སློབ་ཆུང་དུས་མཚམས་ཀྱི་ཕྲུ་གུར་ཁྱིམ་ཚང་སློབ་གསོ་ གཏོང་ཐབས་ཀྱི་བསམ་ཚུལ་ཕྲན་བུ་གླེང་བ།
མི་ཞིག་གི་འཚར་ལོངས་བརྒྱུད་རིམ་ནི་ཐོག་མར་ཁྱིམ་ཚང་སློབ་གསོའི་ཁོར་ཡུག་ཁྲོད་ནས་རིམ་བཞིན་སློབ་གྲྭའི་སློབ་གསོ་དང་སྤྱི་ཚོགས་སློབ་གསོར་འཇུག་དགོས་པའི་རྣམ་པ་ཞིག་ཡིན་སྟབས། བརྒྱུད་རིམ་དེའི་ཁྲོད་ཁྱིམ་ཚང་སློབ་གསོ་ནི་སློབ་གྲྭའི་སློབ་གསོ་དང་སྤྱི་ཚོགས་སློབ་གསོའི་སྐས་འཛེགས་སམ་རྨང་གཞི་ལྟ་བུར་གྱུར་ཡོད་པས། ཁྱིམ་ཚང་སློབ་གསོའི་འགོ་ཡག་པོ་ཞིག་འཛུགས་དགོས་པའི་གལ་ཆེའི་རང་བཞིན་ཡང་མི་ཞིག་ཡིན་ན་ཆུང་ནས་བྱུང་། རྟ་ཞིག་ཡིན་ན་རྟེའུ་ལས་བྱུང་ཞེས་པའི་དཔེ་ལྟར་རོ། ཁྱིམ་བདག་ནི་ཕྲུ་གུ་ཚོའི་ཕ་མ་ཙམ་མ་ཟད་ཁྱིམ་ཚང་སློབ་གསོའི་གར་སྟེགས་ཐོག་གི་དགེ་རྒན་ཡང་ཡིན་པས། དུས་དང་རྣམ་པ་ཀུན་ཏུ་ངེས་དགོས་པ་ཞིག་ནི་ང་ཚོའི་སློབ་གསོ་གཏོང་ཡུལ་ནི་དགའ་སྐྱོ་ཆགས་སྡང་གི་ཚོར་བས་འདུས་པའི་མི་ཞིག་ཡིན་པ་དེ་རེད། དེས་ན་ད་གཟོད་ང་ཚོས་ཀྱང་སློབ་གསོའི་ཐབས་ལམ་དང་བྱེད་ཕྱོགས། དུས་རིམ་དང་ཁྱད་ཆོས་སོགས་ལ་ངེས་པར་དུ་སྣང་འཇོག་བྱེད་དགོས།
སློབ་ཆུང་ནི་ཕྲུ་གུ་ཚོ་ཡུན་རིང་འདྲིས་པའི་ཁྱིམ་ཚང་གི་ཁོར་ཡུག་ནས་ཁ་བྲལ་ཏེ་དངོས་སུ་སློབ་གྲྭའི་སློབ་གསོ་མྱོང་འགོ་ཚུགས་པ་མ་ཟད། མ་ལག་འཐུས་ཚང་གི་རིག་གནས་གང་རུང་སློབ་པའི་སྒོ་མོ་ཐོག་མ་དེའང་ཡིན་ཞེས་བཤད་ཆོག དེ་ལྟ་བུའི་ཁོར་ཡུག་ཁྱིམ་བདག་རྣམ་པས་བྱ་ཐབས་གང་འདྲ་ཞིག་གི་ལམ་ནས་ཁྱིམ་ཚང་སློབ་གསོ་དོན་གཉེར་བྱ་རྒྱུ་དེ་ཆེས་གལ་ཆེ་བའི་གནད་དོན་ཞིག་ཏུ་གྱུར་ཡོད། དེང་གི《སེམས་ཁམས་རིག་པ》ཡི་བཤད་སྲོལ་ལྟར་ན། སློབ་ཆུང་དུས་མཚམས་ཀྱི་ཕྲུ་གུར་སེམས་ཁམས་འཕེལ་རྒྱས་ཀྱི་ཁྱད་ཆོས་འདི་འདྲ་འགའ་ཡོད་པ་སྟེ། གཅིག