“མི་དམངས་དང་ཚེ་སྲོག་གོང་དུ་བཀུར་དགོས”རིམས་ནད་སྔོན་འགོག་དང་ཚོད་འཛིན་ལས་དོན་ཡག་པོ་སྒྲུབ་པར་དོན་སྙིང་གལ་ཆེན་ལྡན་ཡོད་ལ་འགན་འཁྲི་ཡང་ལྕི་པོ་ཡོད། ཏོག་གསར་གློ་ཚད་རིམས་ནད་ཐོན་ཚུན་རང་ལྗོངས་ཀྱི་སྨན་དོན་མི་སྣས་སྤྱི་ཁྱབ་ཧྲུའུ་ཅིའི་བཀའ་མངགས་ཟབ་མོ་བློ་ལ་བརྟན་པོར་ངེས་ནས། མི་དམངས་མང་ཚོགས་ཀྱི་ཚེ་སྲོག་བདེ་འཇགས་དང་གཟུགས་གཞི་བདེ་ཐང་ཐོག་མཐའ་བར་གསུམ་དུ་ཨང་དང་པོར་བཞག་སྟེ་ནུས་ཤུགས་ཡོད་རྒུས་སྨན་བཅོས་ཞབས་ཞུ་སྒྲུབ་པ་དང་དུས་མཚུངས་ནད་པ་ཁག་བགོས་དང་། ཉིང་སྐྱུར་བརྟག་དཔྱད། དྲ་ཐོག་བློ་འདྲི་སོགས་ཀྱི་ལས་དོན་ནན་ཏན་དང་ཞིབ་ཚགས་ངང་བསྒྲུབས་ནས་རང་ལྗོངས་ཀྱི་རིམས་ནད་སྔོན་འགོག་དང་ཚོད་འཛིན་གྱི་ལས་དོན་ཡག་པོ་སྤེལ་བར་རྨང་གཞི་བརྟན་པོ་ཞིག་བཏིང་ཡོད།

“རིམས་ནད་འགོག་རྒོལ”གྱི་དུང་བརྡ་བསྒྲགས་རྗེས་ལྗོངས་ཡོངས་ཀྱི་སྨན་དོན་མི་སྣས་ཚན་རིག་དང་མཐུན་པའི་ནད་ཡམས་སྔོན་འགོག་གི་ཤེས་བྱ་ཕྱོགས་ཡོངས་ནས་སློབ་སྦྱོང་དང་དྲིལ་བསྒྲགས་རྒྱ་ཁྱབ་བྱས་པ་དང་། སྔོན་འགོག་དང་ཚོད་འཛིན་གྱི་གཏན་འབེབས་ཁག་ལ་སྣེ་ཁྲིད་དེ་བརྩི་སྲུང་ཞུས་པ། རིམས་ནད་སྔོན་འགོག་དང་ཚོད་འཛིན་གྱི་ལས་དོན་སྤེལ་རྒྱུར་རོགས་རམ་ཧུར་ཐག་བྱས་པ། ཏང་གི་ལོ་རྒྱུས་སློབ་སྦྱོང་སློབ་གསོའི་གྲུབ་འབྲས་དེ་རིམས་ནད་སྔོན་འགོག་ཚོད་འཛིན་དང་མང་ཚོགས་ལ་ཞབས་འདེགས་ཞུ་བའི་སྒུལ་ཤུགས་ཆེན་པོར་འགྱུར་བ་བཅས་བྱས་ནས་མི་དམངས་མང་ཚོགས་ཀྱི་ཚེ་སྲོག་བདེ་འཇགས་སྲུང་སྐྱོང་བྱེད་པའི་མཁར་རྫོང་བརྟན་པོ་ཞིག་སྐྲུན་ཡོད།

