བརྗོད་དོན་གཙོ་བོའི་སློབ་གསོ་སྤེལ་རིང་ནད་པར་ཞབས་འདེགས་དེ་བས་ལེགས་པ་ཞུ་བ་དང་སྨན་བཅོས་ཀྱི་མྱོང་བ་ལེགས་སུ་གཏོང་ཆེད། རང་སྐྱོང་ལྗོངས་མི་དམངས་སྨན་ཁང་གིས་གནད་ལ་འཁེལ་པོས་ཞན་ཆ་བཙལ་འཚོལ་བྱས་ནས་ཚན་ཁག་སྒྱུར་བཀོད་རིམ་སྤོར་བྱས་པ་དང་དམངས་ཕན་ཞབས་ཞུའི་ལས་དོན་སྤེལ་ཏེ་ནད་པར་དྲོ་སྐྱིད་དང་། བདེ་སྐྱིད། སྟབས་བདེ་བཅས་ཀྱི་སྨན་བཅོས་ཁོར་ཡུག་ཅིག་ཧུར་ཐག་བཏོད་ཡོད་པ་རེད།

“དེ་སྔ་སྨན་ཁང་གི་སྨན་ཆུ་བླུགས་སའི་ལྟེ་གནས་ཀྱི་སྒྲིག་ཆས་རྙིང་ལ་ཁང་པ་གུ་དོག་པས་ནད་པར་སྨན་བཅོས་ཀྱི་ཁོར་ཡུག་ཡག་པོ་བསྐྲུན་ཐུབ་མེད། ང་ཚོས་སྨན་ཆུ་བླུགས་སའི་ལྟེ་གནས་ཕྱོགས་ཡོངས་ནས་སྒྱུར་བཀོད་བྱེད་པ་དང་སྨན་ཆུ་བླུགས་སའི་ཁང་མིག་6ཚང་མར་གསོ་རླུང་དང་དྲོད་ལེན་སྒྲིག་སྦྱོར་བྱས་ཡོད”ཅེས་བོད་རང་སྐྱོང་ལྗོངས་མི་དམངས་སྨན་ཁང་གི་འབྲེལ་ཡོད་འགན་འཁུར་བས་བཤད།

ཤེས་རྟོགས་བྱུང་བར་གཞིགས་ན། རང་སྐྱོང་ལྗོངས་མི་དམངས་སྨན་ཁང་གི་ཁྲུའུ་དང་ཚན་ཁག་མང་པོ་ཞིག་གིས་མཉམ་འབྲེལ་ཐོག་འགག་སྒྲོལ་བྱས་ནས་སྨན་ཆུ་བླུགས་སའི་ལྟེ་གནས་རིམ་སྤོར་སྒྱུར་བཀོད་བྱས་པ་རེད། ནད་པས་ཁོག་ནད་ཚན་ཁག་བྱང་མའི་ནད་ཁང་གི་ཁོར་ཡུག་ཞན་པ་སོགས་ཀྱི་བསམ་འཆར་བཏོན་པར་དམིགས་ཏེ། སྨན་ཁང་གིས་གྱང་དང་པང་གཅལ་སྒྱུར་བཀོད་བྱས་པ་དང་ནད་ཁྲི་དང་ནད་གཡོག་གི་རྐུབ་སྟེགས་གསར་པ་བརྗེས་ཡོད།

“སྨན་པ་བསྟེན་སྐབས་སྤ་སེ་རག་དཀའ་བའི”གནད་དོན་ལ་དམིགས་ཏེ། སྨན་ཁང་གིས་སྒོ་བསྟེན་སྤ་སེ་མང་དུ་གཏོང་རྒྱུར་ཤུགས་སྣོན་བརྒྱབ་ཅིང་། འདི་ལོའི་ཟླ་7པ་ནས་བཟུང་། ཚན་ཁག་ཚང་མར་ཉུང་མཐར་ཡང་རིགས་གཅིག་མཁས་ཅན་4ཡོད་པ་དང་རིགས་གཅིག་མཁས་ཅན་གྱི་སྤ་སེ་ཉིན་རེར་དེ་སྔའི་30ཡོད་པ་དེ་ད་ལྟ་40ནས་50བར་མང་དུ་བཏང་ཡོད། སྤྱིར་བཏང་སྤ་སེ་ཉིན་རེར་དེ་སྔའི་60ནས་ད་ལྟ་70བར་མང་དུ་བཏང་ཡོད། སྤ་སེ་མང་དུ་བཏང་ཚུན་ཟླ་7པའི་སྒོ་བསྟེན་སྨན་བཅོས་བྱེད་ཚད་ཟླ་6པ་ལས་8.5%འཕར་ཡོད།