བསམ་ཚོད་དང་རིག་སྟོབས་འཕེལ་རྒྱས་མྱུར་བ་དང་། སློབ་ཆུང་དུས་ནི་རིག་སྟོབས་འཕེལ་རྒྱས་འགྲོ་བའི་དུས་སྐབས་བཟང་ཤོས་ཤིག་ཡིན་པའི་ངོས་འཛིན་བྱེད་ཀྱི་ཡོད། གཉིས། མ་གཞི་སློབ་ཆུང་སློབ་མའི་སེམས་ཁམས་འཕེལ་རྒྱས་ལྟོས་བཅས་ཀྱིས་མྱུར་པོར་འདོད་ཀྱང་། སློབ་འབྲིང་སློབ་མ་དང་བསྡུར་ན། ཅུང་དོ་སྙོམས་ཀྱི་ཁྱད་ཆོས་ལྡན་ཡོད་པ། གསུམ། སློབ་ཆུང་སློབ་མར་འཚོ་བའི་ཉམས་མྱོང་མང་པོ་མེད་ནའང་། སེམས་ཁོང་གི་འཇིག་རྟེན་ནི་དྭངས་གཙང་ལྷད་མེད་ཅིག་ཡིན་ཕྱིར། དུས་སྐབས་དེའི་རིང་ཕ་མ་དང་དགེ་རྒན་སོགས་ཀུན་གྱིས་རྒྱུས་ལོན་དང་དམ་འཛིན་བྱེད་སླ་ཤོས་ཀྱི་དུས་ཤིག་ཡིན་པར་འདོད། དེས་ན་ཁོ་ཚོའི་སེམས་ཁམས་འཕེལ་རྒྱས་ཀྱི་ཁྱད་ཆོས་དང་བསྟུན་ནས་སློབ་གསོ་གཏོང་ཐབས་སྐོར་ལ་རང་གི་བསམ་ཚུལ་འགའ་ཞིག་གླེང་བར་བྱ།
གཅིག རང་དཔེ་གཞན་སྟོན་གྱི་ལམ་ནས་བུ་ཕྲུག་ལ་སློབ་གསོ་རྒྱག་པ།
སློབ་ཆུང་གི་དུས་མཚམས་ནི་མི་ཚེའི་ལམ་བུའི་ཐོག་བསམ་སྤྱོད་གཉིས་ཀྱི་རྨང་གཞི་འཛུགས་པའི་དུས་སྐབས་གལ་ཆེན་ཞིག་ཡིན་པས། ཁྱིམ་བདག་ཚོས་ཁ་ཏ་བསླབ་བྱ་ཙམ་མ་ཟད་རང་ཉིད་ཀྱི་བྱ་སྤྱོད་ངོ་མའི་ལམ་ནས་མིག་དཔེ་བཟང་པོ་ཞིག་སྟོན་རྒྱུ་ནི་སློབ་གསོ་རྒྱག་སྟངས་གསོན་པོ་ཞིག་དང་། སློབ་གསོའི་ནུས་པའང་ཆེ་ཤོས་སུ་གྱུར་ཐུབ། 《ཁ་ཆེ་ཕ་ལུ》ལས། བྱ་ལུགས་བྱེད་ལུགས་ལྡན་པའི་ཕ་རྒན་ཚོ། འདོད་པ་ཅན་གྱི་ཆོས་པ་བརྒྱ་ལས་ལྷག་ཅེས་པ་ལྟར་ཁྱིམ་ཚང་གི་འཚོ་བའི་ནང་ཕ་མ་ཚོས་རང་ཉིད་ནས་འགོ་བརྩམས་ཏེ་རྒན་པར་གུས་ཞབས་དང་ཆུང་བར་བྱམས་སྐྱོང་། ཤོ་སྦག་རྒྱན་བཙུགས་ལ་སོགས་པའི་སྲོལ་ངན་མཐའ་དག་དང་རིང་དུ་བྲལ་ནས་འཆམ་མཐུན་ལྡན་པའི་ཁྱིམ་ཚང་