ཉེ་ཆར་གནམ་གཤིས་ཡག་པ་དང་བསྟུན་ནས་ནག་ཆུ་གྲོང་ཁྱེར་ཨ་མདོ་རྫོང་རྩ་རིང་གྲོང་རྡལ་ཉི་མ་ལུང་གྲོང་ཚོའི་སྐལ་བཟང་རྒྱ་མཚོས་སྒོ་རའི་ནང་རྩྭ་སོན་གསར་པ་བཏབ།

ས་བོན་བཏབ་མ་ཐག་སྐལ་བཟང་རྒྱ་མཚོའི་ཁྱིམ་དུ་ཉེ་འཁོར་གྱི་ཁྱིམ་མཚེས་ཚོ་སླེབས་པ་དང་ཕྲུ་གུ་ཚོ་ཡིག་རྒྱུགས་གཏོང་གྲབས་ཡོད་པའི་སྐབས་འདིར་གྲོང་ཚོའི་ཁྱིམ་བདག་མང་པོ་ཞིག་ཁོང་ཁྱིམ་དུ་སྐད་ཆ་འདྲི་བར་ཡོང་གི་ཡོད།

སྐལ་བཟང་རྒྱ་མཚོར་ཕྲུ་གུ་བདུན་ཡོད་པའི་ནང་སློབ་ཆེན་སློབ་མ་དྲུག་ཡོད་སྟབས་ཚང་མས་ཁོང་ལ་ཕྲུ་གུ་གསོ་བའི་ཉམས་མྱོང་ཧ་ཅང་ཡག་པོ་ཡོད་པའི་ངོས་འཛིན་བྱེད་ཀྱི་ཡོད།

“ཕྲུ་གུར་ས་བོན་འདི་དང་འདྲ་བར་ངང་རྒྱུད་རིང་པོ་བྱེད་དགོས་ལ་འབད་བརྩོན་བྱས་ཚེ་ས་བོན་ལ་མྱུ་གུ་འབུས་ཐུབ”ཅེས་སྐལ་བཟང་རྒྱ་མཚོས་བཏབ་མ་ཐག་པའི་ས་བོན་ལ་ལྟ་བཞིན་དེ་ལྟར་བཤད།

སྐད་ཆ་སྙན་པོ་དེ་ཙམ་མེད་མོད། འོན་ཀྱང་གནས་ལུགས་ཆེན་པོ་ཡོད། དེ་ལས་སློབ་ཆེན་སློབ་མ་དྲུག་གསོ་སྐྱོང་བྱས་པའི་སྐལ་བཟང་རྒྱ་མཚོ་སློབ་གྲྭར་ཉིན་གཅིག་ཀྱང་འགྲོ་མྱོང་མེད་པ་སུས་ཤེས།

སློབ་གཉེར་ཕུགས་འདུན་དང་པོ། ང་སློབ་གྲྭར་འགྲོ་འདོད་ཡོད།

ཆུང་དུས་སྐལ་བཟང་རྒྱ་མཚོའི་ཕུགས་འདུན་ཆེ་ཤོས་ནི་སློབ་གྲྭར་འགྲོ་རྒྱུ་དེ་ཡིན་མོད། འོན་ཀྱང་ཧ་གོ་དོན་རྟོགས་པའི་ཁོང་གིས་ཁྱིམ་ཚང་གི་ཆ་རྐྱེན་ཧ་ཅང་ཞན་པས་སོ་སོའི་སློབ་གཉེར་ཕུགས་འདུན་འགྲུབ་མི་སྲིད་པ་གསལ་པོ་ཤེས་ཀྱི་ཡོད། རྗེས་སུ་དོན་དེའི་སྐོར་མི་གླེང་བར་ཕུགས་འདུན་དེ་མངོན་འགྱུར་མ་ཐུབ་པའི་བར་སེམས་ཁོངས་སུ་ཉར།

