ཝེ་ཆུའི་འགྲམ་གྱི་གནའ་བོའི་གྲོང་ཁྱེར་ཞན་དབྱང་དུ་གནས་པའི་བོད་ལྗོངས་མི་རིགས་སློབ་ཆེན་ནི་བོད་ཞི་བས་བཅིངས་འགྲོལ་བཏང་རྗེས་ཏང་ཀྲུང་དབྱང་གིས་བོད་ཀྱི་ཆེད་དུ་བཙུགས་པའི་མཐོ་རིམ་སློབ་གྲྭ་དང་པོ་དེ་རེད། བོད་ལྗོངས་མི་རིགས་སློབ་ཆེན་གྱི་ཆིན་ཧན་སློབ་ཁུལ་དུ་སྐྱོད་སྐབས“མཐུན་སྒྲིལ་ཐང་ཆེན”གྱི་ལྗོངས་གཟིགས་རྡོ་ཐོག་ཏུ་ཁ་བཏགས་དཀྲིས་པའི་སེ་འབྲུའི་དབྱིབས་མཐོང་རྒྱུ་ཡོད་པ་དང་། ལྗོངས་གཟིགས་རྡོ་ཡི་གཤམ་དུ“ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་བརྟན་པོར་འཛུགས་དགོས”ཞེས་པའི་ཡིག་འབྲུ་གསལ་པོ་བརྐོས་པ་དེ་ཐོག་ནས་མི་རིགས་ཁག་གི་དགེ་སློབ་ཚོ་སེ་འབྲུའི་རྡོག་ལྟར་གོང་བུ་གཅིག་ཏུ་བསྒྲིལ་བ་མཚོན་ཡོད།

ལོ་མང་རིང་། མི་རིགས་ཁག་གི་སློབ་མས་དེ་གར་མཉམ་དུ་འཚོ་བ་སྐྱེལ་བ་དང་སློབ་སྦྱོང་བྱས་ནས་མི་རིགས་མཐུན་སྒྲིལ་གྱི་མི་སེམས་འགུལ་བའི་ལེའུ་མང་པོ་བརྩམས་ཏེ་མི་རིགས་མཐུན་སྒྲིལ་གྱི་དུས་རབས་ཀྱི་བསྟོད་གླུ་བླངས་ཡོད།

བོད་ལྗོངས་མི་རིགས་སློབ་ཆེན་གྱི་2023ལོའི་སློབ་མ་གསར་པའི་སློབ་འགོ་ཚུགས་པའི་མཛད་སྒོ་དང་དགེ་རྒན་དུས་ཆེན་གྱི་གཟེངས་བསྟོད་ཐད་གཏོང་ཚོགས་ཆེན་ཐོག་2023ལོའི་དྲ་རྒྱའི་བར་མཐོངས་བདེ་འཇགས་ཆེད་ལས་ཀྱི་སློབ་མ་གཡུ་སྒྲོན་གྱིས་མཉམ་སྤྱོད་བྱས་པའི“བོད་ལྗོངས་མི་རིགས་སློབ་ཆེན་གྱི་གཏམ་རྒྱུད”ཀྱིས་ས་གནས་ས་ཐོག་གི་དགེ་སློབ་ཚང་མར་སེམས་འགུལ་ཆེན་པོ་ཐེབས་ཤིང་། གཡུ་སྒྲོན་གྱི་རྨོ་བོ་བཀྲ་ལོ་ནི་བོད་ལྗོངས་སྤྱི་སློབ（དེང་གི་བོད་ལྗོངས་མི་རིགས་སློབ་ཆེན）ཀྱི་1960ལོའི་ཞིང་ལས་ཆེད་ལས་ཀྱི་སློབ་མ་ཡིན་པ་དང་། ཕ་ཕུན་ཚོགས་ཀྱང་བོད་ལྗོངས་མི་རིགས་སློབ་གླིང（དེང་གི་བོད་ལྗོངས་མི་རིགས་སློབ་ཆེན）1986ལོའི་རྒྱའི་སྐད་ཡིག་གི་ཆེད་ལས་སློབ་མ་ཡིན་པས་མི་རབས་གསུམ་གྱི་སློབ་གཉེར་ལམ་བུར“མི་རིགས་སློབ་ཆེན”གྱི་ཐམ་ཀ་བརྒྱབ་ཡོད། གཡུ་སྒྲོན་གྱི་ཁྱིམ་གྱིས་སློབ་གྲྭའི་འཕེལ་རྒྱས་ཀྱི་དུས་མཚམས་གལ་ཆེན་གསུམ་ལ་བདེན་དཔང་བྱས་པ་མ་ཟད། མི་རིགས་མཐུན་སྒྲིལ་གྱི་གཏམ་བཟང་ཡང་གསོན་ཉམས་དོད་པོས་མཚོན་པར་བྱས་ཡོད།

