རང་སྐྱོང་ལྗོངས་ཀྱིས་རྒྱལ་སྤྱིའི་སྨན་གཡོག་དུས་ཆེན་ལ་རྟེན་འབྲེལ་ཞུ་བའི་ཚོགས་ཆེན་འཚོགས་པ།
ལྗོངས་ཡོངས་ཀྱི་སྨན་གཡོག་ལས་དོན་པས་ནད་ཐོག་སྨན་བཅོས་ཀྱི་འཐབ་ཕྱོགས་དང་པོར་གཞི་ཚུགས་ཏེ། ལྷག་བསམ་རྣམ་དག་ངང་རང་འགན་གཙང་མར་བསྒྲུབས་པའི་མི་སེམས་འགུལ་བའི་བྱས་རྗེས་དྲིལ་བསྒྲགས་རྒྱ་ཁྱབ་བྱེད་ཆེད་དང་ལྗོངས་ཡོངས་ཀྱི་སྨན་གཡོག་ལས་དོན་པར་གཟི་བརྗིད་སྲོལ་རྒྱུན་རྒྱུན་འཛིན་བྱེད་པར་སྐུལ་ལྕག་གཏོང་ཆེད། ཚེས་11ཉིན་གྱི་ཕྱི་དྲོར། རང་སྐྱོང་ལྗོངས་འཕྲོད་བསྟེན་བདེ་ཐང་ཨུ་ལྷན་གྱིས་ལྷ་སར“སྨན་གཡོག་མཛེས་ཤོས། ཁྱེད་ཀྱི་བཀའ་དྲིན་ཚོར”ཞེས་པ་བརྗོད་དོན་གཙོ་བོར་བྱས་པའི་རང་སྐྱོང་ལྗོངས་རྒྱལ་སྤྱིའི་སྨན་གཡོག་དུས་ཆེན་ལ་རྟེན་འབྲེལ་ཞུ་བའི་ཚོགས་ཆེན་འཚོགས་ནས་ལྗོངས་ཡོངས་ཀྱི་སྨན་གཡོག་ལས་དོན་པར་དུས་ཆེན་གྱི་སྨོན་འདུན་ཞུས་པ་རེད།
དུས་ཡུན་རིང་པོའི་ནང་རང་ལྗོངས་ཀྱི་རྒྱ་ཆེའི་སྨན་གཡོག་ལས་དོན་པས་ཐོག་མཐའ་བར་གསུམ་དུ་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱེད་པ་དང་། ཐོག་མཐའ་བར་གསུམ་དུ་མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་བློ་མཐའ་འཁྱོངས་བྱེད་པ། “ཚེ་སྲོག་གོང་བཀུར་དང་། སྲོག་སྐྱོབ་ནད་བཅོས། ལེགས་སྐྱེས་འབུལ་བ། བརྩེ་སེམས་རྒྱུན་བཅངས”བཅས་ཀྱི་བླ་ན་མེད་པའི་ལས་རིགས་ཀྱི་སྙིང་སྟོབས་ལག་ལེན་རྣམ་དག་བསྟར་བ། ཆེད་ལས་ལག་ལེན་གཏིང་ཟབ་དང་སྤུས་ལེགས་ཞབས་འདེགས་ཆད་མེད་ཞུ་བ་བཅས་ཀྱི་ཐོག་ནས་སྨན་གཡོག་ལས་དོན་དེ་ནད་པ་དང་། ནད་ཐོག་སྨན་བཅོས། སྤྱི་ཚོགས་བཅས་ལ་ཉེ་བཅར་ཡོང་བར་སྐུལ་འདེད་བཏང་བ་དང་། ནུས་ཤུགས་ཡོད་རྒུས་ནད་པར་གསོ་རིག་ལྟ་རྟོག་དང་། ནད་གཞིར་ལྟ་ཞིབ། སྨན་བཅོས་རོགས་སྐྱོབ། བདེ་ཐང་མཛུབ་ཁྲིད། མི་ཆོས་ཐུགས་ཁུར་སོགས་ཀྱི་ནད་སྐྱོང་ཞབས་འདེགས་ཞུས་ཏེ། “གོས་དཀར་ལྷ་རྗེ”ཞེས་པའི་ནང་དོན་ཇི་མ་ཇི་བཞིན་དུ་མཚོན་པར་བྱས་པ། བྱ་སྤྱོད་དངོས་ཀྱི་ཐོག་ནས“མི་དམངས་གོང་བཀུར་དང་ཚེ་སྲོག་གོང་བཀུར”གྱི་མི་ཡུལ་གྱི་བརྩེ་བ་ཟབ་མོ་བཅངས་པ། ཚ་ཚ་འུར་འུར་གྱི་ནད་སྐྱོང་ལག་ལེན་ཁྲོད་དུ་སྤྱོད་ཚུལ་ཤིན་ཏུ་ལེགས་པ་དང་། དཀའ་སྡུག་ལ་མི་སྐྲག་པ། སྒེར་སེམས་མེད་པར་ལེགས་སྐྱེས་འབུལ་བ་བཅས་ཀྱི་དུས་རབས་གསར་པའི་བྱང་ཚད་མཐོ་བའི་ནད་གཡོག་དཔུང་ཁག་ཅིག་བཏོད་དེ། བདེ་ཐང་གི་བོད་ལྗོངས་འཛུགས་སྐྲུན་ལ་ཕྱོགས་ཡོངས་ནས་སྐུལ་འདེད་གཏོང་ཆེད་ལེགས་སྐྱེས་མངོན་གསལ་དོད་པོ་ཕུལ་ཡོད།