དེང་གི་དུས་སུ་མི་རྣམས་ཀྱིས་ཆ་འཕྲིན་ཤེས་རྟོགས་བྱེད་པའི་ཐབས་ལམ་ཧ་ཅང་མང་པོ་ཡོད་དེ། དྲ་རྒྱ་དང་། ཚགས་པར། ཁ་པར། སྒྲ་སྡུད་འཕྲུལ་འཁོར་སོགས་ཡོད་པ་མ་ཟད། ད་དུང་འཁྲུག་ཆ་དོད་པའི་ཁྲོམ་གཞུང་གང་སར་བརྙན་མཐོང་བསྒར་ཡོད། ལྷག་དོན་དུ་འཁྱུག་དབྱིངས་དང་སྐད་འཕྲིན། པོད་འཕྲིན་སོགས་གང་སར་ཡིད་ཀྱི་དབང་པོ་འཕྲོག་མཁན་མང་ཞིང་ཆ་འཕྲིན་གང་རུང་ཞིག་ལ་དབྱིངས་པ་མང་པོ་བསྡུ་ཐུབ་ན་ཆ་འཕྲིན་དེ་ལེགས་གྲུབ་ལྡན་པ་ཞིག་ཏུ་བརྩི་བ་མ་ཟད། དེའི་ཐོག་ནས་དཔལ་འབྱོར་གྱི་ཁེ་ཕན་ཡང་མི་དམན་པ་ཞིག་ཐོབ་ཀྱི་ཡོད། དེས་ན་བརྙན་འཕྲིན་གསར་འགྱུར་གྱིས་ཇི་ལྟར་བྱས་ནས་རང་ཉིད་ཀྱི་གནས་ས་དེ་བརྟན་པོར་འཛིན་དགོས་སམ་ཞེ་ན། ངེས་པར་དུ་གསར་འགྱུར་གྱི་ཁ་བྱང་ཡག་པོ་ཞིག་བཟོ་བ་ནས་འགོ་བརྩམས་ཏེ་གསར་འགྱུར་གྱི་སྤུས་ཚད་ལ་དོ་སྣང་མང་ཙམ་བྱེད་དགོས་སྙམ། སྐབས་སུ་བབ་པ་བརྙན་འཕྲིན་གསར་འགྱུར་གྱི་ཁ་བྱང་རྩོམ་འབྲིའི་སྐོར་ལ་ཅུང་ཞིག་གླེང་བར་བྱ་སྟེ།

གསར་འགྱུར་གྱི་ཁ་བྱང་ལེགས་པོས་རྒྱུན་དུ་གསར་འགྱུར་ལ་བཀྲག་མདངས་བསྣན་པ་དང་། མི་རྣམས་ཀྱི་ཡིད་དབང་འཕྲོག་ཐུབ་ལ་སེམས་སུ་བག་ཆགས་ཟབ་མོ་འཇོག་ཐུབ། དེ་ལས་ལྡོག་སྟེ། ནང་དོན་ཐད་ཁྱད་ཆོས་དང་དཔེ་གསར་གྱི་རྣམ་པ་ཅི་ཡང་འདོན་མི་ཐུབ་པའི་ཁ་བྱང་ཞིག་གིས་མི་རྣམས་ལ་མཚར་སྣང་སྟེར་མི་སྲིད་པས། ཁ་བྱང་ནི་གསར་འགྱུར་གྱི་ངོ་གདོང་དང་འདྲ་བར་ལྟད་མོ་བས་གསར་འགྱུར་ཤེས་རྟོགས་བྱེད་པའི“སྒེའུ་ཁུང”ཞིག་རེད་ཅེས་བཤད་ཆོག

