-
བོད་ལྗོངས་ཀྱི་མཐོ་སློབ་སློབ་བསྡུའི་བརྡ་ཐོ་ཁག་དང་པོ་ཚེས་18ཉིན་ནས་བཟུང་རིམ་བཞིན་འབྱོར་བ།
-
ཡོང་ཁུངས། མི་དམངས་ཉིན་རེའི་ཚགས་པར། | སྤེལ་དུས། 2023-07-21
འདི་ནི་ལྷ་ས་གྲོང་ཁྱེར་པེ་ཅིང་ཚོད་ལྟའི་སློབ་འབྲིང་གི་སློབ་མ་པད་མ་གཡུ་སྒྲོན་གྱིས་སྦྲག་སྐྱེལ་བའི་ལག་ནས་སློབ་བསྡུའི་བརྡ་ཐོ་ལེན་བཞིན་པ།
ཉེ་ཆར། ལྷ་ས་གྲོང་ཁྱེར་ཁྲེང་ཀོན་ཆུས་གྲྭ་བཞི་ལམ་དུ་སྡོད་མཁན་པད་མ་གཡུ་སྒྲོན་ལ་ཀྲུང་གོ་སྦྲག་སྲིད་ལྷ་ས་ཡན་ལག་ཀུང་སིའི་སྦྲག་སྐྱེལ་བས་བསྐྱལ་བའི་སློབ་བསྡུའི་བརྡ་ཐོ་འབྱོར་པ་རེད། དེ་ནི་འདི་ལོའི་བོད་ལྗོངས་ཀྱི་མཐོ་སློབ་སློབ་བསྡུའི་བརྡ་ཐོ་ཐོག་མ་དེ་ཡིན་པ་དང་། ལོ་18ལ་སླེབས་པའི་པད་མ་གཡུ་སྒྲོན་ནི་ལྷ་ས་གྲོང་ཁྱེར་པེ་ཅིང་ཚོད་ལྟའི་སློབ་འབྲིང་ནས་ཐོན་ཞིང་། ཀྲུང་གོ་མི་དམངས་སྤྱི་བདེ་སློབ་ཆེན་ལ་རྒྱུགས་འཕྲོད་ཡོད་པ་རེད།
མཐོ་སློབ་ཀྱི་སློབ་བསྡུའི་བརྡ་ཐོ་ཐོག་མ་འབྱོར་པ་དང་ཆབས་ཅིག་བོད་ལྗོངས་ཀྱི་2023ལོའི་མཐོ་སློབ་སློབ་བསྡུའི་བརྡ་ཐོ་སྐྱེལ་བའི་ལས་དོན་དངོས་སུ་འགོ་ཚུགས་ཤིང་། ཀྲུང་གོ་སྦྲག་སྲིད་ཚོགས་པ་ཚད་ཡོད་ཀུང་སི་བོད་རང་སྐྱོང་ལྗོངས་ཡན་ལག་ཀུང་སིའི་འབྲེལ་ཡོད་འགན་འཁུར་བས། འདི་ལོར་བོད་ལྗོངས་སྦྲག་སྲིད་ཀྱིས་སྔར་རྒྱུན་བཞིན་ཚད་གཞི་མཐོ་ཤོས་དང་། འགན་ལེན་ཆེ་ཤོས། བྱ་ཐབས་ནན་ཤོས་བཅས་ཀྱི་ཐོག་ནས་བརྡ་ཐོ་སྐྱེལ་བར་ནོར་འཛོལ་གཏན་ནས་མི་ཡོང་བའི་འགན་ལེན་བྱེད་ཀྱི་ཡིན་ཞེས་བཤད།
དེ་དང་ཆབས་ཅིག་རྒྱ་ཆེའི་རྒྱུགས་འཕྲོད་སློབ་མར་དྲན་སྐུལ་ཞུ་རྒྱུར། སློབ་བསྡུའི་བརྡ་ཐོ་སྐྱེལ་རིང་། སློབ་མ་རང་ཉིད་ཀྱི་ཁ་པར་ཤར་གཏོང་ཐུབ་པར་བྱས་ནས་བརྡ་ཐོ་བདེ་བླག་ངང་རང་ཉིད་ཀྱི་ལག་པར་འབྱོར་ཐུབ་པ་བྱེད་དགོས་པ་དང་། གལ་སྲིད་སློབ་བསྡུའི་བརྡ་ཐོ་རང་ཉིད་ཀྱིས་ལེན་མི་ཐུབ་པར་གཞན་གྱིས་ཚབ་བྱས་ནས་ལེན་དགོས་ན་རྒྱུགས་འཕྲོད་སློབ་མའི་ཐོབ་ཐང་ལག་ཁྱེར་དང་། ཡིག་ཚད་གཏོང་ཆོག་པའི་ལག་ཁྱེར་འཁྱེར་དགོས་པ་མ་ཟད། ཚབ་བྱེད་མཁན་དེའི་ཐོབ་ཐང་ལག་ཁྱེར་སོགས་ངེས་པར་དུ་འཁྱེར་དགོས།