འདི་ནི་ལྷོ་ཁ་གྲོང་ཁྱེར་འཕྱོངས་རྒྱས་རྫོང་སྐད་གཉིས་བུ་བཅོལ་ཁང་གི་ཕྲུ་གུ་ཚོ་སློབ་གསེང་བྱེད་སྒོར་ཞུགས་བཞིན་པ།

“ངའི་ཁྲག་ཤེད་མཐོ་བའི་ནད་གཏན་འཁེལ་བྱེད་པའི་དུས་ཚད་དེ་ལོ་གཅིག་ནས་ཡུན་རིང་བར་ཡིན་པས་སླད་ཕྱིན་སྨན་པ་བསྟེན་པ་དང་སྨན་ལེན་སྐབས་དེ་བས་སྟབས་བདེ་རུ་ཕྱིན་སོང”རྒན་ཡོལ་ཞུས་རྗེས་སི་ཁྲོན་ཁྲེང་ཏུའུ་རུ་གཞིས་ཆགས་པའི་སྐུ་ཞབས་ཝང་ལགས་ལ་ཁྲག་ཤེད་མཐོ་བའི་ནད་ཕོག་ནས་ལོ་མང་སོང་ཞིང་། དེ་གོང་བོད་ལྗོངས་ཁྲེང་ཏུའུ་ཡི་དོན་གཅོད་ཁང་སྨན་ཁང་དུ་རང་ཉིད་ཀྱི་སྒོ་བསྟེན་དམིགས་བསལ་ནད་དུས་བཀག་གཙང་ནས་སླར་ཡང་ནད་དེ་གཏན་འཁེལ་བྱས་པས། ལས་དོན་མི་སྣས་ཁོང་ལ་ད་ལྟ་ལག་བསྟར་བྱེད་བཞིན་པའི་སྲིད་ཇུས་གཞིར་བཟུང་། ཁྲག་ཤེད་མཐོ་བའི་ནད་ཚུད་པའི་སྒོ་བསྟེན་དམིགས་བསལ་ནད་རིགས་39ཡི་ཐོབ་ཐང་གཏན་འཁེལ་གྱི་དུས་ཚད་ལོ་གཅིག་ནས་ཡུན་རིང་བར་ནར་འགྱངས་བྱས་ཡོད་ཅེས་བརྗོད་པ་རེད།

ཉེ་བའི་ལོ་ཤས་རིང་། རང་སྐྱོང་ལྗོངས་ཏང་ཨུད་དང་སྲིད་གཞུང་གིས་མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་བློ་མཐའ་འཁྱོངས་དང་། “ཚང་དགོས་པ་གསུམ་དང་ཕན་འདོགས་པ་གཅིག”མཐའ་འཁྱོངས་ཀྱིས་མང་ཚོགས་ཀྱིས་ཡོངས་ཁྱབ་ངང་དོ་ཁུར་བྱེད་པའི་དམངས་འཚོའི་གནད་དོན་ལ་དེ་བས་དམིགས་ནས་ལས་ཞུགས་དང་། སློབ་གསོ། སྤྱི་ཚོགས་འགན་བཅོལ། སྨན་བཅོས། རྒན་གསོ། བུ་བཅོལ། སྡོད་ཁང་སོགས་དམངས་འཚོའི་བྱ་བ་དངོས་ཡག་པོ་སྒྲུབ་པ་དང་བྱ་བ་རེ་རེ་བཞིན་དོན་འཁྱོལ་བྱས་པས། རང་ལྗོངས་ཀྱི་མི་རིགས་ཁག་གི་མང་ཚོགས་ཀྱི་ཐོབ་སྣང་སྔར་བས་ཆེ་བ་དང་། སྐྱིད་སྣང་སྔར་བས་རྒྱུན་མཐུད་ཐུབ་པ། བདེ་འཇགས་ཚོར་སྣང་སྔར་བས་འགན་སྲུང་ཐུབ་པ་བཅས་བྱུང་ཡོད་པ་རེད།

