ཅང་ཕུའུ་ཆིང་གིས“སློབ་ཆུང་འགྲིམ་པའི་སྐབས་ང་རང་ང་ཚོའི་འཛིན་གྲྭའི་དགེ་རྒན་ལ་ཧ་ཅང་དགའ་པོ་ཡོད། གང་ལགས་ཤེ་ན་ཁོང་ནི་གཤིས་རྒྱུད་འཇམ་ལ་ཤེས་རྒྱ་ཆེ་བ་ཞིག་ཡོད་པས་རེད”ཅེས་བཤད། དུས་ཡུན་རིང་པོ་སོང་རྗེས་དགེ་རྒན་དེའི་ཤུགས་རྐྱེན་བཟང་པོ་ལས་ཅང་ཕུའུ་ཆིང་ལ་ཕྱིས་སུ་སློབ་གསོའི་བྱ་གཞག་ནང་ཞུགས་རྒྱུའི་བསམ་འདུན་ཞིག་བྱུང་། ནར་སོན་རྗེས་ཅང་ཕུའུ་ཆིང་གིས་དགེ་རྒན་ཞིག་བྱས་ནས་ཕ་ཡུལ་གྱི་ཕྲུ་གུ་ཚོར་ཤེས་བྱ་འཆད་ཁྲིད་བྱ་རྒྱུ་མ་ཟད། རེ་བས་ཁེངས་པའི་འབྱུང་འགྱུར་ཞིག་ཀྱང་གཏོད་རྒྱུའི་སེམས་ཐག་བཅད།

2005ལོའི་ཟླ་7པར་ལོ་20ལ་སླེབས་པའི་ཅང་ཕུའུ་ཆིང་རང་གི་བསམ་འདུན་བཞིན་དགེ་རྒན་ཞིག་ཆགས་རུང་། ཁོང་གིས་ཕ་ཡུལ་ཁྲུང་ཆིང་གྲོང་ཁྱེར་ཀྲུང་རྫོང་དུ་ལོག་མེད་པར། ཆབ་མདོ་གྲོང་ཁྱེར་མཛོ་སྒང་རྫོང་ཀྲུང་གླིང་ཤང་སློབ་ཆུང་དུ་དགེ་རྒན་བྱེད་པར་བསྐྱོད་རྒྱུའི་གདམ་ག་བྱས།

འཁྱུག་ཙམ་ཞིག་ལ་ལོ་17སོང་།

ལོ་17རིང་ཅང་ཕུའུ་ཆིང་གིས་ལྷད་མེད་བརྩེ་སེམས་བཅངས་ནས་ཕྲུ་གུར་དྲོ་སྐྱིད་ཡང་ཡང་སྦྱིན་ཏེ། སློབ་གསོའི་བྱ་གཞག་ཆེད་ནུས་ཤུགས་གང་ཡོད་འདོན་རྒྱུའི་ཐོག་མའི་བསམ་འདུན་མཚོན་པར་བྱས།

“དེ་གར་ཐོག་མར་སླེབས་དུས་གཞུང་ལམ་ཤར་གཏོང་མི་ཐུབ་པ་དང་། སློབ་གྲྭའི་ཁོར་ཡུག་ཞན་པ་མ་ཟད། འཚོ་བའི་ཆ་རྐྱེན་དེ་བས་སྐྱོ་པོ་ཡོད། སྐབས་ཤིག་རིང་ཡུལ་དེར་སྡོད་འདོད་དེ་ཙམ་མ་བྱུང”ཀྲུང་གླིང་ཤང་སློབ་ཆུང་དུ་ཐོག་མར་འབྱོར་དུས་ཀྱི་གནས་ཚུལ་ཕྱིར་དྲན་བྱེད་སྐབས་ཅང་ཕུའུ་ཆིང་གི་སེམས་སུ་སྔར་སོང་གི་གནས་ཚུལ་ཡིད་ལ་ལྷམ་མེར་དྲན་གྱི་ཡོད།

འོན་ཀྱང་ཤེས་བྱ་ཤེས་འདོད་སྐོམ་པ་ཆུ་འདོད་ལྟར་བྱེད་པའི་ཕྲུ་གུ་ཚོའི་མིག་ཟུང་མཐོང་སྐབས་ཅང་ཕུའུ་ཆིང་སེམས་ཀྱིས་མི་བཟོད་པར་གྱུར། དེས་ན་སློབ་གསོའི་བྱ་གཞག་དང་དགེ་རྒན་གྱི་ལས་རིགས་ལ་དགའ་ཞེན་ཆེ་བའི་ཅང་ཕུའུ་ཆིང་གིས་འདི་གར་གཞིས་ཆགས་རྒྱུའི་སེམས་ཐག་བཅད།

ཅང་ཕུའུ་ཆིང་གིས་དགེ་རྒན་གྱི་འགན་སེམས་བཅངས་ནས་སློབ་མ་ཚང་མ་བརྩེ་སེམས་ཟབ་མོས་བསྐྱངས། སློབ་མའི་སེམས་ནང་ཁོང་ནི་གཏམ་སྤྱོད་གཅིག་མཐུན་དང་། ཚིག་ནན་ཞི་འཇམ། དྲང་གཞག་བསྟུན་མཁས་བཅས་ཀྱི་དགེ་རྒན་ཞིག་ཡིན་པས། ཕྲུ་གུ་ཚོས་ཁོང་ཁོང་ཚོའི་གྲོགས་པོ་བློས་ཐུབ་ཅིག་དང་ཨ་མ་ཡག་པོ་ཞིག་ཏུ་བརྩི་གི་ཡོད།

