འདི་ནི་སྙན་རོང་རྫོང་གི་རྒྱལ་ཁབ་ནུས་རྒྱུ་ཚོགས་པའི་ཕུགས་རེའི་སློབ་ཆུང་ཡིན་པ།

2020ལོའི་ཟླ་9པར་དངོས་སུ་སྤྱོད་འགོ་ཚུགས་པའི་སྙན་རོང་རྫོང་རྒྱལ་ཁབ་ནུས་རྒྱུ་ཚོགས་པའི་ཕུགས་རེའི་སློབ་ཆུང་ནི་སློབ་ཁྲིད་དང་། གཞུང་ལས། ཞག་སྡོད་བཅས་གཞི་གཅིག་ཏུ་བསྡུས་ནས་རིག་ལྡན་ནག་པང་དང་། བར་སྣང་སློབ་ཁང་། སྤུས་དག་ཕབ་འཇུག་ཁང་། རྩིས་འཁོར་ཁང་། ཚན་རིག་ཁང་། རོལ་དབྱངས་ཁང་། དཔེ་ཀློག་ཁང་། ལུས་རྩལ་ཐང་། ལན་ཆིའུ་སྤོ་ལོ་ཐང་སོགས་དེང་རབས་ཅན་གྱི་སློབ་ཁྲིད་སྒྲིག་བཀོད་འཐུས་སྒོ་ཚང་བས། སྙན་རོང་རྫོང་གི་སྒྲིག་བཀོད་ཆ་ཚང་ཤོས་དང་། སྒྲིག་ཆས་སྔོན་ཐོན་ཚ་ཤོས། ཁོར་ཡུག་མཛེས་ཤོས་བཅས་ཀྱི་སློབ་གྲྭ་ཞིག་ཏུ་གྱུར་ཡོད། འཛིན་གྲྭ་24ཡི་སློབ་མ་1200ལྷག་ཙམ་དེ་གར་སློབ་སྦྱོང་དང་འཚོ་བ་སྐྱེལ་བཞིན་ཡོད།

ཁ་གཏད་རོགས་སྐྱོར་བྱས་ནས་རེ་བ་བསྩལ་བ་དང་དབུལ་སྐྱོར་བྱེད་པར་སྔོན་ལ་བློ་སྐྱོར་བྱེད་དགོས། རྒྱལ་ཁབ་ནུས་རྒྱུ་ཚོགས་པས་སྙན་རོང་རྫོང་ལ་ཁ་གཏད་རོགས་སྐྱོར་བྱེད་རིང་། སློབ་གསོའི་རོགས་སྐྱོར་ལ་ཚད་མཐོའི་མཐོང་ཆེན་བྱས་ནས་སློབ་གསོའི་བོད་སྐྱོར་འདུ་འགོད་ལག་བསྟར་ཤུགས་ཆེན་བྱས་པ་སྟེ། 2004ལོར་སློབ་ཆུང་གཅིག་རོགས་སྐྲུན་བྱས་པ་དང་། 2009ལོར་བུ་བཅོལ་ཁང་གཅིག་རོགས་སྐྲུན་བྱས་པ། ལོ་17བསྟུད་མར་སློབ་མ་དབུལ་པོར་རོགས་སྐྱོར་བྱས་པ། སྙན་རོང་གི་སློབ་གསོའི་ཆ་རྐྱེན་ལ་འགྱུར་ལྡོག་གཏོང་རོགས་བྱས་པ། སློབ་ཞུགས་སློབ་མ་མང་དུ་བཏང་བ། སློབ་གསོའི་སྤུས་ཚད་རྒྱུན་ཆད་མེད་པར་ལེགས་སུ་བཏང་བ་རེད།

