ཚེ་རིང་ཕུན་ཚོགས་ནི་གཞིས་རྩེ་གྲོང་ཁྱེར་བསམ་གྲུབ་རྩེ་ཆུས་གྲོང་བྱང་ཁྲོམ་གཞུང་དོན་གཅོད་ཁྲུའུ་མི་རིགས་སྡེ་ཁུལ་གྱི་ཏང་སྤྱི་ཁྱབ་ཀྲི་པུའི་ཧྲུའུ་ཅི་རེད། རིམས་ནད་ཐོན་ཚུན་གྱི་ཉིན་8བསྟུད་མར་ཚེ་རིང་ཕུན་ཚོགས་ཉིན་ལྟར་གཞུང་ལས་ཁང་ནང་ཆུ་ཚོད་གསུམ་བཞི་ལས་གཉིད་ཁུག་ཁོམ་མེད། “རིམས་ནད་སྔོན་འགོག་དང་ཚོད་འཛིན་གྱི་འབྲེལ་ཡོད་བླང་བྱ་གཞིར་བཟུང་གནས་སྐབས་རང་བཞིན་གྱི་སྤྱི་ཚོགས་དོ་དམ་བྱས་པས་ང་ཚོས་སྒོ་རྩར་ཞབས་འདེགས་ཞུ་རྒྱུའི་ལས་དོན་སྔར་བས་ཡག་པོ་བསྒྲུབ་དགོས”ཞེས་ཚེ་རིང་ཕུན་ཚོགས་ཀྱིས་བརྗོད།

མི་རིགས་སྡེ་ཁུལ་དུ་ཁྱོན་གྲོང་མི་དུད་ཚང་500ལྷག་ཙམ་ཡོད་པའི་ཁར། ཕྱོགས་མི་བརྩིས་ན་ཁྱོན་མི་3000ལྷག་ཙམ་ཡོད། དེའི་ནང་གི་ཁང་པ་མང་ཆེ་བ་ནི་གྲོང་མིའི་རང་སྐྲུན་ཁང་པ་ཡིན་པ་མ་ཟད། ད་དུང་སྡེ་ཁུལ་ནང་གི་འགྲོ་ལམ་ཡང་གུ་དོག་པོ་ཡོད། དེས་ན་ཚེ་རིང་ཕུན་ཚོགས་ཀྱིས་གློག་སྒུལ་འཁོར་གསུམ་སྦག་སྦག་བཏང་ནས་ལས་རོགས་ཚོ་དང་ལམ་གསུམ་དུ་ཕྱེ་སྟེ་སྡེ་ཁུལ་གྱི་དུད་ཚང་རེ་རེ་ལ་ཚལ་སྐྱེལ་བར་འགྲོ་གི་ཡོད།

ཕྱི་དྲོའི་ཆུ་ཚོད་6པ་ཙམ་ལ། ཚེ་རིང་ཕུན་ཚོགས་གཞི་ནས་ཚུར་སྡེ་ཁུལ་དུ་འབྱོར་གྱི་ཡོད། ཕྱིར་ལོག་པའི་ལམ་བར་དུ་ཁོང་ལ་ཁྲོམ་གཞུང་དོན་གཅོད་ཁྲུའུ་ནས་གོང་ཚེས་ཉིན་གྱི་དགོང་མོ་ནས་སང་ཉིན་གྱི་ཉིན་དགུང་བར་མི་སྣ་ཡོངས་ལ་ཉིང་སྐྱུར་བརྟག་དཔྱད་བྱ་རྒྱུ་མ་ཟད། མི་གཅིག་ཀྱང་མ་ལུས་པ་བྱེད་དགོས་ཞེས་པའི་ཁ་པར་ཞིག་འབྱོར། མི་རིགས་སྡེ་ཁུལ་དུ་ཁྱོན་ཉིང་སྐྱུར་བརྟག་དཔྱད་ས་ཚིགས་3ཡོད་པ་དང་སྔོན་དཔག་བྱས་ན་ཉིང་སྐྱུར་བརྟག་དཔྱད་ས་ཚིགས་ཚང་མ་ནས་མི་1000ཙམ་གྱི་དཔེ་ལེན་བྱེད་དགོས་པས་ལས་འགན་ལྕི་པོ་ཡོད་པ་རེད།

སྡེ་ཁུལ་དུ་ལོག་རྗེས་ཚེ་རིང་ཕུན་ཚོགས་ཀྱིས་འཕྲལ་དུ་སྡེ་ཁུལ་དང་ཁྲོམ་གཞུང་དོན་གཅོད་ཁྲུའུ་ཡི་ལས་དོན་མི་སྣ་དང་དེ་བཞིན་ས་ཚིགས་སུ་བཅའ་སྡོད་སྤྱི་བདེ་ཅུས་ཀྱི་མི་དམངས་ཉེན་རྟོག་པ་སྐོང་བསྡུ་བྱས་ནས་ལས་འགན་བཀོད་སྒྲིག་བྱེད་ཀྱི་ཡོད། ཚང་མས་བྱ་སྤྱོད་མགྱོགས་མྱུར་སྤེལ་ཏེ་བརྟག་དཔྱད་ས་ཚིགས་ཀྱི་གུར་རྒྱག་པ་སོགས་ཀྱི་གྲ་སྒྲིག་ལས་དོན་བསྒྲུབས་ནས་དགོང་མོའི་ཆུ་ཚོད་9པ་ལྷག་ཙམ་བར་འགོར་ཡོད།

བང་རིང་པོ་ཞིག་བསྒྲིགས་པ་མཐོང་དུས། ཚེ་རིང་ཕུན་ཚོགས་ཀྱིས་བསྐྱར་དུ་དུག་སེལ་ཐེངས་གཅིག་བྱེད་རྒྱུའི་འཆར་གཞི་བཏིང་བ་དང་། “དེ་རིང་དགོང་མོ་ཕལ་ཆེར་མཚན་གང་ལས་ཀ་བྱེད་དགོས་འཁེལ་ས་རེད”ཅེས་ཚེ་རིང་ཕུན་ཚོགས་ཀྱིས་བརྗོད།