རྫབ་རླངས་ནི་གཙང་ལ་སྦགས་བཙོག་མེད་པའི་ནུས་ཁུངས་ཡིན་པ་དང་། དེ་ནས་ཐོན་པའི་རྫབ་ཆུ་དང་རྫབ་སྙིགས་ནི་ཐོན་སྐྱེད་ཐོག་སྤྱོད་པའི་ཞིང་སྤྱོད་ལུད་རྫས་རྩེ་གྲས་ཞིག་ཡིན། ཚོད་ལྟ་བྱས་པ་བརྒྱུད་རྨིད་རྒྱ་དཔངས་གྲུ་བཞི་མ་8ནས་10བྱས་པའི་རྫབ་རླངས་རྫིང་བུ་གཅིག་ནས་ཐོན་པའི་རྫབ་ཆུ་དང་རྫབ་སྙིགས་ཀྱིས་ཞིང་ཁ་མུའུ་4ནས་5བར་གྱི་ལོ་ཏོག་སྐྱེ་འཚར་ལ་མཁོ་བའི་རྫབ་ལུད་འདང་ངེས་ཐོན་ཐུབ་པས་ཚལ་ཞིང་ནང་སྤྱོད་སྐབས་ནུས་པ་མངོན་གསལ་དོད་ལ་ཐོན་ཚད་དང་སྤུས་ཀ་མཐོ་རུ་འགྲོ་བ་མ་ཟད་སྡོང་པོའི་ནད་འགོག་ནུས་པ་ལེགས་སུ་གཏོང་ཐུབ།
༡ རྫབ་སྙིགས་གཏིང་ལུད་ལ་སྤྱོད་པ། མྱུ་གུ་རྩ་སྤོས་བརྒྱབ་པའི་སྔོ་ཚལ་རིགས་ཀྱི་གཏིང་ལུད་ལ་རྒྱག་པ་དང་། མྱུ་གུ་རྩ་སྤོས་རྒྱག་སྐབས་མུའུ་རེར་རུལ་ཟིན་པའི་རྫབ་སྙིགས་སྤྱི་རྒྱ་2000རྒྱག་དགོས་པ་དང་སྡོང་པོ་གཏན་འཁེལ་བྱེད་སའི་ཁུང་བུའི་ནང་ཁུང་བུ་འདྲུས་པའི་ས་མཉམ་བསྲེས་བྱས་རྗེས་སྡོང་པོ་གཏན་འཁེལ་བྱེད་དགོས། ཕུར་འདེབས་དང་གཞི་རྒྱ་ཆེ་བའི་འདེབས་འཛུགས་ཀྱི་བྱ་ཐབས་སྤྱད་པའི་སྔོ་ཚལ་རིགས་ཀྱི་གཏིང་ལུད་སྤྱིར་བཏང་རྣང་གཏོར་གྱི་བྱ་ཐབས་སྤྱོད་ཀྱི་ཡོད། ཀྭ་ཚལ་རིགས་དཔེར་ན། ནན་ཀྭ་དང་། ཏུང་ཀྭ ཧོང་ཀྭ ཀྲོ་མ་ཀྲུའུ་སོགས་སྤྱིར་བཏང་ཕོན་ཆེན་བཙུགས་ཏེ་ལུད་གཏོར་བའི་བྱ་ཐབས་སྤྱོད་དགོས་པ་དང་མུའུ་རེར་རྫབ་སྙིགས་སྤྱི་རྒྱ་3000དང་ཀོའོ་ལིང་སོན་ཀལ་སྤྱི་རྒྱ་35དང་གོ་ཐལ་སྤྱི་རྒྱ་100དེ་མིན་འཚོ་བའི་གད་སྙིགས་འོས་འཚམ་མཉམ་བསྲེས་བྱས་རྗེས་ཁུང་བུའི་ནང་གཏོར་བ་དང་ དེའི་ཐོག་ཞིང་ས་རིམ་པ་ཧ་ལམ་ལིའི་རྨིད་5ནས་10བར་འགེབས་ཀྱི་ཡོད་ཅིང་སྡོང་པོ་གཏན་འཁེལ་རྗེས་ལམ་སེང་ཆུ་སིམ་ཞིག་བཏང་ནས་དུས་ཐོག་ཏུ་སོག་མ་བཀབ་དགོས།
༢ རྫབ་ཆུ་ཁ་ལུད་ལ་སྤྱོད་པ། སྤྱིར་བཏང་རྩ་བ་དང་ལོ་མའི་ཐོག་གཏོར་བའི་བྱ་ཐབས་རིགས་གཉིས་སྤྱོད་ཅིང་རྩ་བར་རྒྱག་པའི་རྫབ་ཆུའི་ཚད་གཞི་དེ་སྔོ་ཚལ་རིགས་ཀྱི་ཐོན་རྫས་ལ་བལྟས་ནས་གཏན་འཁེལ་བྱེད་པ་དང་སྤྱིར་བཏང་སྤྱོད་ཚད་དེ་མུའུ་རེར་སྤྱི་རྒྱ་500ནས་3000བར་ཡིན་དགོས། རྫབ་ཆུ་གཏོར་སྐབས་གནམ་དྭངས་བའི་ཉིན་མོའམ་ས་སྲིབ་ལ་གཏོར་དགོས་པ་ལས་ཆར་དུས་དང་ས་རྒྱུ་བརླན་དྲགས་པའི་སྐབས་གཏོར་མི་ཉན། ལོ་མའི་ཐོག་རྫབ་ཆུ་གཏོར་བའི་སྐབས་སྔོན་ལ་སེང་རས་ཀྱིས་དྭངས་སེང་ཕྱེ་རྗེས་གཏོར་ན་འགྲིག སྔོ་ཚལ་རིགས་ཀྱི་ལོ་མ་སོས་པའི་དུས་ཚིགས་ལ་རྫབ་ཆུར་ཆུ་ལྡབ་གཅིག་བསྲེས་ཏེ་སླ་རུ་བཏང་རྗེས་སྤྱི་རྒྱ་40ནས་50བར་སྔ་ཞོགས་ཀྱི་ཟིལ་པ་སྐམ་རྗེས་གཏོར་དགོས། དབྱར་དུས་ས་སྲིབ་སྐབས་གཏོར་བ་ལས་ཉིན་དགུང་དང་ཆར་པ་འབབ་པའི་དུས་སུ་གཏོར་མི་ཉན། ལོ་ལྡན་སྔོ་ཚལ་རིགས་སྐྱེ་འཚར་ཡོང་བའི་དུས་ཚིགས་གང་ལའང་གཏོར་ཆོག་ལ་ནད་འགོག་འབུ་གསོད་སྐབས་དང་ཟུང་འབྲེལ་བྱས་ཏེ་གཏོར་ན་འགྲིག ཀྭ་རིགས་ཚལ་ལ་ཐིའུ་ཐོན་པའི་དུས་དང་། མེ་ཏོག་ཤར་བའི་དུས། འབྲས་བུ་ཆེ་རུ་འགྲོ་བའི་དུས་བཅས་ལ་གཏོར་དགོས་པ་དང་ཆབས་ཅིག་རྫབ་ཆུའི་ནང་ལིའུ་སོན་ཨར་ཆིང་ཅཱ30% བླུགས་དགོས།