འདི་ནི་ལྷུན་གྲུབ་རྫོང་ཅང་སུའུ་སློབ་ཆུང་གི་སློབ་མས་བོད་ཡིག་ཡིག་གཟུགས་སྦྱོང་བཞིན་པ།

ཉེ་བའི་ལོ་ཤས་རིང་། རང་ལྗོངས་ཀྱི་རིམ་ཁག་རིག་གནས་སྡེ་ཚན་གྱིས་ཕུལ་བྱུང་གི་སྲོལ་རྒྱུན་རིག་གནས་སྲུང་སྐྱོབ་དང་རྒྱུན་འཛིན་བྱེད་རྒྱུར་ཟམ་མི་ཆད་པར་སྐུལ་འདེད་བཏང་སྟེ། རིམ་པ་ཁག་དང་རིགས་ཁག་གི་སློབ་གྲྭས་རྣམ་པ་སྣ་ཚོགས་ཀྱི་མངོན་མིན་རིག་གནས་ཤུལ་བཞག་བྱེད་སྒོ་རྒྱ་ཁྱབ་ངང་སྤེལ་བར་སྐུལ་ལྕག་དང་ཁྲིད་སྟོན་བྱས་ནས། བོད་ཀྱི་ཕུལ་བྱུང་གི་སྲོལ་རྒྱུན་རིག་གནས་འཕེལ་རྒྱས་དེ་བས་ཡག་པོ་འགྲོ་རྒྱུར་ཟམ་མི་ཆད་པར་སྐུལ་འདེད་བཏང་བ་རེད།

དྲིལ་བསྒྲགས་རྒྱ་ཁྱབ་བྱས་ནས་ཕུལ་བྱུང་གི་སྲོལ་རྒྱུན་རིག་གནས་དར་སྤེལ་བཏང་བ།

གཞིས་རྩེ་གྲོང་ཁྱེར་ས་སྐྱ་རྫོང་གི་ས་སྐྱའི་བསུ་བྲོ་ནི་ཡོན་རྒྱལ་རབས་ཀྱི་འགྲོ་མགོན་འཕགས་པའི་དུས་སྐབས་སུ་དར་བ་དང་དམངས་ཁྲོད་ཀྱི་ཆར་པ་འབེབས་པའི་ཞབས་བྲོ་ཞིག་རེད། ལོ་རྒྱུས་ཀྱི་འཕོ་འགྱུར་དང་བསྟུན་ནས་ད་ཆ་ས་སྐྱའི་བསུ་བྲོ་དེ་རིམ་གྱིས་ཐུན་མོང་མ་ཡིན་པའི་དམངས་ཁྲོད་ཀྱི་ཞབས་བྲོ་ཞིག་ཏུ་གྱུར་ཏེ། སྒྱུ་རྩལ་གྱི་ཉམས་འགྱུར་དང་ས་སྐྱའི་མི་ཆོས་རིག་གནས་དང་ས་ཁམས་ཀྱི་ཁྱད་ཆོས་མངོན་གསལ་དོད་པོ་ལྡན་ཡོད། 2008ལོར་ས་སྐྱའི་བསུ་བྲོ་བོད་རང་སྐྱོང་ལྗོངས་ཀྱི་མངོན་མིན་རིག་གནས་ཤུལ་བཞག་གི་མིང་གཞུང་དུ་བཅུག་པ་རེད།

2017ལོར་ས་སྐྱའི་བསུ་བྲོ་དེ་བས་ལེགས་པའི་སྒོ་ནས་རྒྱུན་འཛིན་དང་དར་སྤེལ་གཏོང་ཆེད། ས་སྐྱ་རྫོང་སློབ་འབྲིང་གིས་ས་སྐྱའི་བསུ་བྲོའི་སློབ་མའི་ཚོགས་པ་ཆེད་མངགས་བཙུགས་ནས་སློབ་མ་རྣམས་གོ་རིམ་ལྡན་པ་དང་ཚད་ལྡན་ངང་ས་སྐྱའི་བསུ་བྲོ་སྦྱོང་ཐུབ་པ་བྱས་པ་དང་། རྒྱུན་འཛིན་བྱེད་རིང་ཞབས་བྲོའི་ཡིད་དབང་འཕྲོག་ཤུགས་དང་ཕུལ་བྱུང་སྲོལ་རྒྱུན་རིག་གནས་ཀྱི་རིན་ཐང་མྱོང་ཚོར་གང་ཐུབ་བྱས་ཏེ་ཕུལ་བྱུང་གི་སྲོལ་རྒྱུན་རིག་གནས་རྒྱུན་འཛིན་ཐུབ་པ་བྱས་ཡོད།