ནག་ཆུ་གྲོང་ཨུད་ཀྱི་དྲུང་ཆེ་གཞོན་པ་དང་། སྙན་རོང་རྫོང་ཨུད་ཀྱི་ཧྲུའུ་ཅི་གཞོན་པ། རྒྱལ་ཁབ་ནུས་རྒྱུ་ཚོགས་པའི་བོད་སྐྱོར་ལས་དོན་ཚོགས་ཆུང་གི་ཙུའུ་ཀྲང་བཅས་ཡིན་པའི་པའེ་མིང་གིས་གསར་འགོད་པར། རང་སྐྱོང་ལྗོངས་ཀྱི་སློབ་གསོ་སྤུས་ལེགས་དོ་སྙོམས་འཕེལ་རྒྱས་ཀྱི་བླང་བྱར་དང་ལེན་ཧུར་ཐག་ཞུ་ཆེད། རྒྱལ་ཁབ་ནུས་རྒྱུ་ཚོགས་པས་སྙན་རོང་རྫོང་གི་དོན་དངོས་དང་ཟུང་འབྲེལ་བྱས་ཏེ་དམིགས་ས་ཡོད་པའི་སྒོ་ནས་སློབ་གསོའི་གནད་སྨིན་རོགས་སྐྱོར་བྱས་ཏེ། 2017ལོའི་ཟླ་8པར་རྒྱལ་ཁབ་ནུས་རྒྱུ་ཚོགས་པའི་ཕུགས་རེའི་སློབ་ཆུང་སྐྲུན་འགོ་བཙུགས་ཏེ་སྙན་རོང་རྫོང་གི་སློབ་གསོའི་ཆུ་ཚད་སྔར་བས་མཐོ་རུ་བཏང་ཡོད་ཅེས་བཤད།

སློབ་གྲྭ་བསྐྲུན་རྗེས་སློབ་གསོའི་རོགས་སྐྱོར་ལ་སྔར་བས་རིམ་སྤོར་བྱུང་ཞིང་། མ་དངུལ་སྒོར་ཁྲི་725བཏང་ནས་བོད་རང་སྐྱོང་ལྗོངས་ཀྱི་སློབ་གསོའི་ཁོངས་གཏོགས་སུ་གསོ་རླུང་མཁོ་འདོན་གྱི་དབུགས་སྐྱི་ཁང་ཐོག་མ་བསྐྲུན་པ་དང་། མ་དངུལ་སྒོར་ཁྲི་800བཏང་ནས་སློབ་གྲྭའི་ཉི་འོད་དྲོད་ཁང་བསྐྲུན་པ། མ་དངུལ་སྒོར་ཁྲི་600བཏང་ནས་སྙན་རོང་རྫོང་གི་སློབ་གསོ་སྤུས་ལེགས་དོ་སྙོམས་ཀྱི་འཕེལ་རྒྱས་སྒྱུར་བཀོད་རིམ་སྤར་གྱི་རྣམ་གྲངས་ལག་ལེན་བསྟར་བ། མ་དངུལ་སྒོར་ཁྲི་200བཏང་ནས་ལྗོངས་ཡོངས་ཀྱི་རྫོང་རིམ་པའི་ཚན་རྩལ་ཁང་སྟེ་སྙན་རོང་རྫོང་ཚན་རྩལ་ཁང་ཐོག་མ་བཙུགས་པ་མ་ཟད། སློབ་གྲྭར་རོལ་དབྱངས་ཁང་དང་། ཞབས་བྲོ་ཁང་། མཛེས་རྩལ་ཁང་། ཀང་ཆིན་ཁང་། ལག་ཤེས་བྱེད་སྒོ་ཁང་། དཔེ་དེབ་ལྟ་ཀློག་ཁང་བཅས་དང་དེ་བཞིན་ཚན་རིག་ཁྱབ་གདལ་སློབ་གསོའི་རྟེན་གཞི་སོགས་སློབ་གསོའི་རྨང་གཞིའི་སྒྲིག་བཀོད་ཆ་ཚང་བསྐྲུན་ཡོད། མ་དངུལ་སྒོར་ཁྲི་1434བཏང་ནས་སྙན་རོང་རྫོང་གི་སློབ་ཆུང་གཉིས་ཀྱི་སློབ་མའི་ཉལ་ཁང་བསྐྲུན་ཏེ་ཕྲུ་གུ་800ཡི་ཉལ་ས་ཐག་གཅོད་བྱས་པ་རེད།

སློབ་གསོའི་རྨང་གཞིའི་སྒྲིག་བཀོད་མུ་མཐུད་ལེགས་སུ་བཏང་བས་འབྲོག་ཁུལ་གྱི་ཕྲུ་གུ་ཚོའི་སློབ་སྦྱོང་ཁོར་ཡུག་རྒྱུན་ཆད་མེད་པར་ལེགས་སུ་ཕྱིན་ཡོད། སློབ་གསོའི་རྨང་གཞིའི་སྒྲིག་བཀོད་ཡག་ཏུ་ཕྱིན་པ་དང་སྦྲགས་སྙན་རོང་རྫོང་གི་སློབ་གསོའི“སྟོབས་ཤུགས”ཀྱང་ཆེ་རུ་འགྲོ་བཞིན་ཡོད།