སློབ་མ་མང་པོ་ཞིག་ནི་ཞག་སྡོད་སློབ་མ་ཡིན་པས། ཅང་ཕུའུ་ཆིང་གིས་སློབ་མའི་བཟའ་བཏུང་ལ་སེམས་ཁྲལ་བྱས་ཏེ། གཟའ་མཇུག་སླེབས་རིམ་བཞིན་སློབ་གྲྭའི་ཕྱི་རོལ་དུ་སྔོ་ཚལ་དང་ཤ་སོས་པ་ཉོ་བར་བསྐྱོད་དེ། སློབ་མ་ཚོར་ཕ་ཡུལ་ཁྲུང་ཆིང་གི་ཞིམ་ཟས་ཏེ། རྒྱ་ཁོག་བཟོ་བར་བྲེལ། སློབ་མ་ཚོས་དགའ་ཚོར་ཆེན་པོས་རྒྱ་ཁོག་བཟའ་བ་མཐོང་སྐབས་ཅང་ཕུའུ་ཆིང་ལ་གྲུབ་འབྲས་ཆེན་པོ་ཐོབ་པའི་བློ་ཞིག་སྐྱེས།

ཅང་ཕུའུ་ཆིང་ལའང་ཕྲུ་གུ་ཡོད་མོད། འོན་ཀྱང་ལས་བྲེལ་ཆེ་བའི་ཁར། ཡུན་རིང་བཟའ་ཟླ་དང་ས་གནས་གཉིས་ལ་ལོགས་སུ་སྡོད་དགོས་བྱུང་བས་ཕྲུ་གུ་ཕ་ཡུལ་དུ་ཡོད་པའི་ནང་མིར་ལྟ་རྟོག་བྱེད་པར་རྩིས་མི་སྤྲོད་ཀ་མེད་བྱུང་ཡོད།

སློབ་མ་ཁ་ཤས་ཀྱི་ཁྱིམ་ཚང་གི་ཆ་རྐྱེན་དེ་ཙམ་ཡག་པོ་མེད་པས། སྐབས་འགར་སློབ་མའི་གྱོན་གོས་སམ་ཡང་ན་ལྷམ་རལ་བ་མཐོང་སྐབས་ཅང་ཕུའུ་ཆིང་བློ་མི་བདེ་བར་འགྱུར་གྱི་ཡོད། འབྲེལ་གཏུག་ཐེངས་མང་བྱས་པ་བརྒྱུད། ཅང་ཕུའུ་ཆིང་གིས་སི་ཁྲོན་དུ་གྱོན་ཆས་འཚོང་མཁན་གཉེན་ཉེ་ལ་བྱིས་པའི་གྱོན་ཆས་ཁག་གཅིག་བསྐུར་དུ་བཅུག་ནས་ཕྲུ་གུ་ཚོར་སྤྲད།

ཞིང་འབྲོག་ཁུལ་གྱི་སློབ་མ་མང་པོ་ཞིག་གིས་སློབ་སྦྱོང་ལ་མཐོང་མི་བྱེད་པའི་གནད་དོན་ཐད་ལ། ཅང་ཕུའུ་ཆིང་གིས་ཁོམ་པ་བྱུང་མ་ཐག་སློབ་ཕྲུག་ཚོར་བསམ་བློའི་སློབ་གསོ་རྒྱག་གི་ཡོད་ཅིང་། ཚང་མར་ཕྱི་རོལ་གྱི་ངོ་མཚར་ཆེ་བའི་འཇིག་རྟེན་གླེང་བ་མ་ཟད། ད་དུང་སློབ་སྦྱོང་ཡག་པོ་བྱས་ནས་ཕྱི་རོལ་གྱི་འཇིག་རྟེན་ལ་ལྟ་བར་འགྲོ་བའི་ལྕག་སྐུལ་ཡང་བྱས།

“དགེ་རྒན་གྱིས་སློབ་ཕྲུག་ལ་བཅངས་པའི་བརྩེ་སེམས་ལས་སློབ་མའི་འབད་འབུངས་ཡར་བརྩོན་གྱི་སེམས་ཤུགས་འཕེལ་བར་བྱེད་ཐུབ”ཅེས་དང“ངས་བྱས་པ་ཚང་མ་ནི་དགེ་རྒན་གྱིས་བྱེད་དགོས་པ་ཤ་སྟག་རེད། ང་ཚོའི་སློབ་གྲྭར་ང་ལས་ཧུར་བརྩོན་ཆེ་བ་དང་སློབ་མར་ང་ལས་ལྷག་པའི་དགའ་ཞེན་ཆེ་བའི་དགེ་རྒན་མང་པོ་ཡོད། ང་ཚོས་ལྷད་མེད་བརྩེ་སེམས་བཅངས་ནས་ཕྲུ་གུ་ཚོར་དྲོ་སྐྱིད་ཚོར་དུ་འཇུག་གི་ཡོད། སྐབས་འགར་སློབ་མ་ཚོར་ཁོང་ཡངས་བྱེད་པ་ནས་གཅེས་སེམས་མཚོན་པ་དང་། སྐབས་འགར་སློབ་མར་དམ་ནན་བྱེད་པ་ནས་གཅེས་སེམས་མཚོན་པ། དེ་བཞིན་ལྷད་མེད་གཅེས་སེམས་བཅངས་ནས་སློབ་ཕྲུག་ལ་གཅེས་སྐྱོང་དང་སེམས་ཁུར་གྱིས་སློབ་མའི་བློ་འགུགས་ཐབས་བྱེད་ཀྱི་ཡོད”ཅེས་ཅང་ཕུའུ་ཆིང་གིས་བཤད།