དུས་བཀག་ལྟར་ཚོགས་པའི་སློབ་ཚན་སྒྲིག་འཛུགས་བྱེད་པ་ཕུད། ས་སྐྱ་རྫོང་སློབ་འབྲིང་གིས་ད་དུང་འབྲེལ་ཡོད་དྲིལ་བསྒྲགས་པར་གཞི་བླངས་ཏེ་དྲ་སྦྲེལ་གྱི་ལེགས་ཆར་བརྟེན་ནས་ས་སྐྱའི་བསུ་བྲོ་དྲིལ་བསྒྲགས་བྱེད་ཤུགས་ཆེ་རུ་བཏང་སྟེ། ས་སྐྱའི་བསུ་བྲོ་ལྗོངས་ཕྱི་ནང་དུ་སྐད་གྲགས་ཆོད་ཚད་ཆེ་རུ་བཏང་བ་རེད།

སྔར་ནས་ད་བར་རང་ལྗོངས་ཀྱི་རིག་གནས་སྡེ་ཚན་གྱིས་དུས་ཆེན་ཆེ་ཁག་གོ་སྐབས་སུ་བྱས་ཏེ། མང་ཚོགས་སྒྱུ་རྩལ་ཁང་དང་། རྫོང་དང་ཆུས་སྒྱུ་རྩལ་ཚོགས་པ། མངོན་མིན་རིག་གནས་ཤུལ་བཞག་རྣམ་གྲངས་སྲུང་སྐྱོབ་ཚན་པ། མཚོན་བྱེད་རང་བཞིན་གྱི་རྒྱུན་འཛིན་པ་སོགས་སྒྲིག་འཛུགས་ཧུར་ཐག་བྱས་ནས་འཆད་ཁྲིད་དང་། འགྲེམས་སྟོན། འགྲེམས་འཁྲབ་སོགས་ཀྱི་བྱ་ཐབས་བརྒྱུད་སློབ་གྲྭར་ཕུལ་བྱུང་གི་སྲོལ་རྒྱུན་རིག་གནས་ཤེས་བྱ་དྲིལ་བསྒྲགས་དང་ཁྱབ་གདལ་གཏོང་བའི་ལས་དོན་ཟབ་མོ་སྤེལ་བས་ཕན་འབྲས་བཟང་པོ་ཐོན་ཡོད།

སློབ་ཁང་ལེགས་པར་སྤྱད་དེ་ཕུལ་བྱུང་གི་སྲོལ་རྒྱུན་རིག་གནས་ལ“གསོན་ཤུགས་རྒྱས་པར”བྱས་པ།

ལོ་མང་རིང་ཉང་བྲན་ཤང་ཆ་ཚང་སློབ་ཆུང་གིས་སློབ་ཁང་སློབ་གསོ་གང་ལེགས་སྤྱད་དེ་སྔ་རྗེས་སུ་ལྷ་མོ་དང་བོད་ཡིག་ཡིག་གཟུགས་སོགས་ཁྱད་ལྡན་སློབ་གསོ་ཁྱབ་གདལ་བཏང་ནས་སློབ་མར་ཕུལ་བྱུང་གི་སྲོལ་རྒྱུན་རིག་གནས་ཤེས་རྟོགས་དང་། རྒྱུན་འཛིན། དར་སྤེལ་བཅས་བྱེད་པར་ཁྲིད་སྟོན་བྱས་པར་བརྟེན“རྒྱལ་ཡོངས་ཀྱི་སློབ་གྲྭ་འབྲིང་ཆུང་གི་ཀྲུང་ཧྭའི་ཕུལ་བྱུང་རིག་གནས་སྒྱུ་རྩལ་རྒྱུན་འཛིན་སློབ་གྲྭ”དང“རང་སྐྱོང་ལྗོངས་རིམ་པའི་མངོན་མིན་རིག་གནས་ཤུལ་བཞག་གི་དཔེ་སྟོན་རྟེན་གཞི”སོགས་ཀྱི་གཟི་བརྗིད་མཚན་སྙན་སྔ་རྗེས་སུ་ཐོབ་ཡོད།