ལོ་15ལ་སླེབས་པའི་སྐབས་སུ་སྐལ་བཟང་རྒྱལ་མཚོས་གྲོང་ཚོའི་རྒན་རྒོན་ཚོ་དང་མཉམ་དུ་རིག་གནས་ཤེས་བྱ་གང་ཙམ་སྦྱངས་པས་བྱིས་དུས་ཀྱི་སློབ་གཉེར་ཕུགས་འདུན་གཞི་ནས་མངོན་འགྱུར་བྱུང་ཡོད།

ཡིག་ངོ་ཆོད་རྗེས་སྐལ་བཟང་རྒྱལ་མཚོར་དེ་བས་ཤེས་བྱ་སྦྱོང་འདོད་ཆེན་པོ་བྱུང་ནས་སྔ་རྗེས་སུ་ཕྱུགས་རིགས་སྨན་པ་དང་རྩིས་པ་སོགས་ཀྱི་ཤེས་བྱ་དང་འཚེམ་བཟོའི་རྩལ་ནུས་རང་སྦྱོང་བྱས་པ་དང་འབྲེལ་ལོ་བཅུ་ཕྲག་ཁ་ཤས་ཉིན་གཅིག་ལྟར་རང་ཉིད་ཀྱིས་སྦྱངས་པའི་ཤེས་བྱར་བརྟེན་ནས་གྲོང་མིར་ཞབས་འདེགས་ཧུར་ཐག་ཞུས།

སྐལ་བཟང་རྒྱ་མཚོས་རང་ཉིད་ཀྱི་རྩལ་ནུས་དེ་དག་གྲོང་མི་ཚོས་བསླབས་པ་ཞིག་ཡིན་པས་ངེས་པར་དུ་ཁོང་ཚོའི་དྲིན་ལན་འཇལ་དགོས་སྙམ་བཞིན་བློ་གཅིག་སེམས་གཅིག་གིས་གྲོང་མིར་ཞབས་འདེགས་ཞུ་བའི་རྣམ་འགྱུར་བཅངས་ཏེ་བྱ་སྤྱོད་སྤེལ་བ་མཐའ་དག་ཚང་མས་སེམས་ནང་བཞག་ནས་ཁོང་གྲོང་ཚོའི་ལས་བྱེད་པར་འདེམས་བསྐོ་བྱས། 2021ལོར་གྲོང་མི་ཚོས་སྐལ་བཟང་རྒྱ་མཚོ་ཉི་མ་ལུང་གྲོང་ཚོའི་ཏང་ཀྲི་པུའི་ཧྲུའུ་ཅིར་བདམས་པ་དེ་ནི་ཁོང་ལ་ཁས་ལེན་གང་ལེགས་བྱས་པ་མ་ཟད་མུ་མཐུད་ཚང་མའི་སྣེ་ཁྲིད་དེ་འབད་བརྩོན་ཧུར་ཐག་བྱས་ནས་འཚོ་བ་དེ་བས་ཡག་པ་སྐྱེལ་རྒྱུ་ཡོང་བའི་རེ་བའང་བཅོལ་ཡོད།

སློབ་གཉེར་ཕུགས་འདུན་གཉིས་པ། ངའི་ཕྲུ་གུ་ཚང་མ་སློབ་ཆེན་འགྲིམས་ཐུབ་པ་བྱ་འདོད་ཡོད།

གཞོན་ནུའི་སྐབས་ཀྱི་ཉམས་མྱོང་ལས་སྐལ་བཟང་རྒྱ་མཚོས་དཔེ་དེབ་ཀློག་པའི་གལ་ཆེའི་རང་བཞིན་ལ་གོ་བ་གཏིང་ཟབ་བླངས་པ་དང་ཕྲུ་གུ་བྱུང་རྗེས་སྐལ་བཟང་རྒྱ་མཚོར་སློབ་གཉེར་ཕུགས་འདུན་གསར་པ་ཞིག་ཡོད་པ་དེ་ནི་ཕྲུ་གུ་ཚང་མ་སློབ་ཆེན་འགྲིམས་ཐུབ་པ་བྱ་རྒྱུ་དེ་རེད།

