གཞིས་རྩེ་གྲོང་ཁྱེར་ས་དགའ་རྫོང་རོ་ཀྱོག་ཤང་ཆ་ཚང་སློབ་ཆུང་གི་ལོ་རིམ་ལྔ་པའི་སློབ་མ་པ་སངས་ལྷ་མོ་མཉམ་སྡེབ་དང་འབད་འབུངས་ཡར་བརྩོན་བྱེད་པར་དགའ་པོ་ཡོད་ལ། སྤྱོད་ཡོན་གཉིས་ལྡན་དང་མི་གཞན་ལ་རོགས་རམ་བྱེད་རྒྱུར་ཡང་དགའ་པོ་ཡོད། བུ་མོ་དེས་གཤིས་རྒྱུད་བཟང་པོ་དང་། ཕུལ་བྱུང་གི་སྦྱངས་འབྲས། ཕྱོགས་ཡོངས་འཕེལ་རྒྱས་ཀྱི་ཕྱོགས་བསྡུས་བྱང་ཚད་བཅས་ལ་བརྟེན་ནས་སློབ་གྲོགས་ཁྲོད་ཀྱི་ཕུལ་བྱུང་སློབ་མ་ཞིག་དང་སློབ་གྲོགས་ཚོའི་སློབ་སྦྱོང་གི་མིག་དཔེར་གྱུར་ཡོད། བུ་མོ་དེ་སྙིང་རུས་ཆེ་ཞིང་སློབ་སྦྱོང་ལ་དགའ་ཞེན་ཆེ་བ་མ་ཟད། ཁོ་མོས་བྱ་སྤྱོད་དངོས་དང་བྱ་བ་ཆུང་ཙག་ཁྲོད་ནས“ཏང་ཐུགས་བློ་བདེ་པོ་གནང་དང་། རྒྱལ་ཁབ་སྟོབས་དང་ལྡན་པར་བྱེད་པར་ང་རང་ཡོད”ཅེས་པའི་དམ་བཅའ་བརྟན་པོ་མཚོན་པར་བྱས་ཡོད།

པ་སངས་ལྷ་མོས་སློབ་གྲྭས་གཉེར་བའི་རོལ་དབྱངས་དང་། མཛེས་རྩལ། ཞབས་བྲོ། ཡིག་གཟུགས་སོགས་ཀྱི་སྤྲོ་སྣང་ཚོགས་པའི་བྱེད་སྒོར་ཧུར་ཐག་ཞུགས་ནས་ཀུན་སྤྱོད་དང་། ཤེས་རིག ལུས་རྩལ། མཛེས་དཔྱོད། ངལ་རྩོལ་བཅས་ཕྱོགས་ཡོངས་ནས་འཕེལ་རྒྱས་བཏང་ཡོད།

སློབ་གྲྭར་སྡོད་རིང་པ་སངས་ལྷ་མོས་ཁེངས་སྐྱུང་ངང་སློབ་སྦྱོང་བྱས་ནས་དཀའ་སྤྱད་འབད་བརྩོན་དང་། སློབ་སྦྱོང་ལ་བརྩོན་པ། སློབ་སྦྱོང་ལ་དགའ་བ་བཅས་དངོས་འབྲེལ་ཐུབ་པར་བྱས་པས། 2022ལོར་གཞིས་རྩེ་གྲོང་ཁྱེར་གྱི“དུས་རབས་གསར་པའི་ན་གཞོན་ཡག་པོ”དང་། 2020ནས་2022ལོ་བར་རོ་ཀྱོག་ཤང་གི“དུས་རབས་གསར་པའི་ན་གཞོན་ཡག་པོའི”གཟི་བརྗིད་མཚན་སྙན་ཐོབ་པ་དང་། ལོ་5བསྟུད་མར་སློབ་གྲྭའི“བཟང་པོ་གསུམ་ལྡན་གྱི་སློབ་མ”དང“ཕུལ་བྱུང་གི་འཛིན་གྲྭའི་ལས་བྱེད་པའི”གཟི་བརྗིད་མཚན་སྙན་ཐོབ་ཡོད་ལ་སློབ་སྦྱོང་གི་སྦྱངས་འབྲས་ཀྱང་འཛིན་གྲྭའི་ཨང་དང་པོ་ཡིན་པ་རེད།