2019ལོ་ནས་བཟུང་། ཉང་བྲན་ཤང་ཆ་ཚང་སློབ་ཆུང་གིས་མངོན་མིན་རིག་གནས་ཤུལ་བཞག་སློབ་གྲྭར་སྤེལ་བའི་བྱེད་སྒོ་ཤུགས་ཆེན་སྤེལ་བ་དང་ཉང་བྲན་དམངས་ཁྲོད་སྒྱུ་རྩལ་ཚོགས་པའི་ཐོན་ཁུངས་བཟང་པོ་གང་ལེགས་སྤྱད་དེ་ལྷ་མོ་དང་། ནང་མ། གར་གླུ་བཅས་ཀྱི་གཞི་རྩའི་སྟངས་སྟབས་མཉམ་འདྲེས་བྱས་ནས་སྒྲིག་བཟོ་བྱས་པ་དང་སློབ་གྲྭའི་ཁྱད་ལྡན་སློབ་གསོར་བརྩིས་ཏེ་སློབ་གྲྭ་ཡོངས་ཀྱི་ཁྱབ་ཁོངས་སུ་ཁྱབ་གདལ་བཏང་ཡོད།

སྒོར་གཞས་དང་། འབའ་གཞས། རལ་པ་སོགས་བོད་ཤར་གྱི་ཆབ་མདོ་གྲོང་ཁྱེར་ལ་ལོ་རྒྱུས་ཡུན་རིང་ལྡན་པ་དང་ཕུལ་བྱུང་གི་སྲོལ་རྒྱུན་རིག་གནས་རྣམ་གྲངས་མང་པོ་ཡོད། 2017ལོར་ཆབ་མདོ་གྲོང་ཁྱེར་རིག་གནས་ཅུས(གྲོང་ཁྱེར་རིག་དངོས་ཅུས)ཀྱིས་ཆབ་མདོའི་སྒོར་གཞས་དང་། སྟེང་ཆེན་གྱི་རལ་པ། སྨར་ཁམས་ཀྱི་འབའ་གཞས་སོགས་མངོན་མིན་རིག་གནས་ཤུལ་བཞག་རྣམ་གྲངས་བརྒྱད་རྨང་གཞིར་བྱས་པའི་མངོན་མིན་རིག་གནས་ཤུལ་བཞག་གི་རླུང་འཕྲིན་ལུས་རྩལ་སྒྲིག་བཟོ་བྱས་པ་དང་ཆབས་ཅིག་བརྙན་ལམ་བཟོས་ཏེ་གྲོང་ཁྱེར་ཡོངས་ཀྱི་སློབ་གྲྭ་ཁག་ལ་ཁྱབ་གདལ་བཏང་བ་མ་ཟད་དགེ་རྒན་མངགས་ནས་ཆེད་མངགས་མཛུབ་ཁྲིད་ཀྱང་བྱས་ཡོད།

བྱེད་སྒོ་ལག་བསྟར་བྱས་ཚུན་སྤྱི་ཚོགས་ལས་རིགས་ཁག་གི་གདེང་འཇོག་བཟང་པོ་ཐོབ་པ་མ་ཟད། སློབ་གྲྭའི་དགེ་སློབ་སྐྱོན་བྲལ་ངང་འཕེལ་རྒྱས་འགྲོ་རྒྱུར་རྨང་གཞི་བཏིང་ནས་བསམ་བློར་ཤུགས་རྐྱེན་བཟང་པོ་ཐེབས་པ་དང་། གཟུགས་པོར་སྦྱོང་བརྡར་ཐེབས་པ། ཕུལ་བྱུང་གི་སྲོལ་རྒྱུན་རིག་གནས་རྒྱུན་འཛིན་དང་དར་སྤེལ་ཐུབ་པ་བཅས་ཀྱི་ཕན་འབྲས་བཟང་པོ་ཐོན་ཡོད།