སློབ་འགོ་ཚུགས་པའི་མཛད་སྒོ་དེ་དགེ་རྒན་དུས་ཆེན་དང་ཏག་ཏག་འཁེལ་ཞིང་། གཡུ་སྒྲོན་གྱི་རྨོ་བོ་དང་པ་ཕས་ལོ་མང་ཐུག་འཕྲད་མ་བྱུང་བའི་དགེ་རྒན་ལ་ཁ་བཏགས་བསྒྲོན་ནས་མེ་ཏོག་ཕུལ་ཏེ་ཁོང་རྣམ་པར་བཅངས་པའི་བརྩེ་བ་ཟབ་མོ་དང་སྨོན་འདུན་བཟང་པོ་མཚོན་པར་བྱས།

ཝང་ལན་ཧྥེན་ནི་བོད་ལྗོངས་སྤྱི་སློབ་ལ་ལས་བགོས་བརྒྱབ་པའི་བོད་རྒྱ་སྐད་གཉིས་ཀྱི་གཞོན་ནུ་དགེ་རྒན་ཁག་དང་པོ་ཡིན་པ་དང་། ཁོང་གིས་དེ་གར་ལོ་30ལྷག་ཙམ་ལས་ཀ་བྱས་ནས་བོད་ཀྱི་མི་རིགས་སློབ་གསོའི་བྱ་གཞག་ཆེད་ཚེ་གང་ལེགས་སྐྱེས་ཕུལ་ཡོད།

ལོ་ངོ་60ལྷག་ཙམ་རིང་། བོད་ལྗོངས་སྤྱི་སློབ་ནས་བོད་ལྗོངས་མི་རིགས་སློབ་ཆེན་བར“ཝང་ལན་ཧྥེན”དང་འདྲ་བ་གྲངས་ལས་འདས་པས་སྒེར་སེམས་མེད་པར་ལེགས་སྐྱེས་ཕུལ་བས། སློབ་གྲྭས་སྔ་རྗེས་སུ་གསོ་སྐྱོང་བྱས་པའི་སློབ་ཐོན་སློབ་མ་ཁྲི་11ལྷག་ཙམ་གྱིས་བོད་ཀྱི་འཐབ་ཕྱོགས་ཁག་ཏུ་འབད་འཐབ་བྱས་པས་ད་ཆ་ཁོང་ཚོ་བོད་ལྗོངས་འཛུགས་སྐྲུན་བྱེད་མཁན་གྱི་གཙོ་ཤུགས་དམག་དང་མེས་རྒྱལ་གཅིག་གྱུར་སྲུང་སྐྱོང་དང་མི་རིགས་མཐུན་སྒྲིལ་ལ་སྐུལ་འདེད་གཏོང་མཁན་གྱི་སྟོབས་ཤུགས་གལ་ཆེན་ཞིག་ཏུ་གྱུར་ཡོད།

མི་རབས་གསར་པའི་བོད་ལྗོངས་མི་རིགས་སློབ་ཆེན་གྱི་སློབ་མ་ཡིན་པའི་ངོས་ནས་གཡུ་སྒྲོན་གྱིས་གསར་འགོད་པར། སློབ་གྲྭར་སླེབས་ནས་ཟླ་བ་གཅིག་ཀྱང་མ་སོང་ཡང་སློབ་གྲོགས་ཚོས་ཕན་ཚུན་རོགས་རམ་དང་མཐུན་སྒྲིལ་མཛའ་བརྩེའི་རྣམ་པས་ང་ལ་སེམས་འགུལ་ཆེན་པོ་ཐེབས་བྱུང་། ངས་དཀའ་སྤྱད་སློབ་སྦྱོང་དང་འཇོན་ཐང་འཕེལ་བའི་སློབ་གྲྭའི་གདམ་ཚིག་རྒྱུན་འཛིན་བྱས་ཏེ་མི་སྒེར་འཚར་ལོངས་དང་ཤེས་ལྡན་པ་ཞིག་ཏུ་འགྱུར་བ་བྱ་རྒྱུ་དེ་བོད་ཀྱི་འཕེལ་རྒྱས་ཀྱི་དགོས་མཁོ་དང་འཚམ་པར་བྱས་ནས། རྒྱལ་ཁབ་ལ་བཅངས་པའི་བརྩེ་སེམས་དང་དུས་རབས་ཀྱི་འགན་འཁུར་ཕོད་མཁན་གྱི་དུས་རབས་གསར་པའི་བོད་ལྗོངས་མི་རིགས་སློབ་ཆེན་གྱི་སློབ་མ་ཞིག་ཆགས་པའི་བརྩོན་ལེན་བྱེད་ཀྱི་ཡིན་ཞེས་བཤད།