ཞོགས་པ་སྔ་པོ་ནས་ནག་ཆུ་གྲོང་ཁྱེར་ལྷ་རི་རྫོང་སྨི་ཏི་ཁ་ཤང་འཕྲོད་བསྟེན་ཁང་དུ་ནད་པས་ཁེངས། “ཕྲུ་གུ་གློ་མང་པོ་རྒྱག་གི་འདུག་གམ། ཟ་མ་བཟས་རྗེས་སྐྱུག་གི་འདུག་གམ། སྣ་ཆུ་དོན་གྱི་འདུག་གམ”ཞེས་སྨན་པ་ཆོས་གྲུབ་ཀྱིས་ངང་རྒྱུད་རིང་པོས་སྨན་བཅོས་བྱེད་པར་ཡོང་བའི་ནད་པར་སྐད་ཆ་དྲིས་པ་དང་འབྲེལ་ཁོང་ཚོའི་གཟུགས་པོར་བརྟག་དཔྱད་ཞིབ་ཕྲ་བྱས།

ལོ་མང་རིང་ཆོས་གྲུབ་ཀྱིས་སྨི་ཏི་ཁ་ཤང་གི་ཡུལ་མི་རྣམས་རང་ཉིད་ཀྱི་གཉེན་ཉེར་བརྩིས་ནས་བྱང་ཆུབ་པའི་སྨན་བཅོས་ལག་རྩལ་སྤྱད་དེ་ཡུལ་མི་རྣམས་ལ་ཞབས་འདེགས་ཞུ་བ་དང་རང་ནུས་གང་ཡོད་ཀྱིས་དཀའ་ངལ་ཡོད་པའི་མང་ཚོགས་ལ་རོགས་རམ་བྱས་ནས་ཡུལ་མི་རྣམས་ཀྱི་བདེ་ཐང་ལ་གཡས་གཞོགས་གཡོན་འདེགས་བྱེད་ཀྱི་ཡོད།

ལོ་16སྨན་བཅོས་ལས་ལ་གཞོལ་ནས་གྲོང་མིའི་སེམས་ཀྱི་རྟེན་སར་གྱུར་པ།

སྨན་སྒམ་ཆུང་ཆུང་ཁྱེར་ནས་ས་ཕྱོགས་གང་སར་བསྐྱོད་ཅིང་། ཆུང་དུས་ནས་སྨི་ཏི་ཁ་ཤང་དུ་འཚོ་བ་སྐྱེལ་བའི་ཆོས་གྲུབ་ཀྱིས་ཡུལ་དེ་གའི་ཡུལ་མིར་སྤུས་ལེགས་དང་སྟབས་བདེ་བའི་སྨན་བཅོས་ཞབས་འདེགས་མཁོ་བ་ཤེས་ཏེ་སློབ་ཆེན་ཐོན་རྗེས་སྨི་ཏི་ཁ་ཤང་དུ་ལོག་ནས་གྲོང་གསེབ་ཀྱི་སྨན་པ་ཞིག་བྱས། ནད་པའི་ཁྱིམ་དུ་བསྐྱོད་ནས་བརྟག་དཔྱད་བྱེད་པ་དང་དཀའ་ངལ་ཡོད་པའི་ཁྱིམ་ཚང་ལ་སྨན་རིན་མི་དགོས་པར་སྨན་རྫས་སྐྱེལ་བ་སོགས་ལོ་16རིང་ནད་པས་ག་དུས་འབོད་ཀྱང་དེ་འཕྲལ་འབྱོར་གྱི་ཡོད།

“འདི་གར་ངའི་ཕ་ཡུལ་ཡིན་པས་ང་འདི་གར་ལོག་ནས་སྦྱངས་པའི་ཤེས་བྱ་སྤྱད་དེ་ཡུལ་མི་ཚོའི་བདེ་ཐང་སྲུང་སྐྱོང་བྱེད་ཀྱི་ཡིན”ཞེས་ཆོས་གྲུབ་ཀྱིས་དེ་ལྟར་ཤོད་ཀྱི་ཡོད་ལ་དེ་ལྟར་ཡང་བྱེད་ཀྱི་ཡོད། “རང་ཉིད་ཀྱི་གདམ་གར་འགྱོད་པ་གཏན་ནས་སྐྱེ་གི་མི་འདུག ངའི་རོགས་རམ་འོག་ཡུལ་མི་ཚོའི་ན་ཟུག་སེལ་ཞིང་གཟུགས་པོ་ཇེ་ཡག་ཏུ་སོང་བ་མཐོང་ཐེངས་རེར་ང་ལ་བདེ་སྐྱིད་ཀྱི་ཚོར་སྣང་ཞིག་ཡོང་གི་འདུག”ཅེས་ཆོས་གྲུབ་ཀྱིས་སྤོབས་པ་ཆེན་པོས་བཤད།