ཁྱབ་སྤེལ་དང་ཁྱབ་གདལ་བཏང་ནས་ཕུལ་བྱུང་སྲོལ་རྒྱུན་རིག་གནས་རྒྱ་སྟོབས་ཆེ་རུ་བཏང་བ།

རང་ལྗོངས་སུ་ད་ཆ་མཉམ་འབྲེལ་རྒྱལ་ཚོགས་ཀྱི་མིའི་རིགས་ཀྱི་མངོན་མིན་རིག་གནས་ཤུལ་བཞག་གི་མཚོན་བྱེད་བརྩམས་ཆོས་3དང་། རྒྱལ་ཁབ་རིམ་པའི་མངོན་མིན་རིག་གནས་ཤུལ་བཞག་གི་མཚོན་བྱེད་རང་བཞིན་གྱི་རྣམ་གྲངས་106 རྒྱལ་ཁབ་རིམ་པའི་མངོན་མིན་རིག་གནས་ཤུལ་བཞག་གི་མཚོན་བྱེད་རང་བཞིན་གྱི་རྒྱུན་འཛིན་པ་96 རང་སྐྱོང་ལྗོངས་རིམ་པའི་མངོན་མིན་རིག་གནས་ཤུལ་བཞག་གི་མཚོན་བྱེད་རང་བཞིན་གྱི་རྣམ་གྲངས་460 རང་སྐྱོང་ལྗོངས་རིམ་པའི་མངོན་མིན་རིག་གནས་ཤུལ་བཞག་གི་མཚོན་བྱེད་རང་བཞིན་གྱི་རྒྱུན་འཛིན་པ་522བཅས་ཡོད་པ་དང་། མངོན་མིན་རིག་གནས་ཤུལ་བཞག་གི་རྣམ་གྲངས་16རྒྱལ་ཁབ་ཀྱི་སྲོལ་རྒྱུན་བཟོ་རྩལ་དར་རྒྱས་གཏོང་བའི་དཀར་ཆག་ཁག་དང་པོའི་ནང་ཚུད་ཡོད།

2022ལོར་རང་སྐྱོང་ལྗོངས་རིག་གནས་ཐིང་གིས་རང་སྐྱོང་ལྗོངས་སློབ་གསོ་ཐིང་དང་མཉམ་འབྲེལ་ཐོག་དངོས་སུ་ཡིག་ཆ་བཀྲམ་ནས་ལྷ་ས་གྲོང་ཁྱེར་ཁྲེང་ཀོན་ཆུས་ཉང་བྲན་ཤང་ཆ་ཚང་སློབ་ཆུང་སོགས་སློབ་ཆུང་21བོད་ཀྱི་མངོན་མིན་རིག་གནས་ཤུལ་བཞག་སློབ་གྲྭར་ཁྱབ་གདལ་གཏོང་བའི་དཔེ་སྟོན་རྟེན་གཞི་ཁག་གཉིས་པར་མིང་འདོགས་རྒྱུའི་ཡོངས་བསྒྲགས་བྱས་པ་དེས་ཕུལ་བྱུང་གི་སྲོལ་རྒྱུན་རིག་གནས་ཁྱབ་སྤེལ་དང་ཁྱབ་གདལ་གཏོང་ཤུགས་སྔར་བས་ཆེ་རུ་གཏོང་བ་དང་། ཕུལ་བྱུང་གི་སྲོལ་རྒྱུན་རིག་གནས་སྲུང་སྐྱོང་རྒྱུན་འཛིན་དང་དེང་རབས་སློབ་གསོའི་མ་ལག་མཉམ་འདྲེས་གཏིང་ཟབ་བྱེད་པར་སྐུལ་འདེད་གཏོང་བར་ནུས་པ་ཆེན་པོ་ཐོན་ཡོད།

མངོན་མིན་རིག་གནས་ཤུལ་བཞག་སློབ་གྲྭར་ཁྱབ་གདལ་གཏོང་བའི་བྱེད་སྒོ་ལས་ཕུལ་བྱུང་གི་སྲོལ་རྒྱུན་རིག་གནས་ཀྱི་ཡིད་དབང་འཕྲོག་ཤུགས་ཆེ་རུ་ཕྱིན་པ་དང་ཆབས་ཅིག ཕྲུ་གུ་ཚོས་དེའི་ཁྲོད་ནས་རྒྱུན་འཛིན་གྱི་དོན་སྙིང་དང་འགན་འཁྲི་འཁུར་སེམས་ཤེས་རྟོགས་ཐུབ་ཡོད་ལ། ཁྱིམ་ཞེན་རྒྱལ་གཅེས་ཀྱི་བརྩེ་སེམས་ཀྱང་ཟབ་ཏུ་ཕྱིན་ཡོད།