སེམས་ཐག་དེ་ལྟ་བུ་གཅོད་པ་ནི་ལས་སླ་པོ་ཞིག་མིན་ཞིང་། སྐབས་དེ་དུས་གྲོང་ཚོའི་མི་མང་པོས་ཕྲུ་གུ་གཅིག་སློབ་ཆེན་དུ་བཏང་ཚེ་ཁྱིམ་གྱི་ངལ་ནུས་གལ་ཆེན་ཞིག་ཤོར་བ་མ་ཟད་ད་དུང་འགྲོ་སོང་ཧ་ཅང་ཆེ་བས་དཀའ་ངལ་ཆེན་པོ་འཕྲད་སྲིད་པའི་ངོས་འཛིན་བྱེད་ཀྱི་ཡོད།

སྐལ་བཟང་རྒྱ་མཚོར་ཕྲུ་གུ་བདུན་ཡོད། ཚང་མ་སློབ་གྲྭར་བཏང་ཚེ་ཁྱིམ་གྱི་ངལ་ནུས་བདུན་ཤོར་བའི་ཁར་སྐལ་བཟང་རྒྱལ་མཚོ་དང་བཟའ་ཟླས་ད་དུང་ཕྲུ་གུ་བདུན་གྱི་འགྲོ་སོང་གཏོང་དགོས་སྟབས་འཚོ་བའི་ཁུར་པོ་ལྕི་དྲགས་ཏེ་ཁྱོ་ཤུག་གཉིས་པོ་ངལ་དུབ་ཀྱིས་མནར། འོན་ཀྱང་སྐལ་བཟང་རྒྱ་མཚོས་ཕྱིར་བཤོལ་གཏན་ནས་བྱས་མེད། སྟབས་ལེགས་པ་ཞིག་ལ་ཕྲུ་གུ་ཚང་མ་ཧ་ཅང་འཇོན་པོ་ཡོད།

སྐལ་བཟང་རྒྱ་མཚོའི་བུ་རྒན་པ་རྣམ་དར་ནི་ཁྱིམ་དེའི་སློབ་ཆེན་སློབ་མ་དང་པོ་དེ་ཡིན་ཞིང་། སློབ་གྲྭ་ཐོན་རྗེས་ལྷ་སར་ལས་ཀ་རག་པ་དང་། བུ་གཉིས་པ་སྐལ་བཟང་འཇིགས་མེད་སློབ་གྲྭ་ཐོན་རྗེས་ཨ་མདོ་རྫོང་སློབ་འབྲིང་དུ་དགེ་རྒན་བྱས་པ། བུ་གསུམ་པ་སྐལ་བཟང་དགྲ་འདུལ་ནི་ཕ་མ་གཉིས་དང་ཐག་ཉེ་ཤོས་ཡིན་པའི་རྩ་རིང་གྲོང་རྡལ་ལྷ་མོ་མཚོ་གྲོང་ཚོའི་གྲོང་གསེབ་དར་རྒྱས་ཀྱི་ཆེད་དོན་ལས་བྱེད་པ་ཞིག་ཡིན་པ། བུ་མོ་ཆུང་བ་ཕུན་ཚོགས་དབང་མོ་སློབ་གྲྭ་ཐོན་རྗེས་ཨ་མདོ་རྫོང་དམངས་སྲིད་ཅུས་སུ་ལས་ཀ་བྱེད་ཀྱི་ཡོད་པ། བུ་ཆུང་ཤོས་ད་ལོ་སློབ་གྲྭ་ཐོན་མ་ཐག་ཡིན་པ་དང་གཞུང་ལས་པའི་ཡིག་རྒྱུགས་གཏོང་རྒྱུའི་གྲ་སྒྲིག་བྱེད་ཀྱི་ཡོད་པ་རེད།

གཅེན་གཅུང་ཚང་མ་དང་བསྡུར་ན་བུ་བཞི་པ་སྐལ་བཟང་དཔལ་ལྡན་གྱི་སློབ་སྦྱོང་བརྒྱུད་རིམ་ལམ་ལྷོངས་དེ་ཙམ་བྱུང་མེད། དེའང་ནད་གཞི་ཕོག་པའི་རྐྱེན་གྱིས་མཐོ་རྒྱུགས་གཏོང་ཐུབ་མེད་པ་དང་། ཕྱིས་སུ་ཕ་མ་གཉིས་ཀྱིས་ལྕག་སྐུལ་བྱས་པ་བརྒྱུད་ཁོང་དར་མའི་རང་སྦྱོང་རྒྱུགས་ལེན་ལ་ཞུགས་ནས་སློབ་གྲྭ་ཆེ་མོར་རྒྱུགས་འཕྲོད་ཅིང་། ད་ཆ་ཨ་མདོ་རྫོང་གདང་ལའི་ཀུན་འདུས་སྨྱན་སྦྱོར་ལྟེ་གནས་ཀྱི་གཙོ་སྐྱོང་པ་ཞིག་ཏུ་གྱུར་ཡོད།

བུ་མོ་ཆེ་བ་བཀྲ་ཤིས་ཆོས་འཛོམས་སློབ་ཆེན་འགྲིམ་མྱོང་མེད་ཀྱང་སློབ་སྦྱོང་ལ་དགའ་བ་མ་ཟད། ལག་རྩལ་སྣ་གཅིག་ཀྱང་ཤེས་ཀྱི་ཡོད། ཁོང་གིས་དེ་སྔ་ནག་ཆུ་གྲོང་ཁྱེར་རིག་རྩལ་ལས་དོན་ཚོགས་པར་རོལ་དབྱངས་སྦྱོང་མྱོང་ཡོད། ད་ཆ་རྫོང་དུ་རིག་རྩལ་སྐོང་འཁྲབ་ཀྱི་བྱེད་སྒོ་ཡོད་ཚེ་བཀྲ་ཤིས་ཆོས་འཛོམས་གདན་དྲངས་ཀྱི་ཡོད་ལ་འཚོ་བའང་ཧ་ཅང་སྐྱིད་པོ་ཡོད།

ད་ཆ་ཕྲུ་གུ་ཚང་མ་རང་སྐྱ་འཕེར་བ་མཐོང་སྐབས་སྐལ་བཟང་རྒྱ་མཚོ་སྤོབས་པ་ཆེན་པོ་སྐྱེ་ཡི་ཡོད། དེ་སྔོན་ཕྲུ་གུ་ཚོ་སློབ་གྲྭར་གཏོང་ཆེད་དཀའ་ལས་མང་པོ་བརྒྱབ་ཀྱང་ད་ཆ་བདེ་སྐྱིད་ལྡན་པའི་འཚོ་བ་སྐྱེལ་གྱི་ཡོད།

སློབ་གཉེར་ཕུགས་འདུན་གསུམ་པ། ངས་གྲོང་ཚོའི་ཕྲུ་གུ་ཚང་མ་སློབ་གྲྭར་གཏོང་འདོད་ཡོད།

སྐལ་བཟང་རྒྱ་མཚོས་རང་ཁྱིམ་གྱི་ཕྲུ་གུ་ཚོར་སེམས་ཁྲལ་བྱེད་ཀྱི་ཡོད་པ་མ་ཟད། ད་དུང་གྲོང་ཚོའི་ཕྲུ་གུ་ཚོར་ཡང་སེམས་ཁུར་བྱེད་ཀྱི་ཡོད།