ཏོག་གསར་གློ་ཚད་རིམས་ནད་ཐོན་རྗེས། ནག་ཆུ་གྲོང་ཁྱེར་མི་དམངས་སྨན་ཁང་ས་མཐོའི་འཕྲོད་སྦྱོར་ཁོའོ་ཡི་སྨན་དོན་མི་སྣ་ཚང་མ་ཚ་རྒྱས་སྒོ་བསྟེན་སྨན་ཁང་དང་གསོ་རིག་ལྟ་ཞིབ་ནད་ཁང་དུ་ལས་ཀ་བྱེད་པར་བཀོད་སྒྲིག་བྱས་ཤིང་། ཁོའོ་དང་ཁང་གཞན་གྱི་སྨན་དོན་མི་སྣ་ཁག་གཅིག་ཀྱང་རིམས་འགོག་གི་འཐབ་ས་དང་པོར་ལས་ཀ་བྱེད་པར་བཀོད་སྒྲིག་བྱས་ཡོད།

“རིམས་འགོག་ལས་དོན་ཡག་པོ་སྒྲུབ་ཆེད་སོ་སོའི་ནང་མི་དང་མཉམ་འཛོམས་ཀྱི་གོ་སྐབས་བློས་གཏོང་བྱེད་རྒྱུ་ལས་མ་འདས། དེ་ནི་ང་ཚོའི་འགན་འཁྲི་ཡིན། མ་གཞི་དཀའ་ངལ་སྣ་ཚོགས་འཕྲད་མོད། འོན་ཀྱང་ང་ཚོས་བོད་བྱང་ཐང་གི་མི་དམངས་ཀྱི་བདེ་ཐང་སྲུང་སྐྱོང་ཡག་པོ་བྱེད་དགོས”ཅེས་ནག་ཆུ་གྲོང་ཁྱེར་མི་དམངས་སྨན་ཁང་ཏང་ཨུད་ཀྱི་ཧྲུའུ་ཅི་གཞོན་པ་བསོད་ནམས་ཕུན་ཚོགས་ཀྱིས་བཤད།

རང་སྐྱོང་ལྗོངས་མི་དམངས་སྨན་ཁང་འགོས་ནད་ཚན་ཁག་གི་ཀྲུའུ་རེན་སྨན་པ་དཀའ་བཅུ་པ་ཧྲི་ལིས། སྨན་དོན་མི་སྣ་ཞིག་ཡིན་པའི་ངོས་ནས་རིམས་ནད་སྔོན་འགོག་དང་ཚོད་འཛིན་ལས་དོན་ལ་ཞུགས་ནས་མི་དམངས་ཀྱི་བདེ་འཇགས་སྲུང་སྐྱོང་བྱ་རྒྱུ་ནི་འདོར་ཐབས་མེད་པའི་འགན་འཁྲི་ཞིག་ཡིན་ལ་འཁུར་དགོས་ངེས་ཀྱི་འོས་འགན་ཞིག་ཀྱང་རེད་ཅེས་བཤད།

ད་ལོར་ལོ་33ལ་སླེབས་པའི་བདེ་སྐྱིད་ལས་ཀར་ཞུགས་ནས་ལོ་14སོང་ཞིང་། མིག་སྔར་བོད་རང་སྐྱོང་ལྗོངས་མི་དམངས་སྨན་ཁང་གསུམ་པའིICUཆེད་ལས་ཚན་ཁག་གི་ནད་གཡོག་རེད། ཁོ་མོས“ནད་པར་ལྟ་རྟོག་བྱ་རྒྱུ་ནི་ང་ཚོའི་འགན་འཁྲི་ཡིན། ནད་པར་དགོས་མཁོ་ཡོད་དུས་ང་ཚོས་གང་མགྱོགས་ནད་པའི་སར་ཡོང་གི་ཡོད། དེ་ནི་ནད་གཡོག་ཅིག་ཡིན་པའི་ང་རང་གི་སྤོབས་པ་སྐྱེས་པའི་བྱ་བ་ཞིག་ཡིན”ཞེས་བཤད།

