རང་ལྗོངས་ཀྱི་སྨན་རྫས་བདེ་འཇགས་ཀྱི་ཉེན་ཁར་སྔར་བས་དོགས་ཟོན་དང་བསལ་ཏེ་རྒྱལ་ཡོངས་སུ་སྨན་རྫས་བདེ་འཇགས་ཀྱི་ཆེད་དོན་བཅོས་སྒྲིག་བྱ་སྤྱོད་གཏིང་ཟབ་སྤེལ་བར་སྣེ་ཁྲིད་བྱ་ཆེད། ཉེ་ཆར། རང་སྐྱོང་ལྗོངས་སྨན་རྫས་ལྟ་འདོམས་ཅུས་ཀྱིས་ལྗོངས་ཡོངས་ཀྱི་སྨན་རྫས་དང་། སྨན་བཅོས་ཡོ་བྱད། མཛེས་འཆོས་བྱུག་རྫས་བཅས་ཀྱི་ཐོན་སྐྱེད་ཁེ་ལས་དང་དེ་བཞིན་གཞི་རིམ་གྱི་བོད་སྨན་སྨན་སྦྱོར་ཚན་པའི་འགན་འཁུར་བར་ལྗོངས་ཡོངས་ཀྱི་སྨན་རྫས་ཐོན་སྐྱེད་ཀྱི་ཉེན་ཁའི་ཉེན་བརྡའི་ཚོགས་འདུ་འཚོགས་པ་རེད།
ཚོགས་འདུའི་ཐོག་2021ལོ་འཁོར་གྱི་ལྗོངས་ཡོངས་ཀྱི“རྫས་གཉིས་དང་ཡོ་བྱད་གཅིག”གི་ལྟ་སྐུལ་ཞིབ་བཤེར་བྱེད་རིང་ཤེས་རྟོགས་བྱུང་བའི་གནད་དོན་གཙོ་བོ་དང་། གྱོད་དོན་གྱི་ཞིབ་བཤེར་ཐག་གཅོད་བྱས་ཚུལ། དེ་བཞིན་སྨན་རྫས་བདེ་འཇགས་ཀྱི་ཆེད་དོན་བཅོས་སྒྲིག་ལས་དོན་གཏིང་ཟབ་སྤེལ་བའི་གཙོ་གནད་ལས་འགན་བཅས་བརྡ་ཁྱབ་བཏང་བ་དང་། སྨན་རྫས་ཁེ་ལས་2ཀྱི་འཐུས་མིས་སྤེལ་རེས་གཏམ་བཤད་བྱས་པ་རེད། རང་སྐྱོང་ལྗོངས་སྨན་རྫས་ལྟ་འདོམས་ཅུས་ཀྱི་ཏང་ཙུའི་ཧྲུའུ་ཅི་ཀུའོ་ནའེ་ཞུང་གིས་སྨན་རྫས་ཐོན་སྐྱེད་ཀྱི་ཉེན་ཁའི་མངོན་མེད་རྐྱེན་ངན་གྲལ་བཤེར་དང་སེལ་བའི་ལས་དོན་སྔར་བས་ཡག་པོ་བསྒྲུབ་རྒྱུར་བཀོད་སྒྲིག་བྱས་པ་རེད།
ཚོགས་འདུའི་ཐོག་ལྟ་སྐུལ་ཞིབ་བཤེར་བྱས་པ་བརྒྱུད་རང་ལྗོངས་ཀྱི“རྫས་གཉིས་དང་ཡོ་བྱད་གཅིག”གི་ཐོན་སྐྱེད་ཁེ་ལས་འགའ་ཞིག་ལ་བཅའ་ཁྲིམས་ཀྱི་འདུ་ཤེས་ཞན་པ་དང་། བྱེད་པོའི་འགན་འཁྲི་གསལ་པོ་མེད་པ། ཡིད་རྟོན་འདུ་ཤེས་ཆེན་པོ་མེད་པ་སོགས་ཀྱི་གནད་དོན་སྔར་བཞིན་གནས་པ་དང་། བཟོ་རྩལ་རང་དགར་བསྒྱུར་བ་དང་སྤུས་ཞན་སྤུས་ལེགས་སུ་བརྫུས་པའི་སྣང་ཚུལ་ཡང་སེ་ཐོན་པ་དེས་མི་དམངས་ཀྱི་བདེ་རྩར་ཐུག་པའི་ཁེ་ཕན་ལ་གནོད་འཚེ་ཚབས་ཆེན་བཟོས་པ་དང་ཐོན་ལས་སྐྱོན་བྲལ་འཕེལ་རྒྱས་འགྲོ་བར་ཕན་པ་མེད། གནད་དོན་དེ་དག་ལ་དམིགས་ནས་སྨན་རྫས་ལྟ་འདོམས་སྡེ་ཚན་གྱིས《སྨན་རྫས་ཀྱི་དོ་དམ་བཅའ་ཁྲིམས》གསར་པ་སོགས་བཅའ་ཁྲིམས་ཁྲིམས་སྲོལ་ལག་བསྟར་ནན་པོ་བྱས་ནས་རྡུང་རྡེག་དང་ཆད་གཅོད་བྱེད་ཤུགས་ཆེ་རུ་བཏང་སྟེ། ཁྲིམས་འགལ་སྒྲིག་འགལ་གྱི་བྱེད་སྤྱོད“ཐར་པར་གཏན་ནས་མི་གཏོང་བ”དེས་མང་ཚོགས་ཀྱི་སྨན་སྤྱོད་བདེ་འཇགས་ལ་འགན་ལེན་བྱེད་པའི་ཡིད་ཆེས་དང་ཆོད་སེམས་སྔར་བས་མངོན་ཡོད་པ་རེད། ཁེ་ལས་ཁག་གིས་ངེས་པར་དུ་སྤྱི་ཚོགས་ཀྱི་སྤྱི་ཡོངས་བརྟན་ལྷིང་སྲུང་སྐྱོང་བྱས་ནས་མང་ཚོགས་ཀྱི་ཚེ་སྲོག་བདེ་འཇགས་ལ་འགན་འཁུར་བ་དང་ཁེ་ལས་སོ་སོར་འགན་འཁུར་བའི་མཐོ་ཚད་ཐོག་ནས། ཁྲིམས་དང་སྒྲིག་སྲོལ་ལྟར་ཐོན་སྐྱེད་གཉེར་སྐྱོང་གི་བྱེད་སྒོ་སྤེལ་ཏེ་བྱེད་པོའི་འགན་འཁྲི་རྒྱུན་ཆད་མེད་པར་ནན་དུ་བཏང་ནས། ལྗོངས་ཡོངས་ཀྱི་སྨན་བཅོས་ཐོན་ལས་སྤུས་ཚད་མཐོ་བའི་འཕེལ་རྒྱས་འགྲོ་བར་ལེགས་སྐྱེས་དེ་བས་ཆེ་བ་འབུལ་དགོས་ཞེས་བསྟན་པ་རེད།
ཚོགས་འདུའི་ཐོག་མི་དམངས་མང་ཚོགས་ཀྱི་གཟུགས་གཞི་བདེ་ཐང་ནུས་ཤུགས་ཡོད་རྒུས་འགན་ལེན་བྱས་ནས། རང་ལྗོངས་ཀྱི་སྨན་བཅོས་ཐོན་ལས་སྤུས་ཚད་མཐོ་བའི་འཕེལ་རྒྱས་འགྲོ་བར་སྐུལ་འདེད་གཏོང་ཆེད། ཁེ་ལས་ཀྱི་བྱེད་པོ་དང་ལྟ་འདོམས་སྡེ་ཚན་གྱིས་སྨན་རྫས་བདེ་འཇགས་ཀྱི་ཧ་ཅང་གལ་ཆེའི་རང་བཞིན་ལ་ངོས་འཛིན་གཏིང་ཟབ་བྱེད་པ་དང་། སྨན་རྫས་བདེ་འཇགས་ལས་དོན་གྱི་གཙོ་གནད་ཁོང་དུ་ནན་པོ་ཆུད་པར་བྱས་ཏེ། སྨན་རྫས་ཀྱི་ཡོངས་བསྒྲགས་ལྟ་འདོམས་ལ་སྐུལ་འདེད་ཤུགས་ཆེན་གཏོང་དགོས་པའི་ནན་བཤད་བྱས་པ་རེད།