ཉིན་ཤས་གོང་། ལྷ་ས་གྲོང་ཁྱེར་རིག་གནས་ཅུས་དང་ལྷ་ས་གྲོང་ཁྱེར་སློབ་གསོ་ཅུས་ཀྱིས་གཙོ་གཉེར་བྱས་ཤིང་། བོད་ལྗོངས་གཡག་རྟེན་རྫས་བཤམས་མཛོད་ཁང་གིས་གཉེར་འགན་འཁུར་བ་དང་ལྷ་ས་གྲོང་ཁྱེར་རྩོམ་རིག་སྒྱུ་རྩལ་ལས་རིགས་མཉམ་འབྲེལ་ལྷན་ཚོགས་དང་ལྷ་ས་གྲོང་ཁྱེར་མཛེས་རྩལ་མཁས་ཅན་མཐུན་ཚོགས་ཀྱིས་གཉེར་རོགས་བྱས་པའི《རི་མོའི་དུས་རབས། བོད་ཀྱི་ཞིང་བྲན་ཁྲི་ཚོ་བརྒྱར་བཅིངས་འགྲོལ་ཐོབ་ནས་ལོ་63འཁོར་བར་དྲན་གསོ་ཞུ་བའི་ལྷ་ས་གྲོང་ཁྱེར་གྱི་གཞོན་ནུ་ལོ་ཆུང་གི་ཕུལ་བྱུང་རི་མོའི་བརྩམས་ཆོས་འགྲེམས་སྟོན》བོད་ལྗོངས་གཡག་རྟེན་རྫས་བཤམས་མཛོད་ཁང་དུ་འགོ་ཚུགས་པ་རེད།

ད་ཐེངས་ཀྱི་འགྲེམས་སྟོན་ལ་ལྷ་ས་གྲོང་ཁྱེར་གྱི་སློབ་འབྲིང་ཁག་དང་། སློབ་གྲྭ་ཆུང་གྲས། སྒྱུ་རྩལ་ཁོངས་གཏོགས་ཀྱི་སློབ་མ་བཅས་ཧུར་ཐག་ཞུགས་ནས་རྒྱབ་སྐྱོར་ཤུགས་ཆེན་བྱས་ཡོད་པ་རེད། འདི་ལོའི་ཟླ་1ཚེས་29ཉིན་ནས་བཟུང་ལྷ་ས་གྲོང་ཁྱེར་གྱི་སློབ་གྲྭ་འབྲིང་ཆུང་ཁག་ལ་འགྲེམས་སྟོན་བརྩམས་ཆོས་བསྡུ་རུབ་སྤྱི་བསྒྲགས་སྤེལ་ཚུན་བརྩམས་ཆོས་300ལྷག་ཙམ་འགྲེམས་སྟོན་ལ་ཞུགས་རྒྱུར་བསྐྱལ་ཡོད་པ་དང་། ལྷ་ས་གྲོང་ཁྱེར་གྱི་མཛེས་རྩལ་མཁས་ཅན་མཐུན་ཚོགས་ཀྱི་རིགས་གཅིག་མཁས་ཅན་གྱིས་སློབ་ཆུང་དང་། དམའ་རིམ་སློབ་འབྲིང་། མཐོ་རིམ་སློབ་འབྲིང་བཅས་ཚན་ཁག་གསུམ་ལ་གཞིགས་ནས་དཔྱད་འདེམས་ཐེངས་འགའ་བྱས་པ་བརྒྱུད་མཐར་བརྩམས་ཆོས་138བྱ་དགའ་ཐོབ་པའི་བརྩམས་ཆོས་ལ་གཏན་འཁེལ་བྱས་པའི་ཁྲོད་བྱ་དགའ་རིམ་པ་དང་པོ་4དང་། བྱ་དགའ་རིམ་པ་གཉིས་པ་9 བྱ་དགའ་རིམ་པ་གསུམ་པ་12 ཕུལ་བྱུང་བྱ་དགའ་113བཅས་ཡོད་པ་རེད།

ད་ཐེངས་ཀྱི་འགྲེམས་སྟོན་ཐོག་འགྲེམས་སྟོན་བྱས་པའི་བརྩམས་ཆོས་ཚང་མ་ལྷ་ས་གྲོང་ཁྱེར་གྱི་སློབ་གྲྭ་འབྲིང་ཆུང་གི་སློབ་མའི་བརྩམས་ཆོས་ཡིན་ཞིང་། དེའི་ནང་ལ་ལས་དུས་རབས་ཀྱི་ཞི་མཐུན་འཕེལ་རྒྱས་ལ་བསྔགས་བརྗོད་བྱས་ཡོད་པ་དང་། ལ་ལས་བོད་ཀྱི་ས་ཁོངས་རིག་གནས་ལ་དམིགས་ཡོད་པ། ལ་ལས་མཛེས་སྡུག་ལྡན་པའི་རང་བྱུང་མཛེས་ལྗོངས་བྲིས་ཡོད་པ། ལ་ལས་དེང་རབས་ཅན་གྲོང་ཁྱེར་གྱི་འཕོ་འགྱུར་མངོན་པ་བཅས་བྱས་ཡོད། ཕྲུ་གུ་ཚོས་རི་མོའི་འབྲི་རྩལ་ལ་བརྟེན་ནས་བོད་ཀྱི་ཞི་མཐུན་མཛེས་སྡུག་དང་ཤེས་དཔལ་འབྱོར་ཕྱུག་གི་རྣམ་པ་གསར་པ་མངོན་པར་བྱས་ཡོད།