ཁྱིམ་དུ་བསྡད་ནས་དུག་སེལ་བྱེད་སྐབས་ཚང་མས་གཤམ་གསལ་གྱི་ནོར་འཁྲུལ་འདི་དག་མ་ཤོར་བ་བྱེད་དགོས།
དུག་སེལ་བྱེད་སྐབས་དགོས་ངེས་ཀྱི་འགོག་སྲུང་མི་བྱེད་པ།
སྤྱིར་ན་དུག་སེལ་གཤེར་ཁུ་ངར་ལ་ཤུགས་ཆེ་བས། དབུགས་ལམ་དང་པགས་པར་གནོད་པ་བཟོ་སྲིད། དེས་ན་དུག་སེལ་བྱེད་པའི་བརྒྱུད་རིམ་ནང་རབ་བྱུང་ན་ཁ་རས་དང་ལག་ཤུབས་གྱོན་ནས་གཤེར་གཟུགས་ཁ་སྣར་མི་འཛུལ་བ་དང་པགས་པར་མི་འཐོར་བ་བྱེད་དགོས།
ཁང་པའི་ནང་དུ་ཅིའུ་ཅིང་གཏོར་ནས་དུག་སེལ་བྱེད་པ།
ཁང་པའི་ནང་ཅིའུ་ཅིང་གིས་དུག་སེལ་བྱེད་སྐབས་ཅིའུ་ཅིང་གཏོར་རྒྱུ་མེད། གློག་ཆས་ཀྱི་ཕྱི་ངོས་ལ་དུག་སེལ་བྱེད་སྐབས་སྔོན་ལ་གློག་འགོག་པ་དང་། གློག་ཆས་གྲང་མོ་ཆགས་རྗེས་གཞི་ནས་དུག་སེལ་བྱེད་དགོས། དེ་ལས་ལྡོག་ཚེ་གློག་ཆས་འཚིག་ཉེན་ཆེ།
དུག་སེལ་གཤེར་ཁུས་ཆུའི་ཚབ་བྱེད་པ།
དུག་སེལ་གཤེར་ཁུའི་ནང་ནད་འབུ་གསོད་པའི་གྲུབ་ཆ(ཁྲུན་རིགས་གཙོ་བོར་བྱས་པ)འདུས་པས། དུག་སེལ་གྱི་ནུས་པ་ངེས་ཅན་ལྡན་ཡོད། འོན་ཀྱང་དུག་སེལ་གྱི་གྲུབ་ཆར་ཤུགས་ངེས་ཅན་ལྡན་པས། པགས་པར་མི་འཕྲོད་པ་ཡོང་སྲིད། དེར་བརྟེན་གལ་ཏེ་ཆ་རྐྱེན་ཡོད་ཚེ་གང་ཐུབ་ཅི་ཐུབ་ཀྱིས་ཆུར་འདག་རྫས་དང་ལག་བཀྲུ་གཤེར་ཁུ་བརྒྱབ་ནས་ལག་པའི་མཛུབ་རྩེ་དང་། ལག་མཐིལ། མཁྲིག་མ་བཅས་གཙང་མར་ཁྲུས་དགོས།
དངོས་རྫས་དུག་སེལ་བྱས་རྗེས་གཙང་མ་མི་བཀྲུ་བ།
དུག་སེལ་སྨན་རྫས་ཀྱིས་ཅ་དངོས་ལ་ཟད་སྐྱོན་བཏང་བ་དང་ལྷག་པར་དུ་ལྕགས་རིགས་དེ་བས་ཟད་སླ་བ་ཡོད་པས་མིའི་གཟུགས་པོར་གནོད་པ་ཡོད། དུག་སེལ་སྨན་རྫས་སྤྱད་ནས་ཆུ་ཚོད་ཕྱེད་ཀ་ཙམ་སོང་རྗེས་ཆུ་གཙང་མས་དངོས་པོའི་ཕྱི་ནང་གཉིས་ཀ་ཕྱིས་དགོས།
དུག་སེལ་སྨན་ཆུ་འཇོག་སྟངས་ལུགས་དང་མ་མཐུན་པ།
རྫས་འགྱུར་དུག་སེལ་སྨན་ཆུ་མང་ཆེ་བ་འབར་སླ་བ་དང་། གས་སླ་བ། ཟད་སླ་བ་བཅས་ཀྱི་དངོས་རྫས་ཀྱི་ཁོངས་སུ་གཏོགས་པས་ཉར་ཚགས་དང་བེད་སྤྱོད་བྱེད་པའི་བརྒྱུད་རིམ་ཁྲོད་བདེ་འཇགས་ལ་དོ་སྣང་བྱེད་དགོས། དུག་སེལ་སྨན་ཆུ་ཐེངས་རེར་མང་པོ་ཉོ་རྒྱུ་མེད། དུག་སེལ་སྨན་ཆུ་བླུག་སྣོད་ཀྱི་ཁ་གཅོད་ངེས་པར་དུ་དམ་པོ་རྒྱག་དགོས། ཤེལ་དམ་རེའི་ནང་ཧའོ་ཧྲེང་500ལས་བརྒལ་མི་རུང་། འོད་དང་ཚ་དྲོད་ཆེ་སར་མི་འཇོག་པར་བསིལ་སར་བཞག་སྟེ་བྱིས་པས་རེག་མི་ཐུབ་པའི་འགན་ལེན་བྱེད་དགོས། དུག་སེལ་ཐད་སྤྱོད་པའི་ཕྱིས་རས་སམ་ཡང་ན་ཅ་དངོས་གཞན་དག་བེད་སྤྱོད་བྱས་རྗེས་ཆུ་གཙང་མས་བཀྲུས་ནས་རླུང་འགྲོ་སར་བཞག་སྟེ་སྐམ་དགོས།