འཛམ་གླིང་ས་ཡི་ལྟེ་བ་གངས་ཅན་ལྗོངས། །

རྒྱ་ཆེ་གཏིང་ཟབ་རིག་གཞུང་པདྨའི་མཚོ། །

ཐུན་མོང་མ་ཡིན་ལྔ་རིག་འདབ་བརྒྱ་གྲོལ། །

ལྟ་སྤྱོད་གཙང་མས་འོད་གསལ་ལྷ་ལ་འགྲན། །

བཀའ་དྲིན་མཚུངས་མེད་མེས་པོའི་སྐུ་དྲིན་ལས། །

བསིལ་ལྡན་ལྗོངས་འདིར་ཤེས་དཔལ་ཉིན་བྱེད་ཤར། །

གསང་ཆེན་མི་ནུབ་ལུང་རིགས་འབྲས་བུ་སྨིན། །   

ངོ་མཚར་རིག་དངོས་རི་བོ་གྲུ་འཛིན་བཞེངས། ། 

སྙན་གྲགས་དབྱར་རྔ་སྲིད་གསུམ་ཀུན་ལ་ཁྱབ། །

རྟ་ཐོག་མི་རིགས་དཀྱེལ་ཆེའི་སྤོབས་པས་འགྱིང་། །

རིག་བྱེད་དབྱངས་བདུན་རྫོགས་པའི་རྒྱུད་མངས་ལས། །

འདས་སོང་ལོ་རྒྱུས་སྙན་མོའི་དབྱངས་ལ་བཀུག །

ངན་ངོན་བག་ཆགས་བརྟས་པའི་རིག་གསར་གྱིས། །

སྣང་མཐོང་གཙུག་ལག་ཐམས་ཅད་འཇིག་བྱས་ཏེ། །

རབ་རིབ་མེས་པོའི་མཛེས་ཞལ་མོག་པོར་བཏང་། །

ཕྱི་ནང་སྣོད་བཅུད་འཁྲུགས་པས་བློ་རེ་ཕམ། ། 

དེ་མུར་བསྒྱུར་བཅོས་སྒོ་དབྱེའི་སྐྱ་རེངས་ཤར། །

ངན་རེངས་རིག་གསར་མུན་པ་མཐའ་ནས་སད། །

སྔོན་ཐོན་རིག་གནས་རླབས་ཀྱི་མཁའ་ན་རྩེན། །

ཚན་རྩལ་རལ་གྲིས་རྨོངས་འཐོམ་རྩད་ནས་བཅོམས། །

མ་ལུས་སྐྱེ་རྒུའི་ཡིད་འཕྲོག་རིག་བྱེད་ཀྱིས། །

འཕུར་གྲུར་བཞུགས་སྟེ་གོ་ལའི་གནས་ལུགས་བཙལ། །

སྟོང་གསུམ་ཁམས་ཀྱི་ཉམས་སྣང་མ་ལུས་མཐོང་། །

ཐབས་མཁས་བློ་ཡིས་ལྐོག་འགྱུར་གསང་བ་བརྟོལ། །

འཛམ་གླིང་ས་ཡི་ཤར་ཕྱོགས་ཡུལ་གྲུ་ན། །

སྙན་པ་དོན་ལྡན་ཀྲུང་གོ་ཁྱད་དུ་འཕགས། །

དེང་རབས་ཅན་བཞིའི་རླབས་ཆེན་གྲུབ་འབྲས་ཀུན། །

དབྱར་མཚོའི་དཔལ་བཞིན་གོང་དུ་འཕེལ་བས་མཚར། །

ཨེ་མ་མེས་རྒྱལ་འབྱོར་ཕྱུག་དགུང་ལས་མཐོ། །

མི་རིགས་རང་སྐྱོངས་སུམ་རྩེན་ལྷ་ལས་སྐྱིད། །

ཡང་དག་སྲིད་ཇུས་ཚངས་པའི་ཐིག་ལས་དྲང་། །

མཐོ་སྒང་མི་དམངས་བདེ་སྐྱིད་འཚོ་བར་རོལ། །

ཟུར་ཁྲིད་དགེ་རྒན། བོན་བསྟན་འཛིན།

རྩོམ་པ་པོ། རིག་འཛིན་རྡོ་རྗེ། ལྷ་ས་ཅང་སུའུ་ཚོད་ལྟའི་སློབ་འབྲིང་གི་སློབ་མ།