▶ ང་ཚོའི་འཐས་ས་མདུན་མའི་སྨན་དོན་མི་སྣས་ཉིན་མཚན་དབྱེར་མེད་དུ་གཏན་འཁེལ་ནད་དཔེ་སྐྱོབ་བཅོས་བྱེད་བཞིན་ཡོད། བོད་རང་སྐྱོང་ལྗོངས་ཏང་ཨུད་དང་སྲིད་གཞུང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག་ང་ཚོར་རིམས་ནད་འགག་སྒྲོལ་དམག་འཐབ་ལ་རྒྱལ་ཁ་ཐོབ་པའི་ཡིད་ཆེས་དང་ཆོད་སེམས་ཡོད།

“ང་ཚོའི་སྨན་ཁང་འགོ་ནད་ཆེད་ལས་ཚན་ཁག་གི་སྨན་ཁང་ཞིག་ཡིན་པས་དེ་གོང་ནས་དེ་གར་མི་དེ་ཙམ་མཐོང་རྒྱུ་མེད། ད་ཆ་དེ་བས་ཡུལ་ཅང་ཅང་དུ་གྱུར་ཡོད”ཅེས་བོད་རང་སྐྱོང་ལྗོངས་མི་དམངས་སྨན་ཁང་གསུམ་པའི་ཡོན་ཀྲང་ཕུན་ཚོགས་བཀྲ་ཤིས་ངལ་དུབ་ཀྱིས་མནར་ཡང་བསྟན་བཤིག་ངང་དེ་ལྟར་བཤད།

ཟླ་8ཚེས་10ཉིན་གསར་འགོད་པ་མིག་སྔར་བོད་ལྗོངས་ལྷ་ས་གྲོང་ཁྱེར་གྱི་གཏན་འཁེལ་ནད་དཔེ་སྨན་བཅོས་བྱེད་སའི་བོད་རང་སྐྱོང་ལྗོངས་མི་དམངས་སྨན་ཁང་གསུམ་པར་སྐྱོད་སྐབས་རིགས་གཅིག་མཁས་ཅན་ཚོས་རྒྱང་ཁྲིད་ལྟེ་གནས་སུ་འཐབ་ས་མདུན་མའི་སྨན་དོན་མི་སྣ་དང་དྲ་ཐོག་ནས་ནད་པར་བརྟག་དཔྱད་དང་ནད་གཞི་ཤེས་རྟོགས་བྱེད་བཞིན་ཡོད་པ་རེད། བརྙན་ལམ་ནས་གསར་འགོད་པས་མདུན་ཕྱོགས་ཀྱི་སྨན་དོན་མི་སྣས་གོ་རིམ་ལྡན་པའི་ངང་ལས་དོན་ཁག་སྤེལ་བཞིན་ཡོད་པ་མཐོང་ཞིང་། “སྨན་དོན་མི་སྣས་ཆུ་ཚོད་བཞི་རེར་ལས་རེས་རེ་བྱེད་པ་དང་དེའི་རིང་འགོག་སྲུང་གྱོན་ཆས་གྱོན་གྱི་ཡོད། འོན་ཀྱང་ཁོང་ཚོས་འཁང་ར་བྱེད་ཀྱི་མེད། རིམས་ནད་ཐོན་སྐབས་ཁོང་ཚོས་རང་འགུལ་ངང་འཐབ་ས་དང་པོར་བསྐྱོད་རྒྱུའི་རེ་ཞུ་བྱེད་ཀྱི་འདུག”ཅེས་ཕུན་ཚོགས་བཀྲ་ཤིས་ཀྱིས་བཤད།

