སློབ་མའི་ཀུན་སྤྱོད་དང་འབྲེལ་བའི་གཏམ།
ཁ་ཆེ་ཕན་ལུའི་བསླབ་བྱ་ལས“སྒོ་ང་རྐུ་དུས་ཁྲིག་ཁྲིག་མ་བཟོས་ན། བྱ་མོ་འཁྱེར་བའི་རྗེས་ལ་རྟ་ཕོ་ཁྱེར”ཞེས་ཆུང་དུས་ནས་རང་གི་ཕྲུ་གུའི་བྱ་སྤྱོད་ཆེ་ཆུང་ཅི་རིགས་རྒྱ་ཡན་དུ་མ་བཏང་བར་ངན་པར་སྐྱོན་བརྗོད་དང་ཡོ་བསྲང་བྱས་ཐོག་བཟང་པོར་ཡང་ཐལ་ཆེ་བའི་བསྟོད་པའང་བྱ་རྒྱུ་མེད།
ཕ་མ་ཚོས་རྒྱུན་དུ“ལྕང་གསར་གཞོན་དུས་འདྲོང་ན་འདྲོང་པ་རེད། ལྕང་རྒན་སྲོང་སྲོང་མང་ན་ཆག་པའི་ཉེན”ཞེས་པའི་གནས་ལུགས་ཀྱི་གཏམ་དེར་གཙིགས་ཆེན་བྱས་ནས། ནམ་ཞག་རྒྱུན་དུ་ཕྲུ་གུའི་ཡང་མ་དག་པའི་ཀུན་སྤྱོད་རྣམས་ཆུང་ནས་ཡོ་བསྲང་བྱེད་དགོས་པ་སྟེ། རྔ་ལ་དཔག་པའི་འཆམ་བརྒྱབ་ནས་འཇམ་རྩུབ་ལྕི་ཡང་གང་ལ་གང་འཚམ་སྤྱད་དགོས་པ་ལས། རྩུབ་པོ་ཁོ་ན་སྤྱད་ཚེ་ཕ་མ་དང་ཕྲུ་གུའི་བར་དུ་ཚེ་གང་བསུབ་ཐབས་བྲལ་བའི་རྨ་ཁ་བཟོ་སྲིད་ལ། རྐྱེན་དེར་བརྟེན་ནས་ཕ་བུ་དགྲར་གྱུར་བའི་དཔེ་ནི་རང་ཅག་འཚོ་བའི་ཁོར་ཡུག་ཏུ་ཐོན་དང་ཐོན་མུས་སུ་མཆིས། དེར་བརྟེན་ཕ་མ་ནི་ཕྲུ་གུའི་དགེ་རྒན་ཐོག་མ་དེ་ཡིན་པས། ནམ་ཞག་རྒྱུན་དུ་ཕྲུ་གུའི་བྱ་སྤྱོད་བཟང་ངན་ཅི་རིགས་ལ་འོས་འཚམ་གྱི་བསྟོད་སྨད་བྱེད་དགོས་པ་ལས་བསྟོད་ཆེ་ན་བཟང་ཐལ་དུ་གྱུར་སྲིད་ལ་སྨད་ཆེ་ནའང་ཕྲུ་གུ་ལོག་ལམ་དུ་འགྲོ་ངེན་ཆེ་བས། བསྟོད་སྨད་ཚད་རན་པ་ཞིག་ལག་ལེན་བྱེད་རྒྱུ་ནི་ཤིན་ཏུ་གལ་འགངས་ཆེ་བར་སྙམ།
སྤྱིར་དེང་སང་ཕྲུ་གུ་ཡོད་དོ་ཅོག་ནི་ཏང་གི་སྲིད་ཇུས་བཟང་པོའི་འོག་འཚར་ལོངས་ཡོང་བཞིན་པས་ཉི་མའི་དྲོ་སྐྱིད་ལྟ་བུའི་ཏང་གི་ཉེ་རིང་མེད་པའི་སྲིད་ཇུས་བཟང་པོར་ལོངས་སུ་སྤྱོད་བཞིན་མཆིས། འོས་འགན་སློབ་གསོ་ནི་རང་རྒྱལ་གྱི་རྩ་ཁྲིམས་སྟེང་འཁོད་པའི་གཏན་འབེབས་ཤིག་ཡིན་ལ། དེར་ཁྱིམ་བདག་དང་བུ་ཕྲུག་ཚོས་བརྩི་སྲུང་བྱེད་རྒྱུ་ནི“ཡུལ་ཆུ་བཏུང་ནས་ཡུལ་ཁྲིམས་ཁུར་དགོས”ཞེས་པ་ལྟར་ཕྲུ་གུ་ཚོ་ཤེས་རིག་སྦྱོང་བའི་དུས་སུ་དགེ་རྒན་དང་ཕ་མ་ཚོས་བསླབ་དེབ་ཐོག་གི་ཤེས་བྱ་ཁོ་ནར་དོ་སྣང་བྱེད་པ་ལས་ཕྲུ་གུ་རང་རང་གི་དགའ་ཕྱོགས་དང་མོས་ཕྱོགས་ལ་མི་བལྟ་བར་ཕྲུ་གུའི་ལེགས་ཉེས་ཡོད་ཚད་དེ་སྐར་གྲངས་ཁོ་ནས་ཐག་གཅད་པ་ནི་ལུས་སེམས་གཉིས་སྡུག་ལ་སྦྱར་བ་ཡིན་པར་མཐོང་།
