ཤིན་ཧྭ་གསར་འགྱུར་ཁང་ལྷ་ས་ནས་གློག་འཕྲིན་འབྱོར་གསལ། རང་སྐྱོང་ལྗོངས་ལས་ཞུགས་ཞབས་ཞུ་ལྟེ་གནས་ཀྱིས་མཁོ་འདོན་བྱས་པའི་གྲངས་གཞི་ལས་མངོན་པར། འདི་ལོ་བོད་ཀྱི་མཐོ་སློབ་སློབ་ཐོན་སློབ་མ་ཁྲི་3.38ཟིན་པ་དེ་ན་ནིང་ལས་མི་4200ལྷག་ཙམ་མང་དུ་ཕྱིན་ནས་ལོ་རྒྱུས་ཀྱི་ཟིན་ཐོ་གསར་པ་བཏོད་ཡོད།

གནས་ཚུལ་དེར་དམིགས་ཏེ་བོད་ཀྱི་མི་སྤྱི་སྡེ་ཚན་དང་། སློབ་གསོ་སྡེ་ཚན། མཐོ་སློབ་སོགས་ཀྱིས་དྲ་ཐོག་ནས་ལས་མི་བསྡུ་བ་དང་། ཁེ་ལས་བརྒྱ་སློབ་གྲྭར་སྐྱོད་པ། ལས་ཞུགས་ལ་དཀའ་ངལ་ཡོད་པའི་སློབ་མར་གནད་སྨིན་རོགས་སྐྱོར་བྱེད་པ་སོགས་ཀྱི་བྱེད་ཐབས་བརྒྱུད། སློབ་ཐོན་སློབ་མའི་ལས་ཀ་འཚོལ་ཐབས་ལ་ནུས་ཤུགས་ཡོད་རྒུས་སྲུང་སྐྱོང་བྱས་ཡོད།

ལོ་24ལ་སླེབས་པའི་བོད་ལྗོངས་ཉིང་ཁྲི་གྲོང་ཁྱེར་སྣང་རྫོང་གི་དཔལ་འབྱོར་ནི་འདི་ལོ་བོད་ལྗོངས་སློབ་ཆེན་རང་བྱུང་བཟོ་སྐྲུན་རིག་པ་སློབ་གླིང་ནས་ཐོན་པའི་སློབ་མ་ཞིག་རེད། ཟླ་5པར་སློབ་གྲྭས་ཁེ་ལས་ཀྱི་ལས་བསྡུའི་ཆ་འཕྲིན་ཞིག་ཡོངས་བསྒྲགས་བྱས་པར། ཁོ་པས་འཕྲལ་མར་རང་ཉིད་ཀྱི་ལོ་རྒྱུས་མདོར་བསྡུས་བསྐུར་བ་མ་ཟད། ཕྱིས་སུ་ད་དུང་དྲ་ཐོག་ནས་ངོ་རྒྱུགས་ལ་ཞུགས། ངོ་རྒྱུགས་འཕྲོད་རྗེས་རྒྱལ་ཁབ་ཀྱི་24356སློབ་ཆེན་སློབ་མའི་ལས་ཞུགས་ཞབས་ཞུའི་ལས་སྟེགས་ནས་ཀུང་སི་དང་ཕྱོགས་གསུམ་པའི་གྲོས་མཐུན་ཡི་གེའང་བཞག་པ་རེད།

ཉེ་བའི་ལོ་ཤས་རིང་བོད་ཀྱིས་དྲ་སྦྲེལ་ལས་བསྡུ་ལས་སྟེགས་གཉེར་ནས་ལས་འཚོལ་ལས་ཞུགས་ཀྱི་ཐབས་ལམ་བཤངས་ཏེ། ལས་བསྡུའི་གཡུལ་ས་གཙོ་བོ་དྲ་ཕྱི་ནས་དྲ་ཐོག་ཏུ་བསྒྱུར་བ་རེད། “ལོ་རྒྱུས་མདོར་བསྡུས་བསྐུར་བ་ནས་ངོ་རྒྱུགས་བར་དང་། དེ་ནས་ཕྱོགས་གསུམ་པ་དང་གྲོས་མཐུན་ཡི་གེ་འཇོག་པ་སོགས་ཚང་མ་དྲ་ཐོག་ནས་བྱེད་དགོས་པ་ཤ་སྟག་ཡིན་པས། སྟབས་ཧ་ཅང་བདེ་པོ་འདུག”ཅེས་དཔལ་འབྱོར་གྱིས་བཤད།

