བོད་རང་སྐྱོང་ལྗོངས་སློབ་གསོ་ཐིང་གིས་གཙོ་གཉེར་བྱས་པའི་2023ལོའི་བོད་རང་སྐྱོང་ལྗོངས་ཀྱི་དམངས་ཡོངས་ཀྱི་ཚེ་གང་སློབ་སྦྱོང་བྱེད་སྒོའི་གཟའ་འཁོར་བོད་ལྗོངས་ལས་རིགས་ལག་རྩལ་སློབ་གླིང་དུ་འགོ་ཚུགས་པ་རེད།

ད་ཐེངས་ཀྱི་དམངས་ཡོངས་ཀྱི་ཚེ་གང་སློབ་སྦྱོང་བྱེད་སྒོའི་གཟའ་འཁོར་དེ“སློབ་སྦྱོང་བྱེད་པ་འཚོ་བ་སྐྱེལ་སྟངས་ཤིག་ཏུ་འགྱུར་བ་བྱེད”ཅེས་པ་བརྗོད་དོན་གཙོ་བོར་བྱས་ཤིང་། བྱེད་སྒོ་དེ་ཟླ་12ཚེས་22བར་གཉེར་བ་དང་། དམིགས་ཡུལ་ནི་དམངས་ཡོངས་ཀྱི་དཔེ་ཀློག་རྣམ་པ་བཏོད་ནས་ཚེ་གང་སློབ་སྦྱོང་བྱེད་པ་དེ་གྲོང་མིའི་བསམ་པའི་འཁྱེར་སོ་དང་འཚོ་བ་སྐྱེལ་སྟངས་ཤིག་ཏུ་འགྱུར་བ་བྱས་ནས་སློབ་སྦྱོང་ལ་དགའ་ཞེན་དང་། སློབ་སྦྱོང་བྱེད་མཁས་པ། སྦྱངས་པར་འབྲས་བུ་ཐོན་པ་བཅས་ཀྱི་ཤེས་ལྡན་པ་གསོ་སྐྱོང་དང་འཕེལ་རྒྱས་བཏང་སྟེ། དམངས་ཡོངས་ཀྱིས་ཚེ་གང་སློབ་སྦྱོང་བྱེད་པའི་སྤྱི་ཚོགས་ཤིག་བསྐྲུན་རྒྱུར་རམ་འདེགས་བྱ་རྒྱུ་ཡིན་པ་རེད།

ཤེས་རྟོགས་བྱུང་བར་གཞིགས་ན། བྱེད་སྒོ་སྤེལ་རིང་བོད་རང་ལྗོངས་ཀྱིས་བརྗོད་དོན་གཙོ་བོའི་དཔེ་ཀློག་དང་། གྲངས་འཛིན་དཔེ་ཀློག་མཉམ་སྤྱོད། དྲ་ཐོག་སྤྱི་ཚོགས་ཀྱི་འཆད་ཁྲིད་ཆེ་མོ་སོགས་ཀྱི་བྱེད་སྒོ་རྒྱ་ཁྱབ་སྤེལ་ནས་ལས་བྱེད་པ་དང་མང་ཚོགས་ཀྱི་སློབ་སྦྱོང་སྤྲོ་སེམས་འཕེལ་བར་བྱས་པ་རེད། གྲོང་མིས་དམངས་ཡོངས་ཚེ་གང་སློབ་སྦྱོང་གི་སྤྱི་པའི་ཞབས་ཞུའི་ལས་སྟེགས་དང་། ཀྲུང་གོའི་སྡེ་ཁུལ་སློབ་གསོའི་དྲ་བ། རྒྱལ་ཁབ་ཀྱི་སྒོ་དབྱེའི་སློབ་ཆེན་གྱི་ཚེ་གང་སློབ་གསོའི་ལས་སྟེགས་སོགས་སྤྱི་པའི་སྒོ་དབྱེའི་ལས་སྟེགས་ནས་བྲིན་ཁ་རྒྱུག་པའི་དུས་དེབ་དང་འཕྲུལ་དེབ་སོགས་ཀྱི་ཐོན་ཁུངས་རིན་མེད་ངང་སྤྱོད་ཆོག་གི་ཡོད་པ་རེད།