བརྗོད་དོན་གཙོ་བོའི་སློབ་གསོ་སྤེལ་རིང་རང་སྐྱོང་ལྗོངས་སློབ་གསོ་ཐིང་གིས་མི་དམངས་མང་ཚོགས་ཀྱི་སློབ་གསོའི་ཁྱབ་ཁོངས་ཀྱི་སེམས་ཁྲལ་བྱེད་ས་དང་། སུན་སྣང་བྱེད་ས། སེམས་ནད་ཆེ་ས་བཅས་ལ་དམིགས་ནས་བརྗོད་དོན་གཙོ་བོའི་སློབ་གསོའི“དམངས་ལ་ཕན་པ་སྐྲུན་པའི་བྱ་བ་དངོས་ཡག་པོ་སྒྲུབ་པའི”ལས་དོན་ནན་ཏན་ངང་སྤེལ་བ་རེད།

སློབ་མའི་སློབ་སྦྱོང་དང་འཚོ་བའི་ཆ་རྐྱེན་སྔར་བས་ལེཌ་སུ་གཏོང་བ་དང་སློབ་གསོའི“འགན་ལེན་གསུམ”གྱི་སྲིད་ཇུས་ཀྱི་འགན་ལེན་ནུས་པ་རྒྱུན་མཐུད་ཆེ་རུ་གཏོང་བ། རང་ལྗོངས་ཀྱིས་སློབ་གསོའི“འགན་ལེན་གསུམ”གྱི་སྲིད་ཇུས་ཀྱི་ཁ་གསབ་ཚད་གཞི་སྔར་བས་མཐོ་རུ་གཏོང་བ་བཅས་བྱ་ཆེད། 2023ལོའི་སྟོན་དུས་སློབ་དུས་ནས་བཟུང་ལྗོངས་ཡོངས་ཀྱི་རིགས་ཁུལ་ཁག་དང་སློབ་མཚམས་ཁག་གི་སློབ་གསོའི“འགན་ལེན་གསུམ”གྱི་སློབ་མའི་ཆ་སྙོམས་ཚད་གཞི་དེ་2022ལོའི་རྨང་གཞིའི་ཐོག་སྒོར་90སྤར་ཡོད། “འགན་ལེན་གསུམ”གྱི་ཚད་གཞི་སླར་ཡང་སྤར་བ་དེ་ནི་རང་ལྗོངས་ཀྱི་སློབ་གསོའི་ཁོངས་གཏོགས་ཀྱིས་མི་དམངས་བློ་ཡིད་ཚིམ་པའི་སློབ་གསོ་ཡག་པོ་གཉེར་རྒྱུར་དམིགས་ནས་བརྗོད་དོན་གཙོ་བོའི་སློབ་གསོ་གཏིང་ཟབ་དང་ཏན་ཏིག་སྤེལ་རྒྱུར་སྐུལ་འདེད་བཏང་བའི་ཞིབ་ཕྲའི་བྱེད་ཐབས་གྲས་ཤིག་རེད།

རྒྱ་ཆེའི་དགེ་སློབ་ཀྱི་ཐོབ་སྣང་དང་། སྐྱིད་སྣང་། བདེ་སྣང་བཅས་ཆེ་རུ་གཏོང་ཆེད། རང་ལྗོངས་ཀྱིས་མ་དངུལ་སྒོར་དུང་ཕྱུར་30.85བཏང་ནས་སློབ་གྲྭའི་དྲོད་རླངས་ཡོངས་ཁྱབ་ཀྱི་ལས་གྲྭ་ལག་བསྟར་བྱས་ཡོད། དེ་དང་དུས་མཚུངས་ས་བབ་མཐོ་བའི་སློབ་གྲྭ་1699ལ་ནུས་རྒྱུ་གཙང་མ་ལས་ཕྱོད་ཆེ་བའི་སྒོ་ནས་མཁོ་སྤྲོད་ཐུབ་ཡོད། མིག་སྔའི་བར་ལྗོངས་ཡོངས་ཀྱི་རིམ་པ་ཁག་དང་རིགས་ཁག་གི་སློབ་གྲྭར་དྲོད་རླངས་མཁོ་འདོན་ཁྱོན་ཡོངས་ལ་ཁྱབ་པ་དང་སློབ་གྲྭར་འགྲོ་མུས་ཀྱི་སློབ་མ་ཁྲི་27ལ་ཕན་པ་ཐོབ་པ་རེད།