ཏོག་གསར་གློ་ཚད་རིམས་ནད་ཐོན་ཚུན། རང་ལྗོངས་ཀྱི་སྡེ་ཁུལ་གྱི་སྨན་དོན་མི་སྣ་ཚོས་ལས་གནས་བརྟན་སྲུང་བྱས་ཏེ་སྐད་གྲགས་མེད་པར་རང་ཉིད་ཀྱི་སྟོབས་ཤུགས་ལེགས་སྐྱེས་སུ་ཕུལ་ནས་རིམས་ནད་སྔོན་འགོག་དང་ཚོད་འཛིན་གྱི་ལས་འགན་ཁག་ནུས་ལྡན་ངང་ལེགས་སྒྲུབ་བྱས་ཡོད།

“ཁྱིམ་ཚང་སྨན་པའི”དམངས་འཚོའི་འདུ་འགོད་ནི་གཞི་རིམ་གྱི་སྨན་བཅོས་ཆུ་ཚད་མཐོ་རུ་བཏང་ནས་སྨན་བཅོས་འཕྲོད་བསྟེན་བྱ་གཞག་སྐྱོན་བྲལ་དང་གོ་རིམ་ལྡན་པའི་ངང་འཕེལ་རྒྱས་འགྲོ་རྒྱུར་སྐུལ་འདེད་གཏོང་བའི་ལྷུ་ཚིགས་གལ་ཆེན་ཞིག་རེད། རིམས་ནད་སྔོན་འགོག་དང་ཚོད་འཛིན་བྱེད་རིང་རང་ལྗོངས་ཀྱི“ཁྱིམ་ཚང་སྨན་པ”ཚོས་དུད་ཚང་དུ་སོང་ནས་ཞབས་ཞུ་ཧུར་ཐག་བསྒྲུབས་པ་དང་། རྒན་རྒོན་གྱི་ཚོགས་སྤྱི་སོགས་ལ་སྟབས་བདེའི་སྨན་བཅོས་ཐོན་ཁུངས་མཁོ་འདོན་བྱས་པ་དང་ཆབས་ཅིག་རིམས་ནད་སྔོན་འགོག་དང་ཚོད་འཛིན་གྱི་ཤེས་བྱ་དྲིལ་བསྒྲགས་ཧུར་ཐག་བྱས་ཡོད།

རྒྱུན་འཁྱོངས་ལྷོད་མེད་བྱས་ན་གཞི་ནས་མགོ་མཇུག་ལེགས་པར་འཁྱོངས་ཐུབ། མིག་སྔར་རང་ལྗོངས་ཀྱི་རིམས་ནད་སྔོན་འགོག་དང་ཚོད་འཛིན་གྱི་སྤྱིའི་དུས་བབ་བརྟན་པོ་དང་ལེགས་པོའི་ཕྱོགས་སུ་འགྲོ་བཞིན་ཡོད་མོད། འོན་ཀྱང་རིམས་ནད་མཆེད་ཉེན་སྔར་བཞིན་གནས་ཡོད་པས་སྔོན་འགོག་དང་ཚོད་འཛིན་གྱི་ལས་དོན་ལ་སྔར་བཞིན་ལྷོད་གཡེང་གཏན་ནས་གཏོང་མི་རུང་། དུ་མེད་ཀྱི་དམག་འཐབ་ཁྲོད་རང་ལྗོངས་ཀྱི་རྒྱ་ཆེའི་སྨན་དོན་མི་སྣས་ཐོག་མཐའ་བར་གསུམ་དུ་མཐུན་སྒྲིལ་རྡོག་རྩ་གཅིག་སྒྲིལ་བྱས་ནས་རིམས་འགོག་གི་འཐབ་ས་དང་པོ་བརྟན་སྲུང་བྱས་ཡོད། ཁོང་ཚོས་བྱ་སྤྱོད་ངོ་མའི་ཐོག་ནས“རིམས་ནད་མཇུག་མ་འགྲིལ་བར་ང་ཚོས་ཀྱང་སྔོན་འགོག་དང་ཚོད་འཛིན་བྱེད་་མཚམས་འཇོག་མི་སྲིད་པའི”དམ་བཅའ་དང་འགན་འཁྲི་མཚོན་ཡོད།