བོད་ཀྱི་མཐོ་སློབ་ཀྱིས་ཁེ་ལས་དང་གྲོས་མོལ་བྱས་ནས“ཁྱེད་ཀྱིས་གཞུང་བསྡུ་བྱེད། ང་ཡིས་ཐ་སྐྱོང་བྱེད”པའི་བྱེད་སྒོ་སྤེལ་ཏེ། གཞུང་རྒྱུགས་ལ་ཞུགས་པའི་སློབ་ཐོན་སློབ་མར་རིན་མེད་གན་འགྲོལ་གྱི་གོ་སྐབས་ཤིག་ཀྱང་སྦྱིན་ཡོད། དཔལ་འབྱོར་དང་གྲོས་མཐུན་ཡི་གེ་འཇོག་མཁན་ཨན་ནེང་བོད་ལྗོངས་འཛུགས་སྐྲུན་འཕེལ་རྒྱས་ཚད་ཡོད་ཀུང་སི་ནི་གྲོས་མཐུན་བཞག་པའི་ཁེ་ལས་ཀྱི་གྲས་ཤིག་རེད། “བྱེད་ཐབས་དེས་ང་ཚོར་སྔོན་ལ་ལས་ཀར་ཞུགས་པ་དང་དེ་ནས་ལས་ཀ་འདེམས་པའི་སྐུལ་ལྕག་གཏོང་གི་ཡོད་པས། ངས་ལས་བསྡུའི་ཡིག་རྒྱུགས་ལ་ཞུགས་པའི་གྲ་སྒྲིག་བྱེད་བཞིན་ཡོད། ཕ་མ་གཉིས་པོས་གཞུང་གི་ལས་ཁུངས་སུ་ལས་ཀར་སྐྱོད་པའི་རེ་བ་བྱེད་ཀྱི་འདུག”ཅེས་དཔལ་འབྱོར་གྱིས་བཤད།ལོ་22ལ་སླེབས་པའི་བློ་བཟང་ཡེ་ཤེས་ནི་2018ལོར་ལྷ་ས་འབྲིང་རིམ་ལས་རིགས་ལག་རྩལ་སློབ་གླིང་གཉིས་པ་ནས་ཐོན་པ་ཞིག་རེད། སློབ་གྲྭར་སྐྱོད་རིང་ཁོ་པ་ནན་ཅིང་དུ་ཀྲུང་ལུགས་དང་ཕྱི་ལུགས་ཀྱི་མ་བྱན་ལག་རྩལ་སྦྱོང་མྱོང་ཡོད། སློབ་གྲྭ་ཐོན་རྗེས་ཁོ་པས་ལྷ་ས་དང་གཞིས་རྩེ་སོགས་ས་གནས་ཀྱི་བོད་ཟས་ཟ་ཁང་དུ་སློབ་སྦྱོང་བྱེད་པར་བསྐྱོད། འདི་ལོའི་ཟླ་3པར་ཁོ་པས་ལས་གཏོད་མ་རྩ་རེ་འདུན་ཞུས་པ་དང་འབྲེལ། རང་ཉིད་ཀྱིས་ལོ་མང་བསགས་པའི་དངུལ་ཚང་མ་བཏོན་ནས་མལ་གྲོ་གུང་དཀར་རྫོང་གྲོང་དུ་བོད་ཟས་ཟ་ཁང་ཞིག་བཙུགས་པ་རེད།

སློབ་ཐོན་སློབ་མས་རང་བརྟེན་ལས་གཏོད་བྱེད་པར་རྒྱབ་སྐྱོར་བྱ་ཆེད། བོད་རང་སྐྱོང་ལྗོངས་ཀྱིས་སྲིད་ཇུས་བཏོན་ནས་སློབ་གྲྭ་ཐོན་ནས་ལོ་5ཡི་ནང་ཚུན་དུ་ལས་གཏོད་བྱེད་མཁན་ཐེམ་ཁུངས་བོད་ནས་ཡིན་པའི་མཐོ་སློབ་སློབ་ཐོན་སློབ་མར། གཏན་འབེབས་ལྟར་ལས་གཏོད་མ་རྩ་སྒོར་ཁྲི་6དང་། དེ་བཞིན་ལོ་རེར་མཐོ་ཤོས་ལ་སྒོར་ཁྲི་2.4ཡི་ཁང་གླ་དང་ཆུ་རིན་གློག་རིན་ཁ་གསབ་སྲིད་ཇུས་ལོངས་སུ་སྤྱད་ཆོག་པ་དང་། ཁ་གསབ་དུས་ཡུན་རིང་ཤོས་ལོ་5ཡིན་པ་གཏན་འབེབས་བྱས་ཡོད།

