ཉེ་བའི་ལོ་ཤས་རིང་། ལྷ་ས་གྲོང་ཁྱེར་མི་སྤྱི་ཅུས་ཀྱིས་མཐོ་སློབ་སློབ་ཐོན་སློབ་མའི་ལས་ཞུགས་ལས་དོན་ལ་མཐོང་ཧ་ཅང་ཆེན་པོ་བྱས་ནས། སྔོན་ལ་གསོ་སྦྱོང་དང་རྗེས་སུ་ལས་ཞུགས་དང་། སྔོན་ལ་ལྟ་སྦྱོང་དང་རྗེས་སུ་ལས་ཞུགས་ཐུབ་པའི་ལས་ཞུགས་ཞབས་འདེགས་ཞུ་སྟངས་སྔ་ཕྱི་བར་གསུམ་དུ་འཚོལ་ཞིབ་ཧུར་ཐག་བྱས་པ་དང་། མཐོ་སློབ་སློབ་ཐོན་སློབ་མའི་སྐལ་བཟང་མེ་ཏོག་ལས་ཞུགས་ལས་གཏོད་ཀྱི་དམིགས་བསལ་གསོ་སྦྱོང་སྒར་ས་གསར་གཏོད་བྱས་ཏེ། ལྷ་ས་གྲོང་ཁྱེར་གྱི་མཐོ་སློབ་སློབ་ཐོན་སློབ་མ་ལྗོངས་ཕྱིར་སྤུས་ཚད་མཐོན་པོས་ལས་ཞུགས་ཐུབ་པར་སྐུལ་འདེད་ཧུར་ཐག་བཏང་བ་རེད།
“མཐོ་སློབ་སློབ་ཐོན་སློབ་མའི་མི་གྲངས་ལོ་རེ་བཞིན་མང་དུ་ཕྱིན་པ་དང་བསྟུན་ནས་མཐོ་སློབ་སློབ་ཐོན་སློབ་མ་ཁ་ཤས་ལ“སློབ་གྲྭ་ཐོན་མ་ཐག་ལས་ཀ་ཤོར་བའི”དཀའ་གནད་འཕྲད་ཡོད། ཕྱོགས་གཞན་ཞིག་ནས་གཞི་རིམ་ཚན་པ་དང་ཁེ་ལས་ཁ་ཤས་སུ‘ལས་མི་བསྡུ་དཀའ་བ’དང‘ལས་མི་སྤྱོད་དཀའ་བའི’གནད་དོན་འཕྲད་ཡོད། དཀའ་གནད་དེ་ཇི་ལྟར་སེལ་དགོས་སམ་ཞེ་ན། མཐོ་སློབ་སློབ་ཐོན་སློབ་མ་དང་ལས་མི་བཀོལ་སྤྱོད་ཚན་པའི་དབར་ཕན་ཚུན‘འབྲེལ་གཏུག་ཡང་དག’ཐུབ་པར་བྱས་ནས། ངེས་པར་དུ་ཕྱོགས་གཉིས་པོས་ཤེས་རྟོགས་གང་ལེགས་ཐུབ་པར་བྱེད་དགོས”ཞེས་ལྷ་ས་གྲོང་ཁྱེར་མི་སྤྱི་ཅུས་མཐོ་སློབ་ལྟེ་གནས་ཀྱི་འགན་འཁུར་བ་ཧྲེ་ཁྲང་ཧྲེན་གྱིས་བརྗོད་པ་དང་། ཁོང་གིས“སྐལ་བཟང་མེ་ཏོག་གསོ་སྦྱོང་སྒར་ས་ནི་གྲོང་ཁྱེར་མི་སྤྱི་ཅུས་ཀྱིས་མིག་སྔར་གཙོ་གནད་ཐོག་ཁྱབ་གདལ་གཏོང་བའི་སློབ་གྲྭ་ཆེ་མོ་བར་དམིགས་པའི་ལས་ཞུགས་ཞབས་ཞུའི་རྣམ་གྲངས་ཤིག་རེད། དེའི་དམིགས་ཡུལ་གཙོ་བོ་ནི་ལས་གནས་འཚོལ་བ་དང་ལས་ཞུགས་བྱེད་རིང་། ལྷ་ས་གྲོང་ཁྱེར་གྱི་མཐོ་སློབ་སློབ་ཐོན་སློབ་མར་འཕྲད་པའི་འཇུར་མིག་གི་གནད་དོན་ཁ་ཤས་ཐག་གཅོད་བྱ་རྒྱུ་དེ་རེད། མིག་སྔར་རྫོང་དང་ཆུས་ཁག་གིས་ཀྱང་ཁྱབ་གདལ་གཏོང་བཞིན་ཡོད”ཅེས་བརྗོད།
གྲོང་ཁྱེར་མི་སྤྱི་ཅུས་ཀྱིས་འབྲེལ་ལམ་བཙུགས་པ་བརྒྱུད་ལྷ་ས་གྲོང་ཁྱེར་གྱིས་ལྗོངས་ཕྱི་ནང་གི་ཁེ་ལས་མང་པོ་དང་ལས་ཞུགས་མཉམ་ལས་ཀྱི་འབྲེལ་ལམ་བཙུགས་པ་དང་། ཐེངས་འདིའི་གསོ་སྦྱོང་ལ་ཞུགས་མཁན་སློབ་མ་མང་ཆེ་བས་ལྗོངས་ཕྱིའི་ཁེ་ལས་དང་ལས་ཞུགས་གྲོས་མཐུན་བཞག་པ་རེད། གསོ་སྦྱོང་ཚར་རྗེས་ཁོང་ཚོས་ལྗོངས་ཕྱིའི་ཁེ་ལས་སུ་ལྟ་སྦྱོང་བྱ་རྒྱུ་དང་། ལྟ་སྦྱོང་བྱས་རྗེས་ལྗོངས་ཕྱིའི་ཁེ་ལས་སུ་ཐད་ཀར་ལས་ཞུགས་བྱེད་ཆོག་པའམ་ཡང་ན་ཁེ་ལས་གཞན་དག་ཏུ་ལས་ཞུགས་བྱ་རྒྱུར་འོས་སྦྱོར་བྱས་ནས་མཐར་ལས་ཞུགས་བརྒྱ་ཆ་བརྒྱ་ཐུབ་པར་བྱ་རྒྱུ་རེད།