ཉེ་ཆར། གསར་འགོད་པར་རང་སྐྱོང་ལྗོངས་སློབ་གསོ་ཡིག་རྒྱུགས་ཁང་ནས་ཤེས་རྟོགས་བྱུང་བར། 2024ལོའི་བོད་ཀྱི་མཐོ་རྒྱུགས་ཟླ་6ཚེས་7ཉིན་ནས་ཚེས་9ཉིན་བར་གཏོང་རྒྱུ་ཡིན་ཞིང་། མིག་སྔར་ཡིག་རྒྱུགས་མ་བཏང་གོང་གི་གྲ་སྒྲིག་ལས་དོན་ཚང་མ་ལེགས་གྲུབ་ཟིན་པ་དང་། ལྗོངས་ཡོངས་སུ་རྒྱུགས་ཁུལ་10བཀོད་སྒྲིག་བྱས་པ། ཁྱོན་སློབ་མ་ཁྲི་3.6ཞུགས་ཀྱི་ཡོད་པ་རེད།

རང་ལྗོངས་ཀྱི་འདི་ལོའི་མཐོ་རྒྱུགས་ཀྱི་རྒྱུགས་རར་འཛུལ་བའི་བདེ་འཇགས་ཞིབ་བཤེར་ཐད་ངོ་རིས་ངོས་འཛིན་གྱིས་ཐོབ་ཐང་ར་སྤྲོད་བྱེད་པའི་མ་ལག་སྤྱོད་རྒྱུ་དང་། “རིག་ནུས་ཀྱི་བདེ་འཇགས་ཞིབ་བཤེར་དང་ལག་ཐོགས་ལྕགས་རིགས་འཚོལ་ཞིབ་སྒྲིག་ཆས”ཟུང་འབྲེལ་གྱིས་བཀག་སྡོམ་དངོས་པོར་ཞིབ་བཤེར་བྱེད་སྟངས་ལག་བསྟར་བྱས་པ་དང་འབྲེལ་སྐུད་མེད་ཀྱི་གློག་འཕྲིན་བརྡ་རྟགས་ཡོངས་སུ་བཀག་ནས་ལག་ཐོགས་ཁ་པར་རྒྱུགས་ཚུགས་སུ་འཁྱེར་མི་ཆོག་པ་དོན་འཁྱོལ་དང་། ཡིག་རྒྱུགས་ལས་དོན་པའི་གསོ་སྦྱོང་དཔྱད་ཞིབ་ཚང་མ་ཚད་ལོན་པ། རྒྱུགས་ཚུགས་ཀྱི་ལག་ཐོགས་ཁ་པར་གྱི་བརྡ་རྟགས་ཤུགས་ཚད་དམའ་རུ་དང་ལག་ཐོགས་ཁ་པར་གྱི་དྲ་རྒྱ་རང་འགུལ་ལེགས་གཏོང་ཚོད་འཛིན་བྱེད་པ། གསང་སྲུང་ཁང་གི་རིག་ནུས་སྐོར་ཞིབ་དང་རྒྱུགས་ཚུགས་ཀྱི་རིག་ནུས་སྐོར་ཞིབ་ཡོངས་ཁྱབ་ཐུབ་པ་བཅས་བྱས་ཡོད། མིག་སྔར་རང་སྐྱོང་ལྗོངས་ཀྱི་ཡིག་རྒྱུགས་སྐོར་ཞིབ་ཚོགས་ཆུང་རྒྱུགས་ཁུལ་ཁག་ཏུ་འབྱོར་ནས་ས་གནས་ཁག་ཏུ་རྩ་འཛུགས་ཀྱི་འགོ་ཁྲིད་ལ་ཤུགས་སྣོན་རྒྱག་པ་དང་། རྒྱུགས་ཤོག་བདེ་འཇགས་ལ་འགན་ལེན་བྱེད་པ། འཕྲོད་བསྟེན་རིམས་འགོག་བྱེད་ཐབས་དོན་འཁྱོལ་བྱེད་པ། འཕྲལ་སྡོམ་སྔོན་ཇུས་བཟོ་བ། ཞབས་ཞུ་དང་འགན་སྲུང་ཞིབ་ཚགས་སུ་གཏོང་བ་སོགས་ཀྱི་ཐད་གཙོ་གནད་དུ་ལྟ་སྐུལ་ཞིབ་བཤེར་བྱེད་པ་དང་མཐོ་རྒྱུགས་སྒྲིག་འཛུགས་ཀྱི་ལས་དོན་ཁག་ལ་ཤུགས་སྣོན་བརྒྱབ་སྟེ། ནུས་ཤུགས་ཡོད་རྒུས་རང་ལྗོངས་ཀྱི་མཐོ་རྒྱུགས་བརྟན་བརླིང་བདེ་བླག་དང་དྲང་གཞག་དྲང་བདེན་ངང་གཏོང་ཐུབ་པའི་འགན་ལེན་བྱས་ཡོད་པ་རེད།