ཐོག་མར་རྒྱུན་མཐོང་གི་ཁ་བྱང་རྩོམ་འབྲིའི་སྐྱོན་ཆ་མངོན་གསལ་དོད་པ་འགར་དབྱེ་ཞིབ་བྱས་ན། སྟབས་བདེ་དྲག་པའི་ཁ་བྱང་མི་ཉུང་བ་ཡོད་ཅིང་། ཁ་བྱང་དེ་རིགས་མིང་དང་ས་གནས་གཞན་ཞིག་ཏུ་བརྗེ་ན་ད་དུང་བེད་སྤྱོད་བྱས་ཆོག་སྟེ། དེའི་ཁྱད་ཆོས་ནི་ཁ་བྱང་གསོན་ཉམས་མི་དོད་པ་དང་། དམིགས་བསལ་ཁྱད་ཆོས་ཅི་ཡང་མེད་པ། ནང་དོན་དཔེ་གསར་མེད་པ་སོགས་རེད། དེའི་མངོན་ཚུལ་གཙོ་བོ་ནི་རོ་བཅུད་གང་ཡང་མེད་པའི་བཟའ་བཅའ་ཞིག་དང་འདྲ། ཁ་བྱང་དེ་རིགས་ལ་སྔར་ནས་ད་བར་གསར་གཏོད་མེད་པ་དང་། གོ་དཀའ་ཞིང་གསོན་ཤུགས་དེ་ཙམ་མི་ལྡན།

ངོམ་སྟོན་མཁས་རློམ་དང་སྒྲོ་འདོགས་རང་བཞིན་ཆེ་བའི་ཁ་བྱང་མི་ཉུང་བ་ཡོད་དེ། ཁ་བྱང་དེ་རིགས་ཀྱི་ཐོག་ནས་རྩོམ་པ་པོས་རྩོམ་འབྲི་བྱ་སྐབས་དེའི་ཐད་བསམ་བློ་གཏོང་མྱོང་བ་གསལ་པོར་མཐོང་ཐུབ། འོན་ཀྱང་རྩོམ་པ་པོའི་རྩོམ་ཉམས་སྟོན་ཆེད་དང་ཁ་བྱང་གིས་ལྟ་མཁན་གྱི་ཡིད་དབང་འཕྲོག་ཆེད་དུ་དེའི་ཡང་དག་དང་དངོས་ཡོད་རང་བཞིན་ལ་སྣང་ཆུང་དང་། སྒྲོ་བཏགས། ཚིག་དོན་འཁྱོག་བཤད་བཅས་བྱས་ཏེ། ཞྭ་དཔེ་ལྷམ་འགེབས་དང་བརྒྱ་གོ་གཅིག་ཆོད་བྱེད་པ། དོན་དང་མི་མཐུན་པ། དོན་གོ་དཀའ་བ། ཐ་ན་བརྡ་སྤྲོད་དང་ཚིག་སྦྱོར་བྱ་ཐབས་ཀྱང་ནོར་འཁྲུལ་ཤོར་སླ་བས་ཁ་བྱང་དེ་དག་གིས་ལྟད་མོ་བ་ཁ་ཕྱོགས་གཞན་ཞིག་ཏུ་ཁྲིད་སྟོན་བྱས་ཏེ་གསར་འགྱུར་བལྟས་རྗེས་ཁ་བྱང་དང་ནང་དོན་དངོས་གཞི་གཅིག་པ་མིན་པ་ལྟ་བུའི་ཚོར་སྣང་སྟེར་གྱི་ཡོད།

རྙོག་བཤད་བསྐྱར་ཟློས་ཀྱིས་དོན་གྱི་སྙིང་པོ་སྟོན་མི་ཐུབ་པའི་ཁ་བྱང་མི་ཉུང་བ་ཡོད་དེ། ཁ་བྱང་དེ་རིགས་འབྲི་མཁན་རྩོམ་སྒྲིག་པའི་ཆུ་ཚད་ལ་གཟིགས་མོ་བས་དཔྱད་དཔོག་བྱེད་དཀའ་ཞིང་། ཁ་བྱང་རྙོག་བཤད་ཚ་དྲགས་ནས་ཐ་ན་གསར་འགྱུར་གྱི་འདྲེན་ཚིག་དང་ནོར་ཉེན་ཆེན་པོ་ཡོད། རྩོམ་སྒྲིག་པས་བརྙན་འཕྲིན་གསར་འགྱུར་གྱི་ཁྱད་ཆོས་དེར་སྣང་ཆུང་ཤོར་བས་ཁ་བྱང་ཐོག་ནས་གསར་འགྱུར་གྱི་དོན་དངོས་ཤེས་རྟོགས་བྱ་ཐབས་བྲལ་ཏེ་ཁོང་ཚོའི་ཡིད་དབང་འཕྲོག་རྒྱུ་དེ་བས་གླེང་ཐབས་བྲལ་བ་ཞིག་རེད།

