ཉེ་ཆར། གསར་འགོད་པར་རང་སྐྱོང་ལྗོངས་སློབ་གསོ་ཡིག་རྒྱུགས་ཁང་ནས་ཤེས་རྟོགས་བྱུང་བར། རང་ལྗོངས་ཀྱི་2023ལོའི་མཐོ་སློབ་དཀྱུས་མའི་མཐོ་རྒྱུགས་ཟླ་6ཚེས་7ནས་9ཉིན་བར་གཏོང་གི་ཡོད་པས། རྒྱུགས་སྤྲོད་སློབ་མས་ཟླ་6ཚེས་6ཉིན་གྱི་ཕྱི་དྲོར་རྒྱུགས་གཏོང་ཁུལ་ཁག་གི་གཏན་འབེབས་དུས་ཚོད་ལྟར་རྒྱུགས་རར་རྒྱུགས་གཏོང་སའི་ཁོར་ཡུག་ལ་རྒྱུས་མངའ་དང་རྒྱུགས་རའི་བཀོད་སྒྲིག་ལ་ལྟ་བར་བསྐྱོད་ནས་རྒྱུགས་གཏོང་སའི་ཉེ་འཁོར་གྱི་འགྲིམ་འགྲུལ་གནས་ཚུལ་དང་རྒྱུགས་གཏོང་སའི་གནས་ཡུལ་སྔོན་ཚུད་ནས་ཤེས་པར་བྱེད་དགོས།

ཟླ་6ཚེས་7ནས་ཚེས་9ཉིན་བར་ལས་ཀའི་ཉིན་མོ་འཁེལ་བས། རྒྱུགས་སྤྲོད་སློབ་མ་དང་ཁྱིམ་བདག་གིས་གནམ་གཤིས་དང་། འགྲིམ་འགྲུལ་གྱི་གནས་ཚུལ་ལ་བསམ་བློ་ཞིབ་ཕྲ་བཏང་ནས་ཕྱིར་སྐྱོད་པའི་དུས་ཚོད་དང་འགྲོ་ཐབས་བཀོད་སྒྲིག་ལུགས་མཐུན་བྱས་ཏེ་འགྲོ་སའི་ལམ་ཐིག་ལ་འཆར་འགོད་ཡག་པོ་དང་། ཚ་བ་དང་། ཉི་འོད། ཆར་པ་སོགས་འགོག་པའི་གྲ་སྒྲིག་ཁག་སྔོན་ཚུད་ནས་ཡག་པོ་བྱེད་དགོས་པ་མ་ཟད། རྒྱུགས་གཏོང་བར་འགྲོ་བའི་ལམ་དུ་བདེ་འཇགས་ལ་གཟབ་གཟབ་བྱས་ནས་རྒྱུགས་མ་སྤྲད་གོང་གི་ཆུ་ཚོད་1གི་གོང་ནས་རྒྱུགས་རར་སླེབས་པར་བྱས་ཏེ་གོར་འགྱངས་མི་ཡོང་བར་བྱེད་དགོས་པའི་གྲོས་འགོ་བཏོན་ཡོད།

ད་ཆ་ཏོག་གསར་ནད་དུག་འགོག་སྲུང་སྲིད་ཇུས་ལ“རིགས་ཁ་པའི་དོ་དམ་བྱེད་སྟངས་ཁ་པ”ལག་ལེན་བསྟར་བས། རྒྱུགས་སྤྲོད་སློབ་མ་ཚོས་རྒྱུགས་མ་བཏང་གོང་ཕྱིར་མི་འགྲོ་ཀ་མེད་བྱུང་ན་མ་གཏོགས་ཕྱིར་ཉུང་ཙམ་འགྲོ་དགོས་པ་དང་། ཕྱིར་བསྐྱོད་ནའང་མི་ཚོགས་སྟུག་སར་མི་སྐྱོད་པ་དང་། འདུ་འཛོམས་ཀྱི་བྱེད་སྒོར་མི་ཞུགས་པར་ཕན་ཚུན་འབྲེལ་གཏུག་དང་ཐུག་རེག་ཉུང་ཙམ་བྱས་ནས་འགོ་བའི་ཉེན་ཁ་ཆུང་དུ་གཏོང་དགོས་པ་མ་ཟད། ལུས་སྦྱོང་ལ་ཤུགས་སྣོན་བརྒྱབ་སྟེ་སྒེར་གྱི་འགོག་སྲུང་ཡག་པོ་བྱས་ནས་བདེ་མ་ཐང་མའི་ངང་རྒྱུགས་སྤྲོད་ལ་ཞུགས་ཐུབ་པར་བྱེད་དགོས་པ་དང་། རྒྱུགས་མ་སྤྲད་གོང་གི་ཉིན་3རིང་། ཚ་བ་རྒྱག་པ་དང་། གློ་རྒྱག་པ་སོགས་དོགས་པ་ཆེ་བའི་ནད་རྟགས་ཐོན་ཚེ་ངེས་པར་དུ་ཉིང་སྐྱུར་རམ་འགོག་རྫས་བརྟག་དཔྱད་བྱས་ནས་གདགས་གཤིས་ཡིན་པ་གཏན་འཁེལ་ན་རྒྱུགས་སྤྲོད་སློབ་མས་ངེས་པར་དུ་ཐོ་འགོད་ཡུལ་དང་རྒྱུགས་རར་རང་འགུལ་ངང་དགོངས་སྐོར་སྙན་གསེང་ཞུ་དགོས།

