང་སྐྱོབ་བྱེད་ པར་ཁྱིམ་བདག་ཚོས་ཇི་ལྟར་བྱེད་དགོས་སམ།

སློབ་གྲྭ་འབྲིང་ཆུང་གི་སློབ་མར་རྒྱང་སྒྲིབ་ཕོག་ཚད་ལོ་རེ་བཞིན་མཐོ་རུ་འགྲོ་བའི་རྣམ་པ་མངོན་པ།

“སློབ་གྲྭས་སློབ་དུས་རེར་སློབ་མའི་མིག་ཤེད་ལ་བརྟག་དཔྱད་བྱེད་ཀྱི་ཡོད་པ་དང་། སློབ་ཁང་ཚང་མའི་ནང་དུའང་མིག་ཤེད་དཔྱད་རིས་སྦྱར་ཡོད། འཛིན་གྲྭའི་ནང་རྒྱང་སྒྲིབ་ཕོག་པའི་སློབ་མ་མང་པོ་ཡོད་ལ་མིག་ཤེལ་འདོགས་མཁན་ཡང་ཧ་ཅང་མང་པོ་ཡོད”ཅེས་ལྷ་ས་གྲོང་ཁྱེར་སློབ་ཆུང་དང་པོའི་ལོ་རིམ་བཞི་པའི་སློབ་མ་ལི་གཡོད་ཀྱིས་ངའི་ཕ་མ་གཉིས་ཀར་རྒྱང་སྒྲིབ་ཕོག་ཡོད་མོད། འོན་ཀྱང་ངར་རྒྱང་སྒྲིབ་ཕོག་མེད་པ་དེ་ནི་རྒྱུན་དུ་ཕིང་ཕང་སྤོ་ལོ་རྩེད་བ་དང་འབྲེལ་བ་ཆེན་པོ་ཡོད་པའི་ངོས་འཛིན་བྱེད་ཀྱི་ཡོད།

བོད་ལྗོངས་ཧྥུའུ་ཁང་སྨན་ཁང་གི་དབང་པོ་ལྔའི་ཚན་ཁག་གི་སྨན་པ་ཕན་ཅུན་ཧྥེ་ཡིས་ངོ་སྤྲོད་བྱས་དོན། མིག་ནི་མིའི་རིགས་ཀྱི་དབང་པོའི་ནང་ནས་གལ་ཆེ་ཤོས་ཀྱི་གྲས་ཤིག་ཡིན་པས་མིག་སྤྱོད་སྟངས་མི་འཚམ་པའི་གོམས་གཤིས་ལས་མིག་ལ་ནད་གཞི་བཟོ་བ་མ་ཟད་བདེ་ཐང་ལའང་གནོད་པ་ཡོད།

རྒྱལ་ཁབ་རིམས་ནད་སྔོན་འགོག་ཚོད་འཛིན་ཅུས་ཀྱིས་ཁྱབ་བསྒྲགས་བྱས་པའི་ལྟ་ཞིབ་ཚད་ལེན་གྱི་གྲངས་གཞི་ལས་མངོན་པར། 2022ལོར་རང་རྒྱལ་གྱི་བྱིས་པ་དང་གཞོན་ནུ་ལོ་ཆུང་ལ་སྤྱིར་རྒྱང་སྒྲིབ་ཕོག་ཚད་51.9%(དེའི་ནང་སློབ་ཆུང་36.7%དང་། དམའ་རིམ་སློབ་འབྲིང་71.4% མཐོ་རིམ་སློབ་འབྲིང་81.2%)ཟིན་གྱི་ཡོད། བྱིས་པ་དང་གཞོན་ནུ་ལོ་ཆུང་ལ་རྒྱང་སྒྲིབ་ཕོག་ཚད་ལོ་རེ་བཞིན་མང་དུ་འགྲོ་བའི་རྣམ་པ་མངོན་པ་དེ་ནི་བྱིས་པའི་བདེ་ཐང་དང་ཕྱོགས་ཡོངས་ནས་འཕེལ་རྒྱས་འགྲོ་བར་ཤུགས་རྐྱེན་ཐེབས་པའི་གནད་དོན་མངོན་གསལ་དོད་ཤོས་སུ་གྱུར་ཡོད།