གཙོ་གནད་དམངས་འཚོའི་བྱ་བ་དངོས་ཁྱོན་ཡོངས་ནས་དོན་འཁྱོལ་བྱས་པ།

“སྔོན་ཆད་གྲོང་གསེབ་ཀྱི་འགྲོ་ལམ་གུ་དོག་པ་དང་ཆར་དུས་སུ་འདམ་རྫབ་ཀྱིས་ཁེངས་པས་འགྲིམ་འགྲུལ་ལས་འཛོལ་ཐོན་སླ་པོ་ཡོད། ད་ཆ་གྲོང་ཚོ་ཚང་མར་སྣུམ་ནག་གཞུང་ལམ་བཏིང་པ་མ་ཟད། ད་དུང་དུས་གཏན་རླངས་འཁོར་ཡང་ཤར་གཏོང་ཐུབ་ཡོད” ལོ་དེ་དག་ནང་གི་གྲོང་གསེབ་ཀྱི་གཞུང་ལམ་འགྱུར་ལྡོག་སྐོར་གླེང་སྐབས། ལོ་འཁོར་མོ་ལྷོ་ཁ་གྲོང་ཁྱེར་གོང་དཀར་རྫོང་གི་རྫོང་གྲོང་ནས་གངས་སྟོད་གྲོང་རྡལ་བར་འགྲོ་སྐྱོད་བྱེད་མཁན་འགྲུལ་སྐྱེལ་རླངས་འཁོར་གྱི་ཁ་ལོ་བ་བསམ་གྲུབ་ལ་སྐད་ཆ་ཤོད་དབང་ཡོད། ཁོང་གིས“ལམ་ཡག་ཏུ་སོང་བས་མང་ཚོགས་ཕྱིར་སྐྱོད་དེ་བས་སྟབས་བདེ་རུ་ཕྱིན་ཡོད”ཅེས་བཤད། དམངས་འཚོ་ལེགས་གཏོང་དང་མི་སེམས་གཅིག་སྒྲིལ་བྱེད་པ་དེ་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་འགོ་འཛུགས་ས་དང་དོན་ལ་བབས་སར་བརྩི་རྒྱུ་མཐའ་འཁྱོངས་བྱས་ནས། རང་སྐྱོང་ལྗོངས་ཀྱིས་ནོར་སྲིད་ཡོང་འབབ་ཀྱི་80%ཡན་དམངས་འཚོའི་ཁྱབ་ཁོངས་ལ་བཏང་སྟེ་སློབ་གསོ་དང་། སྨན་བཅོས། རྒན་གསོ་སོགས་ལ་ཁྱབ་པའི་ཁྱོན་ཡོངས་ཀྱི་འགན་ལེན་མ་ལག་ཅིག་བཙུགས་པས་མི་སེར་ལ་དངོས་དངོས་རྗེན་རྗེན་གྱི་ཕན་པ་ཐོབ་པ་བྱས་ཡོད། གྲངས་གཞི་ལས་མངོན་པར། ལོ་ལྔའི་རིང་རང་ལྗོངས་ཀྱིས་ནུས་ཤུགས་ཡོད་རྒུས་དབུལ་སྒྲོལ་འགག་སྒྲོལ་གྱི་དམག་འཐབ་ལ་རྒྱལ་ཁ་ལེན་རྒྱུར་རྒྱབ་སྐྱོར་བྱས་པར་རིམ་རྩིས་བྱས་ན་སྒོར་དུང་ཕྱུར་507བསྡུ་སྒྲིལ་བྱས་ནས་བོད་འདི་ཉིད་རྒྱལ་ཡོངས་དང་མཉམ་དུ་ཕྱོགས་ཡོངས་ནས་འབྱོར་འབྲིང་སྤྱི་ཚོགས་སྐྲུན་ཐུབ་པའི་འགན་ལེན་བྱས་པ་དང་། “ཚང་དགོས་པ་གསུམ་དང་ཕན་འདོགས་པ་གཅིག”མཐའ་འཁྱོངས་བྱས་ཏེ་དམངས་འཚོའི་ཚད་གཞི་གཙོ་བོ་བསྟུད་མར་མཐོ་རུ་བཏང་བ་དེ་རྒྱལ་ཡོངས་དང་དབུས་ནུབ་རྒྱུད་ཀྱི་ཆ་སྙོམས་ཆུ་ཚད་ལས་མངོན་གསལ་དོད་པོས་མཐོ་རུ་ཕྱིན་པ། མ་དངུལ་སྒོར་དུང་ཕྱུར་166བསྡུ་སྒྲིལ་བྱས་ནས་མཐའ་མཚམས་ཀྱི་འབྱོར་འབྲིང་གྲོང་ཚོ་624བསྐྲུན་པ་སོགས་བྱས་ཡོད་པ་རེད།