འོ་ན་བརྙན་འཕྲིན་གསར་འགྱུར་གྱི་ཁ་བྱང་ཇི་ལྟར་འབྲི་དགོས། ཇི་ལྟར་བྱས་ན་གཞི་ནས་གཟིགས་མོ་བའི་ཡིད་དབང་འགུགས་ཐུབ་པ་དང་། གཟིགས་མོ་བས་ལྟ་འདོད་ཀྱི་སྤྲོ་སྣང་འཕེལ་ཐུབ་བམ་ཞེ་ན། སྨྱུག་འཛིན་པའི་བསམ་པར་བརྙན་འཕྲིན་གསར་འགྱུར་གྱི་ཁ་བྱང་ནི་ཁ་གསལ་གོ་བདེ་དང་བཀླགས་པ་ཙམ་གྱིས་དོན་རྟོགས་ཐུབ་པ། གསོན་ཉམས་དོད་པ། དེ་བས་ཡང་དག་པ་དང་དངོས་ཡོད་གནས་ཚུལ་ཞིག་ཡིན་དགོས་སྙམ།

ཐོག་མར། བརྙན་འཕྲིན་གསར་འགྱུར་གྱི་ཁ་བྱང་ངེས་པར་དུ་ཡང་དག་ཡིན་དགོས། འདི་ནི་གསར་འགྱུར་ཁ་བྱང་གི་ཆེས་མ་མཐའི་བླང་བྱ་ཡང་ཡིན། ཁ་བྱང་ནི་གསར་འགྱུར་གྱི་མིག་དང་གསར་འགྱུར་གྱི་ལྟེ་བ་ཡིན་ལ། གསར་འགྱུར་དོན་རྐྱེན་ལ་ཕྱོགས་བསྡོམས་དང་བསྲེགས་བཅད་བརྡར་གསུམ་བྱས་ནས་སྙིང་བཅུད་ལེན་པ་ལྟ་བུ་ཞིག་ཡིན་ལ་དེ་བས་གསར་འཕྲིན་དེའི་ནང་དོན་གལ་ཆེ་ཤོས་ཤིག་ཀྱང་ཡིན། གསར་འགྱུར་གྱི་ནང་དོན་མདོར་བསྡུས་དང་འཕྱུགས་པ་མེད་པའི་སྒོ་ནས་སྙིང་བསྡུས་བྱས་ཏེ་གསར་འགྱུར་གྱི་བརྗོད་དོན་གཙོ་བོ་གསལ་པོར་མཚོན་དགོས། དེ་ནས་ཁ་གསལ་གོ་བདེ་ཞེས་པ་ནི་ཁ་བྱང་དེ་མང་ཚོགས་ཀྱིས་གསལ་པོར་རྟོགས་པ་བྱེད་དགོས་པ་དེ་རེད། བརྙན་འཕྲིན་ལྟ་མཁན་གྱི་ཚོགས་སྤྱི་དེའི་དམིགས་བསལ་རང་བཞིན་ལ་ལྟ་རྟོག་བྱེད་དགོས་ཤིང་། ཁོ་ཚོའི་ལོ་ཚད་མི་འདྲ་བ་དང་། ལས་རིགས་མི་འདྲ་བ། ཡོན་ཚད་མཐོ་དམན་མི་སྙོམས་པ་བཅས་ལ་དམིགས་ནས་བརྙན་འཕྲིན་གྱི་ཁ་བྱང་དེ་ལྟ་མཁན་མང་ཆེ་བའི་དགོས་མཁོར་བསམ་གཞིག་བྱེད་དགོས་པ་དང་དེ་བལྟས་པ་ཙམ་གྱིས་གོ་བ་དང་གོ་བ་ཙམ་གྱིས་དོན་རྟོགས་ཐུབ་པ་ཞིག་དགོས།