འདི་ལོ་རང་ལྗོངས་ཀྱི་མཐོ་རྒྱུགས་ལ་རིག་ནུས་ཀྱི་བདེ་འཇགས་ཞིབ་བཤེར་འཛུལ་སྒོ་བཙུགས་ནས་ཁ་པར་དང་། རིག་ནུས་ཆུ་ཚོད་སོགས་འཕྲིན་གཏོང་ཡོ་ཆས་རྒྱུགས་རར་གཏན་ནས་འཁྱེར་དུ་མི་འཇུག་པ་མ་ཟད། རྒྱུགས་རར་སྐུད་མེད་ཀྱི་གློག་འཕྲིན་བརྡ་རྟགས（5Gའཕྲིན་རྟགས་ཚུད་པ）ཡོངས་སུ་འགོག་གི་ཡོད།

རྒྱུགས་རར་རྒྱུགས་སྤྲོད་སློབ་མས་གོ་ཆོད་པའི་ཐོབ་ཐང་ལག་ཁྱེར་དང་། རྒྱུགས་སྤྲོད་ལག་ཁྱེར་མ་གཏོགས་ཁྱེར་མི་ཆོག་པ་དང་། རྒྱུགས་རས་རྒྱུགས་སྤྲོད་ཡིག་ཆས་དང་གློག་རྡུལ་ཆུ་ཚོད་གཅིག་གྱུར་གྲ་སྒྲིག་བྱས་ཡོད།

རང་སྐྱོང་ལྗོངས་སློབ་གསོ་རྒྱུགས་ལེན་གླིང་གིས། ཡིད་རྟོན་འཕེར་བའི་ངང་རྒྱུགས་གཏོང་བ་ནི་གཟི་བརྗིད་དང་། སྒྲིག་འགལ་ངང་རྐུ་བཤུ་བྱས་ན་ཁྲིམས་ཆད་འཁུར་དགོས་པས། རྒྱ་ཆེའི་རྒྱུགས་སྤྲོད་སློབ་མ་ཚོས་རྒྱུགས་སྤྲོད་པའི་སྒྲིག་ལམ་ནན་པོ་སྲུང་བ་དང་ཡིད་རྟོན་འཕེར་བའི་ངང་རྒྱུགས་སྤྲོད་དགོས་ཤིང་། རྐྱེན་ཆུང་ཆུང་གིས་གནས་ཚུལ་ཆེན་པོ་མི་ཐོན་པར་བྱས་ཏེ་རང་ཉིད་ནས་ཁྲིམས་ཡག་པོ་ཁུར་ཏེ་ཚེ་གང་གནོང་འགྱོད་མེད་པ་བྱེད་དགོས་པའི་ནན་བཤད་བྱས་ཤིང་། རང་ལྗོངས་ཀྱི་རྒྱལ་ཁབ་སློབ་གསོ་རྒྱུགས་ལེན་གྱི་རྒྱུགས་ར་ཚད་ལྡན་ཚང་མར་རྒྱུགས་ལེན་སྐབས་བབ་བསྟུན་གྱི་གློག་མིག་དང་བརྒྱུད་རིམ་ཧྲིལ་པོ་བརྙན་དུ་བླུག་གི་ཡོད་པ་རེད།

རང་ལྗོངས་ཀྱི་མཐོ་སློབ་དཀྱུས་མའི་སློབ་བསྡུ་རང་སྐྱོང་ལྗོངས་སློབ་གསོ་རྒྱུགས་ལེན་གླིང་གིས་འགན་ཁུར་ནས་སྒྲིག་འཛུགས་ལག་ལེན་བསྟར་བ་དང་། སྲིད་ཇུས་ཁྱབ་བསྒྲགས་དང་། བརྡ་ཐོ་དང་སྤྱི་བསྒྲགས་གཏོང་བ། འདོད་མོས་རེའུ་མིག་རྒྱོང་བ། སྐར་གྲངས་ཁྱབ་བསྒྲགས་དང་སློབ་བསྡུ་བཅས་ཚང་མ་བོད་རང་སྐྱོང་ལྗོངས་སློབ་གསོ་རྒྱུགས་ལེན་གླིང་གི་གཞུང་ཕྱོགས་དྲ་རྒྱ（bttp：／／zsks．edu．xizang．gov．cn／）“བོད་ལྗོངས་སྐད་འཕྲིན་གཞོན་ནུའི”སྐད་འཕྲིན་སྤྱི་རྟགས་སུ་ཁྱབ་བསྒྲགས་བྱེད་པའམ་ཡང་ན་ས་གནས（གྲོང་ཁྱེར）ཁག་གི་རྒྱུགས་ལེན་སློབ་བསྡུ་སྒྲིག་གཞིར་མངགས་བཅོལ་བྱས་ནས་དེས་ཁྱབ་བསྒྲགས་བྱེད་པ་ལས་གཞན་གྱི་ཐབས་ལམ་བརྒྱུད་ནས་བཏང་རིགས་ལ་ཡིད་ཆེས་གཏན་ནས་བྱ་རྒྱུ་མེད་པས། རྒྱུགས་སྤྲོད་སློབ་མ་ཚོས་མཐོ་རྒྱུགས་ཀྱི་མིང་ཐོ་འགོད་རིང་འབྲེལ་གཏུག་ཁ་པར་ཤར་གཏོང་བྱེད་དགོས་ལ་རང་སྐྱོང་ལྗོངས་སློབ་གསོ་རྒྱུགས་ལེན་གླིང་དང་རྒྱུགས་གཏོང་ཁུལ་ནས་བརྡ་ཐོ་རྟག་འབྱོར་ཐུབ་པའི་འགན་ལེན་ཡང་བྱེད་དགོས།