དུས་རྒྱུན་གྱི་འཚོ་བའི་ནང་པ་སངས་ལྷ་མོས་དགེ་རྒན་དང་རྒན་རབས་ལ་གུས་ཞབས་ཆེན་པོ་བྱེད་ཀྱི་ཡོད་པས་ཁྱིམ་མཚེས་ཀྱིས་ཁོ་མོ་ཧ་ཉིད་གོ་བ་དང་གུས་ཞབས་ལྡན་པ་ཞིག་འདུག་ཅེས་བསྔགས་བརྗོད་བྱེད་ཀྱི་ཡོད། སློབ་གྲྭའི་ནང་པ་སངས་ལྷ་མོས་སྒྲིག་ཁྲིམས་ལ་བརྩི་སྲུང་དང་། མཉམ་སྡེབ་ལ་དགའ་ཞེན། དགེ་རྒན་ལ་བརྩི་འཇོག སློབ་གྲོགས་ལ་མཐུན་སྒྲིལ། གཞན་ལ་རོགས་རམ་བཅས་བྱེད་ཀྱི་ཡོད་ལ་སེམས་རྩ་འཁོལ་པོས་འཛིན་གྲྭ་དང་སློབ་གྲོགས་ལ་ཞབས་འདེགས་ཀྱང་ཞུ་གི་ཡོད།

སློབ་གྲོགས་པ་སངས་ལྷ་མོ་ནི་དུས་རབས་གསར་པའི་ཤེས་དཔལ་ལག་ལེན་བྱེད་སྒོའི་ཕུལ་བྱུང་གི་མཚོན་བྱེད་ཅིག་ཡིན་པ་དང་སློབ་གྲྭའི་དུས་རབས་གསར་པའི་ཤེས་དཔལ་ལག་ལེན་བྱེད་སྒོ་སྤེལ་ཚུན་ཁོང་གིས་གད་སྙིགས་རིགས་དབྱེ་ཚུར་བསྡུ་དང་། མ་ཡུམ་གཙང་པོར་སྲུང་སྐྱོང་། རྒན་བཀུར་གཞོན་གཅེས་སོགས་ཀྱི་བྱེད་སྒོའི་ནང་ཧུར་ཐག་ཞུགས་ཡོད། 2020ལོའི་རྒྱལ་སྟོན་གྱི་གུང་གསེང་རིང་པ་སངས་ལྷ་མོས་སློབ་གྲོགས་སྒྲིག་འཛུགས་བྱས་ནས་ཉིན་གསུམ་གྱི་དུས་ཚོད་སྤྱད་དེ་རོ་ཀྱོག་ཤང་གི་ཁོར་ཡུག་འཕྲོད་བསྟེན་གཙང་སྦྲའི་བྱེད་སྒོར་ཞུགས་པ་དང་། ཁོ་མོའི《རྒྱལ་སྟོན་གྱི་གུང་གསེང་། ས་མཐོའི་སློབ་ཆུང་སློབ་མ》ཞེས་པའི་སྔོན་ཐོན་བྱས་རྗེས་ས་དགའི་ཡོངས་བསྒྲགས་སོགས་ལས་སྟེགས་ནས་གཏོང་སྤེལ་བྱས་པ་མ་ཟད། ཁོ་མོས་བྱ་སྤྱོད་དངོས་ལ་བརྟེན་ནས་སློབ་མ་ཚང་མར་སློབ་གསོ་ཐེབས་པར་བྱས་ཡོད།