ཀྲུང་གོ་གསར་འགྱུར་དྲ་བ་ལྷ་ས་ནས་གློག་འཕྲིན་འབྱོར་བ་གཞིར་བཟུང་། ཟླ་གསུམ་པ་ནི་ས་མཐོར་སློབ་འགོ་ཚུགས་པའི་དུས་ཡིན་པ་དང་། ཉིན་ཤས་གོང་བོད་ཀྱི་ས་གནས་ཁག་གི་སློབ་གྲྭ་འབྲིང་ཆུང་གཅིག་རྗེས་གཉིས་མཐུད་ངང་སློབ་འགོ་ཚུགས་ཡོད། ཟླ་3ཚེས་13ཉིན་གསར་འགོད་པས་བོད་རང་སྐྱོང་ལྗོངས་སློབ་གསོ་ཐིང་ནས་ཤེས་རྟོགས་བྱས་པར་གཞིགས་ན། 2024ལོའི་སྟོན་ཁའི་སློབ་དུས་ནས་བཟུང་། བོད་ཀྱི་ལྗོངས་ཡོངས་ཀྱི་རིགས་ཁག་གི་སློབ་མཚམས་ཁག་གི་སློབ་གསོའི“འགན་ལེན་གསུམ”གྱི་ལོ་རེར་སློབ་མ་རེའི་ཆ་སྙོམས་ཚད་གཞི་དེ་2023ལོའི་རྨང་གཞིའི་ཐོག་སྒོར་90མཐོ་རུ་བཏང་བ་དང་སྔོན་དཔག་བྱས་ན་སློབ་མ་ཁྲི་71.43ལ་ཕན་པ་ཐོབ་རྒྱུ་ཡིན་པ་རེད།

དེ་ནི་1985ལོར་བོད་ཀྱིས་སློབ་གསོའི“འགན་ལེན་གསུམ（བཟའ་སྡོད་འགན་ལེན་དང་གཞི་རྩའི་སློབ་སྦྱོང་མཁོ་ཆས་འགན་ལེན）”གྱི་སྲིད་ཇུས་ལག་ལེན་བསྟར་བ་ནས་བཟུང་། སློབ་གསོའི“འགན་ལེན་གསུམ”གྱི་ཁ་གསབ་ཚད་གཞི་མཐོ་རུ་གཏོང་ཐེངས་21པ་རེད།

ལྷ་ས་གྲོང་ཁྱེར་མལ་གྲོ་གུང་དཀར་རྫོང་ནན་ཅིང་ཚོད་ལྟའི་སློབ་ཆུང་དེ་1962ལོར་བཙུགས་པ་དང་དེ་གོང་ཟླ་སྒྲིལ་བཏང་བ་བརྒྱུད་སླར་ཡང་སྒོ་བྱང་བཀལ་ནས་བཙུགས་པ་རེད། སློབ་གྲྭ་དེའི་ཏང་ཀྲི་པུའི་ཧྲུའུ་ཅི་གཞོན་པ་དང་སློབ་སྤྱི་ཀརྨ་བསོད་ནམས་ཀྱིས། སློབ་གྲྭ་ཡོངས་སུ་སློབ་མ་1200ལྷག་ཙམ་ཡོད་པ་དང་90%ཡན་ཞིང་འབྲོག་པའི་བུ་ཕྲུག་རེད། “འགན་ལེན་གསུམ”གྱི་སྲིད་ཇུས་ལས་སློབ་མ་ཚོའི་ཉིན་རེའི་ལྟོ་དུས་གསུམ་གྱི་ཆ་རྐྱེན་ཟམ་མི་ཆད་པར་ལེགས་སུ་ཕྱིན་ནས་ཞོགས་ཟས་རྩམ་པ་དང་། ཇ་བསྲུབས་མ། མོག་མོག འབྲས་ཐུག མེན་པའོ་སོགས་བརྗེ་རེས་བྱེད་པ་དང་ཉིན་དགུང་ཤ་ཚལ་གསུམ་དང་ཤ་མེད་ཚལ་གཅིག་མཁོ་འདོན་བྱེད་ཀྱི་ཡོད། གཟའ་འཁོར་རེར་ཚལ་ཐོ་རེ་བཟོས་ཡོད་པས་ཉིན་རེའི་ཚལ་གྱི་སྣ་ཁ་གཅིག་པ་མིན་ཞེས་ངོ་སྤྲོད་བྱས།