གི་ཁོར་ཡུག་ཞིག་བསྐྲུན་ཚེ། བཤད་པ་བརྒྱ་ལས་མཐོང་བ་གཅིག་བདེན་པའི་གནས་ལུགས་བཞིན་ཕྲུ་གུ་ཚོའི་མ་འོངས་པའི་འཚོ་བའི་ནང་ཕ་མ་བཟང་པོའི་ཤུགས་རྐྱེན་ཐེབས་ཏེ། ཡ་རབས་ཚུལ་ལྡན་གྱི་མི་ཞིག་བྱེད་པའི་གོམས་གཤིས་འཇགས་ངེས་ཡིན།
གཉིས། ཕྲུ་གུས་སློབ་སྦྱོང་ལ་འཛིན་པའི་ཕྲུ་གུའི་ཡང་དག་པའི་འདུ་ཤེས་གསོ་སྐྱོང་བྱེད་དགོས།
དེང་དུས་ཀྱི་དངོས་ཡོད་འཚོ་བའི་ཁྲོད་ཁྱིམ་བདག་རེ་འགས་ཕྲུ་གུའི་ཡིག་ཚད་ཀྱི་སྐར་གྲངས་ལ་གཞིགས་ནས། དངུལ་གྱི་བྱ་དགའ་སྤྲོད་པ་སོགས་ཀྱི་བྱ་ཐབས་སྤྱོད་ཀྱི་ཡོད། བྱ་ཐབས་དེ་དག་གིས་སློབ་སྦྱོང་ལ་འཛིན་པའི་ཕྲུ་གུའི་འདུ་ཤེས་ལ་ཤུགས་རྐྱེན་ངེས་ཅན་ཐེབས་ཀྱི་ཡོད། ཡུན་རིང་དེ་ལྟར་བྱས་པ་བརྒྱུད་མཐར་ཕྲུ་གུའི་བསམ་པར། སློབ་སྦྱོང་བྱེད་པ་ནི་དངུལ་གྱི་ཆེདདུ་ཁོ་ན་ཡིན་པ་དང་དངུལ་ནི་ཤེས་བྱ་ལས་ཀྱང་ལྷག་པ་ཡོད་པའི་ཚོར་བ་མི་སྐྱེ་བའི་ངེས་པ་མེད། དེར་བརྟེན་དཔྱོད་ལྡན་གྱི་ཕ་མ་ཞིག་ཡིན་ཕྱིན་རང་གི་ཕྲུ་གུར་རིག་གནས་ལ་མཐོང་ཆེན་བྱེད་དགོས་པའི་སློབ་གསོ་གཏོང་བ་དང་རིག་གནས་སྦྱངས་པའི་མཐར་ཐུག་གི་དམིགས་ཡུལ་ནི། མིག་མདུན་གྱི་ཁེ་ཕན་ཆུང་ངུ་ཞིག་ཐོབ་ཆེད་ཙམ་མིན་པར་རང་ཉིད་ཡར་རྒྱས་ཡོང་བ་དང་ཕྲུ་གུ་བཟང་པོ་ཞིག་བྱ་རྒྱུ་དེ་ཡིན་པ་སོགས་དྲང་ཕྱོགས་ཀྱི་སྐུལ་མ་དང་བསྔགས་བརྗོད་བྱེད་པའམ་ཡང་ན། ཆེས་དོན་སྙིང་ལྡན་པའི་གསང་བའི“ཁ་ཆད”འདྲ་བཟོས་ནས་ཕྲུ་གུར་ཡང་དག་པའི་སློབ་སྦྱོང་གི་འདུ་ཤེས་གསོ་སྐྱོང་བྱེད་དགོས།
གསུམ། ཕྲུ་གུར་ཡིད་ཆེས་དང་རེ་བ་ནན་པོ་འདོན་དགོས།
