བོད་དུ་རིམས་ནད་ཐོན་པས་བོད་སྐྱོར་སྤུན་ཟླའི་ཞིང་ཆེན་དང་གྲོང་ཁྱེར་ཁག་གི་མི་རྣམས་ལ་སེམས་ཁྲལ་ཆེན་པོ་བྱུང་ཞིང་། ཟླ་8ཚེས་9ཉིན་གྱི་སྔ་དྲོ། ཧུའུ་པེ་ཞིང་ཆེན་གྱི་བོད་སྐྱོར་ལས་དོན་རུ་ཁག་ཁག་བཅུ་པས་ཧུའུ་པེ་ཞིང་ཆེན་རིམས་ནད་སྔོན་འགོག་དང་ཚོད་འཛིན་བཀོད་འདོམས་པུའུ་ལ་ཛ་དྲག་གི་རོགས་སྐྱོར་རེ་ཞུ་བྱས་ཡོད།

ཧུའུ་པེ་ཞིང་ཆེན་ཏང་ཨུད་དང་ཞིང་ཆེན་སྲིད་གཞུང་གིས་ཆེད་གཏོང་ཟོག་འདྲེན་གཙང་གླས་གནམ་གྲུ་བཀོད་སྒྲིག་བྱས་ཏེ། མི་ཁྲི་20ཡི་ཉིང་སྐྱུར་བརྟག་དཔྱད་སྨན་དང་། མི་ཁྲི་15.36གི་ཉིང་སྐྱུར་དཔེ་ལེན་སྨན་སོགས་ཁྱོན་བསྡོམས་རིགས་25ཡོད་པའི་སྨན་སྒམ་1980བསྐུར་ཡོད།

ལྷོ་ཁར་འབྱོར་བའི་རོགས་སྐྱོར་དངོས་ཟོག་ཁག་དང་པོར་ཁྱོན་རིན་ཐང་སྒོར་ཁྲི་300ཙམ་རི་བ་དང་། བོད་སྐྱོར་ལས་དོན་རུ་ཁག་གིས་ཡི་གེ་བསྐུར་བ་ནས་དངོས་ཟོག་མཐུན་སྦྱོར་དང་གཙང་གླས་གནམ་གྲུ་བཏང་བའི་བར་ཆུ་ཚོད་30ལས་འགོར་མེད།

ཟླ་8ཚེས་10ཉིན་གྱི་ཕྱི་དྲོའི་ཆུ་ཚོད་1དང་ཕྱེད་ཀའི་ཐོག རིམས་འགོག་དངོས་ཟོག་ཏུན་20ལྷོ་ཁ་གྲོང་ཁྱེར་འཕྲོད་བསྟེན་བདེ་ཐང་ཨུ་ལྷན་དུ་འབྱོར་རྗེས། མགྱོགས་མྱུར་ལྷོ་ཁའི་རྫོང་དང་ཆུས་ཁག་གི་རིམས་ནད་འགོག་བཅོས་ཀྱི་འཐབ་ས་དང་པོར་བགོ་འགྲེམས་བྱས་ཡོད།

ཉིན་ཤས་གོང་། ཨན་ཧུའེ་ཞིང་ཆེན་གྱི་ཧོའེ་པེ་དང་ཐུང་ལིང་སོགས་གྲོང་ཁྱེར་གྱིས་རིན་ཐང་སྒོར་ཁྲི་150ལྷག་ཙམ་རི་བའི་རིམས་འགོག་འགན་ལེན་དངོས་ཟོག་སྣ་ཚོགས་ཛ་དྲག་ངང་གྲབས་གསོག་བྱས་ནས་འཕྲལ་དུ་བསྐྱལ་ཡོད།

ཟླ་8ཚེས་10ཉིན་བར། ཁག་དང་པོའི་མི་ཁྲི་44ཡི་ཏོག་གསར་གློ་ཚད་ནད་དུག་གི་རིམས་འགོག་བརྟག་དཔྱད་སྨན་སྒམ་ཆུང་དང་ལྷན་སྦྱར་གཤེར་ཁུ་སོགས་རིམས་འགོག་དངོས་ཟོག་སྣ་ཚོགས་སྒམ་209ལྷོ་ཁ་གྲོང་ཁྱེར་དང་མཚོ་སྣ་རྫོང་དུ་འབྱོར་ཡོད།

གཞན་ཡང་། ཧུའུ་ནན་ཞིང་ཆེན་དམངས་སྲིད་ཐིང་དང་ཞིང་ཆེན་དགེ་སྒྲུབ་སྤྱི་ཁྱབ་ཚོགས་པས་བོད་ལ་སྨན་སྤྱོད་ཁ་རས་དང་། འགོག་སྲུང་ངོ་ཁེབས། མིག་སྲུང་མིག་ཤེལ་སོགས་ཚུད་པའི་རིམས་འགོག་དངོས་ཟོག་ཡང་ཉིན་མཚན་བལྟོས་མེད་ངང་གནམ་གྲུར་བླུགས་ནས་བོད་དུ་བསྐྱལ་ཡོད།

ཤེས་རྟོགས་བྱུང་བར་གཞིགས་ན། ཧུའུ་པེ་དང་། ཧུའུ་ནན། ཨན་ཧུའེ་བཅས་ཞིང་ཆེན་གསུམ་གྱི་རིམས་འགོག་དངོས་ཟོག་གཞན་དག་མུ་མཐུད་ནས་གོ་རིམ་ལྡན་པའི་ངང་བོད་དུ་དབོར་རྒྱུ་རེད་འདུག