སྤྱི་ཚོགས་ཀྱི་འགན་བཅོལ་མ་ལག་སྔར་བས་འཐུས་སྒོ་ཚང་དུ་བཏང་བ།

ནག་ཆུའི“སྨན་བཅོས་དང་རྒན་གསོ་ཟུང་འབྲེལ”གྱི་ཞབས་ཞུའི་ལྟེ་གནས་སུ་ཡོད་པའི་རྒན་རྒོན་རྣམས་བདེ་སྐྱིད་ལྡན་པའི་འཚོ་བ་སྐྱེལ་བཞིན་ཡོད་ཅིང་། རྨོ་བོ་དགའ་མཚོ་ལགས་ནི་ཉིན་ལྟར་ཞོགས་པ་ཁང་པའི་ནང་ལྷོད་ཤིག་གེར་སྡོད་རྒྱུར་དགའ་པོ་ཡོད་པ་དང་། རྨོ་བོ་རྡོ་སྒྲོན་ལགས་དང་ཁོང་གི་གྲོགས་པོ་རྙིང་པ་ཚོ་ལུས་སྦྱོང་བྱེད་རྒྱུར་དགའ་བས་ཉིན་ལྟར་མཉམ་དུ་སྒོར་གཞས་འཁྲབ་ནས་སྡོད་ཀྱི་ཡོད། སྨན་བཅོས་རྒན་གསོ་དང་། ངལ་གསོ། ལུས་གསོ། ལྟ་རྟོག་སོགས་ནུས་མང་གཞི་གཅིག་ཅན་གྱི་ཞབས་ཞུའི་ལྟེ་གནས་དེར་རྫོང(ཆུས)ཁག་གི་སྨན་བཅོས་འགན་སྲུང་ཅུས་དང་གྲོང་ཁྱེར་སྨན་རྩིས་ཁང་གི་རྒན་རྒོན་གྱི་སྨན་རིན་འགྲོ་སོང་རྩིས་ཞུའི་ཐོགས་མེད་བགྲོད་ལམ་བཏོད་དེ་དམིགས་བསལ་དཀའ་ངལ་ཡོད་པའི་མི་སྣས་སྨན་བཅོས་དྲག་སྐྱེད་དང་། ནད་ཁང་དུ་སྡོད་པ། ནད་ཁང་ནས་དོན་པ་བཅས་ལ་དངུལ་སྐར་མ་གཅིག་ཀྱང་གཏོང་དགོས་ཀྱི་མེད་པ་རེད།

སྨན་བཅོས་འགན་བཅོལ་ནི་མི་དམངས་མང་ཚོགས་ཀྱི་བདེ་ཐང་དང་བདེ་རྩར་འབྲེལ་བ་ཡོད་པའི་དམངས་འཚོའི་འདུ་འགོད་གལ་ཆེན་ཞིག་ཡིན། ལོ་ལྔའི་རིང་རང་སྐྱོང་ལྗོངས་ཀྱིས་བྱ་ཐབས་སྣ་ཚོགས་སྤྱད་དེ་དམངས་འཚོ་འགན་ལེན་དང་ལེགས་སུ་གཏོང་བའི་ཆུ་ཚད་ཟམ་མི་ཆད་པར་མཐོ་རུ་བཏང་ཞིང་། ད་ཆ་བོད་ཀྱི་སྤྱི་ཚོགས་འགན་བཅོལ་ཁྱབ་ཚད་100%ཟིན་པ་དང་། རྒན་གསོ་དང་། སྨན་བཅོས། ལས་ཤོར། ལས་རྨས། བུ་བཙའ་བཅས་འགན་བཅོལ་ཆེ་གྲས་ལྔ་གཙོ་བོར་བྱས་ནས་གྲོང་ཁྱེར་དང་གྲོང་གསེབ་ཀྱི་གྲོང་མི་ཡོངས་ལ་ཁྱབ་པའི་སྤྱི་ཚོགས་འགན་བཅོལ་མ་ལག་ཁྱོན་ཡོངས་ནས་བཙུགས་པས་མི་རིགས་ཁག་གི་མི་དམངས་མང་ཚོགས་ཀྱི་འཚོ་བར་འགན་ལེན་ནུས་ལྡན་ཐུབ་ཡོད་པ་རེད།

བདེ་ཐང་བོད་ལྗོངས་འཛུགས་སྐྲུན་ལ་སྐུལ་འདེད་ཧུར་ཐག་བཏང་བ།

འདི་ལོའི་བོད་རང་སྐྱོང་ལྗོངས་སྲིད་གཞུང་གི་ལས་དོན་སྙན་སྒྲོན་ནང་ལོ་ལྔའི་རིང་གི་བདེ་ཐང་བོད་ལྗོངས་འཛུགས་སྐྲུན་ལ་གྲུབ་འབྲས་མངོན་གསལ་དོད་པོ་ཐོབ་པ་ཞིབ་མོར་གླེང་ཡོད།