ནད་པར་དགོས་མཁོ་ཡོད་ཚེ་རྐང་ཐང་མར་སྐྱོད་དགོས་ཀྱང་འཛེམ་ཟོན་བྱེད་ཀྱི་མེད་པ།

སྨི་ཏི་ཁ་ཤང་གི་དབྱར་ཁའི་ཆར་དུས་རིང་ཞིང་འབྲོག་རའི་བར་གྱི་ལམ་ཐག་རིང་པོ་ཡོད་པས་གངས་མ་ཆར་གྱི་གནམ་གཤིས་བསྟན་ཚེ་ཆོས་གྲུབ་ཀྱི་སྨན་བཅོས་ལ་འགོག་རྐྱེན་སྣ་ཚོགས་བཟོ་གི་ཡོད། “རླུང་རྟ་ཡག་དུས་རྟ་བཞོན་ཐུབ་ཀྱང་མང་ཆེ་བར་རྐང་ཐང་མར་ཡུལ་མིར་སྨན་བཅོས་བྱེད་པར་འགྲོ་དགོས་ཀྱི་ཡོད”ཅེས་ཆོས་གྲུབ་ཀྱིས་བཤད།

“སྨན་པ་ཆོས་གྲུབ་ལགས། ང་ནི་ན་གླིང་དཀར་གྲོང་ཚོའི་ཚེ་རིང་མགོན་པོ་ཡིན། ང་ཚོའི་གྲོང་ཚོའི་མི་ཞིག་གཟུགས་པོ་བདེ་པོ་མི་འདུག་པས་ཁྱེད་རང་གཅིག་ཕེབས་ན་ཨེ་ཡོང”ཞེས་པའི་ཁ་པར་འབྱོར་རྗེས། ཆོས་གྲུབ་ཀྱིས་ལག་ཐོག་གི་ལས་ཀ་བཞག་ནས་མྱུར་དུ་ན་གླིང་དཀར་གྲོང་ཚོར་བསྐྱོད། “ཉིན་གཉིས་གོང་ཁ་བ་བབས་མ་ཐག་ཡིན་པས་གྲོང་ཚོའི་ལམ་བུར་རླངས་འཁོར་སྐྱོད་ཐབས་བྲལ་བར་བརྟེན་རྐང་ཐང་མར་འགྲོ་རྒྱུ་ལས་ཐབས་གཞན་མེད”ཅེས་ཆོས་གྲུབ་ཀྱིས་བཤད།

ཆོས་གྲུབ་ཀྱི་སེམས་ནང་ཡུལ་མིའི་བདེ་ཐང་གི་གནས་ཚུལ་ཚང་མ་ངེས་ཤིང་། ལོ་མང་རིང་དེ་གར་རྩ་བ་ཚུགས་པས་ཤང་དང་ཐ་ན་གྲོང་ཚོའི་ནང་སུ་ལ་གཅོང་ནད་ཡོད་པ་དང་། སུའི་ནད་གཞི་ཚབས་ལྕི་བ། སུ་ལ་དེ་བས་དོ་སྣང་བྱེད་དགོས་པ་བཅས་ཚང་མ་ཁོང་གི་སེམས་ལ་གསལ་གསལ་ཐིང་ཐིང་ངེས་ཡོད།

