ཟླ་9པར་ཨན་ཆིང་རྫོང་དུ་རིམ་གྱིས་སྟོན་ཉམས་རྒྱས་ཤིང་། ཨན་ཧུའེ་ཞིང་ཆེན་ཨན་ཆིང་གྲོང་ཁྱེར་ལུའོ་ལིང་ལྟེ་བའི་སློབ་གྲྭའི་རོལ་དབྱངས་དགེ་རྒན་ཧན་ལུང་གིས་རོལ་དབྱངས་སློབ་ཁང་དུ་ཀང་ཆིན་དཀྲོལ་བའི་སྙན་འཇེབས་ལྡན་པའི་འགྱུར་ཁུག་སློབ་གྲྭའི་ཁོར་ཡུག་ཡོངས་སུ་ཁྱབ།

2018ལོའི་ཟླ་9པར། ཁོང་ལོ་གཉིས་རིང་གི་གྲོང་གསེབ་དགེ་རྒན་གྱི་ལས་དོན་གནས་སྐབས་མཇུག་འགྲིལ་ནས་ཤིན་ཅང་ལ་སློབ་སྐྱོར་བྱེད་པར་བསྐྱོད་ནས་ནུབ་བྱང་གི་བྱེ་ཐང་ཆེན་པོའི་མཐའ་མཚམས་ཀྱི་སློབ་གྲྭ་ཞིག་སྟེ། ཤིན་ཅང་ཧོ་ཐན་ཕི་ཧྲན་རྫོང་གི་མཐོ་རིམ་སློབ་འབྲིང་དུ་འབྱོར་བ་རེད།

2019ལོའི་ཟླ་4པར། ཧན་ལུང་གིས་སློབ་མ་40ཁྲིད་དེ་ལམ་ཐག་སྤྱི་ལེ་སྟོང་ཕྲག་ལྷག་ཙམ་བརྒྱུད་ནས་སུའུ་ཀྲོའུ་རུ་འཁྲབ་སྟོན་བྱེད་པར་ཕྱིན།

“ཕྲུ་གུ་ཚང་མ་ནང་སར་ཡོང་ཐེངས་དང་པོ་རེད་ལ། གར་སྟེགས་ཆེན་པོ་འདི་འདྲར་འཁྲབ་སྟོན་བྱེད་ཐེངས་ཀྱང་དང་པོ་རེད”ཅེས་ཧན་ལུང་གིས་བརྗོད། སུའུ་ཀྲོའུ་ཅིན་ཅི་རྒྱལ་སྤྱིའི་རོལ་དབྱངས་ཚོམས་ཆེན་དུ་ཁོང་དང་ཕྲུ་གུ་ཚོས་གླུ་ལེན་གར་འཁྲབ་ཀྱིས་མི་རིགས་མཐུན་སྒྲིལ་ཁྱིམ་ཚང་གཅིག་ལྟར་བརྩེ་བའི་བརྩེ་བ་ཟབ་མོ་མཚོན་པར་བྱས་པ་རེད།

2019ལོའི་ཟླ་8པར། ཧན་ལུང་ཡང་བསྐྱར་གཉེན་ཉེ་དང་ཁ་བྲལ་ནས་ལས་འགན་སེམས་སུ་བཅངས་ཏེ་བོད་སྐྱོར་ལ་ཡོང་།

བོད་ལྗོངས་ལྷོ་ཁའི་ཆ་ཚང་སློབ་འབྲིང་ནི་ཁོང་གིས་རོགས་སྐྱོར་བྱེད་ས་གཉིས་པ་དེ་རེད།

ས་མཐོར་སླེབས་མ་ཐག་པའི་ཁོང་ས་ཆུ་མ་འཕྲོད་པའི་རྐྱེན་གྱིས་སྲོག་ཉེན་ལ་ཐུག་ཅིང་། “སྨན་ཁང་དུ་མྱུར་སྐྱོབ་ཐེངས་གཉིས་བྱས་པ་རེད། སྟབས་ལེགས་པར་སྐྱོན་མི་འདུག” ཅེས་ཧན་ལུང་གིས་འཛུམ་དམུལ་དམུལ་ངང་བརྗོད།