ཁོང་གིས། 2021ལོར་ནན་ཅིང་ཚོད་ལྟའི་སློབ་ཆུང་དུ་ལས་སྒྱུར་བྱས་རྗེས། སློབ་གྲྭའི་མཉེན་ཆས་དང་མཁྲེགས་ཆས་ཟམ་མི་ཆད་པར་འཐུས་སྒོ་ཚང་དུ་ཕྱིན་པ་དང་། དགེ་རྒན་74ནས་83བར་མང་དུ་ཕྱིན་པ། སློབ་གསོ་ཆ་འཕྲིན་ཅན་དུ་འགྱུར་ཚད་མཐོ་རུ་ཕྱིན་པ་བཅས་ཀྱི་དཔང་པོ་བྱས་པ་ཡིན། ལོ་གཉིས་ཀྱི་གོང་། སློབ་གྲྭས་སློབ་ཁང་ལའང་གློག་རྡུལ་སློབ་ཁྲིད་ནག་པང་གསར་བརྗེས་བྱས་པ་དང་། བོད་སྐྱོར་མ་དངུལ་ནས་སྒོར་ཁྲི་300བཏང་སྟེ་སློབ་གྲྭར་རིག་ནུས་དཔེ་དེབ་ཁང་བསྐྲུན་པ་རེད་ཅེས་བཤད།

ལྷ་ས་ནག་ཆུ་མཐོ་རིམ་སློབ་འབྲིང་བཞི་པ་ནི་ལྷ་སར་སྤོས་པའི་ནག་ཆུའི་སློབ་གྲྭ་ཞིག་ཡིན་ཞིང་། ལྷ་ས་བལྟོས་བཅས་ཀྱིས་ས་བབ་དམའ་བ་དང་གནམ་གཤིས་དང་ཁོར་ཡུག་ལེགས་པས་སློབ་མ་སློབ་སྦྱོང་བྱེད་རྒྱུར་དེ་བས་འཚམ་པོ་ཡོད། སློབ་གྲྭ་བཙུགས་ནས་ཡུན་རིང་མ་སོང་བར་2022ལོའི་སྟོན་དུས་སུ་སློབ་མ་བསྡུས་པ་དང་སློབ་གྲྭ་ཡོངས་ཀྱི་སློབ་མ་1370ལྷག་ཙམ་ཚང་མ་ནག་ཆུ་ནས་ཡིན་པ་རེད།

བློ་བཟང་དོན་གྲུབ་ནི་སློབ་གྲྭའི་ཀུན་སྤྱོད་སློབ་གསོའི་སློབ་སྤྱི་གཞོན་པ་ཡིན་ཞིང་། ཁོང་གིས་ཀྲུང་གོ་གསར་འགྱུར་དྲ་བའི་གསར་འགོད་པར། བོད་ཀྱི་སློབ་འབྲིང་གཞན་དག་དང་འདྲ་བར་སློབ་གྲྭའི་ཟ་ཁང་ནས་སློབ་མར་ཉིན་རེའི་ལྟོ་དུས་གསུམ་དང་ཞོགས་ཟས་རྩམ་པ་དང་ཇ་བསྲུབས་མ་སོགས་མཁོ་འདོན་བྱེད་ཀྱི་ཡོད། སློབ་གྲྭའི་དགེ་རྒན་མང་པོ་ཞིག་ལ་ཡང“འགན་ལེན་གསུམ”སྲིད་ཇུས་ཀྱི་ཕན་པ་ཐོབ་ནས་མི་དམངས་ཀྱི་དགེ་རྒན་དུ་གྱུར་ཡོད་ཅེས་བཤད།

