ཟླ་6ཚེས་7ཉིན་གྱི་སྔ་དྲོའི་ཆུ་ཚོད་7དང་སྐར་མ་30རུ་ནག་ཆུ་གྲོང་ཁྱེར་གསེར་རྙེད་ཆུས་ནག་ཆུ་གྲོང་རྡལ་གྱི་གྲོང་ཚོ་13པའི་བསོད་ནམས་དབང་འདུས་སློབ་གྲྭའི་དགེ་རྒན་གྱི་སྣེ་ཁྲིད་འོག་རྒྱུགས་ཚུགས་སུ་འབྱོར།
འདི་ལོ་རང་ལྗོངས་ཀྱི་མཐོ་རྒྱུགས་ཀྱིས་ཁྱོན་རྒྱུགས་ར་1545བཀོད་སྒྲིག་བྱས་པའི་ནང་རྒྱུགས་སྤྲོད་སློབ་མ་ཡིན་པའི་བྱིས་པ་ལོང་བ་གཉིས་ལ་ལོང་བའི་རྒྱུགས་ཤོག་ཆེད་མངགས་མཁོ་འདོན་བྱས་པ་མ་ཟད། ཁོ་གཉིས་ལ་རྒྱུགས་ར་ལོགས་སུ་བཀོད་སྒྲིག་ཀྱང་བྱས་ཡོད། བསོད་ནམས་དབང་འདུས་ནི“དམིགས་བསལ”རྒྱུགས་རར་ཡོད་པའི་རྒྱུགས་སྤྲོད་སློབ་མ་གཉིས་ཀྱི་ནང་ནས་གཅིག་རེད།
བསོད་ནམས་དབང་འདུས་ནི་ནག་ཆུ་གྲོང་ཁྱེར་དམིགས་བསལ་སློབ་གསོའི་སློབ་གྲྭའི་རྒྱུགས་སྤྲོད་སློབ་མ་ཡིན་ཞིང་། སྐྱེ་དུས་ནས་མིག་ཤེད་ཉམས་སྟབས་ནག་པང་དང་དཔེ་དེབ་ཐོག་བྲིས་པའི་ཡི་གེ་གསལ་པོ་མཐོང་གི་མེད། ཁོ་པས་ཤེས་པའི་རིག་གནས་ཤེས་བྱ་མང་ཆེ་བ་ནི་རྣ་བས་ཉན་པ་དང་མཛུབ་རྩེས་རེག་པ་ལས་ཤེས་པ་ཤ་སྟག་རེད། ཤེས་བྱ་ཡོན་ཏན་སྦྱོང་བའི་ལམ་དུ་དཀའ་ངལ་རྫོགས་རྒྱུ་མེད་པ་འཕྲད་རུང་ད་བར་ཁོང་པས་ཕུགས་ལ་འཆང་བའི་བསམ་འདུན་བཟང་པོ་དོར་མྱོང་མེད།
སློབ་ཆུང་དུ་ཞུགས་པ་ནས་བཟུང་། འཆད་སྟེགས་དང་ཐག་ཉེ་ཤོས་སུ་སྡོད་མཁན་ནི་ཁོ་པ་རེད། སློབ་ཚན་གྲོལ་རྗེས་སློབ་གྲོགས་ཚོས་ཁོ་པར་སློབ་གསེང་དཔེ་ཆ་བཀླགས་ནས་ཁོ་པ་དང་སློབ་དེབ་ནང་འཁོད་པའི་ཤེས་བྱ་སྤེལ་རེས་བྱེད་པ་དང་།སྐབས་རེ་ཡིག་རྒྱུགས་གཏོང་སྐབས་རྒན་ལགས་ཀྱིས་ཁོ་པར་རྒྱུགས་ཤོག་ཀློག་པ་མ་ཟད། ད་དུང་ཡིག་རྒྱུགས་ཀྱི་ཁ་བྱང་གསལ་འགྲེལ་ཡང་བྱེད་པ་ལ་སོགས། མཛུབ་མོར་བརྟེན་ནས་ཤེས་བྱའི་སྟོབས་ཤུགས་མྱོང་ཚོར་བྱེད་པ་ཕུད། བསོད་ནམས་དབང་འདུས་ཀྱིས་ད་དུང་ཕྱི་རོལ་གྱི་སྒྲ་ཉན་ནས་རང་ཉིད་ཀྱི་ཤེས་བྱ་ཕུན་སུམ་ཚོགས་སུ་གཏོང་གི་ཡོད།
