གསར་འགོད་པར་ཁྲུང་ཆིང་གསོ་རིག་ཚན་རིག་སློབ་ཆེན་ཞོར་གཏོགས་སྨན་ཁང་དང་པོ་ནས་ཤེས་རྟོགས་བྱུང་བར། ལྷོ་ནུབ་ཐག་རིང་ལུང་ཁུག་ས་ཁུལ་གྱི་ཕྲུ་གུ་ཚོའི་མིག་གི་བདེ་ཐང་སྲུང་སྐྱོང་བྱ་ཆེད། སྨན་ཁང་དེའི་མིག་ནད་ཚན་ཁག་གི་ཀྲུའུ་རེན་གཞོན་པ་དགེ་རྒན་ཆེ་མོ་བ་ཧུའུ་ཁོ་དང་ཁོང་གི་ཚོགས་པས་ལོ་5བསྟུད་མར་ལྷོ་ནུབ་ཐག་རིང་ལུང་ཁུག་ཏུ་མིག་གི་བདེ་ཐང་གི་འོས་འགན་སྨན་བཅོས་བྱེད་པར་བསྐྱོད་པའི་ནང་གངས་ལྗོངས་ས་མཐོར་ཐེངས་བཞི་བསྐྱོད་པ་རེད།

“ཆེད་ལས་ཀྱི་མིག་ཤེལ་ཞིབ་དཔྱད་སྒྲིག་སྦྱོར་སྒྲིག་གཞིའམ་ཡང་ན་ཁྱིམ་བདག་གི་འདུ་ཤེས་ཞན་པར་བརྟེན། རྒྱང་གྲིབ་ཕོག་པའི་བྱིས་པ་ཁག་གཅིག་ལ་མིག་ཤེལ་མེད་པའམ་ཡང་ན་ཁོང་ཚོས་ཁྱིམ་བདག་གི་མིག་ཤེལ་འདོགས་ཀྱི་ཡོད”འོས་འགན་སྨན་བཅོས་ནང་ཞུགས་མཁན་མིག་ནད་ཚན་ཁག་གི་སྨན་པ་ཀྲང་ཆིས་ངོ་སྤྲོད་བྱས་དོན། ཁོང་ཚོས་བོད་ལྗོངས་ཆབ་མདོར་འོས་འགན་སྨན་བཅོས་བྱེད་སྐབས་ཕྲུ་གུ་མང་པོ་ཞིག་ལ་མིག་འབྲས་སྐྱི་མོའི་གཉན་ཚད་དང་མིག་སྐམ་པ་སོཌ་ཀྱི་མིག་ནད་ཕོག་ཡོད་པ་དང་མིག་གི་འཕྲོད་བསྟེན་ཡག་པོ་མ་བྱུང་བའི་ཁར་ཕྲུ་གུ་མང་ཆེ་བར་སྨན་བཅོས་བྱེད་ཐུབ་ཀྱི་མེད་པས་བདེ་ཐང་གི་གནས་ཚུལ་ལ་མི་རྣམས་སེམས་ཁྲལ་ཆེན་པོ་བྱེད་དགོས་པ་ཞིག་འདུག

2021ལོའི་ཟླ་9པ་ཁོ་ནར་འོས་འགན་སྨན་བཅོས་ཚོགས་པས་ཆབ་མདོ་གྲོང་ཁྱེར་གྱི་ས་ཁུལ་མང་པོའི་སློབ་གྲྭ་9རུ་འོས་འགན་སྨན་བཅོས་བྱེད་པར་བསྐྱོད་དེ་ཁྱོན་སློབ་གྲྭ་འབྲིང་ཆུང་གི་སློབ་མ་2136ལ་ཚགས་བཤེར་བྱས་ནས་རིན་མེད་ངང་ཕྲུ་གུ་ཚོར་མིག་ཤེལ་337སྒྲིག་སྦྱོར་བྱས་པ་རེད།

ས་གནས་ས་ཐོག་ཏུ་འོས་འགན་སྨན་བཅོས་བྱེད་པ་དེས་ལྷོ་ནུབ་དང་ཐག་རིང་ལུང་ཁུག་ས་ཁུལ་གྱི་བྱིས་པ་དང་གཞོན་ནུ་ལོ་ཆུང་གི་མིག་གི་བདེ་ཐང་གནད་དོན་རྦད་དེ་ཐག་གཅོད་བྱེད་མི་ཐུབ་པར་བརྟེན། ཧུའུ་ཁོ་དང་ཁོང་གི་ཚོགས་པས“བྱིས་པའི་མིག་ཤེད་བདེ་ཐང་ལ་སྲུང་སྐྱོང་བྱེད”ཅེས་པའི“ལྷོ་ནུབ་ཀྱི་ཐག་རིང་ལུང་ཁུག་ས་ཁུལ་གྱི་བྱིས་པ་དང་གཞོན་ནུ་ལོ་ཆུང་གི་མིག་ཤེད་འཕེལ་བ་དང་། མིག་གི་བདེ་ཐང་གི་ལྟ་ཞིབ་ཚད་ལེན། མིག་ནད་སྨན་བཅོས་བཅས་ཕྱོགས་གསུམ་གཞི་གཅིག་གི་དྲ་སྦྲེལ་བསྡུ་སྒྲིལ་ལས་སྟེགས”བཏོད་པ་དང་། ལས་སྟེགས་དེ་ཡུན་ནན་དང་། ཀུའེ་ཀྲོའུ། སི་ཁྲོན། བོད་ལྗོངས། ཁྲུང་ཆིང་བཅས་ལ་ཁྱབ་ཡོད་པ་རེད། མིག་སྔའི་བར། “བྱིས་པའི་མིག་ཤེད་བདེ་ཐང་ལ་སྲུང་སྐྱོང་བྱེད”ཅེས་པའི་རྣམ་གྲངས་ཚོགས་པས་མི་ཐེངས་ཁྲི་1000ལྷག་ཙམ་ལ་དྲ་ཐོག་ནས་ཚན་རྩལ་ཁྱབ་གདལ་བཏང་བ་དང་། རིམ་རྩིས་བྱས་ན་མི་ཐེངས་15000ལྷག་ཙམ་ལ་འོས་འགན་སྨན་བཅོས་བྱས་པ་དང་རིན་མེད་ངང་མིག་ཤེལ་1000ལྷག་ཙམ་སྒྲིག་སྦྱོར་བྱས་པ་རེད།