ཉེ་ཆར། ཉིང་ཁྲི་གྲོང་ཁྱེར་ཀོང་པོ་རྒྱ་མདའ་རྫོང་གྲོང་གསར་ཤང་གིས་ཕ་ཡུལ་དུ་ལོག་པའི་སློབ་གྲྭ་ཆེ་མོ་བ་སྒྲིག་འཛུགས་བྱས་ནས“དགེ་རྒན་ཆུང་ཆུང”བྱེད་དུ་བཅུག་སྟེ། རང་བྱུང་གྲོང་ཚོ་སོ་སོར་རྒྱལ་ཁབ་ཀྱི་སྤྱི་སྤྱོད་སྐད་ཡིག་གཅིག་སྡུད་སློབ་སྦྱོང་གི“སློབ་ཁང་ཆེ་མོ”བཙུགས་པ་མ་ཟད། སློབ་ཡོན་མི་དགོས་པར་མང་ཚོགས་ལ་སློབ་ཁྲིད་བྱས་པ་རེད། འཛིན་གྲྭ་དབྱེ་ནས་སློབ་ཁྲིད་དང་། སློབ་ཚན་གསར་གཏོད། དུས་བཀག་ཞིབ་དཔྱད་སོགས་ཀྱི་བྱེད་ཐབས་སྤྱད་ནས་མང་ཚོགས་ཀྱི་སློབ་སྦྱོང་ལ་སྐུལ་ཁྲིད་བྱས་པས་ཁྱབ་ཁྱོན་དེ་བས་ཆེ་བ་དང་། དམིགས་སའི་རང་བཞིན་དེ་བས་ཆེ་བ། རྣམ་པ་གསར་བརྗེས། ཕན་འབྲས་དེ་བས་ལེགས་པ་བཅས་བྱུང་ཡོད།

གྲོང་གསར་ཤང་ཏང་ཨུད་དང་སྲིད་གཞུང་གིས་དབྱར་གསེང་སྐབས་གྲོང་ཚོར་ལོག་པའི་སློབ་གྲྭ་ཆེ་མོ་བའི་ཤེས་ལྡན་མི་སྣའི་ཐོན་ཁུངས་ཀྱི་ལེགས་ཆ་དང་སློབ་གྲྭ་ཆེ་མོ་བའི་བོད་རྒྱ་སྐད་ཡིག་གཉིས་ཀྱི་ཆུ་ཚད་དང་རྒྱལ་ཁབ་ཀྱི་སྤྱི་སྤྱོད་སྐད་ཡིག་གི་སློབ་ཁྲིད་དང་། གསོ་སྦྱོང་། བེད་སྤྱོད་སོགས་ཐད་ཀྱི་ལེགས་ཆ་བཏོན་ནས་སྤྱོད་ཡོན་གཉིས་ལྡན་གྱི་སློབ་གྲྭ་ཆེ་མོ་བ་16སྐུལ་སློང་བྱས་ཏེ། “སློབ་ཁང་ཆེ་མོ”ཡག་པོ་གཉེར་ཆེད་དགེ་རྒན་གྱི་སྟོབས་ཤུགས་ཆེན་པོ་བསྣན་ཡོད་པ་རེད།

གྲོང་གསར་ཤང་གིས་གྲོང་ཚོའི་སྤྱི་པའི་ཁང་པ་དང་ཞིང་པའི་དཔེ་ཁང་སོགས་ཀྱི་ལས་སྟེགས་ལ་བརྟེན་ནས་རང་བྱུང་གྲོང་ཚོ་ཚན་པར་བྱས་ཏེ་རྒྱལ་ཁབ་ཀྱི་སྤྱི་སྤྱོད་སྐད་ཡིག་གི་གཅིག་སྡུད་སློབ་སྦྱོང་སློབ་ཁང་10བཙུགས་པ་དང་སློབ་མ་100ལྷག་ཙམ་བསྡུས་ནས་གཟའ་འཁོར་རེར་ཉིན་7དང་ཉིན་རེར་སློབ་ཚན་2ཀྱི་སློབ་སྦྱོང་ཚད་གཞི་ལྟར་འཛིན་གྲྭ་ཁག་བགོས་ཀྱིས་སློབ་ཁྲིད་བྱས་པ་རེད། དེ་དང་ཆབས་ཅིག་གྲོང་སྡོད་ལས་དོན་རུ་ཁག་དང་། ཧྲུའུ་ཅི་དང་པོ། གྲོང་གསེབ་དར་རྒྱས་ཀྱི་ཆེད་བསྐོས་ལས་བྱེད་པ་བཅས་ཀྱིས་སློབ་མ་དང་ཆ་སྒྲིག་རོགས་སྐྱོར་བྱེད་སྟངས་འཐུས་སྒོ་ཚང་དུ་བཏང་སྟེ། གྲོང་ཚོ་ཚང་མར་འཛིན་གྲྭ་ཡོད་པ་དང་ཉིན་ལྟར་སློབ་ཚན་ཁྲིད་མཁན་ཡོད་པ་བྱས་ནས་འཛིན་གྲྭ་ཁག་བགོས་ཀྱི་སློབ་ཁྲིད་ཁྱོན་ཡོངས་ལ་ཁྱབ་པ་དང་ཆ་སྒྲིག་རོགས་སྐྱོར་ཁྱོན་ཡོངས་ལ་ཁྱབ་ཐུབ་པ་བྱས་ཡོད།

སློབ་སྦྱོང་གི་གྲུབ་འབྲས་སྲ་བརྟན་དུ་གཏོང་བ་དང་སློབ་ཁྲིད་ཀྱི་ཕན་འབྲས་ལ་ཞིབ་བཤེར་བྱ་ཆེད། གྲོང་གསར་ཤང་གིས“ཉིན་ལྟར་ཟུར་འཐེན་འདྲི་བ་ལེན་པ”དང“གཟའ་འཁོར་རེར་ཡིག་རྒྱུགས་ཆུང་གྲས་རེ་གཏོང་བ” “ཟླ་བ་རེར་འགྲན་བསྡུར་ཆུང་གྲས་རེ་བྱེད་པ”སོགས་ཀྱི་དཔྱད་ཞིབ་ལམ་སྲོལ་འཐུས་སྒོ་ཚང་དུ་བཏང་ནས་སློབ་མའི་སློབ་སྦྱོང་གི་གྲུབ་འབྲས་ཚོད་ལེན་གྱི་ཡོད། ཉིན་ལྟར་སློབ་ཚན་མ་འཚོག་གོང་གི་སྐར་མ་5གང་ལེགས་སྤྱད་དེ་སློབ་མར་སྐབས་བསྟུན་དྲི་བ་བཏོན་ནས་ཉིན་གཅིག་གོང་གི་སློབ་ཚན་གྱི་ནང་དོན་སློབ་སྦྱོང་དང་ཤེས་རྟོགས་ཐུབ་ཚུལ་ཕྱོགས་ཡོངས་ནས་ཤེས་རྟོགས་བྱས་ཏེ། ཉིན་རེའི་སློབ་ཚན་བཀོད་སྒྲིག་འོས་འཚམ་བྱས་ནས་སློབ་མ་ཡོངས་སློབ་ཁྲིད་ཀྱི་རྗེས་ཟིན་ཐུབ་པ་བྱས་ཡོད།