ཡང་བརྙན་འཕྲིན་གསར་འགྱུར་ནི་དུས་ཚོད་ཐུང་ཐུང་ནང་གཏོང་སྤེལ་བྱས་ཟིན་པ་དགོས་པའི་ཁྱད་ཆོས་དེས་ལྟ་མཁན་ལ་ཡང་བསྐྱར་དྲན་གསོ་བྱེད་པའི་དུས་ཚོད་སྟེར་མི་ཐུབ་པས། རྒྱུ་རྐྱེན་དེའི་ཐོག་ནས་བཤད་ནའང་བརྙན་འཕྲིན་གསར་འགྱུར་གྱི་ཁ་བྱང་དེ་བས་ཁ་གསལ་གོ་བདེ་དང་སྟབས་བདེ་བ་ཞིག་ཡིན་དགོས་པའི་རེ་བ་ཡོད།

དེ་ནས་ཁ་བྱང་དེ་གསོན་ཉམས་དོད་པོ་ཞིག་དགོས་ཏེ་ནང་དོན་གོ་སླ་པོ་ཡོད་ཀྱང་ཚིག་ཅང་ཅང་མ་ཡིན་པ། དགོད་བྲོ་པོ་ཡོད་པ། བཞད་གད་ཀྱི་ཉམས་དང་ལྡན་པ་གང་ཞིག་ཐལ་མི་དྲག་པ་ཞིག་དགོས། དགོད་བྲོ་བའི་སྐད་ཆས་མང་ཚོགས་ཚོའི་ཡིད་དབང་འཕྲོག་ལ་སྤྲོ་སེམས་འཕེལ་བར་བྱེད། གསར་འགྱུར་གྱི་ཁ་བྱང་གཏན་འཁེལ་བྱེད་པའི་བརྒྱུད་རིམ་ནང་བྱ་ཚིག་འོས་འཚམ་སྤྱད་ཚེ་གསར་འགྱུར་གྱི་ཁ་བྱང་ལ་དེ་བས་གསོན་ཉམས་ལྡན་པ་དང་ཡིད་དབང་འཕྲོག་ཤུགས་ལྡན་པ་དཔེར་ན། “སྒོ་ཁྱིས་ངའི་རྐང་པར་སོ་བཏབ། བདག་པོས་ངའི་སེམས་ལ་རྨ་བཟོས” “མེ་ཏོག་སོས་པས་འཚོ་བ་གསར་པ་སྦྱིན”ལྟ་བུ། སྤྱི་ཚོགས་རྣམ་པ་མངོན་པའི་གསར་འགྱུར་ཁ་བྱང་བཟོ་སྐབས་ཡང་ལྷག་པར་དེ་བས་དཔེ་གསར་དང་། ངོ་མཚར་། སྤྲོ་བ་འཕེལ་བ། ཡ་མཚན་ཆེ་བ་བཅས་ཀྱི་ཐོག་ནས་འབད་པ་བྱེད་དགོས་པ་དཔེར་ན། “གྲོང་ཚོ་ཨུ་ཡོན་ལྷན་ཁང་གི་ཨར་འདམ་ལམ་དང་གྲོང་སྡེའི་འདམ་ཆུའི་ལམ་བུ”ལྟ་བུ་དཔེ་འཇོག་སོགས་ཀྱི་ཚིག་སྦྱོར་བརྗོད་པ་ལྟ་བུ་ཡིན།

