ཉིན་ཤས་གོང་། སོག་རྫོང་སྨན་རྩིས་ཁང་སྒོ་བསྟེན་སྨན་བཅོས་ཁང་དུ་སྨན་པ་བསྟེན་པར་སླེབས་པའི་མི་ཚོགས་ཀྱི་ཁྲོད་དུ་ཡུལ་དེ་གའི་ནད་པ་ཕུད། ད་དུང་རང་སྐྱོང་ལྗོངས་ཀྱི་ས་ཁུལ་ལམ་གྲོང་ཁྱེར་གཞན་དང་ཞིང་ཆེན་གཞན་གྱི་ནད་པ་ཡང་ཡོད་པ་གསར་འགོད་པར་ཤེས་རྟོགས་བྱུང་། སྨན་ཁང་གི་གྱང་ངོས་སུ་གོས་དར་མང་པོ་བཀལ་ཡོད་པ་དེ་དག་ནི་ནད་པ་དྲག་སྐྱེད་བྱུང་སྟེ་སྨན་ཁང་ནས་དོན་རྗེས་ཆེད་མངགས་ཕུལ་བ་ཤ་སྟག་རེད།

ད་བར་སོག་རྫོང་སྨན་རྩིས་ཁང་གིས་ཞབས་འདེགས་ཧུར་ཐག་ཞུ་བར་སྣང་ཆེན་དང་ནད་པ་ལྟེ་བར་བྱེད་པའི་ཞབས་ཞུའི་འདུ་ཤེས་མཐའ་འཁྱོངས་ཀྱིས“ཏང་འཛུགས་སྐྱོང་དང་མི་རིགས་མཐུན་སྒྲིལ”ཟུང་འབྲེལ་གྱི་ལས་ཀའི་རྣམ་པར་བརྟེན་ནས་ནད་པའི་ན་ཟུག་ནུས་ཤུགས་ཡོད་རྒུས་བཅག་སྟེ་མང་ཚོགས་ཀྱི་བདེ་ཐང་བློ་གཅིག་སེམས་གཅིག་གིས་བསྲུངས་ཡོད་པ་དང་། སྨན་ཁང་དེས་གོང་རིམ་གྱི་ཆེད་སྤྱོད་ཁ་གསབ་མ་དངུལ་ལུགས་མཐུན་ངང་སྤྱོད་པ་དང་། རང་ངོས་ཀྱི་ལེགས་ཆར་རྟེན་པ། བོད་ཀྱི་གསོ་བ་རིག་པ་དར་སྤེལ་ཤུགས་ཆེན་གཏོང་བ་བཅས་བྱས་ནས་དེང་རབས་གསོ་རིག་དང་ཀྲུང་ལུགས་གསོ་བ་རིག་པའི་སྔོན་ཐོན་ཤེས་བྱ་དང་། རྩལ་ནུས། སྒྲིག་ཆས་སོགས་ཟམ་མི་ཆད་པར་ནང་འདྲེན་བྱས་ཏེ་ལེགས་ཆ་གསབ་རེས་ཀྱིས་ནད་བརྟག་སྨན་བཅོས་ཀྱི་ཆུ་ཚད་མཐོ་རུ་བཏང་ཡོད།

ལྷག་པར་དུ་སྨན་ཁང་དེས་རྒྱུན་འཛིན་བྱས་པའི་རྩ་སྦྱོང་བཅོས་ཐབས་ལ་ད་བར་ལོ་ངོ་སྟོང་གི་ལོ་རྒྱུས་ཡོད། བོད་ཀྱི་གསོ་བ་རིག་པའི་བསྟན་བཅོས《དཔལ་ལྡན་རྒྱུད་བཞི》ཡི་ནང་སྨན་བཅོས་བྱེད་ཐབས་འདིས་རྩ་དཀར་ནག་གི་ནད་ལ་ཕན་ནུས་མངོན་གསལ་ཐོན་གྱི་ཡོད་པ་འཁོད་ཡོད། 2021ལོའི་ཟླ་5པར་རྩ་སྦྱོང་བཅོས་ཐབས་དེ་ཁག་ལྔ་པའི་རྒྱལ་ཁབ་རིམ་པའི་མངོན་མིན་རིག་གནས་ཤུལ་བཞག་གི་མཚོན་བྱེད་རང་བཞིན་གྱི་རྣམ་གྲངས་མིང་གཞུང་དུ་ཚུད་ཡོད་པ་རེད།

ཞིང་འབྲོག་ཁུལ་གྱི་མང་ཚོགས་ཀྱིས་སྨན་པ་བསྟེན་པར་སྟབས་བདེ་ཡོང་ཆེད། སོག་རྫོང་སྨན་རྩིས་ཁང་གིས་ཐབས་བརྒྱ་ཇུས་སྟོང་ངང་མ་དངུལ་བརྩོན་ལེན་བྱས་ནས་སྨན་བཅོས་དཔུང་ཁག་ཧུར་ཐག་བཙུགས་ཏེ་འབྲོག་ཁུལ་དུ་འོས་འགན་སྨན་བཅོས་དང་། སྨན་སྐྱེལ་བ། གཟུགས་པོར་བརྟག་དཔྱད་སོགས་ཀྱི་སྤྱི་ཕན་རང་བཞིན་གྱི་བྱེད་སྒོ་སྤེལ་ནས་སྨན་རིན་མི་དགོས་པར་སྨན་སྤྲོད་ཚད་རིམ་རྩིས་བྱས་ན་སྒོར་ཁྲི་6ལྷག་ཙམ་ཟིན་ཡོད་པ་རེད།

སོག་རྫོང་སྨན་རྩིས་ཁང་གི་ཡོན་ཀྲང་བཀྲ་ཤིས་རྡོ་རྗེས་སོག་རྫོང་སྨན་རྩིས་ཁང་གིས་བློ་གཅིག་སེམས་གཅིག་ངང་མང་ཚོགས་ཀྱི་བདེ་ཐང་སྲུང་བ་ཐོག་མཐའ་བར་གསུམ་དུ་གནས་བབ་ཨང་དང་པོར་བཞག་ནས་སེམས་ནུས་ཡོད་རྒུས་མང་ཚོགས་ལ་ཞབས་འདེཌ་ཞུ་བའི་ལས་དོན་ཡག་པོ་བསྒྲུབས་ཏེ་མང་ཚོགས་ཀྱི་ཐོབ་སྣང་དང་། སྐྱིད་སྣང་། བདེ་སྣང་བཅས་ཟམ་མི་ཆད་པར་ཆེ་རུ་གཏོང་གི་ཡིན་ཞེས་བཤད་པ་རེད།