གཞིས་རྩེ་གྲོང་ཁྱེར་དུ་སྙིང་ཁང་འདབ་ལོར་ཆད་སྐྱོན་བྱུང་བའི་ལྷན་སྐྱེས་སྙིང་ནད་བར་འཇུག་གསོ་བཅོས་ཐོག་མ་ལེགས་གྲུབ་བྱུང་བ།
ཉེ་ཆར། གཞིས་རྩེ་གྲོང་ཁྱེར་མི་དམངས་སྨན་ཁང་གིས་གྲོང་ཁྱེར་དེ་ཡོངས་ཀྱི་སྙིང་ཁང་འདབ་ལོར་ཆད་སྐྱོན་བྱུང་བའི་ལྷན་སྐྱེས་སྙིང་ནད་བར་འཇུག་གསོ་བཅོས་ཐོག་མ་བདེ་བླག་ངང་ལེགས་གྲུབ་བྱས་པ་དེའི་ཐོག་ནས། སྨན་ཁང་དེས་ལྷན་སྐྱེས་སྙིང་ནད་ཀྱི་བར་འཇུག་གསོ་བཅོས་ཐད་ཚད་བརྒལ་གསར་པ་བྱུང་བ་མཚོན་ཡོད།
གཤགས་བཅོས་དེར་ཆུ་ཚོད་ཕྱེད་ཀ་ཡང་འགོར་མེད་པ་དང་། མཚོ་དམག་དམག་ཁོངས་གསོ་རིག་སློབ་ཆེན་གྱི་ཞོར་གཏོགས་ཁྲང་ཧའེ་སྨན་ཁང་དང་ཧྲང་ཧའེ་གྲོང་ཁྱེར་མི་དམངས་སྨན་ཁང་བཅུ་པ་སོགས་ཀྱི་སྨན་བཅོས་རིགས་གཅིག་མཁས་ཅན་གྱིས་ས་གནས་དེ་གའི་སྨན་པའི་སྣེ་ཁྲིད་དེ་ཐུན་མོང་ཐོག་ལེགས་སྒྲུབ་བྱས་པ་རེད། གཤགས་བཅོས་བྱས་རྗེས་ཀྱི་སྒྲ་རླབས་བརྟག་དཔྱད་འབྲས་བུ་ལས་གཤགས་བཅོས་ཀྱི་ཕན་འབྲས་སྔོན་གཏན་འཁེལ་བའི་དམིགས་ཚད་དུ་བསླེབས་པ་མངོན་ཡོད། ནད་པ་དྲག་སྐྱེད་ཡག་པོ་བྱུང་ནས་གཤགས་བཅོས་བྱས་ཉིན་དེ་རང་དུ་ནད་ཁྲི་ལས་བབས་ཏེ་འགྲོ་སྐྱོད་ཐུབ་ཀྱི་ཡོད་པ་རེད།
ངོ་སྤྲོད་བྱས་པར་གཞིགས་ན། ཉེ་བའི་ལོ་ཤས་རིང་། གཞིས་རྩེ་གྲོང་ཁྱེར་མི་དམངས་སྨན་ཁང་གིས་རང་སྐྱོང་ལྗོངས་རིམ་པའི་ས་ཁོངས་སྨན་བཅོས་ལྟེ་གནས་འཛུགས་སྐྲུན་གྱི་དམིགས་ཚད་ལ་གཞིགས་ནས། སྨན་བཅོས་ཞབས་ཞུ་དང་། ཚན་རིག་ཞིབ་འཇུག ཤེས་ལྡན་པ་གསོ་སྐྱོང་། ས་ཁོངས་མཉམ་ལས། སྨན་ཁང་དོ་དམ་སོགས་ཀྱི་ཐད་འཕེལ་རྒྱས་ཆེན་པོ་བྱུང་ཡོད།