— དུས་བཀག་ལྟར་དགེ་རྒན་སྒྲིག་འཛུགས་བྱས་ནས་གསོ་སྦྱོང་བྱས་ཤིང་། 2023ལོའི་ཟླ་10པའི་བར་སྙན་རོང་རྫོང་གི་སློབ་གྲྭ་འབྲིང་ཆུང་གི་དགེ་རྒན་57པེ་ཅིང་དགེ་འོས་སློབ་ཆེན་ཀྲུའུ་ཧའེ་སློབ་ཁུལ་དུ་སློབ་སྦྱོང་བྱེད་པར་བསྐྱོད་པ་རེད།

— རྒྱལ་ཁབ་ནུས་རྒྱུ་ཚོགས་པས་གཅེས་སེམས་སློབ་རོགས་མ་དངུལ་སྒོར་ཁྲི་534བཏང་ཞིང་། མིག་སྔའི་བར་རིམ་རྩིས་བྱས་ན་སློབ་ཆེན་སློབ་མ་1600ལྷག་ཙམ་དང་། དགེ་རྒན་59 སྦྱངས་འབྲས་གཟེངས་སུ་ཐོན་པའི་སློབ་གྲྭ་འབྲིང་ཆུང་གི་སློབ་མ་300ལྷག་ཙམ་བཅས་ལ་བྱ་དགའ་སྤྲད་པ་དང་དཀའ་ངལ་ཡོད་པའི་སློབ་མ་3ལ་རོགས་སྐྱོར་བྱས་པ་རེད།

— “བར་སྣང་སློབ་ཁང”བཙུགས་ཤིང་། མ་དངུལ་སྒོར་ཁྲི་400བསྟུད་མར་བཏང་ནས་རྫོང་གྲོང་གི་སློབ་གྲྭའི“བར་སྣང་སློབ་ཁང”བསྐྲུན་རྒྱུར་རྒྱབ་སྐྱོར་བྱས་པ་དང་། མ་དངུལ་སྒོར་ཁྲི་70བཏང་ནས་རྒྱང་ཁྲིད་སློབ་གསོའི་རྣམ་གྲངས་བསྐྲུན་པ། སློབ་གྲྭ་14འབྲེལ་མཐུད་བྱས་པ། ལྗོངས་ཕྱིའི་ཕུལ་བྱུང་དགེ་རྒན་གདན་དྲངས་པ། ཕན་ཚུན་འབྲེལ་གཏུག་གི་དྲ་རྒྱའི་རྣམ་པའི་སློབ་ཁང་བསྐྲུན་པས། བོད་ཀྱི་དེང་རབས་ཆ་འཕྲིན་ཅན་གྱི་སློབ་གསོའི་དཔེ་སྟོན་ས་ཚིགས་ཤིག་ཏུ་གྱུར་པ་རེད།

2022ལོའི་བར། སྙན་རོང་རྫོང་དུ་ལོ་ཚད་ལོན་པའི་བྱིས་པ་སློབ་གྲྭར་ཞུགས་ཚད་100%ཟིན་པ་དང་འོས་འགན་སློབ་གསོ་སྲ་བརྟན་གཏོང་ཚད་100%ཟིན་ཡོད། 2023ལོའི་བར། རྒྱལ་ཁབ་ནུས་རྒྱུ་ཚོགས་པས་རིམ་རྩིས་བྱས་ན། སྙན་རོང་རྫོང་གི་སློབ་གསོའི་ཁྱབ་ཁོངས་ལ་མ་དངུལ་སྒོར་དུང་ཕྱུར་1.45བཏང་བ་དང་། རོགས་སྐྱོར་བྱས་པའི་སློབ་གྲྭ་3གྱིས་ལོ་ལྟར་ལོ་ཚད་ལོན་པའི་སློབ་མ་2500བསྡུས་པས། སྙན་རོང་རྫོང་གི་སློབ་ཁྲིད་ཆུ་ཚད་མངོན་གསལ་དོད་པོས་མཐོ་རུ་ཕྱིན་ཡོད་པ་རེད།

ཁ་གཏད་རོགས་སྐྱོར་ལ་བརྟེན་ནས་སྙན་རོང་སློབ་གསོས་སྤུས་ཚད་མཐོ་བའི་འཕེལ་རྒྱས་ཀྱི་ལམ་བུའི་ཐོག་ལེའུ་གསར་པ་ཟམ་མི་ཆད་པར་བརྩམས་ནས་རྩྭ་ཐང་དུ་སློབ་གསོའི་རེ་བ་སྦྱིན་བཞིན་མཆིས།