2004ལོར་བློ་བཟང་དོན་གྲུབ་ལས་ཀར་ཞུགས་པ་ནས་བཟུང་ད་བར་སློབ་གསོའི་ལས་ལ་གཞོལ། ཁོང་གིས་ལོ་མང་ལས་ཀ་བྱེད་པའི་བརྒྱུད་རིམ་ནང“འགན་ལེན་གསུམ”སྲིད་ཇུས་ཀྱི་ཚད་གཞི་རྒྱུན་ཆད་མེད་པར་མཐོ་རུ་ཕྱིན་པ་དང་། སློབ་གསོའི་མཉེན་ཆས་དང་མཁྲེགས་ཆས་མགྱོགས་མྱུར་ལེགས་སུ་ཕྱིན་པ། སློབ་མ་ཚོ་དང་ཐོག་གྲོད་པ་རྒྱགས་ཙམ་ནས་ད་ཆ་ཁ་ལག་འབེལ་འབེལ་ལྷུག་ལྷུག་ཡོད་པའི་བར་གྱི་འགྱུར་ལྡོག་དཔང་པོ་བྱས་ཆོག་ཅེས་བཤད།

བློ་བཟང་དོན་གྲུབ་ཀྱིས། སློབ་གྲྭ་གསར་པ་ཡིན་ཡང་སྔོ་འགྱུར་དང་། ཚོད་ལྟ་ཁང་འཛུགས་སྐྲུན། དཔེ་མཛོད་ཁང་བེད་སྤྱོད་སོགས་མཁྲེགས་ཆས་སྒྲིག་བཀོད་ཁག་ཆ་ཚང་ཡོད་ཅེས་བཤད།

གསར་འགོད་པས་བོད་རང་སྐྱོང་ལྗོངས་སློབ་གསོ་ཐིང་ནས་ཤེས་རྟོགས་བྱས་པར་གཞིགས་ན། མིག་སྔར་བོད་ཀྱི་སློབ་གསོའི“འགན་ལེན་གསུམ”གྱི་ལོའི་སློབ་མའི་ཆ་སྙོམས་ཚད་གཞི་ནི། སློབ་ཞུགས་གོང་གི་སློབ་གསོའི་དུས་མཚམས་ཀྱི་རིགས་གཉིས་པའི་ཁུལ་ལ་སྒོར་3930དང་། རིགས་གསུམ་པའི་ཁུལ་ལ་སྒོར་4030 རིགས་བཞི་པའི་ཁུལ་ལམ་ཡང་ན་མཐའ་མཚམས་རྫོང་ལ་སྒོར་4130བཅས་ཡོད་པ་དང་། འོས་འགན་སློབ་གསོའི་དུས་མཚམས་ཀྱི་རིགས་གཉིས་པའི་ཁུལ་ལ་སྒོར་4430དང་། རིགས་གསུམ་པའི་ཁུལ་ལ་སྒོར་4530 རིགས་བཞི་པའི་ཁུལ་ལམ་ཡང་ན་མཐའ་མཚམས་རྫོང་ལ་སྒོར་4630ཡོད་པ། མཐོ་རིམ་སློབ་འབྲིང་དུས་མཚམས་ཀྱི་རིགས་གཉིས་པའི་ཁུལ་ལ་སྒོར་4930དང་། རིགས་གསུམ་པའི་ཁུལ་ལ་སྒོར་5030 རིགས་བཞི་པའི་ཁུལ་ལམ་ཡང་ན་མཐའ་མཚམས་རྫོང་ལ་སྒོར་5130བཅས་ཡོད་པ་རེད།