“ཡིད་ཆེས་ཆེ་བ་དང་། གྲུང་ཤ་དོད་པ། བརྩོན་འགྲུས་ཆེ་བ། བསམ་ཤེས་ཆེ་བ” རང་ཉིད་ཀྱི་སློབ་མའི་སྐོར་གླེང་སྐབས་འཛིན་གྲྭའི་ཀྲུའུ་རེན་ཝང་ཕུང་ཅོན་གྱིས། སློབ་གྲྭར་སྡོད་རིང་བསོད་ནམས་དབང་འདུས་ཀྱིས་འགྲན་བསྡུར་སྣ་ཚོགས་ལ་ཧུར་ཐག་ཞུགས་པ་དང་འབྲེལ་གྲུབ་འབྲས་ཡག་པོའང་ཐོབ་ཡོད་ཅེས་སྤོབས་པ་ཆེན་པོས་བརྗོད། 2021ལོར་བསོད་ནམས་དབང་འདུས་ལ་ལྗོངས་ཡོངས་ཀྱི་ལོང་བ་ཀློག་པ་པོས་གསར་བརྗེའི་གསུང་རབ་གྱེར་འདོན་གྱི་འགྲན་བསྡུར་ཁྲོད་བྱ་དགའ་ཨང་གསུམ་པ་ཐོབ་པ་དང་། རྒྱལ་ཡོངས་ཀྱི་སྐབས་བཅུ་གཅིག་པའི་དབང་སྐྱོན་ལུས་རྩལ་འགྲན་ཚོགས་དང་སྐབས་བརྒྱད་པའི་དམིགས་བསལ་ཨོ་ལིམ་ཕིག་ལུས་རྩལ་འགྲན་ཚོགས་ཐོག་ལུས་རྩལ་ཀུན་སྤྱོད་ཀྱི་བྱ་དགའ་ཐོབ་ཡོད།
མཐོ་རྒྱུགས་ཀྱི་གྲུབ་འབྲས་སྐོར་གླེང་སྐབས། བསོད་ནམས་དབང་འདུས་ཀྱིས་ནན་ཅིང་དམིགས་བསལ་སློབ་གསོའི་དགེ་འོས་སློབ་གྲྭར་ཚུད་པའི་འདུན་པ་འཆང་བཞིན་དུ“ད་བར་ངའི་ཉེ་འཁོར་དུ་བརྩེ་བ་ཟབ་མོས་ཁེངས་ཤིང་། རྒྱལ་ཁབ་ཀྱི་སྲིད་ཇུས་བཟང་པོའི་ཐུགས་ཁུར་དང་། སྤྱི་ཚོགས་ལས་རིགས་ཁག་གི་དགའ་གཅེས། དགེ་རྒན་དང་སློབ་གྲོགས་ཀྱི་དགའ་ཞེན་བཅས་ཡོད། སླད་ཕྱིན་རང་ཉིད་དམིགས་བསལ་སློབ་གྲྭའི་དགེ་རྒན་ཞིག་ཏུ་གྱུར་པ་དང་། བྱིས་པ་ལོང་བ་དེ་བས་མང་པོའི་སློབ་སྦྱོང་ལམ་བུའི་ཐོག་གི‘མིག’ལྟ་བུར་གྱུར་ནས་ཁོང་ཚོས་ཤེས་བྱ་དེ་བས་མང་པོ་སྦྱོང་རྒྱུར་རོགས་རམ་བྱེད་ཐུབ་པའི་རེ་བ་ཡོད”ཅེས་བཤད།