སྟོན་དུས་ཀྱི་སློབ་འགོ་ཚུགས་ལ་ཉེ་རུང་། ད་ཐེངས་ཀྱི་རིམས་ནད་ཀྱིས་རྐྱེན་པས་ལྗོངས་ཕྱིར་སློབ་གྲྭར་འགྲོ་མཁན་སློབ་མ་མི་ཉུང་བ་ཞིག་བོད་ནས་ཐོན་མ་ཐུབ་པར་ལུས་ཡོད། ཚེས22ཉིན། རང་སྐྱོང་ལྗོངས་སློབ་གསོ་ཐིང་ཏང་ཙུའི་ཁོངས་མི་དང་ཐིང་ཀྲང་གཞོན་པ་པ་སངས་སྒྲོལ་མས་རང་སྐྱོང་ལྗོངས་ཀྱི་ཏོག་གསར་གློ་ཚད་རིམས་ནད་སྔོན་འགོག་དང་ཚོད་འཛིན་ལས་དོན་གྱི་གསར་འགྱུར་ཡོངས་བསྒྲགས་ཚོགས་འདུ་ཐེངས་བཅུ་བཞི་པའི་ཐོག་བརྡ་ཁྱབ་བཏང་དོན། མིག་སྔར། རང་སྐྱོང་ལྗོངས་སློབ་གསོ་ཐིང་གིས་ཞིང་ཆེན(གྲོང་ཁྱེར་དང་རང་སྐྱོང་ལྗོངས)31དང་། ཤིན་ཅང་འཛུགས་སྐྲུན་པིང་ཐོན་གྱི་སློབ་གསོ་སྲིད་འཛིན་སྡེ་ཚན། ཤང་ཀང་དམིགས་བསལ་སྲིད་འཛིན་ཁུལ་གྱི་འབྲེལ་ཡོད་མཐོ་སློབ་བཅས་ལ་ཡི་གེ་བསྐུར་ཏེ་བོད་ནས་དུས་ཐོག་ཏུ་སློབ་གྲྭར་ལོག་ཐུབ་མེད་པའི་སློབ་གྲྭ་འགྲིམ་མུས་ཀྱི་སློབ་གྲྭ་ཆེ་མོ་བ་དང་གསར་དུ་ཚུད་པའི་སློབ་མ་ཚོར་ས་ཆ་དེ་གའི་མཐོ་སློབ་ཀྱིས་དེ་བསྟུན་གྱི་བྱེད་ཐབས་སྤྱད་ནས་སློབ་མ་སློབ་ཞུགས་དང་སློབ་མ་གསར་པའི་འབྱོར་ཐོ་འགོད་པ་སོགས་ཀྱི་གནད་དོན་ཐག་གཅོད་འོས་འཚམ་བྱེད་པའི་གྲོས་འགོ་བཏོན་པ་རེད།

ལྗོངས་ཕྱིའི་མཐོ་སློབ་ཏུ་སློབ་གྲྭ་འགྲིམ་བཞིན་པའི་བོད་དུ་ཡོད་པའི་སློབ་གྲྭ་ཆེ་མོ་བ་ཚོས། རང་སོ་སོའི་སློབ་གྲྭའི་སློབ་འགོ་ཚུགས་དུས་ཀྱི་རིམས་ནད་སྔོན་འགོག་དང་ཚོད་འཛིན་གྱི་བླང་བྱ་དང་མིག་སྔའི་རང་ཉིད་གནས་སའི་རིམས་ནད་དོ་དམ་ཚོད་འཛིན་གྱི་བླང་བྱ་རང་འགུལ་ངང་ཤེས་རྟོགས་ཧུར་ཐག་བྱེད་པ་དང་སྦྲགས། འཛིན་བདག་དང་ཟུར་ཁྲིད་པ་དང་འབྲེལ་བ་ཡང་སེ་བྱས་ཏེ། སློབ་གྲྭའི་ཞིབ་ཕྲའི་བླང་བྱ་ལྟར་བོད་ནས་སློབ་གྲྭར་འབྱོར་ཐོ་འགོད་པར་འགྲོ་བའི་དུས་ཚོད་བཀོད་སྒྲིག་ཡག་པོ་བྱེད་དགོས།

