བོད་ལྗོངས་ཉིན་རེའི་ཚགས་པར་ཐོག་གནས་ཚུལ་སྤེལ་བར་གཞིགས་ན། ཉེ་ཆར། བོད་རང་སྐྱོང་ལྗོངས་སློབ་གསོ་ཐིང་གིས་གཙོ་གཉེར་བྱས་པ་དང་། ལྷ་སའི་མངའ་རིས་ས་ཁུལ་མཐོ་རིམ་སློབ་འབྲིང་གིས་གཉེར་འགན་འཁུར་བའི་2024ལོའི་བོད་རང་སྐྱོང་ལྗོངས་ཀྱི་སློབ་གསོའི་ཁོངས་གཏོགས་ཀྱི“5·25”ཡི་སློབ་གྲྭ་འབྲིང་ཆུང་གི་སེམས་ཁམས་བདེ་ཐང་དྲིལ་བསྒྲགས་སློབ་གསོའི་ཟླ་བ་དང་ལྷ་སའི་མངའ་རིས་ས་ཁུལ་མཐོ་རིམ་སློབ་འབྲིང་གི“སློབ་གསོ་ལྔ་སེམས་ལ་འཇགས་པར་བྱས་ནས་མཉམ་དུ་མདུན་སྐྱོད་བྱེད”ཅེས་པའི་སེམས་ཁམས་བདེ་ཐང་དུས་ཚིགས་ཀྱི་བྱེད་སྒོ་སྐབས་གཉིས་པ་དངོས་སུ་འགོ་ཚུགས་ཡོད།

ད་ཐེངས་ཀྱི་བྱེད་སྒོས་སེམས་ཁམས་བདེ་ཐང་དུས་ཚིགས་ཀྱི་ཆེད་དོན་འཆད་ཁྲིད་དང་། སེམས་ཁམས་ཤེས་བྱའི་འགྲན་བསྡུར། སེམས་ཁམས་བདེ་ཐང་མྱོང་རོལ་སོགས་བརྗོད་དོན་གཙོ་བོའི་བྱེད་སྒོ་རབ་དང་རིམ་པ་སྤེལ་བ་བརྒྱུད། སློབ་མ་ཚོས་སེམས་ཁམས་བདེ་ཐང་གི་ཤེས་བྱར་སྔར་བས་རྒྱུས་ལོན་དང་། རང་ཉིད་ཀྱི་བསམ་པའི་འཁྱེར་སོ་དང་གནོན་ཤུགས་དེ་བས་སེལ་ཐབས་ཤེས་པ། སེམས་བག་ཡངས་པོ་སྐྱེད་སྲིང་བཅས་བྱས་ནས། སློབ་མ་ཚོར་ཡང་དག་པའི་སེམས་ཁམས་བདེ་ཐང་གི་འདུ་ཤེས་འཛུགས་རྒྱུར་ཁྲིད་སྟོན་གྱིས་རང་ངོས་སྙོམས་སྒྲིག་གི་འཇོན་ཐང་ཆེ་རུ་གཏོང་བ་དང་། ཧུར་སྐྱེད་ཡར་བརྩོན་གྱི་སྤྲོ་སྣང་ལྡན་པའི་སེམས་ཁམས་སྐྱེད་སྲིང་ཧུར་ཐག་བྱས་ཡོད།

ཤེས་རྟོགས་བྱུང་བར་གཞིགས་ན། 2023ལོའི་དཔྱིད་དུས་ཀྱི་སློབ་དུས་འགོ་ཚུགས་པའི་སྐབས། ལྷ་སའི་མངའ་རིས་ས་ཁུལ་མཐོ་རིམ་སློབ་འབྲིང་གིས་སེམས་ཁམས་བདེ་ཐང་དེ་སློབ་ཚན་བཀོད་སྒྲིག་ནང་བཅུག་སྟེ་ཆེད་ལས་སེམས་ཁམས་དགེ་རྒན་གསུམ་གྱིས་སློབ་ཚན་ཁྲིད་ཀྱི་ཡོད། དེ་དང་ཆབས་ཅིག་སློབ་གྲྭས་ལོ་རིམ་ཁག་གི་ཐུན་མོང་གི་བརྗོད་གཞིར་དམིགས་པ་དཔེར་ན། སེམས་བག་ཡངས་པོ་དང་། ཚེ་སྲོག་གི་སློབ་གསོ། ཡིག་རྒྱུགས་སྐབས་ཀྱི་སེམས་ཁམས་ཟུར་ཁྲིད། སློབ་མ་བུ་མོའི་སློབ་གསོ་སོགས་དུས་ངེས་མེད་ཀྱི་ཆེད་དོན་འཆད་ཁྲིད་བྱས་ཡོད། གོམ་སྟབས་རྗེས་མར་བོད་རང་སྐྱོང་ལྗོངས་སློབ་གསོ་ཐིང་གིས་གཏོགས་ཁོངས་ཀྱི་སློབ་གྲྭ་འབྲིང་ཆུང་གི་སློབ་གྲྭར་གཞོགས་འདེགས་བྱས་ཏེ། གཞོན་ནུའི་འཕེལ་རྒྱས་ལ་སྐུལ་འདེད་གཏོང་རྒྱུ་ལྟེ་བར་བཟུང་ནས་སེམས་ཁམས་བདེ་ཐང་སློབ་གསོའི་དཔུང་ཁག་འཛུགས་སྐྱོང་ལ་ཤུགས་སྣོན་བརྒྱབ་སྟེ། ཆ་འཕྲིན་གྱི་ལག་རྩལ་གང་ལེགས་སྤྱད་དེ་མི་སྣ་གསོ་སྐྱོང་གི་བྱ་ཐབས་གསར་གཏོད་བྱས་ནས་སློབ་མའི་སེམས་ཁམས་བདེ་ཐང་སློབ་གསོའི་ལས་དོན་གྱི་རྣམ་པ་གསར་པ་ཧུར་ཐག་གཏོད་རྒྱུ་རེད།