ཟླ་5ཚེས་25ཉིན། 2024ལོའི་བོད་རང་སྐྱོང་ལྗོངས་ཀྱི“རྒྱལ་ཡོངས་ཚན་རྩལ་བྱེད་སྒོའི་གཟའ་འཁོར”དང་རྒྱལ་ཡོངས་ཚན་རྩལ་ལས་དོན་པའི་ཉིན་མོའི་བྱེད་སྒོ་ལྷོ་ཁའི་མེ་འཁོར་བབས་ཚུགས་ཀྱི་ཐང་ཆེན་དུ་སྤེལ་འགོ་ཚུགས་ཤིང་། འགོ་ཚུགས་མཛད་སྒོ་དེ་ལྗོངས་ཏང་ཨུད་དྲིལ་བསྒྲགས་པུའུ་དང་། ལྗོངས་ཚན་རྩལ་ཐིང་། ལྗོངས་ཚན་རྩལ་མཐུན་ཚོགས། ལྷོ་ཁ་གྲོང་ཁྱེར་སྲིད་གཞུང་བཅས་ཀྱིས་གཙོ་གཉེར་བྱས་པ་རེད།

ཤེས་རྟོགས་བྱུང་བར་གཞིགས་ན། ཟླ་5ཚེས་25ཉིན་ནས་ཟླ་6ཚེས་1ཉིན་བར་ནི་2024ལོའི་རྒྱལ་ཡོངས་ཚན་རྩལ་བྱེད་སྒོའི་གཟའ་འཁོར་ཡིན་ཞིང་། “ཚན་རིག་མཁས་ཅན་གྱི་སྙིང་སྟོབས་དར་སྤེལ་བཏང་ནས་སྤྱི་ཚོགས་ཡོངས་ཀྱི་གསར་གཏོད་གསོན་ཤུགས་འཕེལ་བར་བྱེད་དགོས”ཞེས་པ་བརྗོད་དོན་གཙོ་བོར་བྱས་པ་དང་། ཟླ་5ཚེས་30ཉིན་ནི“རྒྱལ་ཡོངས་ཚན་རྩལ་ལས་དོན་པའི་ཉིན་མོ”ཐེངས་བརྒྱད་པ་དེ་རེད།

བོད་ཀྱི་བྱེད་སྒོའི་འགོ་ཚུགས་མཛད་སྒོའི་ཐོག་ཚན་རྩལ་གྱི་གྲུབ་འབྲས་འགྲེམས་སྟོན་དང་། ཚན་རིག་ཁྱབ་གདལ་གྱི་འཁྲབ་སྟོན། ཚན་རིག་ཁྱབ་གདལ་གྱི་སློབ་ཚན། ཚན་རིག་ཁྱབ་གདལ་ཤེས་བྱའི་བྱ་དགའ་ཡོད་པའི་དྲི་བ་དྲིས་ལན། རིག་རྩལ་འཁྲབ་སྟོན། འོས་འགན་སྨན་བཅོས། དེ་བཞིན་སྲིད་ཇུས་ཁྲིམས་སྲོལ་དྲིལ་བསྒྲགས་སོགས་བྱེད་སྒོ་མང་པོ་སྤེལ་ནས། ཚན་རྩལ་རྣམ་པའི་ཁེ་ལས་ཀྱིས་ཚན་རྩལ་གསར་གཏོད་ཐོན་རྫས་ས་གནས་ས་ཐོག་ཏུ་འགྲེམས་སྟོན་དང་འགྲེམས་འཚོང་བྱས་པ་རེད།