མཐོ་རྒྱུགས་བཏང་ནས་ལྗོངས་ཕྱིའི་སློབ་ཆེན་ལ་ཚུད་པའི་སློབ་མ་ཚོས། སློབ་ཚུད་བརྡ་ཐོ་འབྱོར་བ་དང་མཉམ་དུ་སློབ་གྲྭར་སྐྱོད་སྐབས་ཀྱི་ངེས་བྱ་ཡང་འབྱོར་ཡོད་པས། སློབ་མ་ཚོས་སློབ་ཞུགས་ངེས་བྱའི་ཐོག་གི་འབྲེལ་གཏུག་ཁ་པར་གཞིར་བཟུང་རང་འགུལ་ངང་སློབ་གྲྭ་དང་འབྲེལ་བ་བྱས་ཏེ། སློབ་འགོ་ཚུགས་དུས་ཀྱི་རིམས་ནད་སྔོན་འགོག་དང་ཚོད་འཛིན་གྱི་ཞིབ་ཕྲའི་བླང་བྱ་ལྟར་བོད་ནས་སློབ་གྲྭར་འགྲོ་བའི་དུས་ཚོད་བཀོད་སྒྲིག་ཡག་པོ་བྱེད་དགོས།

བོད་ལྗོངས་འཛིན་གྲྭའི་སློབ་མ་ཚོས(2022ལོར་ཚུད་པའི་སློབ་མ་ཚུད)བོད་ནས་སློབ་གྲྭར་ལོག་པའི་དུས་ཚོད་བོད་ཀྱི་རིམས་ནད་སྔོན་འགོག་དང་ཚོད་འཛིན་གྱི་གནས་ཚུལ་དང་དེ་བཞིན་སློབ་གྲྭ་ཁག་གནས་ཡུལ་གྱི་རིམས་ནད་དུས་བབ་དང་སྔོན་འགོག་དང་ཚོད་འཛིན་གྱི་བླང་བྱ་གཞིར་བཟུང་། རང་སྐྱོང་ལྗོངས་སློབ་གསོ་ཐིང་གིས་སློབ་གྲྭ་ཁག་དང་མཉམ་དུ་ཞིབ་འཇུག་བརྡར་གཅོད་ཀྱིས་བོད་ནས་ཐོན་པའི་དུས་ཚོད་གཏན་འཁེལ་བྱ་རྒྱུ་དང་འབྲེལ། ལྕགས་ལམ་སྡེ་ཚན་དང་མཉམ་དུ་གཅིག་སྡུད་ཐོག་བོད་ནས་སློབ་གྲྭར་ལོག་པའི་སྐྱེལ་འདྲེན་ལས་དོན་གྱི་ཇུས་གཞི་ཞིབ་འཇུག་བྱས་ནས་བཟོ་རྒྱུ་ཡིན་པས། རྩ་དོན་ཐོག་བོད་ནས་ཐོན་པའི་ལྕགས་ལམ་གྱི་ལམ་ཐིག་དེ་ཞིང་ཆེན་དང་སློབ་གྲྭ་དབྱེ་བ་དང་འཚང་གཡོལ་བྱེད་ཐབས་ལ་བརྟེན་ནས་སློབ་གྲྭར་ལོག་པའི་མེ་འཁོར་གྱི་ཐེངས་གྲངས་དང་ཞིབ་ཕྲའི་དུས་ཚོད་གཏན་འཁེལ་བྱ་རྒྱུ་རེད།

བོད་དུ་ཡོད་པའི་བར་བཅུག་འཛིན་གྲྭའི་སློབ་མ་རྣམས་རྩ་དོན་ཐོག་སློབ་གྲྭ་ཁག་གི་སློབ་མ་ཚོ་དང་མཉམ་དུ་སློབ་གྲྭར་ལོག་པའི་བཀོད་སྒྲིག་བྱ་རྒྱུ་ཡིན། དམིགས་བསལ་གནས་ཚུལ་གྱིས་རྐྱེན་པས་སློབ་མ་རང་ཉིད་བོད་ནས་ཐོན་དགོས་བྱུང་ཚེ། ཁྱིམ་བདག་དང་སློབ་མ་ཚོས་སློབ་གྲྭ་དང་དུས་ཐོག་ཏུ་འབྲེལ་བ་བྱེད་དགོས་པ་དང་སློབ་གྲྭའི་མོས་མཐུན་ཐོབ་རྗེས། སློབ་གྲྭའི་འབྲེལ་ཡོད་བླང་བྱ་ལྟར་རིམས་ནད་སྔོན་འགོག་དང་ཚོད་འཛིན་གྱི་བྱ་ཐབས་དོན་འཁྱོལ་ནན་པོ་བྱེད་དགོས།

གལ་ཏེ་ད་དུང་ཧ་མི་གོ་བའི་གནད་དོན་ཡོད་ཚེ་སློབ་མ་དང་ཁྱིམ་བདག་ཚོས་རང་སྐྱོང་ལྗོངས་སློབ་གསོ་ཐིང་གི་གཙོ་ཆེའི་དྲ་ཚུགས(http://edu.xizang.gov.cn/)ཐོག་ལན་འཇོག་བློ་འདྲི་བྱེད་ཆོག