ནད་པ་ཉུང་ཙམ་རྒྱུག་པ་དང་། བང་དེ་ཙམ་སྒྲིག་མི་དགོས་པ། ཡུལ་རིང་སྒུག་མི་དགོས་པ་བཅས་བྱ་ཆེད། འདི་ལོའི་ཟླ་5པར་སྨན་ཁང་གིས་སྲིད་འཛིན“གཅིག་འཐུས་རྣམ་པའི”ཞབས་ཞུའི་ལྟེ་གནས་བསྐྲུན་ནས་སྤྱོད་འགོ་ཚུགས་པ་དང་ཚན་རིག་དང་མཐུན་པའི་ངང་སྨན་བཅོས་ལག་རྩལ་མི་སྣའི་ལས་ཀའི་དུས་ཚོད་བཀོད་སྒྲིག་ལུགས་མཐུན་བྱེད་པ་དང་འགན་ལེན་བྱེད་ཤུགས་ཆེ་རུ་གཏོང་བ་སོགས་ཀྱི་བྱེད་ཐབས་བརྒྱུད་བརྟག་དཔྱད་འབྲས་བུ་མང་ཆེ་བ་ཉིན་དེ་རང་དུ་དོན་གྱི་ཡོད་པ་རེད། སྨན་ཁང་གིས་སྒྲིག་ཆས་བཀོལ་སྤྱོད་བྱེད་ཚད་དང་། ཚན་ཁག་ཁག་གི་བེད་སྤྱོད་དགོས་མཁོ། ཚན་ཁག་གི་བར་མཐོངས་བཀོད་སྒྲིག་སོགས་ཀྱི་རྒྱུ་རྐྱེན་ལ་སྤྱི་འདོམས་བསམ་གཞིག་བྱས་ནས་ད་ཡོད་ཀྱི་ཐོན་ཁུངས་ཀྱི་མི་མངོན་པའི་སྟོབས་ཤུགས་སྔོག་འདོན་གང་ལེགས་བྱས་ཏེ་བཀོལ་སྤྱོད་ཧུར་ཐག་བྱས་པ་དཔེར་ན། ཚ་རྒྱས་སྒོ་བསྟེན་སྨན་ཁང་གི་ཆེད་སྤྱོད་CTསྒྲིག་ཆས་དེ་དོས་དྲག་དང་སྒོ་བསྟེན་སྨན་ཁང་སོགས་ཚན་ཁག་དང་མཉམ་དུ་སྤྱོད་རྒྱུ་བྱས་པས་ནད་པ་བརྟག་དཔྱད་བྱེད་སྐབས་ཡུན་རིང་སྒུག་མི་དགོས་པ་བྱུང་ཡོད།

འགན་འཁུར་བ་དེས་གསར་འགོད་པར་གོམ་སྟབས་རྗེས་མར་རང་སྐྱོང་ལྗོངས་མི་དམངས་སྨན་ཁང་གིས་མི་དམངས་མང་ཚོགས་ཀྱི་བླང་བྱ་གསར་པ་དང་རེ་སྒུག་གསར་པ་དང་ལེན་ཧུར་ཐག་བྱས་ཏེ་བརྗོད་དོན་གཙོ་བོའི་སློབ་གསོའི་གྲུབ་འབྲས་དེ་ལས་དོན་ཁག་ཡག་པོ་སྒྲུབ་པའི་སྒུལ་ཤུགས་ཆེན་པོ་ཞིག་ཏུ་ཏན་ཏིག་བསྒྱུར་ནས་སྨན་ཁང་གི་ལས་དོན་ཁག་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་རྒྱུ་རེད་ཅེས་བཤད་པ་རེད།