ཟླ་8ཚེས་7ཉིན་གྱི་ཐོ་རེངས་ཆུ་ཚོད་1དང་སྐར་མ་40ཡི་ཐོག་ལྷ་ས་གྲོང་ཁྱེར་ཁྲེང་ཀོན་ཆུས་ཀྱི་གྲོང་མི་བསྟན་ཆེ་གེ་མོ་མིད་པ་ན་བ་དང་ཚ་བ་རྒྱས་པར་བརྟེན་ཉིང་སྐྱུར་བརྟག་དཔྱད་ཐེངས་གཉིས་བྱས་པ་བརྒྱུད་གདགས་གཤིས་ཡིན་པས་བསྟན་ཆེ་གེ་མོ་དང་ཁོང་གི་ཨ་མ་གཉིས་པོ་དུས་ཐོག་ཏུ་བོད་རང་སྐྱོང་ལྗོངས་མི་དམངས་སྨན་ཁང་གསུམ་པར་སྨན་བཅོས་བྱེད་པར་བསྐྱལ། མིག་སྔར་ཁོང་གཉིས་ཀྱི་ནད་གཞི་བརྟན་པོ་ཡོད་ལ་མི་བདེ་བའི་གནས་ཚུལ་ཡང་མེད།

ཕུན་ཚོགས་བཀྲ་ཤིས་ཀྱིས། མིག་སྔར་སྨན་ཁང་དེའི་སྨན་དོན་མི་སྣ་ཡོངས་རྫོགས་ད་ཐེངས་ཀྱི་རིམས་ནད་ལ་ཁ་གཏད་གཅོག་པའི་ལས་ལ་ཞུགས་པ་མ་ཟད། འོས་གྲབས་དཔུང་ཁག་གསུམ་ལ་བགོས་ཡོད། འོས་གྲབས་དཔུང་ཁག་དང་པོའི་སྨན་དོན་མི་སྣ་ཚང་མ་གཏན་འཁེལ་ནད་དཔེ་སྐྱོབ་བཅོས་བྱེད་པའི་ལས་ལ་ཞུགས་ཡོད། འོས་གྲབས་དཔུང་ཁག་གཉིས་པ་དང་གསུམ་པའི་སྨན་དོན་མི་སྣས་ཛ་དྲག་ངང་བཀའ་སྒུག་ནས་དུས་ཐོག་ཏུ་རིམས་ནད་ལ་ཁ་གཏད་གཅོག་པའི་ལས་ལ་ཞུགས་རྒྱུ་རེད་ཅེས་བཤད།

རྒྱང་ཁྲིད་སྨན་བཅོས་ཀྱི་བརྙན་ལམ་ཐོག་གསར་འགོད་པས་ཏོག་གསར་གློ་ཚད་ཀྱི་གཏན་འཁེལ་ནད་དཔེའི་ནད་པ་ཆུང་ཤོས་ཀྱི་གནས་ཚུལ་ཡག་པོ་ཡོད་པ་མཐོང་བྱུང་། ཕུན་ཚོགས་བཀྲ་ཤིས་ཀྱིས“ང་ཚོས《ཏོག་གསར་གློ་ཚད་རིམས་ནད་ཀྱི་སྨན་བཅོས་ཇུས་གཞི(པར་གཞི་དགུ་པ)》གཞིར་བཟུང་། མ་སྨད་གཉིས་ཀྱི་ནད་གཞིར་དམིགས་ནས་སྨན་བཅོས་ཇུས་གཞི་ཞིབ་ཚགས་བཟོས་ཡོད། མིག་སྔར་སྐྱོབ་བཅོས་བྱས་པའི་མ་སྨད་གཉིས་ཀྱི་ནད་གཞི་བརྟན་པོ་འདུག་ལ་ཁོང་གཉིས་ཀྱི་གནས་ཚུལ་ཡང་ཡག་པོ་འདུག”ཅེས་བཤད།