“ང་ལ་སྔོན་མ་བོད་ཟས་ཟ་ཁང་ཞིག་འཛུགས་པའི་ཕུགས་འདུན་ཡོད། ཕུགས་འདུན་གྲུབ་པས་ཧ་ཅང་དགའ་པོ་བྱུང་། ད་ལྟ་ངའི་བོད་ཟས་ཟ་ཁང་ལ་ཟླ་རེར་ཆ་སྙོམས་ཡོང་འབབ་སྒོར་ཁྲི་2ཡས་མས་འདུག”ཅེས་བཤད།

2019ལོར་ལོ་25ལ་སླེབས་པའི་འཇམ་དབྱངས་དཔལ་མོ་ཆི་ཆི་ཧར་སློབ་ཆེན་ནས་ཐོན་རྗེས། ཕྱི་ནས་བསྡུས་པ་བརྒྱུད་ལྷ་ས་གྲོང་ཁྱེར་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་ལྟ་ཞིབ་ཉིང་ལག་རུ་ཁག་ཏུ་ལས་ཞུགས་བྱས་པ་དང་། འདི་ལོའི་ལོ་སྟོད་དུ་ཁོ་མོས་ལྗོངས་ཕྱིའི་ལས་བསྡུའི་ཡིག་རྒྱུགས་ལ་ཞུགས་པ་བརྒྱུད་སི་ཁྲོན་ཞིང་ཆེན་ཕན་ཀྲི་ཧྭ་གྲོང་ཁྱེར་དུ་ལས་ཀར་སྐྱོད་བཞིན་ཡོད།

“ནང་མི་ཚང་མ་ཧ་ཅང་དགའ་པོ་བྱུང་སོང་། འབད་བརྩོན་བྱས་པ་ཆུད་ཟོས་སུ་ཕྱིན་མི་འདུག ལས་ཁུངས་གསར་པ་ནི་འགྲིམ་འགྲུལ་ཉེན་རྟོག་སྡེ་ཚན་རེད། ལས་རོགས་ཚོས་ང་ལ་ཐུགས་ཁུར་ཟབ་མོ་བྱེད་ཀྱི་འདུག་ལ། ངས་ཀྱང་སློབ་སྦྱོང་ཧུར་ཐག་བྱས་ནས་རང་ཉིད་ཡག་ཐོག་ཡག་བརྩེགས་ཡོང་བར་བྱེད་ཀྱི་ཡོད”ཅེས་འཇམ་དབྱངས་དཔལ་མོས་བཤད།

བོད་ཀྱི་ས་ཁུལ་དང་། གྲོང་ཁྱེར། རྫོང་། ཆུས་བཅས་ཁག་གཅིག་གིས་བོད་སྐྱོར་སྟོབས་ཤུགས་ལ་བརྟེན་ནས་ས་གནས་དེ་གའི་སློབ་མར་དེ་བས་འཚམ་པའི་ལས་ཞུགས་ཐབས་ལམ་བཏོད་ཡོད། 2019ལོར་བོད་ལྗོངས་མལ་གྲོ་གུང་དཀར་རྫོང་ལ་ཁ་གཏད་རོགས་སྐྱོར་བྱེད་མཁན་ནན་ཅིང་གི་ལས་དོན་རུ་ཁག་གིས“སྐལ་བཟང་མེ་ཏོག་བཞད”ཅེས་པའི་སློབ་ཆེན་སློབ་མའི་ལས་ཞུགས་ལས་གཏོད་ཀྱི་ཆེད་སྦྱོང་སྒར་ས་བཙུགས་པ་དང་། ལས་ཞུགས་ཐུབ་མེད་པའི་སློབ་ཆེན་སློབ་མ་སྒྲིག་འཛུགས་ཀྱིས་ནན་ཅིང་དུ་བསྐྱོད་ནས་གསོ་སྦྱོང་དང་དངོས་སྦྱོང་བྱས་པ། ལས་རིགས་བློ་འདྲི་དང་ལས་གནས་མཁོ་འདོན་བྱས་ནས་ལས་ཞུགས་ལ་སྐུལ་འདེད་བཏང་ཡོད།