2024ལོའི་སྟོན་ཁའི་སློབ་དུས་ནས་བཟུང་བོད་ཀྱི་སློབ་གསོའི“འགན་ལེན་གསུམ”གྱི་ལོའི་སློབ་མའི་ཆ་སྙོམས་ཚད་གཞི་དེ་མིག་སྔའི་རྨང་གཞིའི་ཐོག་སྒོར་90མཐོ་རུ་བཏང་ནས་ལོའི་སློབ་མའི་ཆ་སྙོམས་ཚད་གཞི་ནི་སློབ་ཞུགས་གོང་གི་སློབ་གསོའི་དུས་མཚམས་ཀྱི་རིགས་གཉིས་པའི་ཁུལ་ལ་སྒོར་4020དང་། རིགས་གསུམ་པའི་ཁུལ་ལ་སྒོར་4120 རིགས་བཞི་པའི་ཁུལ་ལམ་ཡང་ན་མཐའ་མཚམས་རྫོང་ལ་སྒོར་4220བཅས་ཡོད་པ་དང་། འོས་འགན་སློབ་གསོའི་དུས་མཚམས་ཀྱི་རིགས་གཉིས་པའི་ཁུལ་ལ་སྒོར་4520དང་། རིགས་གསུམ་པའི་ཁུལ་ལ་སྒོར་4620 རིགས་བཞི་པའི་ཁུལ་ལམ་ཡང་ན་མཐའ་མཚམས་རྫོང་ལ་སྒོར་4720ཡོད་པ། མཐོ་རིམ་སློབ་འབྲིང་དུས་མཚམས་ཀྱི་རིགས་གཉིས་པའི་ཁུལ་ལ་སྒོར་5020དང་། རིགས་གསུམ་པའི་ཁུལ་ལ་སྒོར་5120 རིགས་བཞི་པའི་ཁུལ་ལམ་ཡང་ན་མཐའ་མཚམས་རྫོང་ལ་སྒོར་5220བཅས་རེད།

གསར་འགོད་པས་ཤེས་རྟོགས་བྱས་པར་གཞིགས་ན། “སྟེགས་བུ་གཉིས་དང་ཚད་གཞི་གཅིག གྲངས་གཞི་གཅིག་དང་ཐོན་ཁུངས་གཅིག”དང“གཞི་གྲངས་འཕར་བ། ཞབས་ཞུ་གཤམ་སྤེལ”གྱི་འཛུགས་སྐྲུན་བསམ་ཕྱོགས་དང“གཅིག་གྱུར་བཞིའི”རྩ་དོན་གཞིར་བཟུང་། བོད་ཀྱིས་སློབ་གསོའི་དོ་དམ་དང་། སྤྱི་པའི་ཞབས་ཞུ། སློབ་གསོའི་ཐབས་ཇུས་དང་དེ་བཞིན་བརྟན་ལྷིང་དང་བདེ་འཇགས་བཅས་གཞི་གཅིག་ཏུ་འདུས་པའི“བོད་ཀྱི་སློབ་གསོའི་ཇོ་མོ་གླང་མའི་སྤྲིན་ཚོམ་ལས་སྟེགས”བསྐྲུན་ནས“རིམ་པ་དང་པོའི་བཀོད་སྒྲིག་དང་རིམ་པ་བཞི་པའི་བེད་སྤྱོད”མངོན་འགྱུར་བྱུང་སྟེ་ལྗོངས་ཡོངས་ཀྱི་རིམ་ཁག་དགེ་སློབ་ལ་ཞབས་འདེགས་ཞུ་བའི“མི་ཚང་མས་སློབ་སྦྱོང་བྱེད་ཆོག་པ་དང་། གང་སར་སློབ་སྦྱོང་བྱེད་ཆོག་པ། དུས་དང་རྣམ་པ་ཀུན་ཏུ་སློབ་སྦྱོང་ཐུབ་པའི”སྒོ་དབྱེ་རྣམ་པའི་སློབ་གསོའི་སྤྲིན་ཚོམ་ཆགས་པར་བྱས་པ་རེད།