རྒྱང་སྒྲིབ་སྔོན་འགོག་དང་ཚོད་འཛིན་བྱེད་པར་ཁྱིམ་བདག་གིས་མཐོང་ཆེན་བྱེད་དགོས་ལ་ལྟ་སྐུལ་ཡང་བྱེད་དགོས་པ།

“ཐེངས་ཤིག་ངའི་བུས་ཅ་དངོས་ལ་ལྟ་སྐབས་མིག་བཙུམ་ཙམ་བཙུམ་ཙམ་བྱེད་པ་མཐོང་བྱུང་བས་སྨན་ཁང་དུ་བརྟག་དཔྱད་བྱེད་སྐབས་རྒྱང་སྒྲིབ་ཏུའུ་400”ཟིན་འདུག་ཅེས་ལྷ་སའི་གྲོང་མི་ལི་ཁའེ་ཡིས་སྨན་པའི་བརྟག་དཔྱད་བྱས་འབྲས་ཐོས་རྗེས་བུ་ལོ་དྲུག་སླེབས་ཙམ་ལ་མིག་ཤེལ་འདོགས་དགོས་བྱུང་སོང་ཞེས་ཧང་སངས་ཤིང་གནོང་འགྱོད་ཆེན་པོས་བཤད།

“རྒྱུན་དུ་ཕྲུ་གུར་ལྟ་རྟོག་བྱེད་ཁོམ་མེད་པས་བུ་སློབ་གྲྭ་གྲོལ་རྗེས་དང་གུང་གསེང་རིང་ཁང་པའི་ནང་གློག་ཀླད་དང་ལག་ཐོགས་ཁ་པར་བལྟས་ནས་ཡུན་རིང་སྡོད་པ་དང་ངས་ཀྱང་སྣང་བ་དེ་ཙམ་གཏོང་གི་མེད”ལི་ཁའེ་ཡིས། གལ་ཏེ་རང་ཉིད་རྒྱུན་དུ་ལས་བྲེལ་དེ་ཙམ་མེད་པར་ཕྲུ་གུར་ལྟ་རྟོག་བྱེད་པའི་དུས་ཚོད་ཡོད་ཚེ་བུ་ལའང་རྒྱང་སྒྲིབ་ཕོག་མི་སྲིད་ཅེས་བཤད།

ཕན་ཅུན་ཧྥེ་ཡིས་ཕྲུ་གུས་སློབ་ཚན་ཉན་སྐབས་སམ་ཡང་ན་སྦྱོང་ཚན་འབྲི་སྐབས་ངེས་པར་དུ་སྡོད་སྟངས་ཡག་པོ་རྒྱུན་འཁྱོངས་བྱེད་དགོས་པའི་གྲོས་འགོ་བཏོན་ཡོད། གལ་ཏེ་ཕྲུ་གུའི་སྡོད་སྟངས་ཡང་དག་མིན་ཚེ། ཁྱིམ་བདག་གིས་ངེས་པར་དུ་ལྟ་སྐུལ་བྱས་ནས་ཕྲུ་གུར་དུས་དང་རྣམ་པ་ཀུན་ཏུ་སྦྱོང་ཚན་འབྲི་སྐབས་སྡོད་སྟངས་ཡང་དག་པའི་གོམས་གཤིས་འཇགས་རྒྱུའི་དྲན་སྐུལ་བྱེད་དགོས། གཞན་ཡང་སློབ་ཆུང་སློབ་མར་གཉིད་ཆུ་ཚོད་10དང་སློབ་འབྲིང་སློབ་མར་གཉིད་ཆུ་ཚོད་8ཉལ་རྒྱུ་ཡོད་པའི་འགན་ལེན་བྱེད་དགོས། སློབ་གྲྭ་འབྲིང་ཆུང་གི་སློབ་མར་ངལ་གསོ་ཡག་པོ་རྒྱག་རྒྱུ་བྱུང་ཚེ་མིག་ལ་ངལ་གསོ་ཐེབས་ཐུབ།