གསར་འགྱུར་གྱི་ཁ་བྱང་ལེགས་པོ་ཞིག་འབྲི་བར་ཐོག་མར་མར་ཁེ་སིའི་རིང་ལུགས་ཀྱི་གསར་འགྱུར་ལྟ་བ་འཛུགས་དགོས། གསར་འགྱུར་གྱིས་མང་ཚོགས་ལ་ཞབས་འདེགས་ཞུ་དགོས། གསར་འགྱུར་གྱི་ཁ་བྱང་བཀོད་པའང་བསམ་བློ་འདིའི་མཛུབ་སྟོན་འོག་ད་གཟོད་དངོས་འབྲེལ་ལྟད་མོ་བའི་ཁྲོད་ནས་འགོ་བརྩམས་ཏེ། བསམ་བློས་དམངས་ལ་བརྩེ་སེམས་འཆང་ན། ད་གཟོད་མང་ཚོགས་ཀྱི་བློ་ཡིད་འཕྲོག་པའི་ཁ་བྱང་འབྲི་ཐུབ།

དེ་ནས་ངེས་པར་དུ་ལས་སྒོའི་རྨང་གཞི་བརྟན་པོ་ཡོད་དགོས། གསར་རྩོམ་གསར་འགྱུར་གྱི་ཁ་བྱང་དེ་ངོ་བོའི་ཐོག་ནས་བརྗོད་ན་ཡིག་ཐོག་གི་ལས་དོན་ཞིག་ཡིན་ཞིང་། དེ་ནི་གསར་འགོད་པ་དང་རྩོམ་སྒྲིག་པས་བཅར་འདྲི་ཟབ་མོ་བྱེད་པའི་ས་གནས་ས་ཐོག་གི་འཆར་སྣང་ལ་བརྟེན་དགོས་ལ། དུས་རྒྱུན་གྱི་རིག་གནས་གསོག་འཇོག་ལ་དེ་བས་བརྟེན་དགོས། བརྙན་འཕྲིན་གསར་འགྱུར་གྱི་ཁ་བྱང་ནི་སྐད་བརྡ་རིག་པ་དང་། གསར་འགྱུར་རིག་པ། བརྒྱུད་སྤེལ་རིག་པ། སྤྱི་ཚོགས་རིག་པ། མཛེས་རིག ལོ་རྒྱུས་རིག་པ། མཚན་ཉིད་རིག་པ། གཏན་ཚིགས་རིག་པ་སོགས་དང་འབྲེལ་བ་ཡོད་པས། ཤེས་རྒྱ་ཡངས་ཤིང་ཡི་གེའི་རྨང་གཞི་ལེགས་པོ་མེད་པའི་མི་ཞིག་དང་ཤེས་རྒྱ་དེ་ཙམ་ཆེན་པོ་མེད་པའི་མི་ཞིག་གིས་གསར་འགྱུར་གྱི་ཁ་བྱང་ལེགས་པོ་ཞིག་གསར་རྩོམ་བྱེད་དཀའ། གསར་འགྱུར་གྱི་ཁ་བྱང་བཟོ་བའི་བརྒྱུད་རིམ་ནི་གསར་འགོད་པས་གསར་འགྱུར་གྱི་སྙིང་བཅུད་ཞུན་བརྡར་བྱས་ནས་གཏམ་རྒྱུད་ཅིག་ཤོད་པའི་བརྒྱུད་རིམ་ཞིག་ཡིན་ཞིང་། དེ་ནི་གསར་འགོད་པས་སློབ་སྦྱོང་ལྷོད་མེད་དང་། གསོག་འཇོག་ལ་དོ་སྣང་། ཡུན་རིང་ལག་ལེན་བཅས་བྱས་ཚེ་གཞི་ནས་ཁ་བྱང་ཡག་པོ་ཞིག་བཟོ་ཐུབ། གསར་འགྱུར་གྱི་ཁ་བྱང་ཡག་པོ་འབྲི་དགོས་བསམས་ན་རང་ཉིད་ཀྱི་རྩོམ་རིག་གི་བློ་སྦྱོང་ལ་ཤུགས་སྣོན་རྒྱག་རྒྱུ་ནི་ཧ་ཅང་དགོས་ངེས་ཤིག་ཡིན་ཞིང་། གསོན་ཉམས་དོད་པའི་ཡི་གེའི་ཐོག་ནས་གསར་འགྱུར་གྱི་དོན་སྙིང་གནད་ལ་འཁེལ་བར་མཚོན་དགོས་པ་དང་། ཚིག་ཉུང་དོན་གསལ་དང་། ངོ་མཚར་དོན་གཉེར། ཚིག་ཉུང་དོན་མང་བཅས་ཡོང་བར་བྱེད་དགོས།