སྤྱོད་ཡོན་གཉིས་ལྡན་གྱི་ཕྲུ་གུ་བཟང་པོ་ཞིག་གསོ་སྐྱོང་བྱེད་པར་ཁོ་ཚོའི་དགེ་མཚན་ལ་བསྟོད་ནས་ཡར་རྒྱས་ཀྱི་གོམ་པ་སྤོ་རུ་འཇུག་རྒྱུ་ཙམ་མ་ཟད། མི་འདང་བའི་ཆའམ་ཞན་ཆ་བཙལ་འཚོལ་གྱིས་བླང་དོར་གྱི་ལམ་སྟོན་བྱ་རྒྱུ་དེ་རེད། སློབ་ཆུང་གི་དུས་ཀྱི་སློབ་མའི་སེམས་ཁམས་ནི་སྤོབས་སེམས་ཆེ་ལ་ཡར་བརྩོན་ལ་སྤྲོ་བའི་བརྒྱུད་རིམ་ཞིག་ཏུ་གནས་ཡོད་པས། ཁྱིམ་བདག་ཚོས་དུས་དང་རྣམ་པ་ཀུན་ཏུ་ཡིད་ཆེས་དང་རྒྱབ་སྐྱོར་བྱ་རྒྱུ་དེ་ཧ་ཅང་གལ་ཆེན་ཞིག་ཡིན། ཕྲུ་གུར་ཡིད་ཆེས་ཞེས་པ་ནི། ཕྲུ་གུའི་བྱ་སྤྱོད་དང་སློབ་སྦྱོང་གི་གྲུབ་འབྲས་ལ་ཡང་དག་པའི་གདེང་འཇོག་བྱས་ནས། ཁོ་ཚོའི་དགེ་མཚན་མཐོང་བ་དང་། ཁོ་ཚོར་ཞན་ཆ་ཡོད་རུང་ལེགས་བཅོས་ཐུབ་པ་ཞིག་དང་ཡར་ཐོན་གྱི་རེ་བ་ཡོད་པ་ཞིག་ལ་ཡིད་ཆེས་བྱེད་དགོས། ཞེས་པ་ལྟར་རེ་བ་དང་སྐུལ་མའི་ལམ་ནས་ཕྲུ་གུའི་རང་གཤིས་སུ་ཡོད་པའི་ཡར་བརྩོན་དང་སྤོབས་སེམས་ཀྱི་ཆ་དེ་སྔོག་འདོན་གང་ལེགས་བྱེད་དགོས། འོན་ཀྱང་ཕྲུ་གུར་ཡིད་ཆེས་ཡོད་ཅེས་བློས་འགེལ་རྐྱང་གིས་ཁོ་ཚོའི་བསམ་སྤྱོད་དང་སློབ་སྦྱོང་ལ་འགན་རྩ་བ་ནས་མ་འཁུར་ན་མི་འགྲིག
ཁྱིམ་ཚང་སློབ་གསོའི་བརྒྱུད་རིམ་ནང་གལ་ཏེ་ཕ་མས་ཕྲུ་གུར་བྱམས་ཐལ་ཤོར་ནས་གཅེས་ལང་གཏོང་བའམ་བདག་མེད་དུ་འཇོག་པ། ཡང་ན་རེ་བ་མཐོ་དྲགས་པ། ནན་དྲགས་པ། ཕྲུ་གུར་སློབ་གསོ་གཏོང་ཕྱོགས་ཐད་ཕ་མ་གཉིས་པོ་བློ་མི་མཐུན་པ། སློབ་གསོ་གཏོང་ཐབས་ཚན་རིག་དང་མི་མཐུན་པ་སོགས་ཀྱི་སྣང་ཚུལ་ཡོད་ཚེ་ཁྱིམ་ཚང་སློབ་གསོའི་ཕན་འབྲས་ཆུང་དུ་འགྲོ་བའམ་ཕྲུ་གུའི་འཚར་ལོངས་ལ་གནོད་པ་ཕོག་ངེས། ཁྱིམ་བདག་མི་ཉུང་བ་ཞིག་གིས་ཁྱིམ་ཚང་སློབ་གསོ་ནི་ཕྲུ་གུ་གཅུན་རྒྱུ་དེ་ཡིན་པར་ངོས་འཛིན་བྱེད་ཀྱི་ཡོད་མོད། ཚན་རིག་དང་མཐུན་པའི་ཁྱིམ་ཚང་སློབ་གསོའི་ནང་དོན་ལ། “གཙོ་བོ་ཀུན་སྤྱོད་དང་ཤེས་རིག ལུས་རྩལ། མཛེས་རིས། ངལ་རྩོལ་བཅས་ཁྱོན་ཡོངས་ནས་འཕེལ་རྒྱས་ཡོང་བ་བྱ་རྒྱུའི་དོན་ཚན་ལྔ་ཚུད་ཡོད།
