ན་ནིང་གི་སྟོན་ཁ།
སྲང་ལམ་ན་ལོ་མ་ཁྱུ་གཅིག་འཕུར་ལྡིང་བྱེད།
ཁེར་རྐྱང་གི་གཞུང་ལམ་ཁ་རོག་གེ།
མུན་ནག་གི་ཁྲོམ་སྲང་སྟོང་ལྷང་ངེ་།
ཁྱི་སྨྱོན་གྱིས་གང་ས་ནས་རྨུག་སྐད་རེ་སྒྲོག་དུས།
ལྷིང་འཇགས་ཀྱི་འཇིག་རྟེན་ཤ་འཐོར་རུས་འཐོར་དུ་བཏང་བས།
ད་གཟོད།
ཉི་ཟླའི་དཀྱིལ་འཁོར་དང་སྐར་ཚོགས་ཀྱི་གུར་ཁང་བོར་བའི་མུན་པའི་ཁུང་བུ་དྲན།
སྒེའུ་ཁུང་གྲུ་བཞི་ནས་རླུང་བུའི་འུར་སྒྲ་དང་ཆར་པའི་ཤག་སྒྲ་གྲང་མོ་དྲན།
ཁྱི་སྤྱང་གི་ངུ་ཟུག་གཟན་པོ་དྲན།
གོས་དཀར་གྱི་ལས་མཁན་ལྷ་རྗེ་དྲན།
རི་བོང་ཅལ་འདྲོགས་དྲན།
དགོ་བ་གློ་འདྲོགས་དྲན།
མིག་ཟུང་དུར་ས་ལ་ཅེར་བའི་སྐྱེ་བོ་མང་པོ་དྲན།
དུར་ཁུང་ནས་ཕྱིར་མིག་འཕེན་པའི་རྣམ་ཤེས་ཇི་སྙེད་དྲན།
སྡོང་ལོ་ཞིག་ས་ནས་སྒྲུག་སྟེ།
མགོ་བོ་གནམ་ལ་གཏད་དུས།
གསེར་མདོག་གི་སྟོན་ཁ་དེ་མཐོང་བྱུང་།
དྭངས་གསལ་གྱི་ཨ་སྔོན་དང་སྤྲིན་དཀར་མཇལ་བྱུང་།
དེ་མུར། ན་ནིང་གི་སྟོན་ཁ་ནག་པོ་དེ་དྲན།
དྲན་མི་འོས་པའི་ན་ནིང་གི་སྟོན་ཁ།
དྲན་མི་འདོད་པའི་ན་ནིང་གི་སྟོན་ཁ།
དྲན་མི་བཟོད་པའི་ན་ནིང་གི་སྟོན་ཁ་ཨང་།
ཟུར་ཁྲིད་དགེ་རྒན། བོན་བསྟན་འཛིན།
རྩོམ་པ་པོ། བཀྲ་ཤིས་ཉི་མ། ལྷ་ས་ཅང་སུའུ་ཚོད་ལྟའི་སློབ་འབྲིང་གི་སློབ་མ།