《སྤྱི་འབངས་ཀྱི་ཀུན་སྤྱོད་འཛུགས་སྐྲུན་བྱེད་ཐབས་ཀྱི་གཞི་རྩའི་རྩ་གནད》ཅེས་པའི་ནང་སློབ་གྲྭ་ནི་ཀུན་སྤྱོད་སློབ་གསོ་གཏོང་སའི་འཐབ་ས་ཞིག་ཡིན་པ་བསྟན་ཡོད། དུས་རབས་ཉེར་གཅིག་པར་ཁྱིམ་ཚང་མང་ཆེ་བར་ཕྲུ་གུ་གཅིག་ལས་མེད་སྟབས་སློབ་མ་ཕལ་ཆེ་བ་ཁྱིམ་ཚང་ནང་ཟས་གོས་སྡོད་གསུམ་གང་ལའང་སེམས་ཁྲལ་མེད་ལ་སློབ་མ་རང་ཉིད་ཀྱིས་བྱེད་ཐུབ་པའི་ལས་ཀ་ཡིན་རུང་ཕྲུ་གུ་མང་ཆེ་བས་ཕ་མར་བརྟེན་ནས་སྡོད་ཀྱི་ཡོད། དེ་ལྟ་བུའི་གོམས་གཤིས་ལྡན་པའི་རྐྱེན་གྱིས་སློབ་གྲྭ་དང་སྤྱི་ཚོགས་སུ་སླེབས་དུས་རང་རྐྱ་རྩ་བ་ནས་འཕེར་ཐུབ་ཀྱི་མེད། དེར་བརྟེན་སློབ་གྲྭའི་ནང་ཆུང་དུས་ནས་སློབ་སྦྱོང་དང་འཚོ་བ། སློབ་མ་ཕན་ཚུན་འབྲེལ་འདྲིས་སོགས་ཀྱི་གོམས་གཤིས་བཟང་པོ་འཇགས་ཐབས་ཀྱི་སློབ་གསོ་དང་ནུས་པ་གསོ་སྐྱོང་བྱ་རྒྱུ་ནི་ཤིན་ཏུ་གལ་འགངས་ཆེ་བའི་གནད་དོན་ཞིག་རེད། འཛིན་གྲྭའི་ཀྲུའུ་རེན་ནི་འཛིན་གྲྭ་མཉམ་སྡེབ་སྒྲིག་འཛུགས་བྱེད་མཁན་དང་། དོ་དམ་བྱེད་མཁན། དེ་བཞིན་སློབ་མ་རྣམས་བདེ་ཐང་ངང་འཚར་ལོངས་ཡོང་བར་བྱེད་མཁན་ཞིག་ཡིན་སྟབས་གལ་ཆེའི་གནས་བབ་བཟུང་ཡོད་པས། རྒྱུན་གཏན་གྱི་ལས་ཀའི་ནང་གཙོ་བོ་ཕྱོགས་བཞི་ཙམ་གྱི་ཐད་ལ་དོ་སྣང་བྱེད་དགོས་པ་སྟེ།

གཅིག འཛིན་གྲྭའི་ཀྲུའུ་རེན་ནི་སློབ་མའི་གོམས་གཤིས་བཟང་པོ་གསར་སྐྲུན་བྱེད་མཁན་ཞིག་ཡིན།