ལོ་ཆུང་བྱིས་པའི་ལྷན་སྐྱེས་ཀྱི་རང་གཤིས་ལ་གཡོ་སྒྱུ་དང་རྫུན་གྱི་གཡའ་དང་བྲལ་གཤིས། ཁྱིམ་བདག་རྣམ་པས་རང་དཔེ་གཞན་སྟོན་གྱིས་སློབ་གསོ་གཏོང་རྒྱུ་དེ་སློབ་ཆུང་སློབ་མ་ཞིག་གི་ངོས་ནས་བརྗོད་ན་ཕན་འབྲས་ཆེ་ཤོས་ཀྱི་སློབ་གསོ་གཏོང་ཐབས་ཤིག་ཡིན་ནོ། འདིར་ཆེད་དུ་བརྗོད་དགོས་པ་ཞིག་ལ“འདྲ་མཉམ་དང་འཆམ་མཐུན་གྱི་ཁྱིམ་ཚང་ཁོར་ཡུག་ཞིག་ཡོད་པ་དང་བྱམས་བརྩེ་དང་ནན་པོ་ཟུང་དུ་འབྲེལ་བའི་ཁྱིམ་ཚང་གི་སློབ་གསོ་གཏོང་བ། ཕྲུ་གུར་རང་རྐྱ་འཕེར་བ་དང་བློ་སྟོབས་དང་ལྡན་པ། གསར་གཏོད་བྱ་རྒྱུར་སྐུལ་འདེད་གཏོང་བ་བཅས་ཀྱི་ལམ་ནས་ཁྱིམ་ཚང་གི་ཁོར་ཡུག་བཟང་པོ་ཞིག་བསྐྲུན་པར་ཁྱིམ་བདག་རྣམ་པས་ཕྲུ་གུ་ཚོའི་སློབ་སྦྱོང་གི་ཧུར་སེམས་སྐོང་འཐེན་བྱེད་སྐབས་རེ་བ་འོས་འཚམ་འདོན་པ་དང་། དོན་དངོས་ལ་བསྟུན་ནས་བསླབ་བྱ་བྱེད་པ། གནས་ལུགས་རྒྱུ་མཚན་ཤོད་པ། སེམས་ཁུར་བྱེད་པ་སོགས་དྲང་ཕྱོགས་ཀྱི་རྣམ་འགྱུར་ཐོག་ནས་འཇམ་རྩུབ་རན་པོས་གོ་བསྐོན་བློ་འགུག་བྱེད་དགོས་པ་ལས་རྩུབ་ཐལ་དང་འཇམ་ཐལ་དུ་ཤོར་མི་རུང་། ལྷག་དོན་དུ་ཕྲུ་གུ་གཅིག་ལས་མེད་པའི་ཁྱིམ་ཚང་ནང་ཕྲུ་གུ་གཅིག་པུ་དེ་ནང་གི་ནོར་བུ་ལྟར་དུ་བརྩིས་ནས། བྱམས་ཐལ་དུ་ཤོར་ཉེན་ཆེ་་བས། དེ་དོན་ལ་དགོངས་བཞེས་ཀྱིས་ཕྲུ་གུའི་ན་ཚོད་དང་ལོ་རིམ། གཤིས་ཀའི་ཁྱད་ཆོས་ལ་གཞིགས་ནས་ཁྱིམ་ཚང་སློབ་གསོ་གཏོང་དགོས་པ་དང་ཕྲུ་གུའི་བྱ་སྤྱོད་དང་སློབ་སྦྱོང་སོགས་ལ་ཨ་ན་ཨུ་ཚུགས་དང་བཙན་ཤེད་མིན་པའི་ཐོག་ནས་རེ་བ་ཅུང་ནན་པོ་འདོན་དགོས་སོ། (ལྷ་ས་གྲོང་ཁྱེར་ཚོད་ལྟའི་སློབ་ཆུང་གི་བློ་བཟང་ཆོས་སྒྲོན་གྱིས)