བྱེད་སྒོ་སྤེལ་ཡུལ་དུ་ལྷོ་ཁ་གྲོང་ཁྱེར་གྱིས་གྲོང་ཁྱེར་ཡོངས་ཀྱི་ཕུལ་བྱུང་གི་ཚན་རྩལ་ལས་དོན་པའི་འཐུས་མི་བཅུ་ལ་འཚམས་འདྲི་ཞུས་ནས་རྒྱ་ཆེའི་ཚན་རྩལ་ལས་དོན་པ་ཚོར་ཆུ་ཚད་མཐོ་བའི་ཚན་རྩལ་རང་ཚུགས་རང་དར་གྱི་གདོང་ལེན་དམག་དང་། ཚན་རྩལ་གསར་གཏོད་ཀྱི་སྔོན་སྐྱོད་པ། ཚན་རྩལ་གྲུབ་འབྲས་གཞན་སྒྱུར་བ། ཚན་རིག་སྙིང་སྟོབས་དར་སྤེལ་བ་བཅས་ཧུར་ཐག་བྱ་རྒྱུའི་ལྕག་སྐུལ་བྱས་པ་རེད། ཤེས་རྟོགས་བྱུང་བར་གཞིགས་ན། ཉེ་བའི་ལོ་ཤས་རིང་། ལྷོ་ཁ་གྲོང་ཁྱེར་གྱིས་ཚན་རྩལ་གསར་གཏོད་ལས་དོན་ལ་ཚད་མཐོའི་མཐོང་ཆེན་གྱིས་ལག་རྩལ་གསར་གཏོད་ཀྱི་ནུས་པ་ཆེ་རུ་བཏང་ནས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་ཡར་སྐུལ་སྲིད་ཇུས་བཏོན་པ་དང་། ཚན་རྩལ་ལ་བརྟེན་ནས་ཐོན་ལས་འཕེལ་རྒྱས་ལ་ནུས་པ་སྦྱིན་ནས་ཧའེ་སི་ཁོའོ་གསར་གཏོད་སྨན་དང་། ཨན་ཆི་སྐྱེ་ཕན་ཕྲ་སྲིན། ཆིང་ཅང་གསོ་རླུང་མཁོ་འདོན་འཕྲུལ་འཁོར། ཧུང་ནུང་སྒོ་ང་ཐོན་མང་བྱ་མོ། ཟངས་རིའི་རྒུན་ཆང་། ལྷུན་རྩེའི་ནས་ནག་སྦི་རག་སོགས་ཚབ་མཚོན་དུ་བྱས་པའི་ཚན་རྩལ་འདུས་ཚད་མཐོ་བའི་ལྷོ་ཁའི་ཐོན་རྫས་ཁག་གཅིག་རིམ་བཞིན་ལྗོངས་ཕྱི་ནང་གི་ཁྲོམ་རར་བཏོན་པ་རེད།

ངོ་སྤྲོད་བྱས་པར་གཞིགས་ན། ལྗོངས་ཡོངས་ཀྱི་གྲོང་ཁྱེར་དང་ས་ཁུལ་གྱིས་ས་ཁོངས་ཀྱི་ཁྱད་ཆོས་དང་ཟུང་འབྲེལ་དང་ཚན་རིག་ཁྱབ་གདལ་གྱི་རྣམ་པ་གསར་གཏོད་བྱས་ནས་བྱེད་སྒོ་རབ་དང་རིམ་པ་སྤེལ་ཞིང་། ལྷ་ས་གྲོང་ཁྱེར་གྱིས་གནམ་གཤིས་ཚན་རྩལ་གཟའ་འཁོར་དང་ས་ཡོམ་ཚན་རྩལ་གཟའ་འཁོར་གྱི་བྱེད་སྒོ་དུས་གཅིག་ཏུ་སྒྲིག་འཛུགས་བྱས་ནས་སྤེལ་བ་དང་། ལྷོ་ཁ་གྲོང་ཁྱེར་གྱིས“སློབ་གྲྭར་ཚན་རིག་ཁྱབ་གདལ་གཏོང་བའི”བྱེད་སྒོ་སྤེལ་བ། ཆབ་མདོ་གྲོང་ཁྱེར་གྱིས“རྒྱལ་སྲུང་གི་འདུ་ཤེས་ཟབ་ཏུ་བཏང་ནས་དགུང་སྔོན་ཕུགས་འདུན་དོན་གཉེར”གྱི་དྲ་ཐོག་གི་ཚན་རྩལ་གཟའ་འཁོར་གྱི་བྱེད་སྒོ་སྤེལ་བ། ནག་ཆུ་གྲོང་ཁྱེར་གྱིས་ཚན་རྩལ་གྱི་ཆེད་བསྐོས་ལས་བྱེད་པའི“དཔེ་མཚོན་བདམས་ནས་འགན་འཁྲི་འཁུར་བར་སྐུལ་ལྕག་བྱེད་པའི”སྤེལ་རེས་ཚོགས་འདུ་འཚོགས་པ་སོགས་རེད།