འཛིན་གྲྭའི་ཀྲུའུ་རེན་ནི་སློབ་ཕྲུག་གི་ཆེས་ཐོག་མའི་དགེ་རྒན་རེད་ལ་སློབ་མ་དང་གཤིབ་མང་ཤོས་དང་འབྲེལ་འདྲིས་ཆེ་ཤོས་ཤིག་ཀྱང་རེད། དེ་ལྟར་བརྗོད་དོན་གང་ཡིན་ཞེ་ན། འཛིན་གྲྭའི་ཀྲུའུ་རེན་དང་སློབ་མའི་བསམ་བློ་ཀུན་སྤྱོད་དང་། སྦྱངས་འབྲས། ནུས་པ་གསོ་སྐྱོང་། རིག་ཚན་གྱི་བྱེད་སྒོ་ཁག་དང་ཁ་བྲལ་ཐབས་མེད་ལ། ཐ་ན་དཔེ་ཁུག་ཇི་ལྟར་འཁུར་དགོས་པ་དང་། གཙང་སྦྲ་ཇི་ལྟར་བྱེད་དགོས་པ། ཡིག་ཆས་གྲ་སྒྲིག་ཇི་ལྟར་བྱེད་དགོས་པ་སོགས་ཚང་མ་འཛིན་གྲྭའི་ཀྲུའུ་རེན་གྱི་མཛུབ་ཁྲིད་དང་ཁ་བྲལ་ཐབས་མེད། ལོ་རིམ་དང་པོའི་སློབ་མར་མཚོན་ན་ཁོང་ཚོ་ལོ་ན་ཤིན་ཏུ་ཆུང་བ་དང་། ལུས་སྟོབས་དེ་ཙམ་འཚར་ལོངས་བྱུང་མེད་པས་མཉམ་སྡེབ་ཀྱི་བྱེད་སྒོ་དཔེར་ན། སྒྲོག་ཙེ་དང་རྐུབ་སྟེགས་དབོར་བ་སོགས་ཀྱི་སྐབས་སུ་ལག་པ་སྒྲོག་རྩེའི་གནས་གང་དུ་འཆང་དགོས་པ་དང་། རྐུབ་སྟེགས་ཇི་ལྟར་འཁྱེར་དགོས་པ། སློབ་མ་ཕན་ཚུན་གྱི་བདེ་འཇགས་ལ་དོ་སྣང་ཇི་ལྟར་བྱེད་པ་སོགས་གནས་ཚུལ་ཆུང་ངུ་ཞིག་ལའང་དགེ་རྒན་གྱིས་བཀོད་སྒྲིག་དང་སློབ་སྟོན་བྱེད་དགོས་ཀྱི་ཡོད་པས་སློབ་མའི་ཡར་རྒྱས་ཆུང་ངུ་ཞིག་ལའང་དགེ་རྒན་གྱི་ནུས་པ་མང་པོ་འདོན་དགོས་ཀྱི་ཡོད།

གཉིས། འཛིན་གྲྭའི་ཀྲུའུ་རེན་ནི་སློབ་མའི་གོམས་གཤིས་བཟང་པོ་ལག་བསྟར་བྱེད་མཁན་ཞིག་ཡིན།

སློབ་གྲྭ་ནི་རྒྱལ་ཁབ་ཀྱི་སློབ་གསོའི་སྲིད་ཇུས་ལག་བསྟར་བྱེད་མཁན་གྱི་ཚན་པ་ཞིག་ཡིན་པས། སྲིད་ཇུས་དེ་དག་འཛིན་གྲྭའི་ནང་དོན་འཁྱོལ་བྱེད་སྐབས། འཛིན་གྲྭའི་ཀྲུའུ་རེན་ནི་འཛིན་གྲྭ་དེའི་སྒྲིག་འཛུགས་པ་དང་། སློབ་གསོ་བ། དོ་དམ་མཁན་ཡིན་པས་མཉམ་སྡེབ་ཀྱི་གོམས་གཤིས་བཟང་པོ་འཇགས་པའི་སློབ་གསོ་གཏོང་བ་ནི་ཧ་ཅང་ཞིབ་ཚགས་ཀྱི་ལས་ཀ་ཞིག་རེད། དེའང་ཐོག་མར་འཛིན་གྲྭའི་ཀྲུའུ་རེན་གྱིས་ཕྱོགས་ཡོངས་ནས་སློབ་མའི་རིག་སྟོབས་དང་། སེམས་ཁམས་འཕེལ་རྒྱས་ཀྱི་ཁྱད་ཆོས་རྟོགས་དགོས་པ་མ་ཟད་ཁྱད་ཆོས་དེ་དག་དང་འཛིན་གྲྭའི་དངོས་ཡོད་གནས་ཚུལ་ལ་གཞིགས་ཏེ་ལས་ཀ་གང་རུང་བཀོད་སྒྲིག་ཞིབ་ཚགས་དང་། གོ་རིམ་དང་འཆར་གཞི་ཡོད་པའི་སྒོ་ནས་འཛིན་གྲྭའི་དོ་དམ་འགན་སྲུང་ཐུབ་པ་བྱེད་དགོས། སློབ་གྲྭས་ལོ་རིམ་སོ་སོར་བཏོན་པའི་ཀུན་སྤྱོད་ཀྱི་དམིགས་ཚད་དང་འཆར་གཞི་ལྟར་སློབ་མ་སོ་སོས་སོ་སོར་སློབ་གསོ་གཏོང་བའི་ནུས་པ་གསོ་སྐྱོང་ལ་དོ་སྣང་བྱེད་པ་སྟེ། ལོ་རིམ་དང་པོའི་སློབ་མར་ཆ་མཚོན་ན་འབྲུ་རིགས་ལ་གྲོན་ཆུང་བསྲི་ཚགས་བྱེད་དགོས་པ་དང་། རང་ཉིད་ཀྱི་དཔེ་ཁུག་ནང་ཡིག་ཆས་གྲལ་ལྟར་སྒྲིག་པོས་བླུགས་དགོས་པ། འབྲི་དེབ་ཀྱི་ཤོག་ལྷེ་གང་བྱུང་དུ་དབྲལ་ནས་དབྱུགས་རྒྱུ་མེད་པ་སོགས་ཀྱི་གོམས་གཤིས་བཟང་པོ་འཇགས་པའི་སློབ་གསོ་རྒྱག་དགོས་པ་ནི་རྒྱུན་གཏན་གྱི་ལས་ཀའི་ཁྲོད་ཁ་བྲལ་ཐབས་མེད་པ་ཞིག་རེད།

