བོད་ལྗོངས་ཉིན་རེའི་ཚགས་པར་ཐོག་གནས་ཚུལ་སྤེལ་བར་གཞིགས་ན། སྤྱི་ཚོགས་ཡོངས་ཀྱིས་སློབ་གསོའི་ལས་དོན་ལ་བསམ་ཤེས་དང་སློབ་མ་ཕྱོགས་ཡོངས་ནས་ཡར་རྒྱས་འགྲོ་བར་སེམས་ཁུར་བྱེད་པའི་སློབ་གསོའི་ཁོར་ཡུག་བཟང་པོ་ཞིག་སྔར་བས་གཏོད་པ་དང“ཁུར་པོ་ཡང་གཏོང་གཉིས”ཀྱི་སྲིད་ཇུས་དོན་འཁྱོལ་བྱས་ཏེ་སློབ་གསོ་སྒྱུར་བཅོས་གཏིང་ཟབ་ཏུ་ཧུར་ཐག་གཏོང་ཆེད། འདི་ལོ་ནས་བཟུང་བོད་ལྗོངས་མེ་ཏོག་རྫོང་གིས་སྤྱོད་ཚུལ་སྔར་བས་ལེགས་གཏོང་དང་དོན་འཁྱོལ་ལ་དམ་འཛིན་བྱེད་པའི་ལས་དོན་དང་ཟུང་འབྲེལ་གྱིས“ཁྱིམ་ཚང་དང་སློབ་གྲྭ་ལག་གདང་སྦྲེལ། ཁུར་པོ་ཡང་གཏོང་གཉིས་ལ་ཕན་འབྲས་ཐོན་པར་བྱེད”ཅེས་པ་བརྗོད་དོན་གཙོ་བོར་བྱས་པའི་ཁྱིམ་སློབ་མཉམ་སྐྲུན་གྱི་བྱེད་སྒོ་རབ་དང་རིམ་པ་སྤེལ་ནས“ཁུར་པོ་ཡང་གཏོང་གཉིས”ཀྱི་ལས་དོན་མེ་ཏོག་རྫོང་དུ་མང་ཙམ་སྤེལ་བ་དང་ཕྱོགས་ཡོངས་ནས་སྤེལ་རྒྱུར་སྐུལ་འདེད་བཏང་བ་རེད།

ཁྱིམ་ཚང་དང་སློབ་གྲྭ་མཉམ་དུ་སློབ་སྦྱོང་བྱེད་པའི་བྱེད་སྒོ་སྤེལ་ནས་ཁྱིམ་བདག་གི་གནོན་ཤུགས་ཆུང་དུ་གཏོང་རོགས་བྱས་ཤིང་། སློབ་གྲྭ་ཁག་སྒྲིག་འཛུགས་བྱས་ནས་ཁྱིམ་བདག་ཚོགས་འདུ་འཚོགས་པ་དང“ཁྱིམ་དུ་སློབ་ཁྲིད་བྱེད་པར་སྐྱོད་པའི”བྱེད་སྒོ་སྤེལ་བ་དང་། “དྲ་ཐོག་དང་དྲ་ཕྱི་ཟུང་འབྲེལ”བྱས་ཏེ《ཁྱིམ་ཚང་སློབ་གསོའི་སྐུལ་སྤེལ་བཅའ་ཁྲིམས》སྒྲོག་འགྲེལ་བྱེད་པ། ཁྱིམ་ཚང་སློབ་གསོའི་འགན་ནུས་ཀྱི་ངེས་གནས་ཁ་གསལ་བཟོས་ནས། ཁྱིམ་བདག་ལ་སྐབས་དང་དུས་ལ་འཚམ་པའི་སློབ་གསོ་དང་། འཇམ་རྩུབ་མཉམ་སྤྱོད། འདྲ་མཉམ་སློབ་གསོ་སོགས་ཀྱི་སློབ་གསོ་གཏོང་སྟངས་བསླབས་པ་དང་། ཁྱིམ་བདག་གི་སྦྱོང་བརྡར་ནུས་པ་ཆེ་རུ་གཏོང་བ། ཁྱིམ་བདག་གི་ཀུན་སྤྱོད་བློ་སྦྱོང་གི་སེམས་ཁྲལ་ཆུང་དུ་གཏོང་བ། ཁྱིམ་ཚང་ཞི་མཐུན་བདེ་སྐྱིད་ཡོང་བར་བྱེད་པ་བཅས་བྱས་ནས། ཁྱིམ་ཚང་དང་། སློབ་གྲྭ སྤྱི་ཚོགས་བཅས་ཀྱིས་མཉམ་དུ་སློབ་མ་གསོ་སྐྱོང་བྱེད་པའི་སློབ་གསོའི་ཁོར་ཡུག་བཟང་པོ་ཞིག་ཧུར་ཐག་བཏོད་ཡོད། མིག་སྔའི་བར་མེ་ཏོག་རྫོང་གིས་ཁྱིམ་བདག་ཚོགས་འདུ་འཚོགས་ནས་སློབ་གསོའི་བཅའ་ཁྲིམས་སྒྲོག་འགྲེལ་ཐེངས་8བྱས་པར་སློབ་མ་2660ལྷག་ཙམ་དང་། དགེ་རྒན་240ལྷག་ཙམ། ཁྱིམ་བདག་1200ལྷག་ཙམ་ཞུགས་པ་མ་ཟད། ཁྱིམ་དུ་སློབ་ཁྲིད་ཐེངས་10ལྷག་ཙམ་བྱས་པ་དང་དུད་ཚང་20ལྷག་ཙམ་ལ་སློབ་ཁྲིད་བྱས་པ་དང་། དྲིལ་བསྒྲགས་དེབ་1200ལྷག་ཙམ་སྤྲད་ཡོད།

ཁྱིམ་ཚང་དང་སློབ་གྲྭས་སྐུལ་མ་མཉམ་གཏོང་གི་བྱེད་སྒོ་སྤེལ་ནས། སློབ་མར་གནོན་ཤུགས་ཆུང་དུ་གཏོང་རོགས་བྱས་ཤིང་། ལོ་རིམ་དྲུག་པའི་སློབ་མའི་ཁྱིམ་བདག་སྒྲིག་འཛུགས་བྱས་ཏེ་སྙིང་གཏམ་ཤོད་རེས་ཀྱི་ཚོགས་འདུ་འཚོགས་ནས་ཉེ་དུས་སློབ་མའི་སློབ་སྦྱོང་གི་གནོན་ཤུགས་དང་སེམས་ཁམས་ཀྱི་གནོན་ཤུགས་ཇི་ལྟར་ཆུང་དུ་གཏོང་རྒྱུར་དམིགས་ནས་གྲོས་བསྡུར་དང་སྤེལ་རེས་ཐེངས་8བྱས་པར་མི་ཐེངས་200ལྷག་ཙམ་ཞུགས་པ་དང་། ཉམས་མྱོང་དང་བྱ་ཐབས་ཁག་10ལྷག་ཙམ་ཕྱོགས་སྡོམ་བྱས་པ་རེད། གནོན་ཤུགས་ཆུང་དུ་གཏོང་བའི་སློབ་ཚན་བཀོད་སྒྲིག་བྱས་ཏེ་འཛིན་གྲྭའི་ཀྲུའུ་རེན་གྱི་རྒྱུན་གཏན་ལྕག་སྐུལ་དང་ཡིག་རྒྱུགས་གོང་གི་བྱ་ཐབས་བརྒྱུད་ཁྲིད་བྱས་པ་བརྒྱུད། ལོ་རིམ་དྲུག་པའི་སློབ་མར་སེམས་ཁམས་ཡག་པོ་དང་། སྣང་བ་སྐྱིད་པོ། ཡིད་ཆེས་བརྟན་པོ། བབ་ཆགས་བློ་བདེ། འབད་བརྩོན་ཆེར