ལྟ་ཀློག་ལ་དགའ་བའི་གཞོན་ནུ་བསྟན་འཛིན།
དེབ་ཁང་དུ་གླ་པ་བྱས་ནས་སློབ་དུས་གསར་པར་གྲ་སྒྲིག་བྱེད་པ།
ལྷ་ས་པེ་ཅིང་སློབ་འབྲིང་གི་བསྟན་འཛིན་འདི་ལོར་ལྷོ་ནུབ་མི་རིགས་སློབ་ཆེན་གྱི་རྒྱའི་སྐད་ཡིག་ཆེད་ལས་ལ་རྒྱུགས་འཕྲོད། མཐོ་རྒྱུགས་བཏང་ནས་ངལ་གསོ་ཉིན་ཁ་ཤས་བརྒྱབ་རྗེས། བསྟན་འཛིན་གྱིས་ཐག་ཉེ་སར་ཡོད་པའི་དེབ་ཁང་ཞིག་ཏུ་གླ་པ་བྱས། “ཆུང་དུས་ནས་དེབ་དད་ཆེ་བ་དང་། ལྷག་པར་དུ་རྒྱའི་སྐད་ཡིག་སྦྱོང་འདོད་འདུག”ཅེས་བསྟན་འཛིན་གྱི་ཨ་ཕ་ཉི་མས་གསར་འགོད་པར་བཤད།
མཐོ་རྒྱུགས་བཏང་རྗེས། བསྟན་འཛིན་རྟག་པར་རང་ཁྱིམ་གྱི་ཉེ་སར་ཡོད་པའི་དེབ་ཁང་དུ་དེབ་བཀླགས་ནས་སྡོད་ཀྱི་ཡོད། ཁོ་པས་ལྟ་ཀློག་ལ་བཅངས་པའི་དགའ་ཞེན་དེས་དེབ་ཁང་གི་སྦྱིན་བདག་ལ་ཡང་སེམས་འགུལ་ཆེན་པོ་ཐེབས་ཤིང་། བསྟན་འཛིན་སློབ་ཆེན་ལ་རྒྱུགས་འཕྲོད་པར་བརྟེན་ལས་ཀ་ཡུན་རིང་བྱེད་ཁོམ་མེད་པ་ཤེས་ཀྱང་སྔར་བཞིན་གླ་པར་གདན་དྲངས།
“རང་ཉིད་ཀྱིས་ནམ་རྒྱུན་དེབ་ཉོས་ནས་ལྟ་གི་ཡོད། ཡིན་ན་ཡང་དེབ་ཁང་དུ་བལྟས་པ་བཞིན་དབྱིངས་ཞུགས་ཐུབ་ཀྱི་མི་འདུག ད་ཆ་ངའི་ལས་ཀ་འདི་ནི་དེབ་ལ་ལྟ་ཐུབ་པ་མ་ཟད། ད་དུང་ཡོང་འབབ་ཀྱང་གསོག་ཐུབ་པས་དངོས་འབྲེལ་སྤྱོད་གོ་ཉིས་ཆོད་རེད” རང་ཉིད་ཀྱི་སློབ་ཆེན་སྐབས་ཀྱི་ཆེད་ལས་རྒྱའི་སྐད་ཡིག་བདམས་པ་ཡང་དགའ་ཞེན་ཆེ་བས་ཡིན། “ངས་རང་ཉིད་ཀྱི་འབྱུང་འགྱུར་ལ་བསམ་བློ་གཏོང་མྱོང་། དེབ་ནང་གི་འཇིག་རྟེན་ཧ་ཅང་མཛེས་སྡུག་ལྡན། ཇི་ཙམ་བལྟས་ན་རང་ཉིད་ཀྱི་མི་འདང་ས་དེ་ཙམ་ཤེས་ཐུབ། ཕྱིས་སུ་རྒྱ་ཡིག་དགེ་རྒན་ཞིག་གམ་ཡང་ན་མུ་མཐུད་རབས་འབྱམས་པ་དང་འབུམ་རམས་པའི་སློབ་གནས་ལེན་པ། ཡང་ན་དེབ་ཁང་ཞིག་གཉེར་རྩིས་ཡོད”ཅེས་བསྟན་འཛིན་གྱིས་བཤད།
བསྟན་འཛིན་རྒྱའི་སྐད་ཡིག་ལས་གཞན་ད་དུང་བོད་དང་འབྲེལ་བའི་དེབ་ཀློག་པར་ཡང་དགའ་པོ་ཡོད། 《བོད་སྐྱོད་ཀོ་དེབ》དེའི་གྲས་ཀྱི་གཅིག་རེད། “དེ་ནི་རང་ཉིད་གཅིག་པུས་གནམ་འོག་སྐོར་བར་དགའ་བའི་ཡུལ་སྐོར་བ་ཚོར་བྲིས་པའི་བོད་ཡུལ་གྱི་འགྲུལ་སྐྱོད་ལམ་ཡིག་ལྟ་བུ་ཞིག་རེད། དེབ་དེར་མཚོ་སྔོན་དང་། བོད་ལྗོངས། ཡུན་ནན། སི་ཁྲོན། ཀན་སུའུ་བཅས་ཞིང་ཆེན་དང་ལྗོངས་ལྔ་ཡི་མཛེས་ལྗོངས་དང་། རྩོམ་པ་པོ་རང་ཉིད་ཀྱི་འགྲུལ་ལམ། ཀུན་ལ་གྲགས་པའི་རི་གྲོང་དང་འབྲོག་ར། དེ་བཞིན་བོད་རིགས་དང་གྲངས་ཉུང་མི་རིགས་གཞན་དག་གི་དམངས་སྲོལ་རིག་གནས་ཕུན་སུམ་ཚོགས་པོ་བྲིས་ཡོད” དེབ་དེའི་ནང་གི་ཤེས་བྱ་མང་པོ་ས་གནས་དེ་གའི་མིས་ཀྱང་ཤེས་ཀྱི་མི་འདུག་ཅེས་བསྟན་འཛིན་གྱིས་བཤད།
“དེབ་ཀྱི་ནང་དུ་པར་རིས་མང་པོ་བཅུག་འདུག ང་དབྱར་དགུན་གུང་གསེང་རིང་ས་ཆ་ཁ་ཤས་ལ་སྐྱོད་མྱོང་། དེབ་ནང་གི་པར་རིས་དང་ཞིབ་བསྡུར་བྱེད་བཞིན་ངས་བོད་ལ་གནམ་ས་བླ་འོག་ཏུ་འགྱུར་བ་ལྟ་བུའི་འཕོ་འགྱུར་བྱུང་བ་ཤེས་བྱུང”“སྔོན་ཆད་ཕ་གིའི་ཁོ་ར་ཁོ་ཡུག་ཚང་མ་རི་སྒང་དང་རྡོ་གསེག་འདམ་རུལ་རེད། ད་ཆ་བོད་ལྗོངས་སློབ་ཆེན་རྔ་ཆེན་སློབ་ཁུལ་བསྐྲུན་ནས་སྣུམ་གནག་ལམ་ཕྱོགས་བཞི་མཚམས་བརྒྱད་ལ་བཟོས་འདུག དེས་མ་ཟད་ད་དུང་མཐའ་འཁོར་དུ་བ་གམ་མཐོན་པོ་མང་པོ་བརྒྱབ་ནས། དངོས་འབྲེལ་འཕོ་འགྱུར་ཆེན་པོ་བྱུང་འདུག”ཅེས་བསྟན་འཛིན་གྱིས་བཤད།