བོད་རང་སྐྱོང་ལྗོངས་མི་དམངས་སྨན་ཁང་གསུམ་པ་ནི་བོད་ཀྱི་འགོ་ནད་ཆེད་ལས་ཚན་ཁག་གི་སྨན་ཁང་ཞིག་ཡིན་པ་དང་དུས་རྒྱུན་གྱི་ལས་ཀའི་ཁྲོད་སྨན་ཁང་གིས་དེ་དང་འདྲ་བའི་ནང་སྦྱོང་ཐེངས་མང་བྱེད་མྱོང་ཡོད། སྨན་ཁང་ཧྲིལ་པོའི་སྔོན་འགོག་དང་ཚོད་འཛིན་གྱི་བརྒྱུད་རིམ་ལྷུ་ཚིགས་ཁག་ཚང་མ་ཅུང་འཐུས་སྒོ་ཚང་པོ་ཡོད། 2020ལོའི་ཟླ་2ཚེས་12ཉིན་བོད་ཀྱི་ཏོག་གསར་གློ་ཚད་རིམས་ནད་ཀྱི་གཏན་འཁེལ་ནད་དཔེ་དང་པོ་དེ་བོད་རང་སྐྱོང་ལྗོངས་མི་དམངས་སྨན་ཁང་གསུམ་པ་ནས་དྲག་སྐྱེད་བྱུང་སྟེ་སྨན་ཁང་ནས་དོན་པ་རེད། ནད་དཔེ་དང་པོ་དེར་སྨན་བཅོས་བྱེད་རིང་ང་ཚོའི་སྨན་ཁང་གིས་ཏོག་གསར་གློ་ཚད་རིམས་ནད་ཀྱི་སྨན་བཅོས་ཇུས་གཞིར་གཞིགས་པ་དང་ནད་པའི་ནད་གཞི་དང་ས་མཐོའི་གནམ་གཤིས་ཟུང་འབྲེལ་བྱས་ནས་ཞིབ་ཕྲའི་སྨན་བཅོས་བྱེད་སྟངས་བཟོས་ཡོད། སྨན་བཅོས་ཚོགས་ཆུང་གི་སྨན་དོན་མི་སྣས་ལས་བཀུར་སྙིང་སྟོབས་ལྡན་པ་དང་། རང་འགན་གཙང་སྒྲུབ་བྱེད་པ། ངང་རྒྱུད་རིང་པོ་བཅས་ཀྱི་སྒོ་ནས་ནད་སྐྱོང་གི་ལས་དོན་སྤེལ་ཏེ་ནད་པར་དུས་ཐོག་ཏུ་སྐྱོབ་བཅོས་ནུས་ལྡན་ཐུབ་པའི་འགན་ལེན་བྱས་ཡོད”ཅེས་ཕུན་ཚོགས་བཀྲ་ཤིས་ཀྱིས་བཤད།

“ང་ཚོའི་མདུན་ཕྱོགས་ཀྱི་སྨན་དོན་མི་སྣས་ཉིན་མཚན་དབྱེར་མེད་ངང་གཏན་འཁེལ་ནད་དཔེ་སྐྱོབ་བཅོས་བྱེད་བཞིན་ཡོད། བོད་རང་སྐྱོང་ལྗོངས་ཏང་ཨུད་དང་སྲིད་གཞུང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག་ང་ཚོར་རིམས་ནད་འགག་སྒྲོལ་དམག་འཐབ་ལ་རྒྱལ་ཁ་ཐོབ་པའི་ཡིད་ཆེས་དང་ཆོད་སེམས་ཡོད། མིག་སྔར་སྨན་ཁང་ལ་ནད་དཔེ་དེ་དག་སྨན་བཅོས་བྱེད་པའི་ནུས་པ་ཡོད་ལ་སྨན་བཅོས་དངོས་རྫས་དང་སྨན་རྫས་ཀྱང་འདང་ངེས་ཡོད”ཅེས་བཤད། ཁོང་གིས་སྤྱི་ཚོགས་ལས་རིགས་ཁག་བློ་བདེ་པོ་བྱེད་པ་དང་དུས་མཚུངས་མི་སྒེར་གྱི་འགོག་སྲུང་ཡག་པོ་བྱས་ནས་ཉིང་སྐྱུར་བརྟག་དཔྱད་ལ་གཞོགས་འདེགས་ཧུར་ཐག་བྱས་ཏེ་ཕྱིར་མ་བསྐྱོད་པ་དང་འདུ་འཛོམས་མི་བྱ་རྒྱུའི་འབོད་སྐུལ་བྱས་པ་རེད།