་སྐྱེད། རང་ཉིད་ཚད་བརྒལ་བཅས་བྱ་རྒྱུར་ཁྲིད་སྟོན་བྱས་པ་དང་། སློབ་མ་ཚོར་ཧུར་བརྩོན་ཡར་སྐྱེད་ཀྱི་སེམས་ཁམས་ཡག་པོ་ཞིག་ཡོང་བའི་ཁྲིད་སྟོན་བྱས་པ་རེད། སློབ་གྲྭར་ཞུགས་མ་ཐག་པའི་ལོ་རིམ་དང་པོའི་སློབ་ཕྲུག་དང་སློབ་གྲྭ་ཐོན་ཉེར་ཡོད་པའི་ལོ་རིམ་དྲུག་པའི་སློབ་མ་སྒྲིག་འཛུགས་བྱས་ཏེ“སེམས་ལྷོད་ལ་བབས་ནས་ཡིག་རྒྱུགས་གྲ་སྒྲིག་བྱེད་པ་དང་ལུས་སེམས་བདེ་ཐང་ངང་ཡིག་རྒྱུགས་བསུ་བའི”ཆུང་རྒྱུགས་ཀྱི་གནོན་ཤུགས་ཆུང་དུ་གཏོང་བའི་བྱེད་སྒོ་སྤེལ་ནས་དབུགས་ལྒང་ཐོག་རང་ཉིད་ཀྱི་ཕུགས་བསམ་དང་རེ་འདུན་བྲིས་ཏེ་ནུས་ཤུགས་ཡོད་རྒུས་ཆུང་རྒྱུགས་ལ་བསུ་བ་ཞུ་བའི་ཚང་མའི་ཡིད་ཆེས་དང་ཆོད་སེམས་མཚོན་པར་བྱས་ཤིང་། བྱེད་སྒོར་ཞུགས་མཁན་ཁྱོན་སློབ་མ་340ལྷག་ཙམ་ཟིན་ཡོད།

ཁྱིམ་ཚང་དང་སློབ་གྲྭ་གོང་འཕེལ་མཉམ་འགྲོའི་བྱེད་སྒོ་སྤེལ་ནས་དགེ་རྒན་གྱི་གནོན་ཤུགས་ཆུང་དུ་གཏོང་རོགས་བྱས་ཤིང་། “གལ་ཏེ་ང་རང་ཕྲུ་གུ་ཡིན་ན། གལ་ཏེ་ངའི་ཕྲུ་གུ་ཡིན་ན”ཞེས་པ་བརྗོད་དོན་གཙོ་བོར་བྱས་པའི་བགྲོ་གླེང་བྱེད་སྒོ་སྤེལ་ནས་གནས་བརྗེས་བསམ་གཞིག་བརྒྱུད། ཁྱིམ་བདག་དང་དགེ་རྒན་དབར་སློབ་གསོར་ཐུན་མོང་གི་ངོས་འཛིན་ཡོང་རྒྱུར་སྐུལ་འདེད་བཏང་སྟེ་ཁྱིམ་བདག་གིས་སློབ་གྲྭའི་སློབ་གསོར་རྒྱབ་སྐྱོར་དང་། དགེ་རྒན་གྱིས་སློབ་མར་བསམ་ཤེས། སློབ་མས་དགེ་རྒན་གྱི་དྲིན་ཚོར་བ་བཅས་བྱས་པ་དང་། སློབ་གསོ་སློབ་ཁྲིད་ཀྱི་ཁོར་ཡུག་སྔར་བས་ལེགས་སུ་གཏོང་བ་དང་། དཔེ་ཁྲིད་མི་སྐྱོང་གི་སྤུས་ཚད་ཕྱོགས་ཡོངས་ནས་ལེགས་སུ་གཏོང་བ། མང་ཚོགས་བློ་ཡིད་ཚིམ་པའི་སློབ་གསོ་ཡག་པོ་གཉེར་བ་བཅས་བྱས་པ་རེད།