བྱམས་སེམས་ཆེ་བས་གྲོང་མི་ཚོས་ཁོང་གཉེན་ཉེར་བརྩི་བ།

སྨི་ཏི་ཁ་ཤང་གི་གྲོང་ཚོ་གསུམ་པའི་གུ་གུག་འདི་ལོ་ལོ་65ལ་སླེབས་པ་དང་། ཁོང་ཁྲག་ཤེད་མཐོ་བ་དང་མཁྲིས་ནད་ཡོད་པ་མ་ཟད། ད་དུང་རྒྱུན་དུ་མགོ་ན་བ་དང་གློ་ལུ་ཡི་ཡོད་པས་ཆོས་གྲུབ་ཀྱིས་གནམ་གཤིས་ཚ་གྲང་ག་དུས་ཡིན་རུང་དུས་ཐོག་ཏུ་གུ་གུག་གི་གཟུཌ་པོའི་གནས་ཚུལ་སྐད་ཆ་འདྲི་བར་འགྲོ་བ་དང་། གུ་གུག་ལ་སྨན་བཅོས་ལ་གཞོགས་འདེགས་དང་བློ་བག་ཡངས་པོ་བྱེད་དགོས་པའི་ཁ་ཏ་བསླབ་བྱ་བྱེད་ཀྱི་ཡོད། མ་གཞི་གུ་གུག་གི་ནད་གཞི་རྩ་བཅོས་བྱེད་ཐབས་བྲལ་ཀྱང་གཟུཌ་པོའི་གནས་ཚུལ་ཡག་པོ་ཡོད། “སྨན་པ་ཆོས་གྲུབ་ནི་མི་བཟང་པོ་ཞིག་ཡིན་པ་མ་ཟད། རྟག་ཏུ་རང་འགུལ་ངང་ང་ལ་ལྟ་བར་ཡོང་གི་ཡོད། ངས་ཁོང་སྔ་ས་ནས་གཉེན་ཉེར་བརྩི་གི་ཡོད”ཅེས་གུ་གུག་གིས་བཤད།

“སྨི་ཏི་ཁ་ཤང་འཕྲོད་བསྟེན་ཁང་གི་རྒན་ཆོས་གྲུབ་ལགས་ནི་སྨན་བཅོས་ལག་རྩལ་བྱང་ཆུབ་ལ་ད་དུང་ངང་རྒྱུད་རིང་པོ་ཡོད། ཐེངས་ཤིག་ཁ་བ་ཆེན་པོ་བབས་ནས་ལམ་འགག་དུས་གྲོང་ཚོའི་ནང་གི་རྒན་རྒོན་ཞིག་ལ་གློ་བུར་དུ་ནད་ཕོག་པས་ང་ཚོས་འཕྲལ་མར་ཁོང་ལ་ཁ་པར་བརྒྱབ་པ་ཡིན། ཁོང་གིས་གནས་ཚུལ་ཤེས་རྟོགས་སྟབས་བདེ་བྱུང་རྗེས་ལམ་སེང་སླེབས་བྱུང་། སྟབས་ལེགས་པ་ཞིག་ལ་རྒན་རྒོན་གྱི་གནས་ཚུལ་ཚང་མ་ཁོང་གིས་གསལ་པོར་ཤེས་ཀྱི་ཡོད་པར་བརྟེན་དུས་ཐོག་ཏུ་སྐྱོབ་ཐུབ་སོང་། དེས་མིན་ན་གནས་ཚུལ་ཆེན་པོ་ལྷག་སྲིད”ཅེས་སྨི་ཏི་ཁ་ཤང་ན་གླིང་དཀར་གྲོང་ཚོའི་གྲོང་མི་ཚེ་རིང་མགོན་པོས་དེ་ལྟར་བཤད།

ལོ་16རིང་ཁོང་གིས་ཉིན་གཅིག་ལྟར་གཞི་རིམ་དུ་རྩ་བ་ཚུགས་ནས་སྨན་པའི་བྱམས་སེམས་དང་སྨན་བཅོས་ལག་རྩལ་ལ་བརྟེན་ནས་མི་སེར་གྱི་ན་ཟུག་སེལ་རོགས་བྱས་པ་དང་སྨན་པའི་ནད་བཅོས་སྲོག་སྐྱོབ་ཀྱི་ཀུན་སྤྱོད་ལ་མང་ཚོགས་ཀྱི་བསྔགས་བརྗོད་ཐོབ་པ་ནི་ཆོས་གྲུབ་ཀྱི་མཚོན་ཚུལ་ངོ་མ་ཞིག་ཡིན་ལ། བོད་ཀྱི་གྲོང་གསེབ་ཀྱི་སྨན་པ་ཁྲི་སྟོང་མང་པོའི་བསྡུས་རིས་ཤིག་ཀྱང་ཡིན།