གསུམ། དགེ་རྒན་གྱི་བྱ་སྤྱོད་ཐམས་ཅད་སློབ་མས་མིག་དཔེ་ལྟ་ས་ཞིག་ཏུ་བརྩི་གི་ཡོད།

གཞན་ལ་དཔེ་ལྟ་རྒྱུ་ནི་བྱིས་པའི་ཁྱད་ཆོས་ཆེ་ཤོས་ཞིག་ཡིན་པ་དང་། ལྷག་པར་དུ་སློབ་མའི་སེམས་སུ་དགེ་རྒན་ནི་རང་གི་བློ་གཏད་ས་དང་། མིག་དཔེར་འོས་པའི་མི་ཞིག་ཏུ་བརྩིས་ནས་དགེ་རྒན་གྱི་བྱ་སྤྱོད་ཐམས་བཅད་ལ་སློབ་མས་ལད་མོ་བྱེད་གང་ཐུབ་བྱེད་ཀྱི་ཡོད། དེ་ལྟར་ཡུན་རིང་དགེ་སློབ་མཉམ་གཤིབ་ཀྱི་བརྒྱུད་རིམ་ནང་སློབ་མ་མང་པོ་ཞིག་ལ་དགེ་རྒན་གྱི་གཤིས་སྤྱོད་འཇགས་འགྲོ་གི་ཡོད་པས་དགེ་རྒན་གྱི་འཚོ་བ་དང་། སློབ་སྦྱོང་གི་གོམས་གཤིས་བཟང་པོ་སློབ་མར་འཇགས་ན་ཕན་ཐོགས་ཆེན་པོ་ཡོད། འོན་ཀྱང་། དེ་ལས་ལྡོག་ཚེ་རང་ཤུགས་སུ་སློབ་མར་ཤུགས་རྐྱེན་ངན་པ་ཐེབས་སྲིད་པས་འཛིན་གྲྭའི་ཀྲུའུ་རེན་གྱིས་རྒྱུན་དུ་རང་གིས་རང་ལ་རེ་བ་ནན་པོ་བཅོལ་ཏེ་བསམ་བློ་ཆབ་སྲིད་ཀྱི་འཁྱེར་སོ་དང་། ཀུན་སྤྱོད་ཀྱི་བྱང་ཚད། རིག་གནས་ཤེས་བྱ། མི་ཕན་ཚུན་གྱི་འབྲེལ་འདྲིས། ལས་ཀའི་བྱེད་ཕྱོགས་སོགས་གང་ཅིར་མིང་དོན་མཚུངས་པའི་དགེ་རྒན་གྱི་དཔེ་མཚོན་ནུས་པ་འདོན་སྤེལ་གང་ལེགས་བྱེད་དགོས། མདོར་ན། སློབ་མར་རེ་བ་ཇི་ལྟར་བཏོན་པ་ཐོག་མར་དགེ་རྒན་རང་ཉིད་ཀྱིས་སྒྲུབས་ཐུབ་པ་བྱེད་དགོས།

བཞི། འཛིན་གྲྭའི་ཀྲུའུ་རེན་ནི་སློབ་མའི་གཤིས་སྤྱོད་དང་གོམས་གཤིས་ལ་ལྟ་སྡུར་བྱེད་མཁན་ཞིག་ཡིན།

