ཉེ་ཆར། རང་སྐྱོང་ལྗོངས་མི་དམངས་སྨན་ཁང་གིས་གྲོང་ཁྱེར་དང་ས་ཁུལ་7གྱི་མི་དམངས་སྨན་ཁང་དང་རྫོང་རིམ་པའི་སྨན་ཁང་13དང་མཉམ་དུ“1+7+13”གྱི་སྨན་ཁང་གི་སྨན་བཅོས་མཉམ་འབྲེལ་སྒྲིག་གཞིའི་དྲ་ཐོག་ཏུ་གན་རྒྱ་འཇོག་པའི་མཛད་སྒོ་འཚོགས་པ་རེད།

ཤེས་རྟོགས་བྱུང་བར་གཞིགས་ན། ས་ཁོངས་ཀྱི་སྨན་བཅོས་མཉམ་འབྲེལ་སྒྲིག་གཞི་འཛུགས་པ་ནི་རང་སྐྱོང་ལྗོངས་ཀྱི་ས་ཁོངས་ནང་གི་སྨན་བཅོས་ཐོན་ཁུངས་བསྡུ་སྒྲིལ་དང་། སྨན་བཅོས་ཐོན་ཁུངས་སྤུས་ལེགས་གཤམ་སྤྲོད་རྒྱ་སྐྱེད་དང་ས་ཁོངས་དོ་སྙོམས་བཀོད་སྒྲིག་ལ་སྐུལ་འདེད་གཏོང་བ། གཞི་རིམ་གྱི་སྨན་བཅོས་ཞབས་ཞུའི་ནུས་པ་ཆེ་རུ་གཏོང་བ། སྨན་བཅོས་ཞབས་ཞུའི་མ་ལག་འཐུས་སྒོ་ཚང་དུ་གཏོང་བ་བཅས་ཀྱི་བྱ་ཐབས་གལ་ཆེན་ཞིག་རེད་ལ། གོ་རིམ་ལྡན་པའི་རིམ་དབྱེའི་སྨན་བཅོས་བྱེད་སྟངས་འཛུགས་རྒྱུར་སྐུལ་འདེད་གཏོང་བའི་ནང་དོན་གལ་ཆེན་དང་ས་ཁོངས་ཀྱི་སྨན་བཅོས་འཕྲོད་བསྟེན་བྱ་གཞག་སྤུས་ཚད་མཐོ་བའི་འཕེལ་རྒྱས་ཡོང་བའི་བྱ་ཐབས་བཟང་པོ་ཞིག་ཀྱང་ཡིན་པ་མ་ཟད། དེ་བས་ཀྱང་མང་ཚོགས་ནད་བསྟེན་པ་དང་སྨན་བཅོས་བྱེད་པའི་ཐོབ་སྣང་ཆེ་རུ་གཏོང་བའི་བྱ་ཐབས་ནུས་ལྡན་ཞིག་ཀྱང་རེད།