བོད་ལྗོངས་ལྷ་ས་གྲོང་ཁྱེར་མལ་གྲོ་གུང་དཀར་རྫོང་གུང་དཀར་གྲོང་ཚོའི་ལོ་27ལ་སླེབས་པའི་ཐུབ་བསྟན་ཕུན་ཚོགས་2019ལོར་ལྷོ་ནུབ་ནོར་དཔལ་སློབ་ཆེན་ནས་ཐོན་རྗེས། ཆེད་སྦྱོང་སྒར་སར་སློབ་མ་བསྡུ་བའི་སྐབས་དང་ཏག་ཏག་འཁེལ། དེས་ན་ཁོ་པས་མིང་ཐོ་བཀོད་པ་བརྒྱུད་ཆེད་སྦྱོང་སྒར་སའི་སློབ་མ་ཁག་དང་པོར་གྱུར། དེ་རྗེས་བོད་སྐྱོར་ལས་བྱེད་པའི་ངོ་སྤྲོད་འོག་ཅང་སུའུ་ཡི་ཨ་རག་ལས་རིགས་ཀུང་སི་ཞིག་ལ་ལས་ཀར་ཞུགས་པ་རེད།

བོད་རང་སྐྱོང་ལྗོངས་ལས་ཞུགས་ཞབས་ཞུ་ལྟེ་གནས་ཀྱི་སྤེལ་རེས་ཞབས་ཞུ་ཁྲུའི་ཁྲུའུ་ཀྲང་ལི་ཡན་ཐུང་གིས། “ཉེ་བའི་ལོ་ཤས་རིང་བོད་ཀྱི་འབྲེལ་ཡོད་ཚན་པའི་སྲིད་ཇུས་ཀྱི་རྒྱབ་སྐྱོར་འོག ལྗོངས་ཕྱིར་ལས་ཞུགས་གདམ་ག་བྱེད་མཁན་སློབ་ཐོན་སློབ་མ་ཇེ་མང་དུ་འགྲོ་གི་འདུག མི་གྲངས་2016ལོའི་མི་བརྒྱ་ལྷག་ཙམ་ནས་2021ལོའི་མི་2400ལྷག་ཙམ་བར་མང་དུ་སོང་འདུག”ཅེས་བཤད།

བོད་ལྗོངས་མཐོ་སློབ་ཀྱིས་ཡོང་འབབ་དམའ་བའི་ཁྱིམ་ཚང་དང་དབང་པོ་སྐྱོན་ཅན་སོགས་ལས་ཞུགས་ལ་དཀའ་ངལ་ཡོད་པའི་སློབ་ཐོན་སློབ་མར་དམིགས་ཏེ། “སློབ་མ་གཅིག་ལ་སྲིད་ཇུས་གཅིག”དང“སློབ་མ་གཅིག་ལ་ཡིག་ཚགས་གཅིག”གི་གནད་སྨིན་རོགས་སྐྱོར་བྱེད་ཐབས་བཟོས་ནས་སློབ་ཐོན་སློབ་མའི་ལས་ཞུགས་ལ་རོགས་རམ་བྱས་ཡོད།

ལི་ཡན་ཐུང་གིས། ཉེ་བའི་ལོ་ཤས་རིང་བོད་ཀྱིས་ཁེ་ལས་ལས་ཞུགས་དང་། གཞུང་གི་ལས་གནས་ལས་ཞུགས། གཞི་རིམ་ལས་ཞུགས། ལྗོངས་ཕྱིར་ལས་ཞུགས། ལས་གཏོད་ལས་ཞུགས་བཅས“སྣ་མང་གཞི་གཅིག”གི་ལས་ཞུགས་རྣམ་པ་རིམ་བཞིན་བཏོད་ནས། མཐོ་སློབ་སློབ་ཐོན་སློབ་མའི་ལས་ཞུགས་ལ་སྐུལ་འདེད་བཏང་ཡོད་ཅེས་བཤད།