དེ་རྗེས་དཀའ་སྡུག་དང་རྙོག་དྲར་མི་འཛེམ་པ་དང་ཐ་སྙད་བེད་སྤྱོད་བྱེད་མཁས་པོར་གོམས་དགོས། གསར་འགྱུར་གྱི་ཁ་བྱང་ལེགས་པོ་ཞིག་འབྲི་ཐུབ་ཆེད། བསམ་བློ་མང་ཙམ་གཏོང་བ་དང་། སྦྱོང་བརྡར་མང་ཙམ་བྱེད་པ། སྐུལ་འདེད་མང་ཙམ་གཏོང་བ་བཅས་བྱེད་དགོས་པ་དང་། སྐབས་འགར་ཁ་བྱང་ལེགས་པོ་ཞིག་གི་ཆེད་དུ་རྒྱུན་དུ་བརྗོད་གཞི་ཉི་ཤུ་ཙམ་འབྲི་དགོས་ཤིང་། དེའི་ཁྲོད་ནས་ནང་དོན་གསར་ཤོས་ཤིག་འདེམས་བདེ་ཡོང་ཆེད། འདི་ལྟར་དབྱེ་ཞིབ་ཡང་ཡང་དང་། ཞིབ་བསྡུར་ཡང་ཡང་། དབྱེ་འབྱེད་ཡག་པོ་བཅས་བྱེད་དགོས། དེར་བརྟེན། དཀའ་ལས་ལ་མི་སྐྲག་པར་ཐ་སྙད་སློབ་སྦྱོང་བྱས་ཏེ། ཁ་བྱང་དང་ནང་དོན་གྱི་མཐུན་འཕྲོད་དང་། ཁ་བྱང་གི་སྡེབ་སྟངས། དམིགས་བྱ་ཡོད་པའི་སྒོ་ནས་ཁ་བྱང་གི་དགོད་བྲོ་བའི་རྣམ་པར་ཞིབ་བསྡུར་བྱས་ཏེ། ཡིག་འབྲུ་རེ་རེ་བཞིན་དུ་གསར་འགྱུར་གྱི་ཁ་བྱང་ལེགས་པོ་འབྲི་ཐུབ་པར་ཡིད་ཆེས་བྱེད་དགོས།

མདོར་ན། བརྙན་འཕྲིན་གསར་འགྱུར་གྱི་ཁ་བྱང་ལེགས་པོ་ཞིག་ཡིན་ན་ཡང་དག་དང་། དྲང་ཕྱོགས། གསོན་ཉམས་བཅས་ལྡན་ངེས་ཡིན། གསར་འགྱུར་རྩོམ་སྒྲིག་པས་ཁ་བྱང་གསོན་ཉམས་ལྡན་ལ་གོ་བདེ་བ་དང་ཡིད་ཀྱི་བརྟན་པ་འཕྲོག་ནུས་པ་ཞིག་འབྲི་རྒྱུར་དེ་བས་དང་དོད་བྱས་ནས་ལྟ་འདོད་ལ་ཉན་སྤྲོ་བའི་གཏམ་རྒྱུད་ཤོད་མཁན་བྱང་ཆུབ་པ་ཞིག་ཆགས་པར་འབད་དགོས།

(ལྷ་ས་གྲོང་ཁྱེར་སྨྱན་སྦྱོར་མཉམ་འདྲེས་ལྟེ་གནས་བོད་སྐད་སྒྲ་བསྒྱུར་པུའུ། བདེ་སྐྱིད་དཔལ་སྒྲོན)