ཁོང་གིས་བཀྲ་ཤིས་ཆུང་བ་ཟེར་བའི་བྱིས་པ་ཞིག་ད་ཆའང་བརྗེད་མེད།

ཁོ་པ་ནི་ས་བབ་མཐོ་ཚད་སྨི་4500ཟིན་པའི་མཐའ་མཚམས་རྫོང་གི་འབྲོག་ཁུལ་དུ་ཆུང་དུས་ནས་ནོར་ལུག་རྩེད་རོགས་སུ་བྱས་ཏེ་གངས་རི་དང་སྤྲིན་དཀར་གྱི་འོག་ཏུ་འཚོ་བ་སྐྱེལ་བའི་ཕྲུ་གུ་ཞིག་རེད།

རོལ་དབྱངས་སློབ་ཚན་འཚོགས་ཐེངས་དང་པོར། བྱིས་པ་དེས་རོལ་ཆ་ཀང་ཆིན་མཐོང་མ་ཐག་ཡ་མཚན་ཆེན་པོ་སྐྱེས་ནས་ཀང་ཆེན་ལ་རེག་ཙམ་རེག་ཙམ་བྱས་པ་དེས་ཧན་ལུང་གི་མིག་ལ་མཆི་ཞག་འཁོར་ཞིང་། ཁོང་གིས་རོལ་དབྱངས་ལ་བརྟེན་ནས་ཕྲུ་གུ་ཚོའི་སེམས་ལ་འོད་སྣང་སྦྱིན་ཏེ་ཁོང་ཚོའི་མདུན་ལམ་ལ་གོ་སྐབས་མང་ཙམ་བསྐྲུན་རྒྱུའི་དམ་བཅའ་བཞག

2022ལོར་ཧན་ལུང་གིས་ལྷོ་ཁའི་ཆ་ཚང་སློབ་འབྲིང་དུ་རོལ་དབྱངས་མཐོ་རྒྱུགས་ཀྱི་དམིགས་བསལ་འཛིན་གྲྭ་ཞིག་བཙུགས། ཁོང་དང་ལས་རོགས་ཚོས་ཉིན་མཚན་ཉིས་བརྒྱ་ལྷག་ཙམ་འབད་བརྩོན་བྱས་པ་བརྒྱུད། 2022ལོའི་བོད་ཀྱི་སྒྱུ་རྩལ་གྱི་གཅིག་གྱུར་རྒྱུགས་ལེན་ནང་སྒྱུ་རྩལ་གྱི་རྒྱུགས་སྤྲོད་སློབ་མ་15ཚང་མ་དངོས་གཞིའི་ཚན་ཁག་ལ་རྒྱུག་འཕྲོད་པ་རེད།

ལྷོ་ཁའི་ཆ་ཚང་སློབ་འབྲིང་དུ་ཁོང་དང་ཕྲུ་གུ་ཚོ་གྲོགས་པོ་ལྟ་བུར་གྱུར་ཡོད་པས། ཁོང་ལ“རྒན་ཧན་ལགས”ཞེས་འབོད་མཁན་མང་པོ་མེད་པར་ཚང་མས་ཁོང་ལ“ལའོ་ཧན”ཞེས་འབོད་ཀྱི་ཡོད།

འདི་ལོའི་ཟླ་8པར་ཧན་ལུང་ལོ་གསུམ་རིང་གི་བོད་སྐྱོར་ལས་འགན་མཇུག་འགྲིལ་ཡང་། ངལ་གསོ་ཕྲན་བུ་བརྒྱབ་རྗེས་སློབ་དུས་གསར་པའི་སློབ་ཚན་གྲ་སྒྲིག་བྱེད་པར་བྲེལ།

འདི་ལོའི་དགེ་རྒན་དུས་ཆེན་ལ། ཧན་ལུང་2022ལོའི“དགེ་རྒན་ཡག་ཤོས”ལ་བདམས་པའི་གཏན་བཟང་གྲགས།

“ངས་མུ་མཐུད་རོལ་དབྱངས་ལ་བརྟེན་ནས་གྲོང་གསེབ་ཀྱི་ཕྲུ་གུ་དེ་བས་མང་བའི་སེམས་ལ་འོད་སྣང་སྦྱིན་ནས་མདུན་ལམ་ལ་གོ་སྐབས་བསྐྲུན་རྒྱུ་ཡིན”ཞེས་ཧན་ལུང་གིས་བརྗོད།