དར་མ་དང་རྒན་རྒོན་གྱིས་དུས་བཀག་ལྟར་མིག་ལ་བརྟག་དཔྱད་བྱེད་དགོས་པའི་གྲོས་འགོ་བཏོན་པ།

གྲོང་མི་ལི་ལགས་ཀྱིས“ངའི་པཱ་ལགས་ལོ་ན་མཐོ་བའི་དབང་གིས་རྒྱུན་དུ་མིག་མདུན་གྱི་དངོས་པོ་གསལ་པོ་མཐོང་གི་མི་འདུག་པས་གྲོང་ཚོའི་ནང་སྨན་ཁང་མེད་སྟབས་ད་རེས་ཆེད་མངགས་ལྷ་སའི་སྨན་ཁང་ཆེ་སར་བརྟག་དཔྱད་བྱེད་པར་ཡོང་བ་ཡིན”“སྨན་པས་པཱ་ལགས་ཀྱི་མིག་ལ་སྐྱ་འགྲིབ་ཕོག་པས་གཤགས་བཅོས་བྱེད་དགོས་ཀྱི་རེད་ཅེས་བཤད་བྱུང་། པཱ་ལགས་རྒྱུན་དུ་ལག་ཐོགས་ཁ་པར་ལ་བལྟ་རྒྱུར་དགའ་པོ་ཡོད་ལ་ཁྱུག་དབྱིངས་གི་བརྙན་ཐུང་བལྟ་རྒྱུར་ཡང་དགའ་པོ་ཡོད། མིག་གིས་མི་མཐོང་སྟབས་ལག་ཐོགས་ཁ་པར་དེ་ཙམ་ལྟ་གི་མི་འདུག”ཅེས་བཤད།

ཕན་ཅུན་ཧྥེ་ཡིས། བོད་ཀྱི་ཆ་སྙོམས་ས་བབ་སྨི་4000ཡན་ཟིན་པ་དང་། མཐོ་ལ་གྲང་ངད་ཆེ་བ། གསོ་རླུང་ཉུང་བ། སྨུག་ཕྱིའི་འོད་ཤུགས་ཆེ་བ་སོགས་ཀྱིས་རྐྱེན་པས་སྐྱ་འགྲིབ་ཕོག་ཚད་ཧ་ཅང་མཐོ་པོ་ཡོད། ཕྱིར་སྐྱོད་སྐབས་ཚང་མར་རྒྱུན་གཏན་གྱི་འགོག་སྲུང་གོམས་གཤིས་འཇགས་པར་བྱེད་དགོས་པ་སྟེ། དཔེར་ན་ཕྱིར་སྐྱོད་སྐབས་མིག་ཤེལ་ནག་པོ་འདོགས་པ་དང་ཞྭ་མོ་གྱོན་ཏེ་ཉི་འོད་ཐད་ཀར་མི་ཕོག་པ་བྱས་ཚེ་མིག་ནད་ཕོག་པའི་ཉེན་ཁ་ཆུང་དུ་འགྲོ་ཐུབ་པ་ལྟ་བུའོ། དེ་དང་ཆབས་ཅིག སྔོ་ཚལ་མང་ཙམ་ཟ་བ་དང་འཚོ་བཅུདCདང་། ལོ་མའི་སེར་རྒྱུ། ཨ་ཤོམ་གྱི་སེར་རྒྱུ་བཅས་ཁ་གསབ་བྱས་ཏེ་མིག་གི་སྨུག་ཕྱིའི་འོད་འགོག་པའི་ནུས་པ་ལེགས་སུ་གཏོང་བ་དང་དུས་བཀག་ལྟར་མིག་ལ་བརྟག་དཔྱད་བྱེད་དགོས་པའི་གྲོས་འགོ་བཏོན་ཡོད།