སློབ་མར་གོམས་གཤིས་བཟང་པོ་འཇགས་ཐུབ་པ་བྱེད་རྒྱུ་ནི་ཞོགས་པ་གཅིག་དང་ཉིན་མ་གཅིག་ལ་སྒྲུབ་ཐུབ་པ་ཞིག་མ་ཡིན་པས་འཛིན་གྲྭའི་ཀྲུའུ་རེན་གྱིས་རྒྱུན་གཏན་ནས་སློབ་མར་ཡར་རྒྱས་ཅུང་ཙམ་བྱུང་བར་དུས་ཐོག་ཏུ་བསྟོད་བསྔགས་དང་སྐུལ་ལྕག་གཏོང་དགོས་པ་དང་བྱ་ངན་སྤྱོད་ངན་དང་གོམས་གཤིས་ངན་པར་དུས་ཐོག་ཏུ་སྐྱོན་བརྗོད་དང་སློབ་གསོ་གཏོང་དགོས། གལ་སྲིད་སློབ་མ་མང་ཆེ་བར་ཐུན་མོང་གི་གོམས་གཤིས་ངན་པ་འཇགས་ཡོད་ཚེ་བསམ་བློ་ཀུན་སྤྱོད་དང་། འཛིན་གྲྭའི་ཚོགས་འདུའི་གོ་སྐབས་བེད་སྤྱད་ནས་མཉམ་སྡེབ་ཀྱི་སློབ་གསོ་དང་སྐྱོན་བཅོས་བྱེད་དགོས། དེའང་དུས་ཐོག་དང་ཡང་དག་པ་ཞིག་ཡིན་དགོས་ལ་སློབ་མས་ངེས་པར་དུ་རང་རྒྱུད་ཀྱི་གོམས་གཤིས་བཟང་པོ་དེས་རང་གི་ཉེ་འཁོར་གྱི་མི་ལ་བདེ་སྐྱིད་དང་སྤྲོ་སྣང་སྦྱིན་ཐུབ་པ་དང་། དེ་ལས་ལྡོག་ཚེ་གཞན་ལ་གནོད་འཚེ་བཟོ་ཡི་ཡོད་པ་ཤེས་སུ་འཇུག་དགོས། དེར་བརྟེན། གོམས་གཤིས་བཟང་པོ་གསོ་སྐྱོང་བྱེད་པའི་བརྒྱུད་རིམ་ནང་སློབ་མར་ཡར་རྒྱས་ཕྲན་ཙམ་བྱུང་བར་དགེ་རྒན་གྱིས་ཚད་མཐོའི་གདེང་འཇོག་བྱེད་པ་དང་། དེ་ལྟར་རིམ་བཞིན་ཐིགས་པ་བསགས་པའི་རྒྱ་མཚོ་ཞེས་པའི་དཔེ་ལྟར་མཐར་ཀུན་སྤྱོད་བཟང་བའི་སློབ་མ་ཞིག་ཏུ་གསོ་སྐྱོང་བྱེད་དགོས། མདོར་ན། གོམས་གཤིས་བཟང་པོ་ནི་མི་ཚེ་གཅིག་བཀོལ་སྤྱོད་བྱེད་ཆོག་པས་འཛིན་གྲྭའི་ཀྲུའུ་རེན་གྱིས་དུས་དང་རྣམ་པ་ཀུན་ཏུ་གོམས་གཤིས་བཟང་པོ་གསོ་སྐྱོང་བྱེད་པ་ནི་རྒྱུན་གཏན་གྱི་ལས་ཀའི་གཙོ་གནད་ཞིག་ཏུ་བརྩིས་ནས་མཉམ་སྡེབ་ཀྱི་འཚོ་བ་དང་སློབ་གསོ་དང་ཁ་མ་བྲལ་བར་མཛུབ་ཁྲིད་དང་། རང་ཤུགས་ཀྱིས་སློབ་གསོ་ཐེབས་པའི་འཁོར་རྒྱ་ཞིག་སྐྲུན་དགོས་པ་ལས་སློབ་གསོའི་ཆེད་དུ་སློབ་གསོ་གཏོང་བ་དང་གོམས་གཤིས་ཀྱི་ཆེད་དུ་གོམས་གཤིས་གསོ་སྐྱོང་བྱེད་མི་རུང་སྙམ།

（ལྷ་ས་གྲོང་ཁྱེར་ཁྲེང་ཀོན་ཆུས་གཙང་རལ་སློབ་ཆུང་གི་སྒྲོལ་མ་ཆོས་ཉིད）