དེང་གི་སྤྱི་ཚོགས་དེར་ཀློག་དེབ་ཁོ་ནའི་ནང་གི་ཤེས་བྱས་ཕྲུ་གུའི་མདུན་ལམ་ཡངས་པོར་ཕྱེ་མི་སྲིད་ལ་ཕྲུ་གུའི་མ་འོངས་པར་སློབ་སྟོན་བཟང་པོ་ཞིག་བྱེད་མི་ཐུབ། གུང་ཐང་བསྟན་པའི་སྒྲོན་མེ་མཆོག་གིས་ཀྱང“ཀུན་སྤྱོད་གཙང་བས་གཞན་གྱིས་ཡིད་དུ་འཐད”ཅེས་ཀུན་སྤྱོད་བཟང་པོ་ཞིག་ལྡན་ན་གཞན་གྱིས་གུས་བཀུར་དང་བརྩི་འཇོག་བྱེད་སྲིད་ལ། ཡིད་ཆེས་དང་ཆ་འཇོག་བྱེད་སྲིད་པས་ཕྲུ་གུའི་མ་འོངས་པར་ཕན་པ་མི་དམན་པ་ཞིག་ཐོབ་སྲིད།
མ་གཞི་དེང་གི་དུས་སུ་ཕྲུ་གུའི་ཤེས་ཚད་མཐོ་དམན་དེ་སློབ་མའི་སྐར་གྲངས་ལ་གཙོར་འཛིན་པ་ལས། ཕ་མ་ཚོས་ཕྲུ་གུའི་ཀུན་སྤྱོད་ལ་དེ་ཙམ་གྱིས་དོ་སྣང་ཆེན་པོ་མི་བྱེད་པའི་སྣང་ཚུལ་རེ་ཟུང་མཐོང་རྒྱུ་འདུག དེར་བརྟེན་རྒྱུན་དུ་ཕ་མ་དང་དགེ་རྒན་ཚོས་ཕྲུ་གུའི་ཀུན་སྤྱོད་ལ་གཙིགས་ཆེན་བྱས་ནས་སློབ་ཞོར་དང་འཚོ་བའི་ཁྲོད་དུས་ཚོད་ཁོམ་པ་མང་ཙམ་བེད་སྤྱད་དེ་གོ་བདེ་བའི་ཁྲིམས་ལུགས་ཤེས་བྱ་དང་རྒྱུ་འབྲས་སྐོར་གྱི་དམངས་སྒྲུང་དང་ཁ་ཆེ་ཕ་ལུའི་བསླབ་བྱ་སོགས་འཇིག་རྟེན་ལས་འབྲས་བརྩི་ཚུལ་སྐོར་གྱི་དཔེ་དེབ་མང་ཙམ་ཕྲུ་གུར་ལྟ་ཀློག་བྱེད་དུ་བཅུག་ནས་བྱ་བ་བཟང་ངན་གཉིས་ལ་འཇུག་ལྡོག་མི་དམན་པའི་སློབ་སྟོན་བྱེད་དགོས་ལ། འཚོ་བའི་ལས་བྲེལ་ཇི་ལྟར་ཛ་དྲག་རུང་ལེགས་ཉེས་བླང་དོར་གྱི་ཀུན་སྤྱོད་སློབ་གསོར་སྣང་འཇོག་མང་ཙམ་བྱེད་པའི་དགོས་པ་ཆེ་བར་མཐོང་།
དེར་བརྟེན་ཕྲུ་གུའི་ཀུན་སྤྱོད་སློབ་གསོའི་ཐད་ལ་ཕ་མ་དང་དགེ་རྒན་གཉིས་ནས་མཐོང་ཆེན་བྱེད་དགོས། ལྷག་པར་དུ་སློབ་མའི་སྐར་གྲངས་ཁོ་ནར་བརྩོན་ལེན་མི་བྱེད་པར། ཕྲུ་གུའི་དགའ་ཕྱོགས་ལ་བརྩི་བཀུར་བྱས་ཏེ་ཀུན་སྤྱོད་སློབ་གསོ་ཞར་ཞོར་དུ་ཉེ་བར་བླངས་ན་ད་གཟོད་གཞི་ནས“ཆུ་རྒྱུག་ཞོར་ལ་ཡུར་བ་མཉམ་གྲུབ”ཞེས་པའི་དཔེ་ལྟར་ཡོན་ཏན་དང་ཀུན་སྤྱོད་གཉིས་འཛོམས་ཀྱི་ཕྲུ་གུ་བཟང་པོ་ཞིག་ཆགས་པར་གོར་མ་ཆག
རྩོམ་པ་པོ། དིང་རི་རྫོང་དམའ་རིམ་སློབ་འབྲིང་དང་པོའི་བཀྲ་ཤིས་ཚེ་མཚོ།