ལོ་ལྔའི་རིང་། རང་ལྗོངས་ཀྱིས་མི་དམངས་ཀྱི་བདེ་ཐང་སྔོན་ལ་འཕེལ་རྒྱས་གཏོང་བའི་འཐབ་ཇུས་ཀྱི་གནས་བབ་ཐོག་བཞག་ནས་མི་དམངས་ཀྱི་བདེ་ཐང་ལ་སྐུལ་འདེད་གཏོང་བའི་སྲིད་ཇུས་འཐུས་སྒོ་ཚང་དུ་བཏང་སྟེ། སྔ་རྗེས་སུ《བདེ་ཐང་བོད་ལྗོངས་ཀྱི་བྱ་སྤྱོད་ལ་སྐུལ་འདེད་གཏོང་རྒྱུའི་སྐོར་གྱི་ལག་བསྟར་བསམ་འཆར》དང《བདེ་ཐང་བོད་ལྗོངས་བྱ་སྤྱོད(2020ལོ་ནས་2030ལོ་བར)》བཀྲམ་པ་དང་། 《བོད་རང་སྐྱོང་ལྗོངས་ཀྱི་སྨན་བཅོས་འཕྲོད་བསྟེན་ཞབས་ཞུའི་མ་ལག་གི“ལོ་ལྔ་ཚན་བཅུ་བཞི་པའི”འཆར་འགོད》སོགས་བཏོན་ནས་བདེ་ཐང་དང་ཤེས་དཔལ་གྱི་འཚོ་བ་སྐྱེལ་སྟངས་དར་སྤེལ་གཏོང་བ་དང་། ནད་གཞི་ཚབས་ཆེན་སྔོན་འགོག་དང་ཚོད་འཛིན་བྱེད་པ། མི་དམངས་མང་ཚོགས་ཀྱི་བདེ་ཐང་ཆུ་ཚད་མཐོ་རུ་གཏོང་བ་བཅས་བྱས་ནས་བདེ་ཐང་བོད་ལྗོངས་འཛུགས་སྐྲུན་ལ་མགྱོགས་མྱུར་སྐུལ་འདེད་བཏང་བ་རེད།

ལོ་ལྔའི་རིང་། རང་ལྗོངས་སུ་དམངས་ཡོངས་ལུས་སྦྱོང་གི་རྒྱལ་ཁབ་ཀྱི་འཐབ་ཇུས་དོན་འཁྱོལ་བྱས་ནས་རྐང་རྩེད་སྤོ་ལོ་དང་། ལག་རྩེད་སྤོ་ལོ། ཝང་ཆིའུ་སྤོ་ལོ། རྟ་རྩལ། སྒོར་གཞས་སོགས་མང་ཚོགས་ཀྱི་ལུས་རྩལ་འགྲན་བསྡུར་གྱི་བྱེད་སྒོ་སྣ་ཚོགས་སྤེལ་བ་དང་། སྤྱི་གླིང་དང་སྡེ་ཁུལ་གྱི་ལུས་སྦྱོང་སྒྲིག་བཀོད་ཁྱོན་ཡོངས་ནས་ཁྱབ་གདལ་བཏང་བ། ལུས་སྦྱོང་ས་ཚིགས་དང་། ལུས་རྩལ་སྤྲོ་སྐྱིད་ཁང་། སྤྱི་ཚོགས་ཀྱི་ལུས་རྩལ་རྩ་འཛུགས་བཅས་ཀྱི་དྲ་བ་རགས་ཙམ་ཆགས་པས་མང་ཚོགས་ཀྱི་ལུས་སྦྱོང་དགོས་མཁོ་སྐོང་བར་སྟབས་བདེ་ཆེན་པོ་བསྐྲུན་ཡོད་ལ་དམངས་ཡོངས་ལུས་སྦྱོང་བྱེད་པའི་བྱེད་སྒོ་རྒྱུན་རྣམ་ཅན་ལ་སྐུལ་འདེད་བཏང་བ་རེད།

དམངས་འཚོ་འགན་ལེན་དང་ལེགས་སུ་གཏོང་རྒྱུ་ནི་ནམ་ཡང་ཚར་དུས་མེད། འགོ་འཛུགས་ས་གསར་པའི་ཐོག་རང་ལྗོངས་ཀྱིས་མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་བློ་ལག་ལེན་གཏིང་ཟབ་བསྟར་ཏེ་ཐོག་མཐའ་བར་གསུམ་དུ་མི་དམངས་བདེ་སྡོད་ལས་བརྩོན་དང་བདེ་སྡུག་སེམས་ནང་བཞག་ནས་དམངས་འཚོར་སྣང་ཆེན་དང་། དམངས་འཚོ་འགན་ལེན། དམངས་འཚོ་ལེགས་གཏོང་བཅས་བྱས་ཏེ་མི་རིགས་ཁག་གི་མང་ཚོགས་ཀྱི་ཐོབ་སྣང་དང་། སྐྱིད་སྣང་། བདེ་སྣང་བཅས་ཟམ་མི་ཆད་པར་ཆེ་རུ་བཏང་ཡོད་པ་རེད།