དེ་སྔ་ཁྱིམ་གྱི་དཔལ་འབྱོར་ཡག་པོ་མེད་པས་ཉི་མ་ལུང་གྲོང་ཚོའི་ཕྲུ་གུ་མང་པོ་ཞིག་སྔ་ས་ནས་སློབ་གྲྭར་འགྲོ་མཚམས་བཞག་པ་དང་ཡང་ན་སློབ་གྲྭར་ཉིན་གཅིག་ཀྱང་འགྲོ་མྱོང་མེད་པའང་ཡོད། སྐབས་དེ་དུས་སྐལ་བཟང་རྒྱ་མཚོས་གྲོང་ཚོ་དེ་ཡོངས་ཀྱི་ཕྲུ་གུ་ཚང་མ་སློབ་གྲྭར་འགྲོ་ཐུབ་པའི་རེ་བ་བྱས།

བོད་ཀྱི་སློབ་གསོའི་ལས་དོན་མགྱོགས་མྱུར་འཕེལ་རྒྱས་བཏང་ནས་ཕྲུ་གུ་དེ་བས་མང་བ་སློབ་གྲྭར་འགྲོ་ཐུབ་པ་དང་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཚད་མཐོའི་མཐོང་ཆེན་དང་བྱམས་བརྩེའི་ཐུགས་ཁུར་འོག་1985ལོ་ནས་བཟུང་བོད་ཀྱིས་འོས་འགན་སློབ་གསོའི་དུས་མཚམས་ཀྱི་ཞིང་འབྲོག་པའི་བུ་ཕྲུག་ཚོར“བཟའ་སྡོད་དང་གཞི་རྩའི་སློབ་སྦྱོང་འགྲོ་གྲོན་འགན་ལེན”གྱི་སློབ་གསོའི“འགན་ལེན་གསུམ”གྱི་སྲིད་ཇུས་ལག་ལེན་བསྟར་བ་རེད། 2011ལོར་སློབ་གསོའི“འགན་ལེན་གསུམ”གྱི་སྲིད་ཇུས་དེ་སློབ་ཞུགས་གོང་ནས་མཐོ་རིམ་སློབ་འབྲིང་བར་གྱི་ལོ་15ཡི་སློབ་གསོའི་དུས་མཚམས་བར་སྣུར་བསྲིང་བྱས་པ་རེད།

སྲིད་ཇུས་ཡག་པོ་མང་པོ་ཡོད་པས་བོད་ཀྱི་ཕྲུ་གུ་ཚང་མ་སློབ་གྲྭར་འགྲོ་ཐུབ་ཡོད།

ད་ཆ་མི་གྲངས་813ལས་མེད་པའི་ཉི་མ་ལུང་གྲོང་ཚོར་སློབ་གྲྭ་ཆེ་མོ་འགྲིམ་བཞིན་པའི་སློབ་མ་162ཡོད་པ་མ་ཟད། ད་དུང་སློབ་ཆེན་སློབ་མ་80སློབ་གྲྭ་ཐོན་པ་དང་འབྲེལ་སྔ་རྗེས་སུ་ལས་ཀར་ཞུགས་པ་དང་། གྲོང་ཚོ་དེ་ཡོངས་ཀྱི་སློབ་ལོ་ལོན་པའི་བྱིས་པ་ཚང་མ་དཔེ་དེབ་བཀླགས་རྒྱུ་ཡོད་ལ་སློབ་གྲྭར་ཡང་འགྲོ་ཐུབ་ཡོད།

སྐལ་བཟང་རྒྱལ་མཚོའི་སློབ་གཉེར་ཕུགས་འདུན་གསུམ་ཀ་ལམ་ལྷོངས་བྱུང་ཡོད།

ད་ཆ་སྐལ་བཟང་རྒྱ་མཚོ་བློ་ཡིད་ཚིམ་པོས་རང་ཁྱིམ་གྱི་སྒོ་རའི་ནང་བསྡད་དེ། སྒོ་རའི་རྩྭ་ལྗང་མྱུ་གུ་འབུས་ནས་སྐྱེ་འཚར་བྱུང་བ་དང་རིམ་བཞིན་སྔོ་ཐིང་ཐིང་དུ་གྱུར་བར་ལྟ་བཞིན་དེ་དག་ཕྲུ་གུ་ཚོ་དང་འདྲ་བར་རེ་བས་ཁེངས་བཞིན་ཡོད།